Ang Doktrina ug mga Pakigsaad 121:34–46 mao ang usa ka porsyon sa dinasig nga sulat ni Joseph Smith gikan sa Liberty Jail. Niini nga porsyon sa sulat, nagtudlo ang Propeta og mga baruganan mahitungod sa gahum ug awtoridad sa priesthood. Gipasabut niya nganong daghan ang gitawag apan pipila lamang ang gipili ug sa unsang paagi nga ang mga naghupot sa priesthood makasangpit sa mga gahum sa langit aron moserbisyo sa uban.
Gitudlo ni Joseph Smith nga ang katungod sa priesthood dili mabulag gikan sa mga gahum sa langit
Ipakita ang usa ka lampara nga wala nasaksak ang power plug. Siguroha nga ang switch sa lampara anaa sa “pawong” nga pagkabutang mao nga dili kini mosiga kon ang power plug isuksok na sa kuryente. Kon dili ka makadala og lampara, i-drowing ang kauban nga diagram (nga walay mga pulong) sa pisara.
Imahe
lamp diagram
Ipasabut nga sa leksyon karon, ang lampara nagrepresentar sa usa ka naghupot sa priesthood. Ang kahayag gikan sa lampara nagrepresentar sa mga panalangin nga madawat sa mga tawo gikan sa Dios pinaagi sa pagserbisyo sa usa ka naghupot sa priesthood. Kon ikaw dunay nadala nga lampara, butangi kini og ngalan nga Naghupot sa priesthood. Kon dili, isulat kining mga pulong sa tukma nga dapit diha sa diagram.
Samtang magsugod ang mga estudyante sa ilang pagtuon sa Doktrina ug mga Pakigsaad 121:34–46 karon, hangyoa sila sa pagkonsiderar kon sa unsang paagi nga ang personal nga pagkamatarung sa usa ka naghupot sa priesthood makaapekto sa iyang abilidad sa pagtabang sa ubang tawo aron makadawat sa mga panalangin sa priesthood. Ipasabut nga bisan kon kining mga bersikulo gitumong ngadto sa mga naghupot sa priesthood, naglangkob kini og mga baruganan nga magamit sa tanang miyembro sa Simbahan.
Pahinumdumi ang mga estudyante nga ang Doktrina ug mga Pakigsaad 121 naglangkob sa mga porsyon sa usa ka dinasig nga sulat nga gidiktar ni Joseph Smith sa dihang didto siya sa Liberty Jail. Dapita ang usa ka estudyante sa pagbasa og kusog sa Doktrina ug mga Pakigsaad 121:34. Hangyoa ang klase sa pagbantay sa pangutana diha niini nga bersikulo.
Aron matabangan ang mga estudyante nga makapamalandong ug makahisgot kon unsay gipasabut alang sa usa ka naghupot sa priesthood nga “gitawag” ug “gipili,” dapita ang usa ka estudyante sa pagbasa og kusog sa mosunod nga pamahayag nga gihimo ni Presidente James E. Faust sa Unang Kapangulohan ngadto sa mga naghupot sa priesthood:
Imahe
President James E. Faust
“Gitawag kita sa dihang gipandong ang mga kamot sa atong mga ulo ug gihatagan sa priesthood, pero dili kita mapili hangtud makapakita kita ngadto sa Dios sa atong pagkamatarung, sa atong pagkamatinud-anon, ug sa atong pasalig” (“Gitawag ug Gipili,”Liahona, Nob. 2005, 55).
Sumala ni Presidente Faust, unsay gipasabut alang sa usa ka batan-ong lalaki nga “gitawag”?
Ipasabut nga ang “gitawag” dili pareho sa “gipili.” Aron mahimong usa sa “gipili” sa Dios, ang naghupot sa priesthood kinahanglang magpakabuhi gayud sa paagi nga makapahimo kaniya sa pagsangpit sa mga gahum sa langit sa pagtabang sa uban aron makadawat sa mga panalangin sa priesthood.
Ipasabut nga diha sa Doktrina ug mga Pakigsaad 121:35–39, atong makat-unan nganong ang pipila ka naghupot sa priesthood wala mapili. Dapita ang usa ka estudyante sa pagbasa og kusog sa Doktrina ug mga Pakigsaad 121:35–36. Hangyoa ang klase sa pagsunod, nga mangita sa usa ka leksyon nga kinahanglang makat-unan sa matag naghupot sa priesthood.
Sumala sa bersikulo 36, unsa nga leksyon ang kinahanglang makat-unan sa matag naghupot sa priesthood?
Aron matabangan ang mga estudyante nga makasabut sa leksyon diha sa bersikulo 36, i-refer ngadto sa tinubdan sa kuryente sa classroom o sa diagram diha sa pisara.
Unsa kaha nga mga pulong diha sa bersikulo 36 ang girepresentar sa kuryente? (“Ang mga gahum sa langit.” Isulat ang Mga gahum sa langit diha sa pisara sunod sa hulagway sa outlet, o butangi og ngalan ang aktwal nga tinubdan sa kuryente.)
Sa bersikulo 36, unsa kaha ang gipasabut sa “katungod sa pagkapari [priesthood]”? (Ang mga tubag sa mga estudyante kinahanglang mopahayag nga ang usa ka tawo makadawat sa katungod sa paggamit sa priesthood kon itugyan ang awtoridad sa priesthood nganha kaniya pinaagi sa pagpandong sa mga kamot.)
Butangi og ngalan ang cord og Awtoridad sa priesthood. Kon nag-display ka og lampara, dapita ang usa ka estudyante sa pag-plug sa cord ngadto sa tinubdan sa kuryente.
Nganong wala man mosiga ang lampara? (Tungod kay gi-turn off ang switch.)
Unsa kaha nga mga pulong diha sa bersikulo 36 ang matandi ngadto sa switch? (“Sa mga baruganan sa pagkamatarung.” Ipasabut nga kini nga mga pulong nagpasabut sa responsibilidad sa mga naghupot sa priesthood nga magpakabuhi sa matarung nga paagi.)
Butangi og ngalan ang switch og Mga baruganan sa pagkamatarung. Dapita ang usa ka estudyante sa pag-turn on sa switch.
Niini nga analohiya, sa unsang paagi nga ang pagpakabuhi sa matarung nga paagi susama sa pag-turn on sa switch?
Dapita ang mga estudyante sa pagsulti diha sa kaugalingon nilang mga pulong ang usa ka baruganan gikan sa bersikulo 36. I-summarize ang ilang mga tubag pinaagi sa pagsulat sa mosunod nga baruganan—o morag susama niini—diha sa pisara: Ang mga naghupot sa priesthood makasangpit sa mga gahum sa langit kon magpakabuhi lamang sila sa matarung nga paagi. Mahimo nimong isugyot nga isulat sa mga estudyante kini nga baruganan diha sa ilang mga kasulatan.
Dapita ang usa ka estudyante sa pagbasa og kusog sa Doktrina ug mga Pakigsaad 121:37–38. Hangyoa ang klase sa pagsunod, nga mangita kon unsay mahitabo sa ablildad sa naghupot sa priesthood sa pagsangpit sa mga gahum sa langit kon dili siya magpakabuhi sa matarung nga paagi.
Unsay mahitabo kon ang usa ka naghupot sa priesthood dili magpakabuhi sa matarung nga paagi? (Ang gahum sa langit mobiya, ug ang iyang awtoridad mawalay pulos. Mahimo nimong ipasabut nga ang mga pulong nga “pagpatid batok sa mga tunokon” nagpasabut sa usa ka hayop nga molighut sa usa ka hait nga nipis nga kahoy [stick] nga gigamit sa paggiya niini paingon sa gitinguha nga destinasyon. Alang kanato, kining mga pulong nagpasabut sa pagsupak sa direksyon gikan sa Ginoo o sa Iyang mga sulugoon.)
Aron matabangan ang mga estudyante nga makasabut sa baruganan diha sa pisara, dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Angawtoridad sa priesthood madawat pinaagi sa pag-orden; ang gahum sa priesthood madawat pinaagi sa pagkamatinud-anon ug masulundon nga pagpuyo sa pagtahud sa mga pakigsaad. Kini mapalambo pinaagi sa pagbansay ug paggamit sa priesthood diha sa pagkamatarung” (“Ang Gahum sa Priesthood,”Liahona, Mayo 2010, 9).
Isulat ang mosunod diha sa pisara:
Mopahuyang sa koneksyon Mopalig-on sa koneksyon
Dapita ang mga estudyante sa pagbasa og usab sa hilum sa mga bersikulo 35 ug 37, nga mangita sa dili matarung nga mga kinaiya ug mga lihok nga makapahuyang sa koneksyon sa naghupot sa priesthood ngadto sa mga gahum sa langit. Mahimo nimong isugyot nga ilang markahan kon unsay ilang makit-an. Human sa igong panahon, hangyoa sila sa pag-report sa unsay ilang nakit-an. Dapita ang usa ka estudyante nga magsilbing tigsulat, nga magsulat sa mga tubag ubos sa “Mopahuyang sa koneksyon.” Human malista ang mga tubag sa mga estudyante, basaha ang mosunod nga mga ehemplo. Alang sa matag ehemplo, hangyoa ang mga estudyante sa pagtino sa mga kinaiya ug mga lihok nga ilang gilista diha sa pisara.
Aron mohaum sa pipila sa iyang sikat nga mga kauban, usa ka naghupot sa priesthood ang miapil nila sa pagbugal-bugal sa usa ka classmate diha sa eskwelahan.
Usa ka teachers quorum president ang ganahan og sports, ug mibalibad siya nga moapil sa pagplano og bisan unsang kalihokan sa korum nga dili maglakip sa soccer o basketball. Sa higayon nga ang korum moapil og usa ka kalihokan o mohatag og serbisyo, mo-demand siya nga buhaton sa ubang mga young men kon unsay iyang isulti tungod kay siya ang presidente sa korum.
Unsa ang pipila ka ehemplo sa mga tawo nga misulay sa pagtabon sa ilang mga sala?
Unsa ang pipila ka mga ehemplo sa mga tawo nga mipahimutang sa ilang mga kasingkasing diha sa mga butang sa kalibutan, ug nagtinguha sa mga pasidungog sa mga tawo?
Ngano kaha nga kining mga kinaiya ug mga lihok makapugong man sa mga naghupot sa priesthood sa pagsangpit sa mga gahum sa langit?
Dapita ang usa ka estudyante sa pagbasa og kusog sa Doktrina ug mga Pakigsaad 121:39–40, ug hangyoa ang klase sa pagpangita og rason nganong ang ubang mga tawo mohimo og dili matarung nga kamandoan. Ipareport nila kon unsay ilang makit-an.
Base sa unsay inyong nakat-unan gikan sa Doktrina ug mga Pakigsaad 121:34–40, unsaon man ninyo pag-summarize nganong daghan ang gitawag apan pipila lamang ang gipili?
Nagtudlo si Joseph Smith kon unsaon pagpahimutang sa mga naghupot sa priesthood ang ilang kaugalingon
Ipasabut nga human magtudlo mahitungod sa mga kinaiya ug mga lihok nga makapahuyang sa koneksyon tali sa mga naghupot sa priesthood ug sa mga gahum sa langit, gitudlo ni Joseph ang mahitungod sa mga kinaiya ug mga lihok nga makapalig-on niana nga koneksyon. Bahina ang klase ngadto sa mga parisan, ug hangyoa sila sa pagbasa sa Doktrina ug mga Pakigsaad 121:41–45 nga magdungan. Hangyoa sila sa pagpangita sa mga kinaiya ug mga lihok makatabang sa mga naghupot sa priesthood sa pagsangpit sa mga gahum sa langit aron makatabang sa ubang tawo. (Sa dili pa sila mobasa, mahimo nimong ipasabut nga diha sa bersikulo 41, ang pulong nga lamang nagpasabut og “gawas.”)
Human sa igong panahon, hangyoa ang mga estudyante sa pag-report sa unsay ilang nakit-an. Dapita ang usa ka estudyante nga magsilbing tigsulat, nga magsulat sa mga tubag ubos sa “Mopalig-on sa koneksyon.” Samtang maglista ang mga estudyante sa mga baruganan sa pagkamatarung, mahimo nimo silang hangyoon sa pagpasabut o paghatag og mga ehemplo sa matag baruganan. Kon gikinahanglan, ipangutana ang mosunod:
Unsa kaha ang gipasabut sa pagbuhat uban sa tiunay nga paghigugma ug walay pagpakaaron-ingnon o walay pagpanglimbong? (Ang mga tubag mahimong maglakip nga nagpasabut kini sa sinsero ug tinud-anay nga paghigugma sa mga tawo ug pagbaton og matarung nga mga tinguha.) Ngano nga kining mga kinaiya importante man alang sa mga naghupot sa priesthood?
Diha sa bersikulo 43, ang pulong nga pagpanton nagpasabut sa buhat sa pagsulti sa usa ka tawo nga siya naghimo og sayop nga butang, kasagaran sa malumo o mabinationg paagi. Ang pulong nga sa tukma nga panahon nagpasabut og “sayo” o “sa sakto nga panahon.” Ang pulong nga tuman nga kahigpit mahimong magpasabut sa panginahanglan nga mopahayag og klaro sa atong kaugalingon. Ngano kaha nga importante alang sa usa ka naghupot sa priesthood nga klarong mopanton, sa sakto nga panahon, ug sumala sa giya sa Espiritu Santo? Ngano kaha nga importante nga mopakita og dugang nga paghigugma human mopanton sa usa ka tawo? Kanus-a kamo nakadawat og kaayohan gikan sa pagdawat sa maong pagkorihir?
Unsa kaha ang buot ipasabut sa himoa ang inyong mga kasingkasing nga mapuno sa gugma nga putli ngadto sa tanan nga mga tawo? (Tan-awa sa bersikulo 45.) Ngano kaha nga importante alang sa naghupot sa priesthood nga magmalumo ug magmabination sa ilang pakig-inter-aksyon sa uban?
Unsa kaha ang gipasabut sa himoon ang hiyas nga modayan-dayan sa atong mga hunahuna nga walay paghunong? (Tan-awa sa bersikulo 45.) Unsa ang pipila ka butang nga atong mahimo aron mapabilin ang atong mga hunahuna nga mahiyason?
Ngano kaha nga ang mga naghupot sa priesthood kinahanglang mosunod niining mga baruganan sa pagkamatarung aron makasangpit sa mga gahum sa langit?
Ipasabut ang pulong nga unya diha sa bersikulo 45. Ipasabut nga kini nga pulong nagtunong ngadto sa mga resulta sa pagpakabuhi sumala sa mga baruganan sa pagkamatarung nga makita diha sa mga bersikulo 41–45. Dapita ang usa ka estudyante sa pagbasa og kusog sa Doktrina ug mga Pakigsaad 121:45–46. Hangyoa ang klase sa pagsunod, nga mangita sa mga panalangin nga moabut ngadto sa mga naghupot sa priesthood kinsa misangpit sa mga gahum sa langit pinaagi sa pagpakabuhi sa matarung nga paagi. (Sa dili pa mobasa ang usa ka estudyante, mahimo nimong ipasabut nga ang usa ka setro [scepter] mao ang usa ka tungkod [staff] nga dad-on sa hari o rayna. Usa kini ka simbolo sa awtoridad ug gahum.)
Unsa ang pipila ka panalangin sa pagpakabuhi pinaagi sa mga baruganan sa pagkamatarung?
Hunahunaa ang usa ka naghupot sa priesthood nga inyong nailhan kinsa nagpakabuhi sa paagi nga nakatabang kaniya aron makasangpit sa mga gahum sa langit. Sa unsang paagi nga kamo napanalanginan pinaagi sa iyang pagserbisyo?
Ipakigbahin ang imong pagpamatuod mahitungod sa mga panalangin nga imong nadawat pinaagi sa awtoridad sa priesthood ug gahum sa priesthood. Dapita ang mga estudyante sa pagpakigbahin usab sa ilang mga pagpamatuod. Dapita sila sa pagpili og usa ka baruganan sa pagkamatarung nga nahisgutan diha sa Doktrina ug mga Pakigsaad 121:41–45 ug sa pagtakda og tumong nga mas mosunod niana nga baruganan.
Si Elder David A. Bednar sa Korum sa Napulog Duha ka mga Apostoles mihatag og gibug-aton sa panginahanglan nga ang mga naghupot sa priesthood mosunod aron makaangkon sila sa parehong awtoridad ug gahum sa priesthood:
Imahe
Elder David A. Bednar
“Ang gahum sa priesthood mao ang gahum sa Dios nga naglihok pinaagi sa kalalakin-an sama nato ug nagkinahanglan og personal nga pagkamatarung, kamatinud-anon, kamasulundon, ug kakugi. Ang usa ka lalaki mahimong modawat sa awtoridad sa priesthood pinaagi sa pagpandong sa mga kamot apan walay gahum sa priesthood kon siya masinupakon, dili takus, o dili andam nga moserbisyo. …
“… Ang mga naghupot sa priesthood nga mga batan-on ug mga tigulang parehong nagkinahanglan sa awtoridad ug gahum—ang gikinahanglan nga pagtugot ug ang espirituhanong kapasidad sa pagrepresentar sa Dios diha sa buhat sa kaluwasan” (“Ang mga Gahum sa Langit,”Liahona, Mayo 2012, 49).
Si Elder David A. Bednar sa Korum sa Napulog Duha ka mga Apostoles mitudlo:
Imahe
Elder David A. Bednar
“Ang mahimo o pagkahimo nga pinili dili eksklusibong kahimtang nga gihatag kanato. Hinoon, kamo ug ako sa katapusan ang modeterminar kon kita gipili. …
“Nagtuo ako nga ang implikasyon niini nga mga bersikulo [D&P 121:34–35] tinuod gayud. Ang Dios walay listahan sa mga paborito diin maglaum kita nga ang atong mga ngalan sa umaabut nga adlaw madugang. Wala Siya maglimit ‘sa pinili’ ngadto sa pipila lamang. Apan, ang atong mga kasingkasing ug ang atong mga tinguha ug ang atong pagkamasulundon diin sa klaro mopiho kon kita maihap ba nga usa sa mga pinili sa Dios” (“Ang Malumo nga mga Kalooy sa Ginoo,”Liahona, Mayo 2005, 101).
“Tingali kinahanglan natong ikonsiderar kon unsay gipasabut sa pagpanton uban ang tuman nga kahigpit. Ang pagpanton uban ang tuman nga kahigpit nagpasabut og pagpanton nga klaro, uban sa mahigugmaong pagkahigpit, uban sa tinuoray nga katuyoan. Wala kini magpasabut og pagpanton uban sa pagbugal-bugal, o uban sa kasagmuyo, o uban sa kasuko ug dako nga tingog. Ang usa ka tawo nga nagpanton sigun sa gisugo sa Ginoo mohimo niini pinaagi sa mga baruganan, dili sa mga personalidad. Dili siya modaut sa tawo o mopakaubos sa usa ka indibidwal.
“Sa hapit tanang sitwasyon diin gikinahanglan ang pagkorihir, ang pagpanton diha sa pribado mas labaw pa kay sa pagpanton diha sa publiko. Gawas kon ang tibuok ward ang kinahanglang badlungon, mas maayo sa usa ka bishop nga makigsulti sa indibidwal kay sa mogamit sa tiningub nga pamaagi. Sa samang paagi, ang usa ka anak o kapikas adunay katungod nga sultihan sa pribadong paagi bahin sa mga sayop. Ang pagkorihir diha sa publiko kasagaran mapintas o, maingon nato nga, walay giya” (“Unrighteous Dominion,” Ensign, Hulyo 1989, 10).