Sa 1838 gisugdan ni Joseph Smith pagtrabaho ang iyang opisyal nga kasaysayan. Diha niini gilarawan niya ang iyang pamilya ug ang mga dapit nga ilang napuy-an. Gidetalye usab niya ang dili sagad nga kaguliyang mahitungod sa relihiyon nga midagsang sa kasadpang New york sa 1820. Kining relihiyosong kainit migiya kaniya ngadto sa “mahinungdanong pamalandong ug dako nga kabalisa”mahitungod kon haing simbahan magpasakop (Joseph Smith—Kasaysayan 1:8). Human siksika ang mga kasulatan, ilabi na ang Santiago 1:5, mihukom si Joseph sa pagpangutana sa Dios diha sa pag-ampo alang sa tubag niini nga mga pangutana. Agig tubag sa iyang pag-ampo, ang Dios Amahan ug ang Iyang Anak, nga si Jesukristo, mipakita kaniya.
Nagsulat si Joseph Smith og usa ka kasaysayan sa Simbahan
Hangyoa ang usa ka estudyante sa pagbasa og kusog sa mosunod nga kasinatian sa duha ka mga misyonaryo sa Canada, ingon nga gireport ni Presidente Thomas S. Monson (ang sumpay sa istorya moabut sa dili madugay diha sa leksyon):
Imahe
President Thomas S. Monson
“Duha ka [mga misyonaryo] gitawag ngadto sa panimalay ni Mr. Elmer Pollard. … Gipresentar nila ang ilang mensahe ug nangutana kon siya ba moduyog sa pag-ampo. Miuyon siya, sa kondisyon nga siya ang mag-ampo.
“Ang pag-ampo nga iyang gihatag nakapahingangha sa mga misyonaryo. Miingon siya, ‘Langitnong Amahan, panalangini kining duha ka walay swerte, wala magiyahi nga mga misyonaryo, nga unta mopauli sila sa ilang mga panimalay ug dili mag-usik sa ilang panahon sa pagsulti sa katawhan sa Canada mahitungod sa usa ka mensahe nga dili gayud katuohan ug mahitungod sa butang nga gamay ra kaayo ang ilang nahibaloan.’
“Sa ilang pagbarug, giingnan ni Mr. Pollard ang mga misyonaryo nga dili na gayud mobalik pa sa iyang panimalay. Sa ilang pagbiya, mabiaybiayon siyang misulti kanila, ‘Dili man gani mo makasulti kanako nga mituo gyud mo nga si Joseph Smith usa ka propeta sa Dios!’ ug iyang gilamba ang pultahan” (“Si Propeta Joseph Smith: Magtutudlo Pinaagi sa Ehemplo,”Liahona, Nob. 2005, 69).
Kon ikaw usa niadto nga mga misyonaryo, unsa kaha ang imong isulti ngadto ni Mr. Pollard?
Unsaon sa usa ka tawo pagkahibalo alang sa ilang mga kaugalingon nga si Joseph Smith usa ka propeta sa Dios?
Dapita ang usa ka estudyante sa pagbasa og kusog sa Joseph Smith—Kasaysayan 1:1–2. Hangyoa ang klase sa pagsunod ug sa pagpangita sa mga rason nga gihatag ni Joseph Smith sa pagsulat sa iyang kasaysayan ug sa kasaysayan sa Simbahan.
Sumala sa bersikulo 1, unsa ang nagkanap taliwala sa katawhan sa panahon sa unang mga adlaw sa Simbahan? (Daghang sayop nga mga report nga gituyo aron sa pagpalihok sa katawhan batok sa Simbahan.)
Unsa nga rason ang gihatag ni Joseph sa pagsulat sa iyang kasaysayan? (Aron sa paghatag sa publiko og kasaligan ug walay sayop nga istorya sa mga hitabo sa Unang Panan-awon ug sa Pagpahiuli.)
Ipasabut nga dihay nagpadayon nga mga indibidwal ug mga grupo karon kinsa nagpakaylap og sayop o makalibug nga impormasyon mahitungod sa Simbahan nga ang katuyoan mao ang pag-among-among sa tinuohan.
Unsa ang atong makat-unan gikan sa rason ni Joseph Smith sa pagsulat sa iyang kasaysayan nga makatabang kanato sa paglikay nga malingla pinaagi sa sayop o makalibug nga impormasyon? (Kadtong kinsa sinsero nga gusto sa kamatuoran kinahanglan nga makugihong mangita og katoohan nga mga tinubdan sa impormasyon mahitungod sa Simbahan ug sa kasaysayan niini kay sa yanong modawat og bisan unsa nga impormasyon nga ilang nadunggan, lakip ang bisan unsang moabut isip resulta sa pagsiksik sa Internet.)
Nganong importante nga ang “mga nagpakisayud sa kamatuoran” mahitungod sa Pagpahiuli moadto sa istorya ni Joseph Smith? (Ang pagsalig sa istorya sa Propeta makatabang sa mga indibidwal sa paglikay nga malingla pinaagi sa sayop o makalibug nga impormasyon.)
Sa unsa nga paagi nga ang pagbasa sa kaugalingong mga pulong ni Joseph Smith makatabang sa usa ka tawo nga mahibalo sa kamatuoran mahitungod sa iyang mga kasinatian?
Ipakigbahin ang mosunod nga pahimangno gikan ni Elder Neil L. Andersen:
Imahe
Elder Neil L. Andersen
“Kanunay adunay pipila kinsa gustong modaut sa Simbahan ug moguba sa hugot nga pagtuo. Karon mogamit sila sa Internet.
“Pipila sa mga impormasyon kabahin sa Simbahan, bisan unsa pa ka mahaylohon, dili gayud tinuod” (“Pagsulay sa Inyong Hugot nga Pagtuo,”Liahona, Nob. 2012, 41).
Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Dapita ang klase sa pagpaminaw kon unsaon nato sa pagtimbang-timbang ang unsay atong nabasa mahitungod sa Simbahan ug sa kasaysayan niini. (Mahimo nimong hatagan og kopya sa pamahayag ang kada estudyante aron sila makasunod.)
Imahe
Elder Dallin H. Oaks
“Ang mga Santos sa Ulahing mga Adlaw nga mga mambabasa kinahanglang … mahimo nga… maantigo sa ilang pagtimbang-timbang sa unsay ilang gibasa. …
“Ang atong indibidwal, personal nga mga pagpamatuod gibase sa pagsaksi sa Espiritu, dili sa bisan unsang kombinasyon o napundok nga makasaysayanong mga kamatuoran. Kon lig-on kaayo ang atong pundasyon, walay kausaban sa makasaysayanong mga kamatuoran ang makauyog sa atong mga pagpamatuod. Ang atong Langitnong Amahan mihatag kanato og mga gahum sa pagpangatarungan, ug gilauman nga ato kining gamiton sa hingpit. Apan gihatag usab niya kanato ang Tighupay, kinsa iyang giingon nga mogiya kanato ngadto sa kamatuoran ug kang kinsa nga gahum kita mahimong mahibalo sa kamatuoran sa tanang mga butang. Kana mao ang katapusang giya alang sa mga Santos sa Ulahing mga Adlaw kinsa takus ug andam sa pagsalig diha niini” (“Reading Church History” [pakigpulong ngadto sa mga CES religious educator, Ago. 16, 1985], 7, LDS.org).
Dapita ang mga estudyante sa pagpakigbahin unsa ang mipatigbabaw diha kanila sa tambag ni Elder Oaks ug nganong nakatabang kini.
Mahimo nimong ipasabut nga gisulat ni Joseph Smith kini nga istorya sa Unang Panan-awon sa 1883 isip usa ka bahin sa usa ka opisyal nga kasaysayan sa Simbahan nga gimantala ngadto sa kalibutan. Adunay siyam nga nailhang mga istorya sa Unang Panan-awon—upat gisulat o gidikta ni Joseph Smith ug lima gisulat pinaagi sa pag-istorya og balik sa uban sa iyang kasinatian. (Alang sa dugang impormasyon mahitungod sa upat ka istorya sa Unang Panan-awon ni Joseph Smith, tan-awa sa Milton V. Backman Jr., “Joseph Smith’s Recitals of the First Vision,” Ensign, Ene. 1985, 8–17.)
Mahimo usab nimong ipasabut nga ang daghang mga istorya sa Unang Pan-awon giandam sa lain-laing mga panahon ug alang sa lain-laing mga tigpaminaw. Niini nga mga istorya, gihatagan og gibug-aton ni Joseph Smith ang lain-laing mga aspeto sa iyang kasinatian sa Unang Panan-awon, apan ang mga istorya tanan nagkauyon nga si Joseph Smith sa tinuod nakapaabli sa mga kalangitan ngadto kaniya ug nakakita sa balaang mga mensahero, lakip sa Dios Amahan ug sa Ginoong Jesukristo. Tungod kay ang 1883 nga istorya usa ka bahin sa opisyal nga kasaysayan ug pagpamatuod ni Joseph Smith ngadto sa kalibutan, kini gilakip diha sa Perlas nga Labing Bililhon isip kasulatan.
Sama lamang sa paghatag og gibug-aton ni Joseph Smith sa lain-laing mga aspeto sa iyang panan-awon sa daghan niyang mga istorya, ang Apostol Pablo mihatag og gibug-aton sa lain-laing mga aspeto sa iyang panan-awon sa Manluluwas ngadto sa nagkalain-laing mga tigpaminaw (tan-awa sa Mga Buhat 9:1–9; Mga Buhat 22:5–11; Mga Buhat 26:12–20). Ngano kaha nga si Joseph Smith ug si Pablo mihatag og gibug-aton sa lain-laing mga butang sa kada higayon nga sila moasoy sa mga istorya sa ilang mga panan-awon?
I-summarize ang Joseph Smith—Kasaysayan 1:3–4 pinaagi sa pagpasabut nga si Joseph natawo sa Vermont apan mibalhin ngadto sa Palmyra, New York, sa dihang siya 10 anyos pa.
Taliwala sa relihiyosong kagubot, determinado si Joseph Smith sa pagpangutana sa Dios hain nga relihiyon ang husto
Ipasabut nga si Joseph Smith nagpuyo atol sa panahon sa dakong kaguliyang mahitungod sa relihiyon. Dapita ang pipila ka mga estudyante nga magpuli-puli sa pagbasa og kusog gikan sa Joseph Smith—Kasaysayan 1:5–7. Hangyoa ang klase sa pagpangita sa mga pulong nga naghulagway sa sitwasyon nga giatubang ni Joseph Smith. Dapita ang usa ka estudyante sa pagsulat diha sa pisara sa mga pulong nga ilang makit-an. Dayon dapita ang usa ka estudyante sa pagbasa og kusog sa Joseph Smith—Kasaysayan 1:8, 10. Hangyoa ang klase sa pagpangita sa paghulagway ni Joseph Smith kon unsa ang iyang gibati niana nga higayon.
Unsa ang gibati ni Joseph Smith isip usa ka resulta sa relihiyosong kaguliyang nga naglibut kaniya?
Unsa ang pipila ka mga pangutana nga siya nakigbisog?
Aduna ba kaninyo sukad napangutana og sama nga mga pangutana? Unsa ang inyong gibuhat aron sa pagtubag niini?
Dapita ang mga estudyante sa pagbasa og hilum sa Joseph Smith—Kasaysayan 1:11 ug sa pagpangita sa unsay gibuhat ni Joseph Smith nga makit-an ang mga tubag sa iyang mga pangutana.
Diin modangop si Joseph alang sa panabang sa pagtubag sa iyang mga pangutana?
Unsa nga baruganan ang gitudlo diha sa Santiago 1:5 ang mitabang ni Joseph Smith pagbaton og pagsalig nga iyang makit-an ang mga tubag ngadto sa iyang mga pangutana? (Ang mga estudyante mahimong mogamit og lain-laing mga pulong, apan kinahanglan nga mahibaloan nila ang mosunod nga mga baruganan: Kon mag-ampo kita inubanan sa hugot nga pagtuo, ang Ginoo motubag sa atong mga pag-ampo. Tingali mahimo nimong ipasabut nga ang Dios motubag sa atong mga pag-ampo sa Iyang panahon ug pamaagi.)
Dapita ang usa ka estudyante sa pagbasa og kusog sa Joseph Smith—Kasaysayan 1:12–13. Hangyoa ang klase sa pag-ila kon giunsa sa baruganan nga gitudlo diha sa Santiago 1:5 pag-impluwensya si Joseph Smith.
Ngano kaha nga misulay si Satanas sa paghunong ni Joseph Smith gikan sa pag-ampo?
Dapita ang usa ka estudyante sa pagbasa og kusog sa Joseph Smith—Kasaysayan 1:16–17. Hangyoa ang klase sa pag-ila kon giunsa ni Joseph sa pagsanong ang oposisyon nga iyang nasinati. Hangyoa usab sila sa paghinumdom og mga pulong gikan sa pagpamatuod ni Joseph nga makahuluganon nganha kanila o tingali ilang gamiton sa pagtudlo sa uban mahitungod sa Unang Panan-awon.
Unsa nga mga pulong niini nga mga bersikulo ang makahuluganon nganha kaninyo? Ngano man?
Isulat ang mosunod nga kamatuoran diha sa pisara: Nakita ni Joseph Smith ang Dios Amahan ug ang Iyang Anak, si Jesukristo.
Nganong importante ang pagbaton og pagpamatuod nga si Joseph Smith nakakita sa Dios Amahan ug sa Iyang Anak, si Jesukristo?
Giunsa ninyo pagkahibalo nga nakakita si Joseph Smith sa Dios Amahan ug sa Iyang Anak, si Jesukristo?
Human ang pipila ka mga estudyante makigbahin sa ilang mga pagpamatuod, ipasabut nga ang Unang Panan-awon mao ang pundasyon nga hitabo sa Pagpahiuli. Ang Unang Panan-awon usab naghatag og mga tubag ngadto sa importanting mga pangutana sa doktrina. Dapita ang mga estudyante sa pagribyu og hilum sa Joseph Smith—Kasaysayan 1:15–17 nga mangita og mga kamatuoran nga atong makat-unan gikan niini nga istorya. Mahimo nimong ipangutana ang mosunod:
Unsa nga baruganan ang atong makat-unan gikan sa Joseph Smith—Kasaysayan 1:15–16 nga makatabang kanato sa pagbuntog sa tintasyon? (Ang mga estudyante mahimong mogamit og lahi nga mga pulong, apan kinahanglan nilang ilhon ang mosunod nga baruganan: Kon kita matinguhaon sa pagpangayo sa tabang sa Dios sa panahon nga si Satanas naninguha sa pagwagtang sa atong tinguha, ang Dios makaluwas kanato.)
Unsa ang gitudlo niini nga mga bersikulo mahitungod sa kinaiyahan sa Dios Amahan ug ni Jesukristo? (Ang mga tubag mahimong mag-apil sa mosunod: Ang Dios Amahan ug ang Iyang Anak, si Jesukristo, buhi. Ang Langitnong Amahan ug ang Iyang anak, si Jesukristo, managbulag ug lahi.)
Unsa ang unang pulong nga gisulti sa Dios ngadto ni Joseph Smith? (Joseph.) Nganong importante man kini nga mahibaloan? Unsa nga mga kamatuoran ang atong makat-unan gikan niini? (Ang mga tubag mahimong maglakip sa mosunod: Ang Langitnong Amahan nakaila sa atong pangalan. Ang Dios nagtubag sa atong mga pag-ampo.)
Aron matabangan ang mga estudyante sa pagsabut ug sa pagbati sa importansya sa mga doktrina ug mga baruganan nga ilang naila niini nga leksyon, mahimo nga ipangutana nimo ang mosunod:
Ngano nga kining mga kamatuoran mahitungod sa Langitnong Amahan ug ni Jesukristo importante nga mahibaloan ug masabtan?
Kanus-a ang usa o sobra pa niini nga mga kamatuoran nagpanalangin sa inyong kinabuhi? (Pahinumdumi ang mga estudyante nga pipila sa mga kasinatian sagrado kaayo o personal nga ipakigbahin.)
Ipasabut nga si Joseph Smith usab midawat og mga tubag sa iyang mga pangutana atol sa Unang Panan-awon. Dapita ang mga estudyante sa pagbasa og hilum sa Joseph Smith—Kasaysayan 1:18–20.
Unsa ang nakat-unan ni Joseph agi og tubag sa iyang pag-ampo?
Pahinumdumi ang mga estudyante sa istorya mahitungod sa mga misyonaryo nga gibasa sa sinugdanan sa leksyon. Dapita ang usa ka estudyante sa pagbasa sa sumpay niini nga istorya:
Imahe
President Thomas S. Monson
“Ang duha mibalik sa pultahan ni Mr. Pollard. Giablihan ni Mr. Pollard ang pultahan ug masuk-anong miingon, ‘Abi ba nakog giingnan ko na kamong mga batan-ona nga dili na gyud mobalik pa!’
“Ang junior kompanyon miingon dayon, uban sa tanang kaisug nga iyang mahimo, ‘Mr. Pollard, dihang migawas mi sa imong pultahan, miingon ka nga wala gyud mi motuo nga si Joseph Smith usa ka propeta sa Dios. Gusto kong mopamatuod kanimo, Mr. Pollard, nga ako nasayud nga si Joseph Smith usa ka propeta sa Dios, nga pinaagi sa inspirasyon iyang nahubad ang sagradong rekord nga nailhan nga ang Basahon ni Mormon, nga iyang nakita ang Dios Amahan ug si Jesus nga Anak.’ Ang mga misyonaryo mibiya dayon sa may pultahan.
“[Sa wala madugay mipamatuod si Mr. Pollard:] ‘Nianang gabhiona wala ko makatulog. Naghigwaos ug nag-alindasay ako. Akong nadunggan diha sa akong hunahuna ang pabalik-balik nga mga pulong “si Joseph Smith usa ka propeta sa Dios. Nasayud ako niini. … Nasayud ako niini. … Nasayud ako niini.” Dili na gyud ko makahulat nga mobuntag na. Akong gitawagan ang mga misyonaryo. … Mibalik sila, ug niining higayona ang akong asawa, akong pamilya, ug ako miapil sa hisgutanan isip tinud-anay nga nangita sa kamatuoran. Isip resulta, kaming tanan midawat sa ebanghelyo ni Jesukristo’” (“Si Propeta Joseph Smith: Magtutudlo pinaagi sa Ehemplo,” 69).
Awhaga ang mga estudyante sa pagbasa sa Joseph Smith—Kasaysayan sa ilang kaugalingon ug sa paghangyo sa Langitnong Amahan sa pagtabang kanila sa paglig-on sa ilang pagpamatuod nga ang istorya ni Joseph Smith sa Unang Panan-awon tinuod. Mahimo usab nimong awhagon sila sa pagpangita og mga oportunidad sa pagpakigbahin sa mensahe sa Unang Panan-awon ngadto sa lain. Taposa pinaagi sa pagpakigbahin sa imong pagpamatuod sa mga kamatuoran nga imong gihisgutan karong adlawa.
Komentaryo ug Background nga Impormasyon
Joseph Smith—Kasaysayan. Kanus-a namantala ang opisyal nga kasaysayan ni Joseph Smith?
Sa 1838 gisugdan ni Joseph Smith ang trabaho sa iyang opisyal nga kasaysayan, nga gimantala sa pahayagang Times and Seasons sa 1842. Kini nga kasaysayan sa kadugayan nahimong kabahin sa unom ka bolyom nga A Comprehensive History of the Church ni B. H. Roberts sa 1957. Ang Joseph Smith—Kasaysayan, ingon nga kini makita diha sa sumbanan nga mga kasulatan, gikuha gikan sa opisyal nga kasaysayan ni Joseph Smith ug gimantala isip kabahin sa usa ka missionary tract nga gitawag og Perlas nga Labing Bililhon sa 1851. Ang Perlas nga Labing Bililhon gikanonisar isip usa ka kasulatan sa 1880.
“Ang mga ginikanan ni [Joseph Smith] , si Lucy Mack ug Joseph Smith Sr., naminyo sa 24 sa Enero 1796 ug namuyo sa usa ka umahan sa pamilya sa Tunbridge, Vermont. Miabang og uma si Joseph ug Lucy [sa Sharon, Vermont] gikan ni Solomon Mack, amahan ni Lucy, sa ting-init sa 1805 ug nagtudlo usab si Joseph sa eskwelahan sa tingtugnaw. Didto niini nga ang ilang ikalimang anak, si Joseph Smith Jr., natawo sa 23 Disyembre 1805. Gitudloan ni Joseph ug Lucy ang ilang mga anak og relihiyosong mga sugo ug ilabi na nga giawhag ni Lucy ang pagtuon sa Biblia. Nagsuspetsa si Joseph Sr. sa tradisyonal nga mga simbahan apan kanunay nga nagpabilin og lig-ong pagtuo sa Dios” (The Pearl of Great Price Student Manual [manwal sa Church Educational System, 2000], 54).
“Nagtubo si Joseph Smith diha sa umahan sa pamilya ug hapit na lamang ubos sa impluwensya sa iyang pamilya. … Sa katuigan sa iyang pagtubo, gisugdan ni Joseph Smith ang pagtipon ug sa pagpakita og mga hiyas nga motabang kaniya sa pagtuman sa iyang gi-orden nang daan nga misyon.
“… Gipalambo niya ang lig-on nga mga talikala sa pamilya, gikat-unan ang pagtrabaho og maayo, sa paghunahuna alang sa iyang kaugalingon, sa pagserbisyo sa uban, ug sa paghigugma sa kagawasan (Church History in the Fulness of Times, 2nd ed. [manwal sa Church Educational System, 2003], 15).
“Sa unang mga katuigan ni Joseph Smith, ang iyang pamilya kanunay nga nagbalhin-balhin, nangita og tambok nga yuta o pipila ka ubang paagi sa panginabuhi. … Sa 1811 ang mga Smith mibalhin ngadto sa usa ka gamay nga komunidad sa West Lebanon, New Hampshire. … Ang tipus nga hilanat miabut ngadto sa West Lebanon. … Tagsa-tagsa ang mga anak nga Smith nasakit. …
“Ang siyete anyos nga Joseph, Jr., naayo gikan sa hilanat nga [tipus] human sa duha ka semana apan nag-antus og komplikasyon nga sa kadugayan nagkinahanglan og upat ka operasyon. Ang labing seryosong komplikasyon naglakip og paghubag ug inpeksyon sa bukog sa iyang wala nga bitiis. … Nag-antus si Joseph sobra sa duha ka semana.” Gilahutay ni Joseph ang operasyon sa pagkuha sa inpeksyon gikan sa iyang bitiis “nga walay pugong o pag-inom og bino aron dili siya sakitan” (Church History in the Fulness of Times, 22–23).
“Sa 1816, miadto si Joseph Sr. sa Palmyra, New York, sa pag-imbestigar sa report sa usa ka nindot nga baratong yuta. Si Joseph Jr., nianang panahona dyes anyos pa, nahinumdom nga bisan tuod og wala pa siya hingpit nga maayo sa iyang operasyon sa bitiis , ang drayber sa karomata nga mitabang sa mga Smith sa ilang panaw mipalakaw kaniya ngadto sa snow, 64 ka kilometro kada adlaw sulod sa daghang mga adlaw, diin niana nga panahon giantus niya ang labing ngulngol nga kakapoy ug kasakit” (The Pearl of Great Price Student Manual, 54).
“Si Joseph Smith, Sr., ang amahan sa pamilya nga napulo—napulog usa inig ka 1821—mitrabaho og maayo alang sa panginabuhi. Human sa duha ka tuig sa Palmyra, nakaipon siya og igo nga kwarta alang sa down payment sa 40 ka hektarya nga kakahoyan nga yuta duol sa lungsod sa Farmington. Sulod sa unang tuig siya ug ang iyang anak nga mga lalaki mihawan sa 12 ka hektarya sa dagkong kahoy, miandam sa yuta alang sa pagtikad, ug gitamnan og trigo. … Ang batan-ong Joseph sa kadugayan nakahinumdum nga ‘gikinahanglan niini ang paningkamot sa tanan nga makahatag og tabang alang sa pagsuporta sa Pamilya.’ [“History of Joseph Smith By Himself,” 1832 (gisulat sa Kirtland, Ohio, tali sa 20 sa Hulyo ug 27 Nob. 1832), LDS Historical Department, Salt Lake City, p. 1.] …
“Niini nga higayon ang mga oportunidad ni Joseph sa pag-eskwela limitado. Giangkon kini niya ‘sa kabus nga kahimtang’ nga siya nagtubo. ‘Gihikawan kami sa mga kaayohan sa edukasyon. Dili kinahanglan nga isulti, gitudloan lamang ako sa pagbasa, pagsulat, ug mga sukaranang lagda sa aritmetik nga naglangkub sa akong tibuok nga mga nakab-ut sa literatura’ [“History of Joseph Smith By Himself,” pp. 1–2]” (Church History in the Fulness of Times, 29–30).
Alang sa dugang impormasyon mahitungod sa upat ka istorya sa Unang Panan-awon ni Joseph Smith, tan-awa sa Milton V. Backman Jr., “Joseph Smith’s Recitals of the First Vision,” Ensign, Ene. 1985, 8–17. Lain nga makatabang nga artikulo mahitungod sa lain-laing mga istorya sa Unang Pana-awon mao ang kang Richard L. Anderson, “Joseph Smith’s Testimony of the First Vision,” Ensign, Abril 1996, 10–21.
Mipamatuod si Presidente Gordon B . Hinckley sa ka-importante sa Unang Pan-awon ngadto sa Simbahan:
Imahe
President Gordon B. Hinckley
“Ang atong tibuok nga hitabo isip mga miyembro sa Ang Simbahan ni Jesukristo sa mga Santos sa Ulahing mga Adlaw nag-agad sa katinuod niining mahimayaon nga Unang Panan-awon. Ang panghitabo mao ang nag-abli niini, ang dispensasyon sa kahingpitan sa mga panahon. Walay atong mabasehan sa atong doktrina, walay atong ikatudlo, walay atong masunod nga mas dako og importansya kay sa niining nagsugod nga pamahayag. Ako nagtuo nga kon si Joseph Smith nakigsulti sa Dios Amahan ug sa Iyang Pinalanggang Anak, nan ang tanan nga iyang gipamulong tinuod. Kini mao ang hitabo nga nag-abli sa ganghaan nga naggiya ngadto sa dalan sa kaluwasan ug kinabuhing dayon” (“What Are People Asking about Us?” Ensign, Nob. 1998, 71).
Gideklarar ni Presidente Joseph F. Smith ang importansya sa Unang Panan-awon kon itandi sa ubang mga hitabo nga nahitabo sukad sa Pagkabanhaw ni Jesukristo:
Imahe
Presidente Joseph F. Smith
“Ang labing dako nga hitabo nga sukad nahitabo sa kalibutan, sukad sa pagkabanhaw sa Anak sa Dios gikan sa lubnganan ug sa iyang pagsaka sa langit, mao ang pag-anhi sa Amahan ug sa Anak ngadto nianang bata nga lalaki nga si Joseph Smith, aron sa pag-andam sa agianan alang sa pagpahimutang sa pundasyon sa iyang gingharian—dili ang gingharian sa tawo—nga dili na gayud mohunong ni mapukan. Ingon nga gidawat kini nga kamatuoran, sayon kanako ang pagdawat sa matag kamatuoran nga iyang gilitok ug gideklarar atol sa iyang napulog upat ka tuig nga misyon sa kalibutan. Wala gayud siya mitudlo og usa ka doktrina nga dili tinuod. Wala gayud siya misunod og usa ka doktrina nga wala siya sugoa sa pagsunod. Wala gayud siya miawhag og sayop. Wala siya malingla. Iyang nakita, iyang nadungog, iyang gibuhat ingon nga siya gisugo sa pagbuhat; ug, busa, ang Dios ang responsable alang sa buhat nga nahimo ni Joseph Smith—dili si Joseph Smith. Ang Ginoo ang responsable niini, dili ang tawo” (Gospel Doctrine, 5th ed. [1939], 495–96).
Si Elder M. Russell Ballard sa Korum sa Napulog Duha ka mga Apostoles nanghimatuod sa katinuod sa Unang Panan-awon:
Imahe
Elder M. Russell Ballard
“Ang ebanghelyo napahiuli ba o wala. Ang orihinal nga simbahan sa Manluluwas ug ang doktrina niini nawala ba o wala mawala. Si Joseph Smith nakaangkon ba nianang talagsaong panan-awon o wala. Ang Basahon ni Mormon lain ba nga tugon ni Jesukristo o dili. Ang kahingpitan sa ebanghelyo ni Jesukristo gipahiuli ba nganhi sa yuta pinaagi sa pinili nga propeta sa Dios sa ulahing mga adlaw o wala.
“Ang kamatuoran sa tinud-anay dili mas komplikado kaysa niana. Kining mga butanga nahitabo ba sama gayud sa akong gipamatuod o wala. Isip usa ka ulahing adlaw nga Apostol ni Ginoong Jesukristo, ang akong pagpamatuod, ug ang pagpamatuod sa minilyon nga matinud-anong mga miyembro sa tibuok kalibutan, mao nga ang unsay akong gisulti kaninyo niining buntaga tinuod. Ang Simbahan ni Jesukristo sa mga Santos sa Ulahing mga Adlaw napahiuli nganhi sa yuta pinaagi ni Joseph Smith ug gidumala karon pinaagi sa usa ka buhing propeta. Niini nga mga butang ako nahibalo!” (“Restored Truth,” Ensign, Nob. 1994, 67–68).
Namulong si Elder Jeffrey R. Holland sa Korum sa Napulog Duha ka mga Apostoles kabahin sa kalisdanan, oposisyon, o kangitngit nga moabut sa wala pa o human sa espirituhanong mga kasinatian:
Imahe
Elder Jeffrey R. Holland
“Ang yano ug ang ugdang kaayo nga kamatuoran mao nga sa dili pa ang importanting mga higayon, sa tinuod sa dili pa ang dagkong espirituhanong mga higayon, adunay mahimong moabut nga kalisdnan, oposisyon, ug kangitngit. Ang kinabuhi adunay pipila niadtong mga higayon alang kanato, ug usahay sila moabut samtang kita nagsingabut og importanting desisyon o importanting lakang sa atong kinabuhi.
“… [Usab adunay] oposisyon nga sa kasagaran moabut human mahimo ang malamdagon nga mga desisyon, human ang mga higayon sa pagpadayag ug lig-on nga pagtuo naghatag kanato og kalinaw ug pasalig nga gituohan nato nga dili gayud nato mawala. …
“… Nagtuo ako nga sa atong kaugalingong indibidwal nga mga paagi, nagdala kanato ang Dios ngadto sa kakahoyan o sa bukid o sa templo ug didto ipakita kanato ang katingalahan sa unsay iyang plano alang kanato. Mahimong dili nato hingpit makita kini sama ni Moises o Nephi o sa igsoong lalaki ni Jared, apan makita nato sama kadaghan sa atong gikinahanglan nga makita aron makaila sa kabubut-on sa Ginoo alang kanato ug aron mahibalo nga siya nahigugma kanato lapas sa mortal nga pagsabut. Nagtuo usab ako nga ang kaaway ug ang iyang paghigpit, miserabling malinglahong mga sumusunod naninguha sa pagbatok sa samang mga kasinatian ug dayon naninguha sa pagtago niini sa kamatuoran. …
“Ang pakig-away lahus sa kangitngit ug pagkanawad-an og paglaum ug sa pagpangamuyo alang sa kahayag mao ang nag-abli niini nga dispensasyon. Kini mao ang unsay nagpadayon niini, ug kini mao ang unsay naghimo nimong magpadayon. …
“Akong giila ang katinuod sa oposisyon ug kalisud, apan ako magpamatuod sa Dios sa Kahimayaan, sa matubsanong Anak sa Dios, sa kahayag ug paglaum ug usa ka mahayag nga kaugmaon. Nagsaad ako kaninyo nga ang Dios buhi ug nahigugma kaninyo, kada usa kaninyo, ug nga siya nagpahimutang og mga utlanan ug mga limitasyon ngadto sa nakigbatok nga mga gahum sa kangitngit. Ako nagpamatuod nga si Jesus mao ang Kristo, ang mananaog batok sa kamatayon ug impiyerno ug sa sinalikway kinsa nagplano sa impiyerno” (“Cast Not Away Therefore Your Confidence” [Brigham Young University debosyonal, Mar. 2, 1999], 1, 2, 6–7, speeches.byu.edu).