Sa katapusan sa Mayo 1829, si Joseph Smith ug si Oliver Cowdery milahutay og mga hulga gikan sa manggugubot nga mga tawo samtang nagtiwas sa paghubad sa Basahon ni Mormon. Gitabangan sila ni David Whitmer sa pagbalhin gikan sa Harmony, Pennsylvania, ngadto sa panimalay ni Whitmer sa Fayette, New York, aron sila makalikay sa pagpanggukod ug aron sila makatudlo sa gipahiuli nga ebanghelyo ngadto sa mga Whitmer ug sa ilang mga silingan. Ang pamilyang Whitmer nagpakita og dakong interes sa mga panghitabo sa Pagpahiuli. Gihulagway ni Joseph Smith si David Whitmer, John Whitmer, ug Peter Whitmer Jr. isip “mainitong mga higala ug mga assistant sa trabaho; ug … matinguhaong mahibalo sa ilang kaugalingong mga katungdanan” (History of the Church, 1:48–49). Nag-ampo ang Propeta ug nakadawat og mga pinadayag alang ni David Whitmer ug sa iyang igsoong mga lalaki nga si John ug Peter. Gikat-unan niining igsoon nga mga lalaki ang mahitungod sa ilang mga tahas sa pagdala sa buhat sa Ginoo.
Gitawag sa Ginoo si David Whitmer sa pagtabang sa buhat sa ulahing adlaw
Aron matabangan ang mga estudyante sa pagsabut sa historical background sa mga pinadayag nga ilang tun-an karon, i-summarize ang impormasyon diha sa pasiuna niini nga leksyon. Agi og dugang, mahimo nimong hangyoon ang usa ka estudyante sa pagbasa sa mosunod nga istorya. Sa dili pa mobasa ang estudyante, ipasabut nga gikinahanglan ni David Whitmer ang pagtanom og binhi sa trigo diha sa umahan sa pamilya ug sa pagsabwag og plaster sa paris, nga gigamit isip abuno. Gibati niya ang kadasig nga kinahanglan niyang tabangan si Joseph ug si Oliver human makompleto niya kadto nga mga trabaho. Dapita ang klase sa pagpaminaw alang sa mga milagro nga mitugot ni David Whitmer sa pagtabang ni Oliver Cowdery ug Joseph Smith sa pag-eskapo gikan sa ilang mga tiggukod:
Imahe
Lucy Mack Smith
“Miadto si David sa umahan, ug nahibalo nga siya adunay duha ka adlaw nga bug-at nga trabahong naghulat kaniya. … Iya dayong gihigot ang iyang mga kabayo ngadto sa daro, ug kaysa bahinon ang uma ngadto sa unsay kasagarang gitawag sa mga mag-uuma nga mga luna, gidaro ang tanan niini, nagpadayon hangtud sa udto, sa dihang, sa paghunong aron manihapon, gilibut niya pagtan-aw, ug sa iyang katingala iyang nadiskubrihan nga iyang nadaro ang tibuok katunga sa umahan sa trigo. Human og panihapon mipadayon siya sama sa kaniadto, ug sa pagkagabii nahuman niya ang tibuok duha ka adlaw nga trabaho.
“Ang iyang amahan, sa pag-adto sa umahan sa samang gabii, nakakita sa unsay nahimo, ug siya nahingangha, ‘Tingali adunay gamhanang kamot nga naghimo niini, ug naghunahuna ako nga mas maayo pang modulhog ka ngadto sa Pennsylvania inig kahuman dayon og sabwag sa imong plaster sa paris.’
“Sa pagkasunod nga buntag, misipit si David og kahoy nga metrosan diha sa iyang ilok ug miadto sa pagsabwag sa plaster, nga iyang gibiyaan, sa milabay nga duha ka adlaw, nga nagtipun-og duol sa balay sa iyang igsoong babaye, apan, sa pag-abut sa lugar, iyang nadiskubrihan nga nawala kini! Midagan siya ngadto sa iyang igsoong babaye, ug nangutana kaniya kon nakahibalo ba siya unsay nahitabo niini. Nasorpresa miingon siya, ‘Nganong mangutana ka nako? wala ba kini tanan gisabwag gahapon?’
“‘Sa akong nahibaloan wala,’ tubag ni David.
“‘Nahibulong ako niana,’ mitubag ang iyang igsoong babaye, ‘kay ang mga bata miduol kanako sa udto, ug mihangyo kanako sa paggawas ug sa pagtan-aw sa mga tawo nga nagsabwag sa plaster diha sa umahan, nag-ingon, nga sila wala gayud makakita bisan kinsa sa ilang kinabuhi nga nagsabwag og plaster nga paspas kaayo. Sumala niana ako migawas, ug nakakita sa tulo ka mga tawo nga nagtrabaho diha sa umahan, ingon sa gisulti sa mga bata, apan, naghunahuna nga ikaw misuhol og pipila ka tabang, tungod sa imong pagdali, mibalik dayon ako ngadto sa balay, ug wala na mohatag og dugang nga atensyon niini.’
“Mihimo si David og ubay-ubay nga pagsusi kalabut niini nga butang, sa iyang mga paryente ug mga silingan, apan walay nahibalo kinsa ang nagbuhat niini” (Lucy Mack Smith, History of Joseph Smith by His Mother, ed. Preston Nibley [1958], 148–49).
Sa imong hunahuna giunsa kaha niini nga mga kasinatian pag-impluwensya si David Whitmer?
I-summarize ang Doktrina ug mga Pakigsaad 14:1–5 pinaagi sa pagpasabut nga mipahibalo ang Ginoo sa pagtungha sa Iyang buhat ug misaad og mga panalangin ngadto niadtong moapil niini. Dapita ang usa ka estudyante sa pagbasa sa Doktrina ug mga Pakigsaad 14:6–7. Hangyoa ang klase sa pagsunod, mangita sa mga direksyon sa Ginoo ngadto ni David ug ang panalangin nga madawat ni David agi og resulta sa pagpatalinghug sa mga panudlo a Ginoo.
Unsa ang gisaad sa Ginoo ni David Whitmer? Unsa ang gikinahanglan nga buhaton ni David aron kini nga saad matuman?
Hangyoa ang mga estudyante sa pagpahayag og usab sa baruganan diha sa Doktrina ug mga Pakigsaad 14:7 sa ilang kaugalingon nga mga pulong. Samtang ang mga estudyante nagtubag, isulat ang mosunod nga baruganan diha sa pisara: Kon kita mosunod sa mga sugo sa Dios ug molahutay hangtud sa katapusan, makadawat kita og kinabuhing dayon.
Unsay ipasabut sa makadawat og kinabuhing dayon? (Ang pagdawat og kinabuhing dayon mao ang pagpuyo sa hangtud uban sa atong mga pamilya diha sa presensya sa Dios. Ang kinabuhing dayon mao ang matang sa kinabuhi sa Dios.)
Sa unsa nga paagi nga ang kinabuhing dayon nag-awhag kanato sa pagsunod sa mga sugo sa Dios ug sa paglahutay hangtud sa katapusan?
Dapita ang usa ka estudyante sa pagbasa og kusog sa Doktrina ug mga Pakigsaad 14:8. Hangyoa ang klase sa pagsunod, mangita sa ubang mga panalangin nga madawat ni David Whitmer kon siya magmasulundon. Human ang mga estudyante mo-report unsa ang ilang nakit-an, ipasabut nga sa wala madugay human nadawat kini nga pinadayag ni Joseph Smith alang ni David, nahimo si David nga usa sa Tulo ka mga Saksi sa Basahon ni Mormon. Nakita niya ang anghel Moroni ug ang bulawan nga mga palid, ug nadungog niya ang tingog sa Dios nga nagpamatuod sa katinuod sa rekord.
Ipasabut nga ang Ginoo mihatag ni David Whitmer og lain nga saad pinasubay sa kamatinud-anon ni David. Aron sa pag-andam sa mga estudyante sa pag-ila og baruganan diha sa mga pulong sa Ginoo ngadto ni David, isulat ang mosunod diha sa pisara: Kon kita , ang Ginoo .
Dapita ang mga estudyante sa pagbasa og hilum sa Doktrina ug mga Pakigsaad 14:9–11. Hangyoa sila sa pag-ila og baruganan nga haum sa sundanan diha sa pisara. Tuguti ang pipila ka mga estudyante sa pagpakigbahin unsay ilang nakit-an. Ang mga estudyante mahimong mosugyot og lain-laing mga baruganan, apan siguroa nga kini klaro nga kon kita matinud-anong motabang sa Ginoo sa Iyang buhat, ang Ginoo mopanalangin kanato sa espirituhanon ug sa temporal nga paagi.
Sa unsa nga mga paagi ang Ginoo naghangyo kaninyo sa pagtabang sa Iyang buhat? Unsa nga mga panalangin ang miabut sa inyong kinabuhi samtang kamo nagtabang sa buhat sa Ginoo?
Si Jesukristo nagtudlo ni John Whitmer ug Peter Whitmer Jr. unsay labing bililhon ngadto kanila
Pagdapit og duha ka estudyante sa pagduol sa atubangan sa klase. Hangyoa ang usa kanila sa pagbasa og kusog sa Doktrina ug mga Pakigsaad 15:1,ug hangyoa ang lain nga estudyante sa pagbasa og kusog sa Doktrina ug mga Pakigsaad 16:1. Hangyoa kini nga mga estudyante sa pagbasa sa mga bersikulo 2–6 niini nga mga seksyon sa samang paagi.
Unsa ang gitinguha ni John Whitmer ug Peter Whitmer? (Aron mahibalo unsa ang ilang mabuhat nga labing bililhon nganha kanila.)
Dapita ang mga estudyante sa pagbasa og hilum sa Doktrina ug mga Pakigsaad 15:6 ug 16:6. Hangyoa sila sa pag-ila sa tubag nga gihatag sa Ginoo ngadto niini nga mga tawo.
Giunsa pagtubag sa Ginoo ang ilang pangutana? Unsa nga baruganan ang atong makat-unan gikan sa tubag sa Ginoo? (Bisan og ang mga estudyante mogamit og lahi nga mga pulong, siguroa nga ilang nasabtan nga ang atong mga paningkamot sa pagdala sa uban ngadto ni Jesukristo dako kaayo og bili kanato.)
Unsay atong mahimo sa pagtabang sa uban sa pagduol ngadto ni Kristo?
Nganong kini nga mga paningkamot dako kaayo og bili kanato?
Dapita ang mga estudyante sa pagribyu sa Doktrina ug mga Pakigsaad 15 ug 16, mangita sa unsa nga paagi ang duha ka mga pinadayag lahi sa usag usa. (Ang kalainan lamang mao nga ang usa gihatag ngadto ni John ug ang lain gihatag ngadto ni Peter.)
Ipasabut nga usahay, nagpadayag ang Ginoo og sama nga mensahe ngadto sa lain-lain nga mga indibidwal tungod kay sila tingali adunay sama nga mga panginahanglan, mga sitwasyon, o mga tinguha. Hinoon, kita makapaniguro nga Siya nakaila tagsatagsa kanato. Niini nga panig-ingnan, gitawag Niya si John Whitmer ug Peter Whitmer Jr. pinaagi sa ngalan ug gipadayag ang Iyang kabubut-on ngadto kanila sa tinagsa.
Sa unsa nga paagi nga ang panalangin sa priesthood o tawag sa misyon nagpakita nga ang Dios personal nga nakaila kanato, bisan kon ang panalangin o tawag sa misyon nagdala og sama nga pulong ngadto niadtong gihatag sa uban?
Aron mahatagan og lain nga panig-ingnan nga ang Dios personal nga nakaila kanato, hangyoa ang usa ka estudyante sa pagbasa sa mosunod nga istorya ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
“Pipila ka panahon ang milabay nakigsulti ako sa usa ka lider sa priesthood kinsa giaghat sa pagsag-ulo sa mga pangalan sa tanang kabatan-onan nga nag-edad og 13 ngadto sa 21 diha sa iyang stake. Naggamit og mga snapshot sa batan-ong mga lalaki ug mga babaye, mihimo siya og mga flash card nga iyang giribyu samtang nagbiyahe tungod sa negosyo ug diha sa ubang mga panahon. Kini nga lider sa priesthood dali nga nakakat-on sa tanang mga pangalan sa kabatan-onan.
“Usa niana ka gabii ang priesthood lider nagdamgo kalabut sa usa sa batan-ong lalaki nga iyang nailhan sa litrato lamang. Sa iyang damgo iyang nakita ang batan-ong lalaki nga nagsul-ob og puti nga polo ug adunay missionary name tag. Adunay kauban nga naglingkod sa iyang tupad, ang batan-ong lalaki nagtudlo og usa ka pamilya. Ang batan-ong lalaki naggunit og Basahon ni Mormon, ug makita nga daw nagpamatuod siya sa katinuod sa basahon. Dayon ang priesthood lider nahigmata gikan sa iyang damgo.
“Sa sunod nga panagpundok sa priesthood, ang lider miduol sa batan-ong lalaki nga iyang nakita sa iyang damgo ug mihangyo nga makigsulti kaniya sa makadiyot. Human sa mubo nga pag-ilaila, gitawag sa lider ang batan-on sa iyang ngalan ug miingon: ‘Ako dili tigdamgo. Wala gayud ako makadamgo bisag usa ka miyembro niini nga stake, gawas kanimo. Sultihan ka nako sa akong damgo, ug dayon gusto ako nga motabang ka nako nga makasabut unsa ang gipasabut niini.’
“Giasoy sa priesthood lider ang damgo ug nangutana sa batan-ong lalaki kon unsa kahulugan niadto. Nasud-ipan tungod sa pagkahinuklog, ang batan-ong lalaki yanong mitubag, ‘Kini nagpasabut nga ang Dios nakaila kinsa ako.’ Ang nahibiling panagsinultihanay tali niining batan-ong lalaki ug sa iyang priesthood lider mas labing makahuluganon, ug nagsabut sila nga magkita matag karon ug unya aron magtinambagay sulod sa sunod nga mga bulan” (“Ang Malumo nga mga Kalooy sa Ginoo,”Liahona, Mayo 2005, 100).
Nganong makatabang kini kanato nga makaamgo nga ang Dios personal nga nakaila kanato?
Dapita ang pipila ka estudyante sa pagpakigbahin kon sa unsa nga paagi sila nahibalo nga ang Dios personal nga nakaila kanila. (Tingali kinahanglan nimong ipasabut nga ang mga ehemplo sa mga estudyante dili kinahanglan nga extraordinaryo. Pahinumdumi ang mga estudyante nga dili kinahanglang mopakigbahin sila og mga kasinatian nga personal o pribado kaayo.)
Sa unsang paagi nga ang kahibalo nga ang Dios personal nga nakaila kaninyo nag-impluwensya sa mga desisyon nga inyong gihimo kada adlaw? Sa unsa nga paagi kini nga kahibalo nag-impluwensya sa inyong mga desisyon?
Mahimo nimong tapuson kini nga leksyon pinaagi sa pagpamatuod sa mga kamatuoran nga inyong nahisgutan ug sa pagdapit sa mga estudyante sa paggamit niini nga mga kamatuoran.