Sa tingpamulak sa 1829 gibati ni Propeta Joseph Smith ang grabeng pagdali mahitungod sa paghubad sa Basahon ni Mormon. Namatikdan niya nga ang iyang panahon sa paghubad limitado kaayo tungod sa panginahanglan nga motrabaho aron sa pagsuporta sa iyang pamilya. Mitabang si Emma ug ang igsoong lalaki ni Joseph nga si Samuel pinaagi sa paglihok isip mga tigsulat, apan dili sila makasulat sa tibuok panahon alang kaniya. Diha na ni Joseph ang mga palid sobra sa usa ka tuig ug tunga ug, sa pagkawala sa 116 ka mga pahina sa manuskrito, pipila lamang ka pahina sa nahubad nga materyal ang mapakita niini. Nag-ampo si Joseph nga ang Ginoo mopadala og usa ka tawo kinsa makatabang kaniya sa buhat sa paghubad. Agi og tubag sa pag-ampo ni Joseph, mipadala ang Ginoo ni Oliver Cowdery sa pagserbisyo isip tigsulat.
Ang mga pinadayag diha sa Doktrina ug mga Pakigsaad 6 ug 7 gihatag wala madugay human miabut si Oliver. Ang Doktrina ug mga Pakigsaad 6 naglangkob og tambag ngadto ni Oliver kalabut sa iyang tahas diha sa buhat sa Ginoo. Ang Doktrina ug mga Pakigsaad 7 naglangkob og hinubad nga bersyon sa pipila ka mga sinulat ni Juan ang Hinigugma, nagtudlo nga gihatag sa Ginoo ang tinguha ni Juan nga mabuhi ug magdala og mga kalag ngadto ni Jesukristo hangtud sa Ikaduhang Pag-anhi.
Nahimong tigsulat si Oliver Cowdery ngadto ni Joseph Smith
Pagdrowing og usa ka bombelya ug pagsidlak sa adlaw diha sa pisara.
Imahe
lightbulb line drawing
Imahe
sunrise line drawing
Sa unsa nga paagi ang pagpasiga sa bombelya lahi sa pagtan-aw sa pagsidlak sa adlaw? (Ang mga estudyante mahimong mosugyot og pipila ka mga kalainan, apan ipasabut nga sa usa, makita dayon nimo ang hayag, ug sa lain, makita nimo kini sa inanay.)
Ipasabut nga si Elder David A. Bednar sa Korum sa Napulog Duha ka mga Apostoles migamit niini nga pag-angid-angid aron sa pagtudlo mahitungod sa personal nga pagpadayag. Gitudlo niya nga usahay ang pagpadayag mahitabo sa “dinalian …, sa hingpit, ug sa hinanali [sama sa pagpasiga sa suga sa ngitngit nga kwarto]. … [Apan] labing kasagaran, ang pagpadayag motubo nga hinay-hinay sa pagdagan sa panahon” (“Ang Espiritu sa Pagpadayag,”Liahona, Mayo 2011, 88). Dapita ang mga estudyante sa pagpamalandong sa mga panahon nga ang Ginoo mitubag sa ilang mga pag-ampo diha-diha dayon ug sa mga panahon nga Iyang gitubag sa inanay. Samtang sila nagtuon sa Doktrina ug mga Pakigsaad 6 karon, awhaga sila sa pagpangita og mga kamatuoran nga motabang kanila sa pag-ila kon ang Dios naghatag ba kanila og pagpadayag.
Aron matabangan ang mga estudyante sa pagsabut sa makasaysayanong konteksto alang niini nga pinadayag, dapita ang usa ka estudyante sa pagbasa og kusog sa unang paragraph sa pasiuna niini nga leksyon. Dayon dapita ang tanang mga estudyante sa pagbasa og hilum sa Joseph Smith—Kasaysayan 1:66–67 ug sa pag-ila kon sa unsa nga paagi ang Langitnong Amahan mitabang ni Joseph sa iyang mga paninguha sa paghubad nga mas madali.
Unsa ang gibuhat sa Ginoo agi og tubag sa pangamuyo ni Joseph alang sa usa ka tawo aron motabang kaniya sa paghubad?
Human sa pag-report sa mga estudyante kon unsay ilang nakit-an, ipasabut nga si Oliver Cowdery miabut gikan sa Palmyra, New York, sobra sa 225 ka kilometro ang gilay-on, aron sa pagpakigkita ni Joseph sa Harmony, Pennsylvania (tan-awa sa Church History Maps, Map 1, “Northeastern United States”), ug nga siya miabut pipila lamang ka adlaw human mag-ampo si Joseph alang sa panabang.
Ipasabut nga wala madugay human si Oliver misugod isip tigsulat ni Joseph, nadawat ni Joseph ang usa ka pinadayag diin ang Ginoo namulong ngadto ni Oliver. Kini nga pagpadayag mitubag sa mga tinguha ni Oliver ug sa dayag mitubag sa mga pangutana nga iyang giampo apan wala maipahayag ngadto ni Joseph. Dapita ang mga estudyante sa pagbasa og hilum sa Doktrina ug mga Pakigsaad 6:5–6, 8 ug pangitaa ang mga ilhanan nga ang Ginoo nahibalo sa mga tinguha ni Oliver.
Unsa niini nga mga bersikulo ug sa paninguha ni Oliver sa pagbiyahe og 225 ka kilometro aron matabangan si Joseph ang gisulti kanato mahitungod ni Oliver?
Gipasaligan sa Ginoo si Oliver Cowdery sa pagkatinuod sa buhat
Hangyoa ang mga estudyante sa pagpamalandong sa mosunod nga pangutana:
Nakadawat ka ba sukad og tubag gikan sa Dios ug sa wala madugay nakasinati og mga kabalaka o kalibug kalabut sa tubag? (Dapita ang pipila ka mga estudyante sa pagpakigbahin sa ilang mga kasinatian. Mahimo ka usab nga mopakigbahin og usa ka kasinatian nga imong kaugalingon. Pahinumdumi ang mga estudyante nga pipila sa mga kasinatian sagrado kaayo o personal aron ipakigbahin.)
I-summarize ang Doktrina ug mga Pakigsaad 6:10–13 pinaagi sa pagpasabut nga gisultihan sa Ginoo si Oliver Cowdery nga si Oliver adunay gasa sa pagpadayag. Dapita ang mga estudyante sa pagbasa og hilum sa Doktrina ug mga Pakigsaad 6:14–17, 20 nga mangita sa unsay gitudlo sa Ginoo ni Oliver mahitungod sa pagdawat ug pag-ila og pagpadayag.
Unsa nga mga kamatuoran ang gitudlo sa Ginoo ni Oliver mahitungod sa pagdawat ug pag-ila og pagpadayag?
Ang mga estudyante mahimong mohisgot sa mosunod nga mga baruganan. Mahimo nimo kining isulat diha sa pisara samtang ang mga estudyante nag-ila niini. Mahimo usab nimong isugyot nga markahan sa mga estudyante ang mga pulong nga makahuluganon kanila niini nga mga bersikulo.
Samtang maninguha kita og mga tubag gikan sa Langitnong Amahan, Siya mohatag kanato og panudlo.
Ang Ginoo molamdag sa atong mga hunahuna pinaagi sa Espiritu Santo.
Nahibalo ang Dios sa atong mga hunahuna ug mga tinguha sa atong mga kasingkasing.
Kon kita makadawat og pagpadayag, kinahanglan nga ato kining tipigan sa atong mga kasingkasing.
Nganong importante kanato nga mahibalo nga ang Ginoo namati ug nagtubag sa atong mga pag-ampo?
Unsa kaha ang gipasabut nga “lamdagan” sa Ginoo ang atong mga hunahuna? (Mahimo nimong ipasabut nga pinaagi sa Espiritu Santo, ang Ginoo mohatag kanato og mga ideya ug panabut.)
Nganong importante nga mahibalo nga ang Dios lamang ang nasayud sa atong mga hunahuna ug mga tinguha sa atong mga kasingkasing?
Unsa kaha ang gipasabut sa “tipigi” ang mga pulong sa Ginoo? (Sa pagtuon, pamalandong, ug paglihok sa mga butang nga gipadayag sa Ginoo ug sa pagsalig sa pagpadayag nga atong nadawat.)
Dapita ang usa ka estudyante sa pagbasa og kusog sa Doktrina ug mga Pakigsaad 6:21–24 ug hangyoa ang mga estudyante sa pagpangita sa laing paagi nga ang Ginoo makigsulti kanato.
Unsa ang atong makat-unan gikan niini nga mga bersikulo mahitungod sa laing paagi nga ang Ginoo makigsulti kanato? (Ang Ginoo nagsulti og kalinaw sa atong mga hunahuna isip usa ka saksi sa kamatuoran. Mahimo nimong isugyot nga markahan sa mga estudyante ang mga pulong nga “kalinaw nganha sa imong hunahuna” [D&P 6:23].)
Gikan sa inyong kasinatian, sama sa unsa ang bation nga ang Ginoo nagsulti og kalinaw sa atong hunahuna?
Aron matabangan ang mga estudyante nga mas masabtan kon sa unsa nga paagi ang pagpadayag mahimong moabut nganha kanila, ipasabut nga ang pag-ila nga ang Ginoo nakigsulti kanato usahay lisud. Ipasabut nga si Elder Bednar migamit sa pag-angid-angid sa pagsidlak sa adlaw aron sa pagpatin-aw kon sa unsa nga paagi ang pakigsulti gikan sa Ginoo kasagaran nga moabut. Dapita ang usa ka estudyante sa pagbasa og kusog sa mosunod nga pamahayag:
Imahe
Elder David A. Bednar
“Usahay ang adlaw mosidlak sa kabuntagon nga dag-umon o gabunon. Tungod sa kisdum nga mga kondisyon, ang pagkakita sa kahayag mas lisud, ug ang pag-ila sa eksakto nga higayon kon kanus-a mosaka ang adlaw sa kapunawpunawan dili mahimo. …
“Sa sama nga paagi, kita sa makadaghan nga panahon nakadawat og pagpadayag nga wala makaila sa eksakto kon giunsa o kanus-a kita nakadawat og pagpadayag” (“Ang Espiritu sa Pagpadayag,” 89).
Sa unsa kaha nga paagi ato usahay nga mataligam-an o mabaliwala ang mga tubag sa Ginoo sa atong mga pag-ampo?
Unsa nga tambag ang imong ihatag ngadto sa usa ka tawo kinsa gusto nga makakat-on kon sa unsa nga paagi mas makaila kon ang Ginoo nakigsulti kaniya?
Ipasabut nga wala mosulti si Oliver ni Joseph hangtud human kini nga pinadayag nadawat mahitungod sa “ang gabii” nga gipasabut sa Ginoo diha sa Doktrina ug mga Pakigsaad 6:22. Dapita ang usa ka estudyante sa pagbasa unsay nakat-unan ni Propeta Joseph human madawat ang pinadayag diha sa Doktrina ug mga Pakigsaad 6:
Imahe
Prophet Joseph Smith
“Human namo nadawat kini nga pinadayag, mipahayag si Oliver Cowdery kanako nga human siya mipuyo kadiyot sa akong amahan, ug human ang pamilya nakasulti kaniya kalabut sa akong pagkakuha sa mga palid, nga usa ka gabii niana human siya mihigda nag-ampo siya sa Ginoo aron masayud kon kining mga butanga ingon ba gayud, ug ang Ginoo mipakita kaniya nga kini tinuod, apan iyang gitago ang tibuok sitwasyon nga sekreto, ug wala mohisgot niini ngadto sa usa ka tawo; mao nga human kini nga pinadayag gihatag, nasayud siya nga ang buhat tinuod, kay walay buhi nga binuhat ang nasayud sa butang nga gihisgutan diha sa pinadayag, apan ang Dios ug siya mismo” (History of the Church, 1:35).
Dapita ang mga estudyante sa paghinumdom og mga panahon nga ang Dios naglamdag sa ilang mga hunahuna o naghatag kanila og kalinaw. I-konsiderar ang pagdapit kanila sa pagsulat og pipila niini nga mga panumduman. Awhaga sila sa pagsalig sa personal nga pagpadayag nga ilang nadawat sa nanglabay nga panahon. Ipasabut nga ang sunod nga duha ka leksyon motabang kanila sa pagkat-on ug sa pag-ila sa mga tubag sa ilang mga pag-ampo.
Nagtambag ang Ginoo ni Joseph ug ni Oliver sa paghubad ug sa dili pagduha-duha o pagkahadlok
I-summarize ang Doktrina ug mga Pakigsaad 6:25–31 pinaagi sa pagpasabut nga ang Ginoo misulti ni Oliver nga kon siya nagtinguha, maangkon niya ang gasa sa paghubad ug mobarug uban ni Joseph isip ikaduhang saksi sa Basahon ni Mormon.
Kon ikaw pa si Oliver, unsa kaha nga mga pagbati ang anaa kanimo sa imong pagkadungog sa responsibilidad nga gibutang sa Ginoo diha kanimo?
Hangyoa ang mga estudyante sa paghunahuna bahin sa mga panahon sa dihang mibati sila og pagduha-duha o kahadlok mahitungod sa gusto nga ipabuhat kanila sa Ginoo. Dapita ang mga estudyante sa pagbasa og hilum sa Doktrina ug mga Pakigsaad 6:32–37 ug sa pagpangita kon giunsa sa Ginoo pagtambag si Joseph ug si Oliver sa pagbuntog sa pagduha-duha ug kahadlok samtang sila nagpadayon sa Iyang buhat.
Unsa nga mga kamatuoran o mga baruganan gikan niini nga tambag ang atong magamit sa atong mga kinabuhi? (Ang mga estudyante mahimong mosugyot og lain-laing mga baruganan, apan siguroa sa paghatag og gibug-aton nga samtang kita motan-aw ngadto ni Jesukristo, makabuntog kita sa pagduha-duha ug kahadlok.)
Unsa ang pipila ka mga ehemplo sa unsa nga paagi ang usa ka tawo mahimong motan-aw ngadto ni Kristo sa kada hunahuna?
Dapita ang pipila ka mga estudyante sa pagpakigbahin og mga kasinatian nga sila aduna sa diha nga ang ilang kahibalo sa Manluluwas mitabang kanila sa pagbuntog sa pagduha-duha o kahadlok. Mahimo ka usab nga mopakigbahin og kaugalingon nimong kasinatian.
Gisaaran si Juan nga Hinigugma nga siya mabuhi ug magdala og mga kalag ngadto ni Kristo hangtud sa Ikaduhang Pag-anhi
Pahinumdom: Walay gipadayag mahitungod sa mga detalye sa pangalagad ni Juan isip usa ka nabalhin sa pagkahimaya nga binuhat. Ayaw pangagpas mahitungod sa mga kalihokan o mga nabuhat ni Juan.
Ipasabut nga sa mga panahon sa Abril 1829, samtang si Oliver nagtabang ni Joseph sa paghubad, siya ug si Joseph may “kalainan og opinyon … mahitungod sa istorya ni Juan ang Apostol, nga gihisgutan diha sa Bag-ong Tugon [tan-awa sa Juan 21:20–23] … , kon siya namatay, o nagpadayon siya nga [buhi]” (Histories, Bol 1: 1832–1844, bol. 1 sa Histories nga mga serye sa The Joseph Smith Papers [2012], 284).
Dapita ang mga estudyante sa pagbasa sa Doktrina ug mga Pakigsaad 7:1–3 aron sa pagdiskubre sa tubag sa pangutana ni Joseph ug Oliver. (Kon maglisud ang mga estudyante sa pag-ila sa tubag, mahimo nimong isugyot nga basahon nila ang summary sa seksyon alang sa Doktrina ug mga Pakigsaad 7:1–3.)
Gihulagway ni Elder Richard G. Scott sa Korum sa Napulog Duha ka mga Apostoles ang panginahanglan alang sa pag-ampo ug sa unsa nga paagi mailhan ang mga tubag gikan sa Dios:
Imahe
Elder Richard G. Scott
“Ang pag-ila sa mga tubag sa pag-ampo usahay lisud kaayo. Usahay sa dili maalamong paagi mosulay kita sa pag-atubang sa kinabuhi nga nagsalig sa atong kaugalingong kasinatian ug kapasidad. Mas maalamon alang nato sa pagpangita pinaagi sa pag-ampo ug balaang inspirasyon aron mahibalo unsay buhaton. Ang atong pagkamasulundon nagsiguro nga kon kinahanglan, kita makabaton sa balaang gahum sa pagtuman og dinasig nga katuyoan.
“Sama sa kadaghanan nato, si Oliver Cowdery wala makaila sa ebidensya sa mga tubag sa pag-ampo nga nahatag na sa Ginoo. …
Si Elder David A. Bednar sa Korum sa Napulog Duha ka mga Apostoles nakigbahin og panabut kalabut sa unsaon pag-ila og personal nga pagpadayag:
Imahe
Elder David A. Bednar
“Tingali dili kita makakita og mga anghel, makadungog og langitnong mga tingog, o makadawat og hilabihan nga mga espirituhanong mga hunahuna. … Apan samtang kita nagtahud sa atong mga pakigsaad ug nagsunod sa mga sugo, samtang kita kanunay gayud nga naningkamot sa pagbuhat og maayo ug mahimo nga mas maayo, makalakaw kita uban ang pagsalig nga ang Dios mogiya sa atong mga lakang. …
“… Usahay ang espiritu sa pagpadayag molihok diha-diha dayon ug sa hilabihan, sa uban nga mga panahon sa hinay ug inanay, ug sa kasagaran sa malumo nga kamo mahimo nga dili gani makamatikod niini. Apan sa walay pagsapayan sa sumbanan diin kini nga panalangin nadawat, ang kahayag nga gihatag niini mosanag ug mopatubo sa inyong kalag, molamdag sa inyong salabutan (tan-awa sa Alma 5:7; 32:28ug motudlo ug mopanalipod kaninyo ug sa inyong pamilya” (“Ang Espiritu sa Pagpadayag ,”Liahona, Mayo 2011, 90).