Niadtong Abril 1832, si Propeta Joseph Smith ug ang uban mibiyahe ngadto sa Independence, Missouri, misunod sa sugo sa Ginoo sa pag-establisar og organisasyon aron sa pagtukod sa Zion ug sa pag-atiman sa mga kabus (tan-awa sa D&P 78, lakip ang pasiuna sa seksyon). Sa pagka-Abril 26, ang Propeta nakadawat sa pinadayag nga narekord diha sa Doktrina ug mga Pakigsaad 82 atol sa usa ka konseho sa mga high priest ug mga elder sa Simbahan sa Independence. Niini nga pagpadayag ang Ginoo mipasaylo sa mga kaigsoonan sa ilang mga kalapasan ug mipasidaan kanila sa paglikay sa dugang nga mga sala. Ang Ginoo mitudlo usab niini nga mga kaigsoonan kon unsaon sa pagdumala sa temporal nga mga kalihokan sa Zion. Paglabay sa upat ka adlaw, si Joseph Smith nakadawat sa pinadayag nga narekord diha sa Doktrina ug mga Pakigsaad 83, diin ang Ginoo mitudlo sa mga lider sa Simbahan kon unsaon sa pag-atiman sa mga biyuda ug mga ilo.
Ang Ginoo mipasidaan niadtong kinsa daghan og nadawat gikan Kaniya
Sa dili pa magklase, pagpundok og pipila ka dagko nga mga piraso sa papel ug mga marker. (Unya sa leksyon, ang mga estudyante mogamit niini aron sa paghimo og mga lista nga mahimong i-display aron makita sa tibuok klase.)
Sugdi ang leksyon pinaagi sa paghangyo sa mga estudyante sa paghunahuna og higayon nga nagkasumpaki sila sa usa ka higala o sakop sa pamilya nga nasulbad ra sa kaulahian.
Unsay inyong gibati sa dihang nasulbad ang inyong panagsumpaki?
Pahibaloa ang mga estudyante nga sulod sa pipila ka bulan adunay ngil-ad nga mga pagbati tali ni Sidney Rigdon sa Ohio ug Bishop Edward Partridge sa Missouri. Niadtong Abril 1832, si Propeta Joseph Smith ug ang ubang mga lider sa Simbahan mibiyahe ngadto sa Missouri sa pagsunod sa sugo sa Ginoo nga sila “molingkod diha sa konseho uban sa mga santos nga anaa sa Zion” (D&P 78:9). Sa ilang pag-abut, usa ka konseho sa mga high priest sa Simbahan ang gipahigayon. Tali sa buntag ug hapon nga mga sesyon sa komperensya, gisulbad ni Sidney Rigdon ug Edward Partridge ang ilang mga panagsumpaki. Ang pinadayag sa Doktrina ug mga Pakigsaad 82 nadawat atol sa sesyon sa hapon.
Dapita ang usa ka estudyante sa pagbasa og kusog sa Doktrina ug mga Pakigsaad 82:1. Hangyoa ang klase sa pagsunod ug sa pagpangita kon unsay gisulti sa Ginoo kang Sidney Rigdon ug Edward Partridge mahitungod sa pagsulbad sa ilang panagsumpaki.
Sumala sa bersikulo 1, unsa ang relasyon tali sa pagpasaylo sa uban ug sa pagdawat sa kapasayloan sa Ginoo?
Dapita ang usa ka estudyante sa pagbasa og kusog sa Doktrina ug mga Pakigsaad 82:2, ug hangyoa ang klase sa pagpangita sa pasidaan nga gihatag sa Ginoo ngadto sa mga Santos.
Unsa ang gisulti sa Ginoo nga modangat niadtong kinsa wala “[molikay sa] pagpakasala”?
Aron matabangan ang mga estudyante nga makasabut sa ubang mga sala nga mahimong maoy gipasabut sa Ginoo, ipasabut nga samtang ang mga miyembro sa Simbahan mibalhin ngadto sa Missouri, daghan kanila ang napakyas sa pagsunod sa tambag sa mga lider sa Simbahan ug ang uban midumili sa pagsunod sa balaod sa pagpahinungod. Isip resulta, ang uban niini nga mga miyembro sa Simbahan sad-an sa pagkasina, pagkamaibugon, ug sa pagpasagad sa katungdanan.
Hangyoa ang usa ka estudyante sa pagbasa og kusog sa Doktrina ug mga Pakigsaad 82:3–4. Dapita ang klase sa pagsunod ug sa pagpangita og rason nganong ang mga paghukom nga gihisgutan diha sa bersikulo 2 moabut niadtong nagpadayon diha sa sala.
Sa unsang mga paagi kini nga mga Santos gikonsiderar isip mga tawo nga nakadawat sa “labaw nga dako nga kahayag”?
Unsa ang gitudlo sa Ginoo niini nga mga bersikulo mahitungod sa atong pagkamay tulubagon alang sa unsay Iyang gihatag kanato? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga baruganan: Ang Ginoo daghan og gikinahanglan niadtong kinsa gihatagan Niya og daghan. Mahimo nimong isugyot nga markahan sa mga estudyante kini nga baruganan diha sa ilang mga kasulatan.)
Ngano kaha nga kadtong daghan og nadawat gikan sa Ginoo daghan usab og gikinahanglan kanila?
Bahina ang mga estudyante ngadto sa gagmay nga mga grupo. Hatagi ang matag grupo og usa ka dakong piraso sa papel ug usa ka marker. Dapita sila sa paglista og daghang mga panalangin nga ilang nadawat gikan sa Ginoo kutob sa ilang mahimo sulod sa duha ka minuto. Awhaga sila sa paglakip sa mga panalangin nga miabut kanila isip mga miyembro sa Simbahan. Kon mahuman na sila, i-display ang mga lista diha sa atubangan sa klase ug ipangutana ang mosunod:
Ngano kaha nga makonsiderar kita isip mga tawo “ngadto kinsa daghan ang gihatag”?
Tungod kay ang Ginoo daghan kaayo og gihatag kanato, unsa ang pipila ka mga butang nga Iyang gikinahanglan kanato?
Aron matabangan ang mga estudyante nga magamit ang baruganan gikan sa bersikulo 3, hangyoa sila sa pagsulat diha sa ilang mga class notebook o mga scripture study journal og usa sa mga panalangin nga ilang nadawat gikan sa Ginoo. Sunod, hangyoa sila sa pagsulat unsay ilang gibati nga gipaabut sa Ginoo nga ilang buhaton tungod kay sila nakadawat niana nga panalangin. Sa katapusan, dapita sila sa pagsulat og tumong kon unsay ilang sugdan sa pagbuhat aron sa pagtuman niana nga ekspektasyon.
I-summarize ang Doktrina ug mga Pakigsaad 82:5–6 pinaagi sa pagpasabut nga ang Ginoo mipasidaan sa mga Santos nga ang kamandoan ug gahum ni Satanas sa tibuok yuta nagkadaghan. Dapita ang usa ka estudyante sa pagbasa og kusog sa Doktrina ug mga Pakigsaad 82:7, ug dapita ang klase sa pagpangita sa dugang nga pasidaan nga gihatag sa Ginoo mahitungod sa sala.
Sumala sa bersikulo 7, nganong importante man alang niadtong naghinulsol sa pagbiya sa sala? (Kon tuyo kitang mobiya gikan sa pagkamatarung ngadto sa pagpakasala, ang atong “kanhi nga mga sala mobalik.”)
Ngano kaha nga ang atong kanhi nga mga sala mobalik kon kita tuyo nga magpakasala human mangayo og kapasayloan sa Ginoo? (Tabangi ang mga estudyante nga makasabut nga aron hingpit nga maghinulsol ug mapasaylo, kinahanglan gayud kitang mosalikway sa atong mga sala.)
Ang Ginoo misugo sa siyam ka mga tawo sa pagtukod og usa ka kompaniya sa pagdumala sa temporal nga mga kalihokan sa Simbahan
Ipares-pares ang mga estudyante. Hangyoa ang matag parisan sa paghunahuna og duha ka sitwasyon diin ang usa ka batan-ong lalaki o babaye tingali magkinahanglan og kasiguroan nga ang Dios motuman sa Iyang mga saad. (Sama pananglit, ang usa ka batan-ong babaye adunay suod nga relasyon ngadto sa iyang lola kinsa nag-antus og sakit nga makamatay. Kining batan-ong babaye mahimong magkinahanglan og kasiguroan mahitungod sa mga saad sa mahangturong mga pamilya ug Pagkabanhaw.) Hangyoa ang mga estudyante sa pagpaambit og pipila sa ilang mga sitwasyon diha sa klase.
Ipasabut nga atol sa konseho sa mga high priest sa Missouri, ang Ginoo mihatag og makapaniguro nga saad niadtong nagsunod sa Iyang mga sugo. Awhaga ang mga estudyante sa pagpangita og mga kamatuoran nga makahatag og kasiguroan niadtong anaa sa mga sitwasyon nga ilang gihisgutan samtang padayon sila nga nagtuon sa Doktrina ug mga Pakigsaad 82.
Hangyoa ang mga estudyante nga hilum nga mobasa sa Doktrina ug mga Pakigsaad 82:8–9 ug mangita sa unsay gisulti sa Ginoo nga Iyang ihatag sa mga Santos atol niini nga konseho.
Sumala sa bersikulo 8, unsa ang gisulti sa Ginoo nga Iyang ihatag niadtong nanagpundok niini nga konseho?
Gikan sa unsay inyong nabasa diha sa mga bersikulo 8–9, unsa man ang Iyang mga rason sa paghatag kanila niining bag-o nga sugo? (Isulat ang mga tubag sa mga estudyante diha sa pisara.)
Sa unsang paagi kini nga mga rason magamit sa matag sugo nga gihatag sa Ginoo kanato?
Dapita ang usa ka estudyante sa pagbasa og kusog sa Doktrina ug mga Pakigsaad 121:34. Hangyoa ang klase sa pagsunod ug sa pagpangita og baruganan nga makahatag kanato og pagsalig samtang maningkamot kita sa pagsunod sa mga sugo sa Ginoo.
Unsa nga baruganan ang inyong nakit-an nga makahatag kaninyo og pagsalig samtang maningkamot kamo sa pagsunod sa Ginoo? (Ang mga estudyante mahimong mogamit og lahi nga mga pulong, apan ang ilang mga tubag kinahanglang magpakita sa mosunod nga baruganan: Kon mosunod kita sa Ginoo, kanunay Siyang motuman sa Iyang mga saad sa pagpanalangin kanato.)
Dapita ang mga estudyante sa pagpamalandong og mga kasinatian nga ilang nasinati nga nagpakita kanila nga tinuod kini nga baruganan. Hatagi sila og panahon sa pagsulat sa usa niini nga mga kasinatian diha sa ilang mga class notebook o scripture study journal. Dapita ang pipila ka mga estudyante sa pagpakigbahin sa ilang mga kasinatian uban sa klase. Mahimo ka usab nga mopaambit og kasinatian gikan sa imong kinabuhi nga nagmatuod niini nga baruganan.
Pahinumdumi ang mga estudyante nga sa dihang gitun-an nila ang Doktrina ug mga Pakigsaad 78 nakakat-on sila nga gisugo sa Ginoo ang mga lider sa Simbahan sa Kirtland, Ohio, sa pagtukod og kompaniya nga maoy modumala sa mga balay tipiganan ug mga paningkamot sa publikasyon sa Simbahan. I-summarize ang Doktrina ug mga Pakigsaad 82:11, 15–17 pinaagi sa pagpahibalo sa mga estudyante nga niini nga pagpadayag ang Ginoo midirekta sa aktwal nga pag-organisar sa kompaniya—nailhan isip ang United Firm—ug mitudlo sa mga sakop niini.
Dapita ang mga estudyante nga hilum nga mobasa sa Doktrina ug mga Pakigsaad 82:12 ug mangita sa katuyoan sa United Firm. Samtang magbasa sila, makatabang tingali ang pagpahinumdom kanila nga usa sa mga katungdanan sa bishop mao ang pagtabang sa temporal nga mga panginahanglan sa mga miyembro sa Simbahan.
Sumala sa bersikulo 12, unsa ang katuyoan sa United Firm?
Dapita ang mga estudyante nga hilum nga mobasa sa Doktrina ug mga Pakigsaad 82:14, 18–19, nga mangita sa mga pulong nga dugang nagpasabut nganong misugo ang Ginoo sa pagtukod sa United Firm.
Nganong importante man alang sa mga Santos nga makapalambo sa panglantaw nga gipasabut diha sa bersikulo 19?
I-summarize ang Doktrina ug mga Pakigsaad 82:20–24 pinaagi sa pagpasabut nga gitapos sa Ginoo kini nga pagpadayag pinaagi sa pagpasidaan sa mga lider sa Simbahan nga magmatinud-anon sa pakigsaad nga ilang himoon isip mga sakop sa United Firm.
Ang Ginoo mipadayag kon unsaon pag-atiman sa mga biyuda ug mga ilo
Pahibaloa ang mga estudyante nga upat ka adlaw human madawat ang pinadayag nga narekord diha sa Doktrina ug mga Pakigsaad 82, si Propeta Joseph Smith nakadawat og pagpadayag kon unsaon sa pagtubag ang lisud nga hagit sa pag-atiman sa temporal nga mga panginahanglan sa mga Santos. Dapita ang mga estudyante nga hilum nga mobasa sa Doktrina ug mga Pakigsaad 83:1 ug mangita kon kang kinsang mga panginahanglan ang gihisgutan niini nga pagpadayag.
Kang kinsang mga panginahanglan ang gihisgutan niini nga pagpadayag?
Pahinumdumi ang mga estudyante nga daghan sa mga Santos ang nagsunod sa balaod sa pagpahinungod ug nakadawat og usa ka “kabilin”, o kabtangan gikan sa Simbahan. Niini nga pagpadayag ang Ginoo mipadayag kon unsa ang mahitabo sa kabilin sa pamilya kon ang bana o amahan mamatay.
Dapita ang mga estudyante nga hilum nga mobasa sa Doktrina ug mga Pakigsaad 83:2–3 ug mangita sa instruksyon sa Ginoo mahitungod sa pag-atiman sa mga babaye nga nawad-an sa ilang mga bana.
Kon ang tawo mamatay ug ang iyang asawa nagpabilin nga matinud-anon, unsa nga panalangin ang iyang nadawat?
Ipasabut nga sa panahon nga gihatag kini nga pagpadayag, kadaghanan sa mga babaye nagsalig sa ilang mga bana alang sa ilang temporal nga suporta. Ang “makaangkon og panagdait diha sa simbahan” nagpasabut nga, tungod kay nawala na ang tigsangkap sa asawa, ang Simbahan motabang kaniya samtang iyang giako ang tahas nga bugtong tigsangkap. Dapita ang usa ka estudyante sa pagbasa og kusog sa Doktrina ug mga Pakigsaad 83:4–6. Hangyoa ang klase sa pagsunod, nga mangita kon sa unsang paagi ang Simbahan makatabang sa mga ilo ug mga biyuda.
Unsa ang gitudlo niini nga mga bersikulo kaninyo kon unsa ang gibati sa Ginoo mahitungod sa mga biyuda, mga ilo, ug niadtong tanan nga nanginahanglan?
Awhaga ang mga estudyante nga mas magmatngon sa mga panginahanglan niadtong naglibut kanila ug mangita og mga paagi nga magamit ang tambag sa Ginoo sa pagtinguha sa kaayohan sa ilang mga silingan (tan-awa sa D&P 82:19). Sumala sa paggiya sa Espiritu, tapusa pinaagi sa pagpaambit sa imong pagpamatuod sa mga kamatuoran nga gitudlo niini nga mga pinadayag.
Si Elder Richard G. Scott sa Korum sa Napulog Duha ka mga Apostoles mitudlo:
Imahe
Elder Richard G. Scott
“Ang pagbiya sa sala … usa ka dili matarug, permanenting desisyon nga dili mousab sa kalapasan. Pinaagi sa pagsunod niini nga pasalig, ang pait nga matagamtam niana nga sala dili kinahanglan nga usbon sa pagsinati. Hinumdumi: ‘Apan ngadto niana nga kalag kinsa nagpakasala ang kanhi nga mga sala mobalik’ [D&P 82:7]. Si Joseph Smith mipahayag: ‘Ang paghinulsol usa ka butang nga dili kayama-yamaan sa matag adlaw. Ang matag adlaw nga kalapasan ug matag adlaw nga paghinulsol dili … makapahimuot sa panan-aw sa Dios’ [Teachings of the Prophet Joseph Smith, sel. Joseph Fielding Smith [1976], 148]” (“Finding Forgiveness,” Ensign, Mayo 1995, 76).
Sa nag-unang mga edisyon sa Doktrina ug mga Pakigsaad, ang mga pseudonym, o dili tinuod nga mga ngalan, gigamit aron sa pagpanalipod sa Simbahan ug sa mga lider sa Simbahan gikan sa mga kaaway. Kini nga buhat gigamit sa mga ngalan sa mga sakop sa United Firm diha sa Doktrina ug mga Pakigsaad 82:11. Sa ingon, sa pipila ka nag-una nga mga edisyon sa Doktrina ug mga Pakigsaad, ang mga pseudonym tingali makita diha sa teksto nga karon naglangkob niini nga bersikulo. Ang tinuod nga mga ngalan gibalik sa ulahi nga mga edisyon.
Ang “mga pagkatinugyanan” o mga responsibilidad sa mga miyembro nga gihisgutan diha sa bersikulo 11 mao ang mosunod: ang unom sa siyam natudlo nga “mga tinugyanan sa mga pagpadayag ug sa mga sugo” (D&P 70:3—si Propeta Joseph Smith, Martin Harris, Oliver Cowdery, John Whitmer, Sidney Rigdon, ug William W. Phelps), ang duha mga bishop sa Simbahan (si Edward Partridge ug Newel K. Whitney), ug ang usa mao ang tinugyanan sa balay tipiganan sa Independence, Missouri (A. Sidney Gilbert).
Ang mosunod nga pamahayag naghulagway kon sa unsang paagi ang Ginoo naggamit sa Iyang mga balay tipiganan karon:
“Ang balay tipiganan sa Ginoo … tingali usa ka lista sa serbisyo nga anaa, kwarta diha sa banko, pagkaon nga anaa sa kusina, o mga kagamitan diha sa building. Ang balay tipiganan ma-establisar sa higayon nga ang matinud-anon nga mga miyembro mohatag ngadto sa bishop sa ilang mga panahon, mga talento, mga kahanas, kalooy, mga materyal, ug tabang pinansyal sa pag-amuma sa mga kabus ug sa pagtukod sa gingharian sa Dios dinhi sa yuta.
“Mao nga, ang balay tipiganan sa Ginoo anaa sa matag ward. Ang bishop mao ang tigdumala sa balay tipiganan sa Ginoo. Giniyahan sa inspirasyon sa Ginoo, siya moapud-apod ngadto sa mga kabus ug timawa sa mga halad sa mga Santos. Tabangan siya sa mga korum sa priesthood ug sa Relief Society” (Providing in the Lord’s Way: A Leader’s Guide to Welfare [1990], 11; tan-awa usab sa LDS.org).
Ang pulong nga mammon [adunahan] nagpasabut sa mga katigayunan (Giya ngadto sa mga Kasulatan, “Mammon,” scriptures.lds.org). Si Presidente Joseph Fielding Smith mipasabut:
Imahe
President Joseph Fielding Smith
“Ang sugo sa Ginoo nga ang mga santos kinahanglang ‘[ma]kighigala sa [ilang] mga kaugalingon uban sa adunahan sa pagkadili matarung,’ ingon og usa ka pamahayag nga daw lisud dawaton kon dili masabtan og maayo. Dili tuyo nga sa pakighigala sa mga ‘adunahan sa pagkadili matarung’ nga ang mga kaigsoonan makig-ambit kanila sa ilang mga sala; modawat kanila diha sa ilang mga dughan, makigminyo kanila ug kon dili makigsama kanila. Sila kinahanglang magpakabuhi nga ang kalinaw uban sa ilang mga kaaway masiguro. Sila kinahanglang motagad nila nga mabination, magmahigalaon ngadto kanila kutob sa mahimo subay sa sakto ug mahiyason nga mga baruganan, apan dili gayud mamalikas uban kanila o makig-inom ug makighugoy-hugoy uban kanila. Kon ilang mapaminosan ang pagkamapihigon ug magpakita og kaandam nga makigsabut ug magpakita og mabination nga espiritu, tingali kini makatabang sa pagpabiya kanila gikan sa ilang mga kalagot. Ang paghukom kinahanglang isalig sa Ginoo” (Church History and Modern Revelation, 2 vols. [1953], 1:323; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 179.)