Materyal sa Pagpangandam alang sa Home-Study Teacher
Summary sa Daily Home-Study nga mga Leksyon
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang nagtuon sila sa “Ang Simbahan Gibalhin ngadto sa Amihanang bahin sa Missouri” ug Doktrina ug mga Pakigsaad 113–120 (unit 25) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Day 1 (Ang Simbahan Gibalhin ngadto sa Amihanang bahin sa Missouri)
Samtang ang mga estudyante nagtuon mahitungod sa mga panghitabo nga misangput sa pagbalhin sa punoang buhatan sa Simbahan ngadto sa amihanang bahin sa Missouri, ilang nakat-unan nga kon kita mopili sa pagtubag sa atong mga pagsulay inubanan sa hugot nga pagtuo imbis pagduha-duha, ang atong mga pagpamatuod mahimong malig-on. Nakat-unan usab nila nga kon kita mosuporta sa propeta ug mosunod sa iyang tambag, makadawat kita og espirituhanon nga kasiguroan nga mobugkos kanato ngadto sa Dios. Nadiskubrihan sa mga estudyante nga kon kita mopasaylo sa uban, ang Ginoo makahimo sa pag-ayo sa atong mga relasyon. Agig dugang, kini nga leksyon nakahatag sa mga estudyante og usa ka oportunidad sa pagkonsiderar kon sa unsang paagi nga ang atong mga lihok ug mga pulong makaimpluwensya sa pagtan-aw sa ubang tawo sa Simbahan ni Jesukristo.
Sa wala madugay human sa pag-abut sa Far West, Missouri, si Propeta Joseph Smith gihangyo sa paghatag og katin-awan sa pipila ka lisud nga mga tudling sa basahon ni Isaias. Gikan sa gipadayag nga mga tubag sa Ginoo ngadto niining mga pangutana, nakat-unan sa mga estudyante nga si Joseph Smith nakadawat sa mga yawe sa gingharian alang sa pagpundok sa Israel sa katapusang mga adlaw. Samtang gitun-an sa mga estudyante ang kabahin ni David W. Patten, usa sa unang mga Apostoles, ilang nadiskubrihan nga kon mopatalinghug kita sa direksyon sa Ginoo, maandam kita alang sa bisan unsa nga Iyang giplano alang kanato.
Dinhi niining leksyon, nakat-unan sa mga estudyante nga kon kita motindog ug mopakita, ang atong kahayag mahimong sumbanan alang sa mga nasud. Nadiskubrihan usab nila nga kadtong nanagpundok ngadto sa mga stake sa Zion mahimong makadawat og pagpanalipod ug seguridad ug nga ang Presidente sa Simbahan naghupot sa mga yawe sa paggiya sa buhat sa Ginoo dinhi sa yuta.
Gikan sa tambag sa Ginoo ngadto ni Newel K.Whitney ug William Marks kalabut sa kabtangan didto sa Kirtland, Ohio, nakat-unan sa mga estudyante nga ang pagkasina sa temporal nga mga butang maoy hinungdan nga mabaliwala nato ang mas importanting mga butang. Gikan sa ehemplo ni Oliver Granger, ilang nakat-unan nga ang mga sakripisyo nga atong gihimo diha sa pagserbisyo sa Ginoo sagrado ngadto Kaniya.
Pasiuna
Kini nga leksyon makatabang sa mga estudyante nga masabtan ang balaod sa ikapulo ug ang mga panalangin nga moabut kon kita mosunod niining balaod.
Isulat ang mosunod nga pangutana diha sa pisara: Sa unsa nga mga paagi nga kita mapanalanginan kon mosunod kita sa balaod sa ikapulo?
Ipasabut nga sa sinugdanang bahin niadtong 1837, ang Simbahan nakasinati og dakong kalisdanan sa panalapi, ingon man ang daghang indibidwal nga mga miyembro sa Simbahan. Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 119. Hangyoa ang klase sa pagsunod, nga mangita kon unsay gipangutana ni Joseph Smith nga misangput ngadto niining pagpadayag.
Unsa man ang gipangutana ni Joseph Smith sa Ginoo?
Dapita ang usa ka estudyante sa pagbasa og kusog sa Doktrina ug mga Pakigsaad 119:1–4. Hangyoa ang klase sa pagsunod, nga mangita kon unsay tubag sa Ginoo sa hangyo ni Joseph.
Sumala sa bersikulo 4, unsa man ang ikapulo? (Ang mga estudyante kinahanglang mahibalo sa mosunod nga sugo: Gimanduan kita sa Ginoo nga mobayad og ikanapulo sa tanan natong abut ngadto Kaniya isip ikapulo. Mahimo nimong isulat kini nga sugo diha sa pisara.)
Aron matabangan ang mga estudyante nga makasabut sa kahulugan sa pulong nga tubo diha sa bersikulo 4, dapita ang usa ka estudyante sa pagbasa og kusog sa mosunod nga pamahayag ni Presidente Howard W. Hunter:
Imahe
Presidente Howard W. Hunter
“Ang balaod yano nga gipahayag isip ‘ikanapulo sa tanan nilang tubo.’ Ang tubo nagpasabut sa ganansya, sweldo, usbaw. Kini sweldo sa usa ka tawo nga nagtrabaho, ang ganansya sa pagpadagan og negosyo, ang ganansya sa usa ka tawo kinsa nananom o nangani, o ang kinitaan sa usa ka tawo gikan sa bisan unsang uban nga tinubdan. Ang Ginoo miingon nga kini usa ka balaod sa ‘kahangturan’ ingon nga kini gihimo kaniadto pa” (sa Conference Report, Abr. 1964, 35).
Unsa ang inyong nakat-unan gikan sa pagmando sa Ginoo sa mga Santos sa pagbayad sa ikapulo atol sa usa ka panahon sa dihang lisud alang kanila ang pagbuhat sa ingon?
Sa unsa nga mga paagi nga ang pagbayad sa ikapulo usa ka buhat sa hugot nga pagtuo?
Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan:
Imahe
President James E. Faust
“Nganong ang mga miyembro sa tibuok kalibutan, nga ang kadaghanan mahimong walay ikapaigo sa ilang inadlaw-adlaw nga panginahanglan, nga awhagon sa pagsunod sa balaod sa Ginoo nga mao ang ikapulo? Sumala sa gipamulong ni Presidente Hinckley sa Cebu didto sa Isla sa Pilipinas, kon ang mga miyembro ‘bisan ang mga nagpuyo sa kawad-on ug katimawa … modawat sa ebanghelyo ug mosunod niini, mobayad sa ilang ikapulo ug mga halad, bisan kadtong ginagmay, … sila adunay makaon ug saput nga ikasul-ob ug sila dunay kapasilungan. Wala koy laing nakita nga laing solusyon’ [“Inspirational Thoughts,” Ensign, Ago. 1997, 7].
“Ang uban tingali mobati nga dili sila makahimo sa pagbayad sa ikapulo, apan ang Ginoo misaad nga Siya moandam og paagi para atong masunod ang tanan Niyang mga sugo [tan-awa sa 1 Nephi 3:7]. Ang pagbayad sa ikapulo nagkinahanglan og dako gayud nga pagtuo sugod sa sinugdanan. Nagtuo ko nga posible ang paglingkawas gikan sa kawad-on pinaagi sa pagbaton og hugot nga pagtuo nga ibalik ngadto sa Ginoo ang bahin nianang gamay nga anaa kanato” (“Opening the Windows of Heaven,” Ensign, Nob. 1998, 59).
Aron matabangan ang mga estudyante nga makasabut kon unsaon pagbayad sa ikapulo, i-display ang usa ka porma sa Ikapulo ug Uban pang mga Halad. Hangyoa ang mga estudyante sa paghunahuna nga bag-o lang silang nakaangkon og kwarta. Dapita ang usa ka estudyante sa pagsugyot og kantidad.
Pila may ikapulo ang kinahanglang ibayad nianang kantidad sa kwarta?
Irekord ang kantidad sa ikapulo diha sa hustong dapit sa porma ug ipangutana ang mosunod:
Kon bahinon nato ang 10 porsyento sa atong kinitaan sa lain-laing mga kategoriya sa donasyon diha sa porma, nakabayad ba kita og hingpit nga ikapulo? (Siguroa nga ang mga estudyante makasabut nga ang 10 porsyento sa ilang kinitaan kinahanglang ilista isip ikapulo. Ang bisan unsang mga donasyon nga ilang himoon sa ubang mga pundo dugang lamang ngadto nianang 10 porsyento.)
Ipares-pares ang mga estudyante. Hangyoa sila sa pagpasabut ngadto sa usag usa sa ilang nasabtan kon sa unsang paagi gigamit ang mga pundo sa ikapulo. Dayon dapita sila sa pagbasa sa pagpasabut sa Ginoo diha sa Doktrina ug mga Pakigsaad 119:2.
Sumala sa bersikulo 2, asa gamiton ang mga pundo sa ikapulo? (Ang ikapulo gamiton “alang sa pagtukod sa balay [sa Ginoo]” [pagtukod og mga templo] ug “alang sa pagpahimutang sa pundasyon sa Zion ug alang sa priesthood” [pagpundo sa ubang mga aspeto sa buhat sa Ginoo, sama sa pagtukod ug pagmintenar sa mga meetinghouse, paghubad ug pagmantala sa mga kasulatan, ug pagsuporta sa misyonaryo ug family history nga buhat sa tibuok kalibutan]. Mahimo nimong ipasabut nga karon wala nay utang ang Simbahan. Isulat ang mosunod nga kamatuoran diha sa pisara: Ang mga pundo sa ikapulo gigamit aron sa pagtukod og mga templo ug sa pagtuman sa buhat sa Ginoo.)
Dapita ang duha ka estudyante sa pag-apil sa role play. I-assign ang usa ka estudyante sa pag-arte isip matinud-anon nga miyembro sa Simbahan, samtang ang ikaduha nga estudyante modala sa papel sa usa ka tawo nga dili miyembro sa Simbahan. Hatagi ang ikaduhang estudyante og usa ka piraso nga papel nga gisulatan sa mosunod nga pangutana: Nakadungog ko nga mohatag kuno mo og 10 porsyento sa inyong kinitaan ngadto sa inyong simbahan. Nganong gusto man kamo nga mobuhat niana?
Hangyoa ang ikaduhang estudyante sa pagbasa og kusog sa pangutana, ug dapita ang unang estudyante sa pagtubag. Human sa role play, pangutan-a ang klase kon unsa kaha unta ang ilang reaksyon. Ipasabut nga dunay daghang maayo nga tubag niini nga pangutana.
Dapita ang usa ka estudyante sa pagbasa og kusog sa Doktrina ug mga Pakigsaad 119:6–7. Hangyoa ang klase sa pagsunod, nga mangita kon unsay matuman pinaagi sa pagkamasulundon ngadto sa balaod sa ikapulo.
Sumala sa bersikulo 6, unsa may natuman pinaagi sa pagkamasulundon ngadto sa balaod sa ikapulo? (Ang pagbalaan sa yuta sa Zion ngadto sa Ginoo.)
Aron matabangan ang mga estudyante nga makasabut niining bersikulo, ipasabut nga ang pagkabalaan nagpasabut nga mahimong gawasnon gikan sa sala—putli, limpyo, ug balaan pinaagi sa Pag-ula ni Jesukristo. Agig dugang, pahinumdumi ang mga estudyante nga ang Zion mas labaw pa kay sa pisikal nga lokasyon; katawhan kini kinsa “putli og kasingkasing” (D&P 97:21).
Dapita ang mga estudyante sa pag-summarize sa mga epekto sa pagsunod sa balaod sa ikapulo sa ilang kaugalingong mga pulong. Bisan og ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga baruganan: Ang pagbayad og ikapulo mopabalaan kanato isip mga indibidwal ug isip usa ka Simbahan.
Aron matabangan ang mga estudyante nga makasabut ug mobati sa kaimportante niini nga baruganan, ipangutana ang mosunod:
Sa unsa kaha nga mga paagi nga ang pagbayad sa ikapulo makatabang sa usa ka tawo nga mabalaan?
I-refer ngadto sa pangutana diha sa pisara: Sa unsa nga mga paagi nga kita mapanalanginan kon mosunod kita sa balaod sa ikapulo? Mahimo nimong dapiton ang mga estudyante sa pagpakigbahin og usa ka kasinatian ug mohatag sa ilang pagpamatuod sa balaod sa ikapulo. Mahimo usab nimong kining buhaton. Awhaga ang mga estudyante sa paggamit sa hugot nga pagtuo pinaagi sa paghalad sa 10 porsyento sa ilang tubo isip ikapulo ngadto sa Ginoo.
Dapita ang estudyante sa paghunahuna mahitungod sa mga pagsulay nga ilang nasinati ug unsay ilang nakat-unan gikan niadtong mga kasinatian. Unsay inyong bation kon kamo giakusahan og bakak nga pasangil ug gibilanggo? Ipasabut nga atol sa sunod semana ilang matun-an ang pipila ka mga baruganan nga nakat-unan ni Propeta Joseph Smith sa panahon sa iyang dili makiangayon nga pagkabilanggo didto sa Liberty Jail, lakip sa mga katuyoan sa Ginoo sa pagtugot nga makasinati kita og mga pagsulay.