Materyal sa Pagpangandam alang sa Home-Study Teacher
Summary sa Daily Home-Study nga mga Leksyon
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 41–44 (unit 10) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Gikan sa Doktrina ug mga Pakigsaad 41, nakat-unan sa mga estudyante nga ang Ginoo mahimuot sa pagpanalangin kanato kon maminaw kita ug mosunod Kaniya ug nga kita mahimong mga disipulo ni Jesukristo samtang gidawat nato ang Iyang mga balaod ug mosunod niini. Pinaagi sa pagtuon sa tawag ni Edward Partridge nga mahimong unang bishop sa Simbahan, nakat-unan usab sa mga estudyante nga ang mga bishop gitawag sa Dios, gipaluyohan pinaagi sa tingog sa mga miyembro, ug gi-orden pinaagi sa tukma nga awtoridad.
Ang Doktrina ug mga Pakigsaad 42 naila isip ang “balaod sa Simbahan.” Samtang ang mga estudyante nagtuon sa unang bahin sa balaod sa Simbahan, ilang nakat-unan nga kon kita mag-ampo inubanan sa hugot nga pagtuo, atong madawat ang Espiritu aron sa pagtabang kanato sa pagtudlo sa uban. Agig dugang, nakat-unan sa mga estudyante nga ang Espiritu Santo nasayud sa tanang butang ug nagpamatuod sa Amahan ug sa Anak. Lakip sa daghang mga balaod ug mga kasugoan nga natun-an dinhi niining bahin sa Doktrina ug mga Pakigsaad 42, gitun-an sa mga estudyante ang kamatuoran nga kon maibug kita ngadto sa laing tawo, nan gilimud nato ang pagtuo ug mawad-an sa Espiritu.
Samtang ilang gitun-an ug gitudlo ang mahitungod sa balaod sa Ginoo bahin sa pagpahinungod, nakat-unan sa mga estudyante nga kita kinahanglang moatiman sa mga kabus ug niadtong mga nanginahanglan ug nga samtang nagbuhat kita og kaayohan ngadto sa uban, gibuhat nato kini ngadto sa Ginoo. Nahibaloan usab sa mga estudyante ang baruganan nga kon mangayo kita, nan ang Ginoo mohatag kanato sa kahibalo nga makahatag kanato og kalinaw ug kalipay. Gitapos nila ang leksyon pinaagi sa pagkat-on nga ang mga sala nga gihimo sa tago angayang resolbahon sa tago.
Sa Doktrina ug mga Pakigsaad 43, nakat-unan sa mga estudyante nga ang Presidente lamang sa Simbahan ang makadawat og mga pagpadayag alang sa tibuok Simbahan. Nasabtan usab sa mga estudyante nga ang katuyoan sa mga miting sa Simbahan mao ang pagtudlo ug pagpalig-on sa usag usa ug nga kita angayang mahiusa sa atong mga kaugalingon sa pagbuhat sa mga kamatuoran nga atong nakat-unan. Human matun-an kon sa unsang paagi ang Ginoo mimando sa Iyang mga anak sa paghinulsol ug pag-andam sa ilang mga kaugalingon alang sa Ikaduhang Pag-anhi ni Jesukristo, nakat-unan sa mga estudyante nga atol sa Milenyum, si Satanas pagagapuson ug si Jesukristo maghari sa Iyang mga katawhan dinhi sa yuta.
Pasiuna
Niini nga leksyon, mag-focus ang mga estudyante sa mga pagtulun-an sa Ginoo sa Doktrina ug mga Pakigsaad 42 kabahin sa kamatayon ug pagkaayo, nga wala maapil sa home-study nga mga leksyon sa mga estudyante.
Ang Ginoo naghatag og tambag kalabut sa kamatayon ug pagkaayo
Sa usa ka kamot, paggunit og garapa o gamay nga sudlanan sa dinihugan nga lana sa oliba alang sa pagpangalagad sa masakiton; sa imong pikas kamot, paggunit og botelya sa tambal.
Unsa ang gamitan niining mga butanga?
Hain man niini ang angay natong saligan sa mga panahon nga masakit?
Human ang mga estudyante mopakigbahin sa ilang mga hunahuna, dapita ang usa ka estudyante sa pagbasa og kusog sa Doktrina ug mga Pakigsaad 42:43–44. Hangyoa ang klase sa pagpangita sa instruksyon sa Ginoo kabahin sa unsay atong masaligan sa mga panahon nga masakit. Aron matabangan ang mga estudyante nga makasabut niining mga bersikulo, tingali makatabang ang pagpasabut nga ang mga hilba ug humok nga pagkaon nga nahisgutan diha sa bersikulo 43 nagpasabut sa medikal nga pagpanambal nga kasagarang gidapat atol sa panahon nga kining pagpadayag nahatag.
Aron matabangan ang mga estudyante nga makasabut nga ang pagkaayo mahimong moabut pinaagi sa hugot nga pagtuo ug medikal nga pagpatambal, hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Samtang magbasa ang estudyante, dapita ang klase sa pagpaminaw kon sa unsang paagi ang pagkaayo moabut pinaagi sa hugot nga pagtuo ug medical science.
Imahe
Elder Dallin H. Oaks
“Ang mga Santos sa Ulahing mga Adlaw nagtuo sa paggamit sa labing maayo nga syentipikanhon nga kahibalo ug mga pamaagi. Naggamit kita og nutrisyon, ehersisyo, ug uban pang naandang buhaton sa pagreserba sa kahimsug, ug motagana sa kahimsug, ug atong gigamit gilakip ang panabang sa mga healing practioners, sama sa mga doktor ug mga tig-opera, sa pagpahiuli sa atong kahimsug.
“Ang paggamit sa medical science dili sukwahi sa atong mga pag-ampo sa pagtuo ug sa atong pagsalig diha sa mga panalangin sa priesthood. …
“Syempre dili kita maghulat hangtud nga ang tanang mga pamaagi magamit una pa kita mag-ampo inubanan sa pagtuo o mohatag og mga panalangin sa priesthood alang sa pag-ayo. Atol sa emerhensya, ang mga pag-ampo ug mga panalangin mag-una. Sa kasagaran dungan natong gamiton ang tanang mga paningkamot” (“Pag-ayo sa Masakiton,”Liahona, Mayo 2010, 47).
Ngano kaha nga importante man para nato nga mogamit sa pag-ampo ug sa mga panalangin sa priesthood ingon man sa medical nga pagtambal alang sa pag-ayo sa panahon nga masakit?
Sumala sa bersikulo 44, ang kada tawo ba nga masakit kinsa nakadawat og panalangin sa priesthood mamaayo?
Sultihi ang mga estudyante nga ang Ginoo mipasabut kon nganong ang uban kinsa nakadawat og mga panalangin sa priesthood mahimong dili maulian. Dapita ang usa ka estudyante sa pagbasa og kusog sa Doktrina ug mga Pakigsaad 42:48. Hangyoa ang klase sa pagsunod ug mangita sa mga baruganan nga nagdumala kon ang usa ka tawo mamaayo isip resulta sa panalangin sa priesthood.
Sumala sa bersikulo 48, unsa ang dakong hinungdan nga motino sa sangputanan sa usa ka panalangin sa priesthood? (Kon ang usa ka tawo adunay hugot nga pagtuo kang Jesukristo ug wala pa gitakda nga mamatay, mamaayo siya. Tingali kinahanglan nimong ipasabut nga ang mga pulong nga “wala pa gitakda nga mamatay” nagpasabut sa kamatuoran nga ang kamatayon o pagkaayo mahitabo sumala sa panahon, kaalam, ug kabubut-on sa Ginoo.)
Nganong dili man ang tanan nga nagbaton og hugot nga pagtuo ni Jesukristo ang mamaayo?
Nganong importante ang pagbaton og hugot nga pagtuo sa kabubut-on ug sa panahon sa Dios alang sa matag usa kanato?
Dapita ang mga estudyante sa pagtino og usa ka baruganan nga atong makat-unan gikan sa Doktrina ug mga Pakigsaad 42:48 mahitungod sa pagkaayo gikan sa atong mga balatian. Bisan og ang mga estudyante mahimong mogamit og lain-laing mga pulong, ang ilang mga tubag kinahanglang mopakita sa mosunod nga baruganan: Kon kita dunay hugot nga pagtuo ni Jesukristo, mamaayo kita sumala sa Iyang kabubut-on. Mahimo nimong isugyot nga markahan sa mga estudyante ang mga pulong sa bersikulo 48 nga nagtudlo niini nga baruganan.
Aron matabangan ang mga estudyante nga makasabut nga ang atong pagtuo kinahanglang masentro ngadto ni Jesukristo kay sa piho nga sangputanan nga atong gitinguha, hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Dapita ang klase sa pagpaminaw sa usa ka rason nganong importante nga ang atong pagtuo masentro ni Jesukristo.
Imahe
Elder Dallin H. Oaks
“Isip mga anak sa Dios, nga nasayud sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, mosalig kita Kaniya. Ang unang baruganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulugan og pagsalig. Akong gibati kana nga pagsalig sa usa ka pagpamulong nga gihatag sa akong ig-agaw sa panahon sa usa ka lubong sa batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdanan mipahingangha kanako ug dayon milig-on kanako: ‘Nasayud ako nga kabubut-on kadto sa Ginoo nga siya mamatay. Siya adunay maayo kaayo nga medikal nga pag-atiman. Gihatagan siya og mga panalangin sa priesthood. Ang iyang pangalan gibutang sa prayer roll sa templo. Siya ang gihisgutan sa gatusan ka mga pag-ampo aron mahimsog og balik. Ug nasayud ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayuna.’ Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangidaron. Siya mipahayag, ‘Ang hugot nga pagtuo sa among pamilya anaa kang Jesukristo, ug wala magdepende sa mga resulta.’ Kadto nga mga pagtulun-an mga tinuod gayud alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta” (“Pag-ayo sa Masakiton,” 50).
Giunsa man sa mga indibidwal nga gihisgutan ni Elder Oaks sa paggamit ang hugot nga pagtuo diha ni Jesukristo?
Usahay nagkinahanglan kini og mas dakong pagtuo nga makita ang usa ka minahal nga mamatay o mag-antus sa dugay nga pagkasakit kay sa makita nga sila nabuhi o naayo. Ngano kaha nga ingon man kini niini?
Ngano kaha nga importante man ang pagpakita og hugot nga pagtuo ni Jesukristo bisan og wala kita makadawat sa resulta nga atong gitinguha?
Pangutan-a ang mga estudyante kon nakaila ba sila og usa ka tawo nga namatay bisan og nagsunod sa tukmang medikal nga tambag ug nagtinguha og pagkaayo pinaagi sa pag-ampo ug sa mga panalangin sa priesthood. (Magmabinantayon gayud sa mga pagbati niadtong lagmit nakasinati niining sitwasyon.) Dapita ang usa ka estudyante sa pagbasa og kusog sa Doktrina ug mga Pakigsaad 42:45–47. Hangyoa ang klase sa pagsunod, nga mangita sa mga pulong nga tingali makahupay sa tawo nga nakasinati nga namatyan sa usa ka minahal.
Ang bersikulo 45 nagsulti kanato nga natural lang kitang magbangutan sa pagkawala niadtong atong gimahal. Unsa nga doktrina ang gitudlo diha sa bersikulo 46 nga mahimong makadala og kahupayan niadtong nagbangutan sa pagkawala sa usa ka minahal sa kinabuhi? (Tam-is ang kamatayon alang niadtong namatay tungod sa Ginoo. Mahimo nimong isugyot nga markahan sa mga estudyante ang mga pulong nga nagtudlo niining kamatuoran.)
Unsa kaha ang gipasabut sa mamatay tungod sa Ginoo? (Usa ka paagi sa pagpasabut niini mao nga ang usa ka tawo matinud-anong milahutay ug nakatuman sa sagradong mga pakigsaad hangtud sa panahon sa kamatayon.)
Unsa kaha ang gipasabut sa ang kamatayon mahimong “tam-is” ngadto niadtong mamatay tungod sa Ginoo? (Tingali kinahanglan nimong ipasabut nga bisan ang usa ka matinud-anon nga tawo kinsa namatay mahimong pisikal nga nag-antus sa kasakit, kini nga saad nagpasabut sa kalinaw ug kapahulayan nga iyang masinati didto sa kalibutan sa mga espiritu.)
Dapita ang mga estudyante sa pagpamalandong kon sila nagpakabuhi ba sa paagi nga ang kamatayon mahimong “tam-is” ngadto kanila kon kini mahitabo karon. (Mahimo nimong dapiton ang mga estudyante sa pagrekord sa ilang mga hunahuna diha sa ilang class notebook o mga scripture study journal.)
Tapusa pinaagi sa pagpakigbahin sa imong pagpamatuod sa mga kamatuoran nga natudlo sa leksyon karon.
Pangutan-a ang mga estudyante kon mibati ba sila nga nahasol o nabalaka mahitungod sa Ikaduhang Pag-anhi ni Jesukristo. Ipasabut nga sa sunod nga unit sila makakat-on og dugang mahitungod sa mga timailhan sa Ikaduhang Pag-anhi sa Manluluwas. Unsa ang mahitabo kon si Jesukristo moabut? Unsay atong mabuhat aron maandam alang nianang panahona?