Niadtong Hulyo 23, 1837, si Propeta Joseph Smith nakadawat og pagpadayag alang ni Thomas B. Marsh, kinsa mao ang Presidente sa Korum sa Napulog Duha ka mga Apostoles. Niini nga pagpadayag, nga narekord sa Doktrina ug mga Pakigsaad 112, ang Ginoo mihatag og tambag kabahin sa mga responsibilidad sa Korum sa Napulog Duha ka mga Apostoles.
Ang Ginoo mihatag og tambag ug misaad og mga panalangin ngadto ni Thomas B. Marsh
Isulat ang mosunod nga mga pulong diha sa pisara: nasuko, nahigawad, nasilo, nasina. Dapita ang mga estudyante sa paghunahuna sa mga panahon sa dihang nakasinati sila niini nga mga pagbati.
Dapita ang usa ka estudyante sa pagbasa sa mosunod nga pamahayag. Hangyoa ang klase sa pagpaminaw sa sitwasyon nga giatubang ni Thomas B. Marsh nga maoy nakaingon nga siya nakasinati sa mga pagbati nga gisulat diha sa pisara.
Sa wala madugay sa pagkatawag ni Thomas B. Marsh nga mahimong Apostol niadtong 1835, gitudlo siya nga Presidente sa Korum sa Napulog Duha ka mga Apostoles. Sa tingpamulak niadtong 1837, si Presidente Marsh nakahibalo nga usa sa Napulog Duha ka mga Apostoles, nga si Elder Parley P. Pratt, nagplano nga magmisyon ngadto sa England nga walay direksyon ni Presidente Marsh. Si Presidente Marsh, kinsa didto sa Missouri, misulat ngadto ni Elder Pratt ug sa ubang mga sakop sa Napulog Duha ug midapit kanila nga magmiting kaniya didto sa Kirtland, Ohio, niadtong Hulyo 24, 1837, aron sila magkahiusa sa ilang mga plano alang sa mga misyon. Bisan pa niana, usa ka bulan sa wala pa ang miting, laing duha ka sakop sa Napulog Duha, sila si Elder Heber C. Kimball ug Orson Hyde, mibiya padulong sa England human makadawat og tawag sa misyon gikan ni Propeta Joseph Smith. Si Presidente Marsh klaro nga naglagot nga ang mga sakop sa Napulog Duha misangyaw sa ebanghelyo didto sa England nga wala siya pahibaloa.
Niini nga sitwasyon, unsay mahimo ni Presidente Marsh aron malikayan ang mga pagbati nga nalista sa pisara? Unsa ang pipila ka mga kakuyaw sa pagtugot sa maong mga pagbati sa pagdumala sa atong mga hunahuna ug mga aksyon?
Ipasabut nga si Presidente Marsh misulti sa iyang reklamo ngadto ni Propeta Joseph Smith ug nangayo sa iyang tambag. Agig tubag, mihatag ang Ginoo sa pagpadayag nga narekord sa Doktrina ug mga Pakigsaad 112.
Dapita ang usa ka estudyante sa pagbasa og kusog sa Doktrina ug mga Pakigsaad 112:1–3. Hangyoa ang katunga sa klase sa pagpangita sa mga pasidaan nga gihatag sa Ginoo ngadto ni Presidente Thomas B. Marsh. Hangyoa ang laing katunga sa pagpangita sa maayong mga butang nga gisulti sa Ginoo nga nabuhat ni Presidente Marsh. (Sa dili pa mobasa ang mga estudyante, mahimo nimong ipasabut nga ang pulong nga pagpaubos sa bersikulo 3 nagpakita nga si Presidente Marsh nagpaubos sa iyang kaugalingon.)
Unsa nga mga pasidaan ang gihatag sa Ginoo ngadto ni Thomas B. Marsh?
Unsa ang maayong mga buhat ang gisulti sa Ginoo nga nahimo ni Presidente Marsh?
Ipasabut nga ang Ginoo mihatag og dugang nga tambag ngadto ni Presidente Marsh ug mipadayag og pipila ka mga panalangin nga madawat ni Presidente Marsh tungod sa iyang pagkamatinud-anon. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 112:4–10. Hangyoa ang klase sa pagsunod ug mangita sa mga saad nga gihatag sa Ginoo ngadto ni Thomas B. Marsh. Ikonsiderar ang pagdapit og usa ka estudyante sa pagsulat sa mga saad diha sa pisara kon makita na sa mga estudyante.
Unsaon ninyo sa pagsulti pag-usab sa tambag sa Ginoo sa bersikulo 10 sa inyong kaugalingong mga pulong? (Ang mga estudyante mahimong mogamit og lain-laing mga pulong, apan kinahanglang makit-an nila ang mosunod nga baruganan: Kon mapainubsanon kita, ang Ginoo mogiya nato ug mohatag nato og mga tubag sa atong mga pag-ampo.)
Ngano sa inyong hunahuna nga ang pagkamapainubsanon makatabang nato nga makadawat sa direksyon sa Ginoo?
Kanus-a kamo mibati nga gigiyahan sa Ginoo human kamo nagpaubos?
Ipasabut nga niadtong Hulyo 1837, sa dihang ang Ginoo mihatag niini nga pagpadayag, ang Simbahan nakasinati og pagkawalay panaghiusa, panagbingkil, ug apostasiya. Garbo ug kahakog maoy nakaingon nga ang ubang mga miyembro sa Simbahan dayag nga misaway ni Propeta Joseph Smith ug mikwestyon sa iyang awtoridad. Pipila ka mga miyembro sa Simbahan, lakip sa pipila sa Korum sa Napulog Duha ka mga Apostoles, nagtinguha gani sa pagtang-tang ni Joseph Smith isip Presidente sa Simbahan.
Dapita ang usa ka estudyante sa pagbasa og kusog sa Doktrina ug mga Pakigsaad 112:11–13. Hangyoa ang klase sa pagsunod, nga mangita unsay gisugo sa Ginoo ni Presidente Marsh aron sa pagtabang sa mga sakop sa Korum sa Napulog Duha kinsa nakigbisog. Hangyoa ang mga estudyante sa pag-report kon unsay ilang makit-an.
Ang Ginoo mitudlo ni Thomas B. Marsh mahitungod sa mga katungdanan sa Napulog Duha ka mga Apostoles
Ipasabut nga ang Ginoo mihatag ni Presidente Thomas B. Marsh og daghang importante nga mga responsibilidad. Isulat sa pisara ang mosunod nga pangutana: Unsay makatabang ninyo nga magpaubos kon kamo makadawat og importante nga mga responsibilidad o pagtamud? Dapita ang mga estudyante sa pagpamalandong niini nga pangutana.
Ipasabut nga ang Ginoo mitabang ni Thomas B. Marsh nga makaila sa kaimportante sa iyang mga responsibilidad isip Presidente sa Korum sa Napulog Duha ka mga Apostoles samtang nagpadayon sa pagpahinumdom niya nga magpaubos. Kopyaha ang mosunod nga tsart diha sa pisara o andama kini nga usa ka handout. Hangyoa ang mga estudyante sa pagbasa sa gitudlo nga mga bersikulo ug kompletuha ang tsart nga magpares-pares (o kompletuha kini isip usa ka klase).
Mga pulong nga naghatag og gibug-aton sa kaimportante sa mga responsibilidad ni Presidente Marsh ug sa Korum sa Napulog Duha ka mga Apostoles
Mga pulong nga nagpahinumdom ni Presidente Marsh ug sa Korum sa Napulog Duha ka mga Apostoles sa panginahanglan nga magpaubos
Human ang mga estudyante dunay igong panahon sa pagkompleto sa tsart, ipangutana ang mosunod nga mga pangutana:
Unsa nga mga pulong ang inyong nakit-an nga naghatag og gibug-aton sa kaimportante sa mga responsibilidad ni Presidente Marsh?
Sumala sa mga bersikulo 16–17, unsa nga mga yawe ang gihuptan sa Presidente sa Korum sa Napulog Duha ka mga Apostoles? (Ang mga estudyante mahimong mogamit og lain-laing mga pulong, apan kinahanglan nga ilang makit-an ang mosunod nga kamatuoran: Ang Presidente sa Korum sa Napulog Duha ka mga Apostoles naghupot sa mga yawe sa paggiya sa buhat sa Napulog Duha sa pagsangyaw sa ebanghelyo ngadto sa tanang mga nasud.)
Sumala sa bersikulo 30–32, unsa ang gitudlo sa Ginoo ni Thomas B. Marsh mahitungod sa mga yawe sa priesthood nga iyang gihuptan? (Ang mga estudyante mahimong mangita og lain-laing mga baruganan, apan siguroa nga sila makakita sa mosunod nga kamatuoran: Ang mga yawe sa priesthood gipahiuli sa katapusang higayon sa dispensasyon sa kahingpitan sa mga panahon. Mahimo nimong ribyuhon sa makadiyot ang kahulugan sa pulong dispensasyon [tan-awa sa Bible Dictionary, “Dispensation”].)
Unsa nga mga pulong ang inyong nakit-an nga nagpahinumdom ni Thomas B. Marsh nga magpaubos?
Unsa ang gitudlo sa mga pulong sa Ginoo sa mga bersikulo 15 ug 30 mahitungod sa relasyon tali sa mga responsibilidad ni Thomas B. Marsh isip Presidente sa Korum sa Napulog Duha ug sa mga responsibilidad ni Joseph Smith isip Presidente sa Simbahan?
Aron matabangan ang mga estudyante nga makakita nga si Thomas B. Marsh nakigbisog sa pagsunod sa tambag nga iyang nadawat niini nga pagpadayag, dapita ang usa ka estudyante sa pagbasa sa mosunod nga paragraph:
Dili pa dugay human ang pagpadayag sa Doktrina ug mga Pakigsaad 112 gihatag, gisultihan ni Thomas B. Marsh si Vilate Kimball nga iyang bana, si Elder Heber C. Kimball, dili mahimong epektibo sa iyang misyon didto sa England. Si Presidente Marsh klaro nga mibati nga tungod kay ang pagsangyaw sa ebanghelyo sa laing dapit iyang responsibilidad, ang pultahan sa misyonaryo nga buhat sa England dili maablihan hangtud nga siya mopadala og usa ka tawo o siya ang moadto.
Sa unsa nga paagi kini nga insidente naghulagway nga si Presidente Marsh naglisud nga magpabilin nga mapainubsanon?
Baliki ang pangutana nga imong gisulat diha sa pisara. Dapita ang mga estudyante sa pagtubag sa pangutana. Isip kabahin niini nga panaghisgutan, ikonsiderar ang paggamit sa mosunod nga pamahayag ni Presidente Dieter F. Uchtdorf sa Unang Kapangulohan:
Imahe
President Dieter F. Uchtdorf
“Dili nato madiskubrihan ang pagpaubos pinaagi sa dili kaayo paghunahuna sa kaugalingon; atong madiskubrehan ang pagpaubos pinaagi sa dili kaayo paghunahuna kabahin sa atong kaugalingon. Moabut kini samtang magbuhat kita sa atong buluhaton uban sa kinaiya sa pagserbisyo sa Dios ug sa atong isigkatawo.
“… Sa higayon nga mohunong kita sa pagpasulabi sa kaugalingon ug kalimtan ang kaugalingon alang sa pagserbisyo, ang atong garbo mominus ug anam-anam nga mamatay” (“Garbo ug Priesthood,”Liahona, Nob. 2010, 58).
Pahinumdumi ang mga estudyante sa mga panalangin nga gisaad sa Ginoo ngadto ni Presidente Marsh (tan-awa sa D&P 112:4–10). Mahimong imo na kining gipalista sa usa ka estudyante kini nga mga panalangin diha sa pisara sa sayo pa. Dapita ang usa ka estudyante sa pagbasa og kusog sa Doktrina ug mga Pakigsaad 112:34. Hangyoa ang klase sa pagsunod ug pagpangita unsay angay nga buhaton ni Presidente Marsh aron madawat kini nga mga panalangin. Hangyoa ang mga estudyante sa pag-report kon unsay ilang makit-an. Isulat ang mosunod nga baruganan sa pisara: Kinahanglang magmatinud-anon kita aron makadawat sa mga panalangin nga gisaad sa Ginoo.
Aron matabangan ang mga estudyante nga makasabut niini nga baruganan, basaha o i-summarize ang mosunod nga istorya sa pagsupil ug pagbalik ni Thomas B. Marsh ngadto sa Simbahan:
Sa makadiyot, misunod ni Presidente Marsh sa tambag nga iyang nadawat. Nagtrabaho siya sa paglig-on sa Simbahan ug nagpaluyo ni Joseph Smith. Bisan pa niana, sa wala madugay mibalik siya sa iyang mabingkilon nga mga pagbati mahitungod sa paagi nga gigiyahan ang Simbahan. Kini nga mga pagbati inubanan sa mga kabalaka mahitungod sa mga panagbangi tali sa mga masinupakon ug agresibo nga mga miyembro sa Simbahan ug sa ilang mga silingan sa Missouri. Niadtong Septyembre 1838, samtang siya gisamok niining espiritu sa apostasiya, ang iyang asawa, nga si Elizabeth, nakakita og lalis. Siya ug laing babaye, mga miyembro sa Simbahan, nagkauyon nga magbinayloay og gatas aron dunay igo sa paghimo og keso, apan si Sister Marsh giakusar nga wala motuman sa iyang sabut pinaagi sa pagtago sa parte sa gatas nga daghan og cream. Ang hitabo gipaabut ngadto sa mga lider sa Simbahan sa makadaghan. Gidala gani kini ngadto sa atubangan sa Unang Kapangulohan. Sa matag higayon, kini gihukman nga si Sister Marsh maoy sayop. Si Presidente Marsh nasuko ug wala matagbaw niini nga mga desisyon (tan-awa sa George A. Smith, “Discourse,” Deseret News, Abr. 16, 1856, 44). Samtang kini nga sitwasyon wala makaaghat niya sa pagbiya sa Simbahan, kini nakadugang sa iyang ubang mga kahigawad. Nahimo siyang mas kritikal sa ubang mga lider sa Simbahan, ug sa katapusan mibatok na siya sa mga Santos. Dayon siya nakahinumdom, “Nasina ako sa Propeta … ug wala na magtagad sa tanan nga matarung, ug migahin sa akong tanang panahon sa pagpangita sa dautan” (“Remarks,” Deseret News, Sept. 16, 1857, 220).
Niadtong Oktubre 1838, si Thomas B. Marsh nanumpa atubangan sa mga mahistrado nga si Joseph Smith ug ang mga Santos sa Ulahing mga Adlaw kaaway sa estado sa Missouri. Kini nga affidavit nakasalmot sa gobyerno sa pag-isyu og extermination order nga miresulta sa pagpapahawa sa sobra sa 15,000 ka mga Santos gikan sa ilang mga panimalay sa Missouri.
Dise otso ka tuig human si Thomas B. Marsh mibiya sa Simbahan, mapainubsanon siya misulat ngadto ni Presidente Heber C. Kimball sa Unang Kapangulohan, nangayo og pasaylo ug pagtugot nga mobalik sa Simbahan. Mipasabut siya kon unsay iyang nakat-unan tungod sa iyang mga sayop: “Ang Ginoo makahimo ra bisan unsa nga wala ko ug walay nawala Kaniya tungod sa akong pagbiya; Apan pagkadako sa nawala kanako?!” (Thomas B. Marsh letter to Heber C. Kimball, Mayo 5, 1857, Brigham Young Collection, Church History Library, kinutlo sa Kay Darowski, “The Faith and Fall of Thomas Marsh,” Revelations in Context, history.lds.org).
I-refer ang baruganan diha sa pisara. Ipasabut nga si Thomas B. Marsh gidawat pag-usab ngadto sa hingpit nga pakigdait sa Simbahan. Hinoon, tungod kay wala siya mosunod sa tambag sa Ginoo nga magpaubos sa iyang kaugalingon ug magmatinud-anon isip Presidente sa Korum sa Napulog Duha, wala niya madawat ang mga panalangin nga gilista diha sa Doktrina ug mga Pakigsaad 112:4–10.
Hangyoa ang pipila ka mga estudyante sa pag-summarize unsay ilang nakat-unan karon. Dapita ang mga estudyante sa pagpili og usa ka paagi nga sila mas magpaubos pa ug magmatinud-anon, ug pagsulat og tumong sa pagbuhat niini.
Ang matag sakop sa Unang Kapangulohan ug sa Korum sa Napulog Duha ka mga Apostoles naghupot sa mga yawe sa gingharian. Ang Presidente sa Korum sa Napulog Duha ka mga Apostoles naghupot usab sa mga yawe, o awtoridad, sa paggiya sa buhat sa Napulog Duha sa pagsangyaw sa ebanghelyo ngadto sa tanang mga nasud sa yuta (tan-awa sa D&P 112:16). Hinoon, ang Presidente sa Korum sa Napulog Duha ug ang matag Apostoles mogamit lamang sa iyang mga yawe sa priesthood ubos sa direksyon sa Presidente sa Simbahan ug sa iyang mga magtatambag diha sa Unang Kapangulohan. Sa ingon, ang Ginoo mipahimangno si Thomas B. Marsh ug sa ubang mga sakop sa Korum sa Napulog Duha ka mga Apostoles sa pag-ila sa awtoridad ni Joseph Smith sa pagdumala kanila (tan-awa sa D&P 112:15–20). Kining tigdumalang awtoridad mao nga si Joseph Smith, isip Presidente sa Simbahan, adunay awtoridad sa pagtawag og duha ka sakop sa Korum sa Napulog Duha, sila si Heber C. Kimball ug Orson Hyde, nga magmisyon ngadto sa England bisan og si Thomas B. Marsh, isip Presidente sa Korum sa Napulog Duha ka mga Apsotoles, naghupot sa mga yawe sa paggiya sa buhat sa Napulog Duha sa pagsangyaw sa ebanghelyo.