Sa hinapos nga bahin sa Nobyembre 1832, ang ubang mga Santos mibalhin ngadto sa Zion apan wala mopahinungod sa ilang mga kabtangan sumala sa gisugo sa Ginoo. Tungod kay wala nila gipahinungod ang ilang mga kabtangan, wala sila makadawat sa ilang mga kabilin sumala sa na-establisar nga paagi sa Simbahan. Si Propeta Joseph Smith namulong niini nga isyu sa usa ka dinasig nga sulat ngadto ni William W. Phelps, gipetsahan og Nobyembre 27, 1832. Usa ka bahin niini nga sulat narekord diha sa Doktrina ug mga Pakigsaad 85. Wala madugay, niadtong Disyembre 6, 1832, si Joseph Smith nakadawat sa pinadayag nga narekord diha sa Doktrina ug mga Pakigsaad 86 samtang nagtrabaho siya sa dinasig nga rebisyon sa Biblia. Kini nga pagpadayag naghatag og dugang pagpasabut sa sambingay sa trigo ug bunglayon ug ang tahas sa priesthood sa pagtabang sa Ginoo pagpundok sa mga matarung sa katapusang mga adlaw.
Ang tigsulat [clerk] sa Ginoo maghimo og rekord sa katawhan sa Dios
Dapita ang mga estudyante sa paghunahuna nga bag-o lang silang gitudlo nga unang magdudula sa usa ka sports team. (Mahimo nimong hinganlan ang nag-una nga sport sa inyong kultura ug usa ka inila nga team nga nagdula niana nga sport.) Human sa pipila ka adlaw nga pagdula uban niini nga team nakabantay sila nga ang usa ka sakop sa team hakog nga modula, ang ubang sakop sa team wala modula sa ilang tukma nga posisyon, ug ang uban mobaliwala sa coach.
Nganong lisud man modaug kini nga team? Unsa man ang kinahanglang mausab aron mas maayong modula kini nga team?
Ipasabut nga ang susama nga sitwasyon misugod sa pagtunga niadtong 1832 samtang nagkadaghan ang mga Santos nga miabut sa Missouri. Ang nag-una nga mga pinadayag nagsulti nga ang siyudad sa Zion pagatukuron sa Jackson County, Missouri, sumala sa mga balaod sa Ginoo ug ubos sa direksyon sa priesthood. Sumala niini nga mga balaod, ang mga miyembro sa Simbahan dili mopanaw ngadto sa Zion hangtud nga sila makadawat og sertipiko gikan sa mga lider sa Simbahan. Sa ilang pag-abut, ilang ipahinungod ang tanan nilang kwarta ug kabtangan ngadto sa Simbahan ug makadawat og kabilin gikan sa bishop. Agig dugang, kinahanglan silang mosunod sa tanang sugo sa Dios. (Tan-awa sa D&P 64:34–35; 72:15–19, 24–26.)
Aron sa pagtabang sa mga estudyante nga makasabut sa konteksto sa pinadayag nga narekord diha sa Doktrina ug mga Pakigsaad 85, ipasabut nga daghang mga Santos sa Missouri nagpuyo nga nagsubay sa mga balaod nga gitakda sa Ginoo alang sa pagtukod sa Zion. Hinoon, pipila ka mga miyembro sa Simbahan misupak sa sugo sa Ginoo sa pagpahinungod sa ilang mga kabtangan ug mibiyahe ngadto sa Zion nga wala mokuha og sertipiko gikan sa ilang mga lider. Tungod niini, wala sila makadawat sa ilang mga kabilin.
Ngano kaha nga lisud ang pag-establisar sa siyudad sa Zion ubos niini nga mga kahimtang?
Ipasabut nga agi og tubag niini nga mga kalisdanan sa Missouri, si Joseph Smith mipadala og sulat ngadto ni William W. Phelps, usa ka lider sa Simbahan kinsa nagpuyo sa Independence niana nga panahon (tan-awa sa pasiuna sa seksyon sa Doktrina ug mga Pakigsaad 85).
Ipasabut nga ang sulat sa Propeta mihatag og mga panudlo alang sa tigsulat sa Ginoo, si John Whitmer, kinsa nagpuyo sa Missouri. Dapita ang usa ka estudyante sa pagbasa og kusog sa Doktrina ug mga Pakigsaad 85:1–2. Hangyoa ang klase sa pagsunod ug sa pagpangita kon unsay gisugo sa Ginoo nga buhaton sa tigsulat sa Simbahan sa Missouri.
Unsa ang gisugo nga irekord sa tigsulat?
Hangyoa ang usa ka estudyante sa pagbasa og kusog sa Doktrina ug mga Pakigsaad 85:3–5. Dapita ang klase sa pagsunod ug sa pagpangita kon kinsa ang gisulti sa Ginoo nga kinahanglang dili isulat ang ilang mga ngalan diha sa mga rekord sa Simbahan.
Kinsa nga mga tawo ang dili isulat ang ilang mga ngalan diha sa mga rekord sa Simbahan?
Ipasabut nga sama nga adunay gihimo nga rekord sa panahon ni Joseph Smith, dunay gihimo usab nga mga rekord sa Simbahan sa atong panahon. Usa ka tuyo niini mao ang pagpreserbar og rekord sa mga ngalan sa matinud-anon ingon man usab usa ka saysay sa ilang mga buhat.
Unsa ang pipila ka mga butang nga kinahanglan natong buhaton aron ang atong mga ngalan marekord isip matinud-anong mga miyembro sa Simbahan?
Human makatubag ang mga estudyante, isulat sa pisara ang mosunod nga kamatuoran: Kon mosunod kita sa mga balaod sa Dios, ang atong mga ngalan mahisulat sa mga rekord sa Simbahan isip matinud-anong mga miyembro. Ipasabut nga ang mga binuhatan sa mga matinud-anon nga narekord dinhi sa yuta narekord usab sa langit sa unsay gitawag nga basahon sa kinabuhi (tan-awa sa D&P 128:6–7). Dapita ang mga estudyante sa pagbasa sa Doktrina ug mga Pakigsaad 85:5, 9, 11 ug sa pag-ila sa ubang mga ngalan nga gigamit sa paghulagway sa rekord nga gitipigan dinhi sa yuta mahitungod niadtong kinsa mga matinud-anon. Hangyoa sila sa pagreport sa ilang nakit-an.
Aron matabangan ang mga estudyante nga mobati sa ka-importante sa kamatuoran nga imong gisulat sa pisara, dapita sila sa paghunahuna nga sila adunay mga plano nga motambong og usa ka bantugan nga kalihokan. Pangutan-a sila kon unsay ilang bation kon moabut sila sa kalihokan apan dili tugutan nga makasulod tungod kay ang ilang ngalan wala diha sa lista sa mga dinapit.
Dapita ang mga estudyante nga hilum nga mobasa sa Doktrina ug mga Pakigsaad 85:9–11 ug maghunahuna kon unsa kahay bation sa pagkasayud nga ang ilang mga ngalan wala diha sa basahon sa handumanan sa Ginoo.
Unsa kaha ang gipasabut nga ang mga tawo kansang mga ngalan wala marekord “dili makadawat og kabilin” uban sa mga Santos? (Dili sila makadawat sa mga panalangin nga ihatag ngadto sa matinud-anon.)
Sumala sa bersikulo 11, unsa ang makapatangtang sa mga ngalan sa mga miyembro sa Simbahan gikan sa basahon sa balaod sa Dios?
Unsaon ninyo pag-summarize ang inyong nakat-unan mahitungod sa ka-importante nga marekord ang inyong ngalan isip matinud-anong miyembro sa Simbahan?
Pagpamatuod nga adunay mga rekord nga gitipigan dinhi sa yuta ug didto sa langit. Kitang tanan kinahanglang manubag alang sa atong mga lihok ug sa atong pagkamatinud-anon sa pagsunod sa balaod sa Dios. Dapita ang mga estudyante sa pagpamalandong sa ilang mga kinaiya ug sa pagsunod sa mga balaod sa Dios.
Ang Manluluwas mipasabut sa sambingay sa mga trigo ug mga bunglayon [tares]
Sa dili pa magklase dapita ang usa ka estudyante sa pagbasa sa Mateo 13:24–30 ug mangandam sa pag-summarize sa sambingay sa mga trigo ug mga bunglayon alang sa klase. Isulat sa pisara ang mosunod nga mga pulong: trigo, mga bunglayon, umahan, mga tigpugas sa mga binhi, ang kaaway.
Human ma-summarize sa pinili nga estudyante ang sambingay, pangutan-a ang klase sa mosunod:
Unsay gisimbolohan sa trigo ug sa bunglayon? (Ang trigo nagsimbolo sa mga matarung, ug ang bunglayon nagsimbolo sa mga dautan [tan-awa sa Mateo 13:38].)
Nganong ang tawo sa sambingay gusto man nga mohulat sa dili pa ibton ang mga bunglayon?
Imahe
wheat and tares
I-display ang nag-uban nga hulagway sa mga trigo ug mga bunglayon, o drowinga kini diha sa pisara. Ipasabut nga ang mga bunglayon usa ka matang sa makahilo nga sagbut. Ang mga trigo ug mga bunglayon morag pareha ra kon moturok kini, apan mailhan kini sa higayon nga modako na kini. Kon ang tig-ani mosulay og ibut sa mga bunglayon sa dili pa managko ang mga trigo ug mga bunglayon, malagmit iya usab nga maibut ang kadaghanan sa mga trigo.
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 86:1–6. Hangyoa ang klase sa pagsunod ug sa pagpangita sa mga kahulugan sa umahan, mga tigpugas sa mga binhi, ug sa kaaway. Dapita ang mga estudyante sa pagreport sa unsay ilang nakat-unan.
Base sa pagpasabut sa Ginoo sa mga simbolo, unsaon man ninyo pag-summarize ang kahulugan sa sambingay?
Ipasabut nga si Joseph Smith nagribyu ug nag-edit sa dinasig nga bersyon sa Biblia (ang Hubad ni Joseph Smith) sa dihang nadawat niya kini nga pagpadayag. Ang pinadayag diha sa Doktrina ug mga Pakigsaad 86 dugang nga mipasabut sa sambingay ingon nga narekord diha sa Mateo 13:24–30. Sama pananglit, sa Doktrina ug mga Pakigsaad 86 atong nakat-unan nga ang mga tigsabwag [tigpugas] sa sambingay nagrepresentar sa mga Apostoles sa Manluluwas (tan-awa sa bersikulo 2) ug nga ang mga sagbut [bunglayon] “mituok sa trigo ug nag-abug sa simbahan ngadto sa kamingawan” (bersikulo 3). Nakat-unan usab nato nga “sa katapusan nga mga adlaw,” ang bag-ong mga udlot sa trigo “[mo]gitib” (bersikulo 4). Ang pagpugas sa mga bunglayon nagrepresentar sa Apostasiya, ug ang paggitib sa bag-ong mga trigo nagrepresentar sa Pagpahiuli.
Ipasabut nga diha sa sambingay, ang pangulo sa panimalay misugo sa iyang mga sulugoon nga pundukon og una ang mga bunglayon aron sunugon ug dayon pundukon ang mga trigo didto sa kamalig (tan-awa sa Mateo 13:27–30). Dapita ang mga estudyante nga hilum nga mobasa sa Doktrina ug mga Pakigsaad 86:7 aron sa pagdiskubre og usa ka panabut nga gihatag niini nga pagpadayag nga nagtin-aw sa han-ay sa pagpundok.
Unsa man ang atong nakat-unan gikan sa bersikulo 7 mahitungod sa han-ay sa pagpundok?
Unsa ang gitudlo niini mahitungod sa unsa ang mahitabo sa mga matarung ug sa mga dautan sa katapusang mga adlaw? (Ang mga estudyante kinahanglang mahibalo sa mosunod nga doktrina: Ang Ginoo mopundok sa mga matarung sa katapusang mga adlaw ug dayon molaglag sa mga dautan sa Iyang Ikaduhang Pag-anhi.
I-display ang mga hulagway nga Mga misyonaryo: Mga elder ug Mga misyonaryo: Mga sister (Libro sa mga Hulagway sa Ebanghelyo [2009], nu. 109, 110; tan-awa usab sa LDS.org).
Imahe
missionaries, elders
Imahe
missionaries, sisters
Sa unsang paagi kini nga mga hulagway may kalabutan sa sambingay sa mga trigo ug mga bunglayon? (Tabangi ang mga estudyante nga makakita nga makatabang kita sa pagpundok sa mga matarung pinaagi sa pagpaambit sa ebanghelyo ngadto sa uban.)
Ipasabut nga ang paghinumdom sa daghang mga paagi nga kita napanalanginan isip mga miyembro sa Simbahan sa Ginoo makapalambo sa atong tinguha sa pagpaambit niadto nga mga panalangin ngadto sa uban. Dapita ang usa ka estudyante sa pagbasa og kusog sa Doktrina ug mga Pakigsaad 86:8–10. Hangyoa ang klase sa pagsunod ug sa pagpangita og mga paagi nga napanalanginan kita isip mga miyembro sa Simbahan sa Ginoo.
Sumala sa bersikulo 8–10, unsa ang pipila ka mga paagi nga napanalanginan kita isip mga miyembro sa Simbahan sa Ginoo?
Ipasabut ang mga pulong nga “kamo may katungod nga manununod” diha sa bersikulo 9. Ipasabut nga kini nagpasabut nga ang mga miyembro sa Simbahan ni Jesukristo sa mga Santos sa Ulahing mga Adlaw mga parte sa pakigsaad nga gihimo sa Dios uban kang Abraham, nga pinaagi niini si Abraham gisaaran nga ang iyang kaliwatan makatagamtam sa mga panalangin sa priesthood ug mopaambit niadto nga mga panalangin ngadto sa uban (tan-awa sa Abraham 2:9–11).
Sa unsang paagi kamo napanalanginan pinaagi sa priesthood?
Dapita ang usa ka estudyante sa pagbasa og kusog sa Doktrina ug mga Pakigsaad 86:11, ug hangyoa ang klase sa pagtino og mga paagi nga motabang kita sa uban. Hangyoa ang mga estudyante sa pagreport sa ilang nakit-an. Isulat ang mosunod nga baruganan diha sa pisara: Makadala kita og kaluwasan ngadto sa uban pinaagi sa pagtabang kanila nga makadawat sa mga panalangin sa priesthood.
Dapita ang mga estudyante sa pagpaambit sa ilang mga kasinatian sa dihang nakabuhat sila og matarung nga ehemplo alang sa usa ka tawo o sa dihang mitabang sila sa laing tawo nga makadawat sa mga panalangin sa priesthood.
Ang gipasabut nga “usa ka makagagahum ug malig-on” (D&P 85:7) kinsa ang mohan-ay sa balay sa Dios ug ang gipasabut nga usa kinsa “magpahimutang sa iyang kamot sa paghunong sa arka” (D&P 85:8) gigamit sa daghang mi-apostasiya aron mahatagan og katarungan ang ilang pagbiya sa Simbahan. Nangangkon sila nga ang lain-laing mga Presidente sa Simbahan wala mauyuni sa Dios ug gisalikway, ug nga sila, ang mga mi-apostasiya, mao ang “usa ka makagagahum ug malig-on” nga gitawag sa Dios aron tarungon ang mga butang. Ang ingon nga pagpangangkon misukwahi sa kahulugan sa mga kasulatan. Sa usa ka opisyal nga pamahayag nga gihatag niadtong 1905, ang Unang Kapangulohan (Joseph F. Smith, John R. Winder ug Anthon H. Lund) naghisgut sa mga sirkumstansya nga nakapaagni sa pagpadayag diha sa Doktrina ug mga Pakigsaad 85:7–8 ug niadtong gipasabut niining duha ka hugpong sa mga pulong:
“Ma-obserbahan una sa tanan nga ang hilisgutan niining tibuok sulat [ang sulat sa Propeta ngadto ni William W. Phelps], ingon man ang parte niini nga sa wala madugay gidawat isip pinadayag, may kalabutan sa mga kalihokan sa Simbahan sa Missouri, sa pagpundok sa mga Santos niana nga dapit ug sa pag-angkon sa ilang mga kabilin ubos sa balaod sa pagpahinungod ug pagkatinugyanan; ug ang Propeta naghisgot ilabi na kon unsay mahitabo niadtong napakyas sa pagdawat sa ilang mga kabilin pinaagi sa mando o dokumento gikan sa bishop. …
“Si Bishop Partridge usa sa mga kaigsoonan, kinsa—bisan takus kaayo nga tawo, usa ka tawo nga gihigugma sa Ginoo, ug kinsa gihulagway sa Propeta isip ‘usa ka sumbanan sa pagkarelihiyuso’ ug ‘usa sa talagsaong mga tawo sa Ginoo’—usahay nakigbatok sa Propeta niadtong unang mga panahon, ug nagtinguha sa pagkorihir kaniya sa iyang pagpangalagad sa mga kalihokan sa Simbahan; sa laing pagkasulti, ‘[mi]pahimutang sa iyang kamot sa paghunong sa arka.’ …
“Niini nga mga kondisyon sa pagsukol, kasina, garbo, pagkawalay pagtuo ug pagkatig-a sa kasingkasing nga mipatigbabaw taliwala sa mga kaigsoonan sa Zion—Jackson County, Missouri—diin miapil tanan si Bishop Partridge, nga ang mga pulong sa pinadayag nga gikuha gikan sa sulat ngadto ni William W. Phelps, sa ika-27 sa Nobyembre, 1832, gisulat. Ang ‘tawo nga gitawag ug gitudlo sa Dios’ aron ‘mobahin-bahin ngadto sa mga Santos sa ilang kabilin’—si Edward Partridge—nianang panahona dili maayo og binuhatan, mibaliwala sa iyang kaugalingong katungdanan, ug ‘mipahimutang sa iyang kamot sa paghunong sa arka’; tungod niini, gipasidan-an siya sa umaabut nga paghukom sa Dios, ug gihimo ang panagna nga adunay lain, ‘usa ka makagagahum ug malig-on,’ nga ipadala sa Dios nga mopuli sa iyang dapit, nga makaangkon sa iyang bishopric—usa ka tawo nga nagbaton sa espiritu ug gahum nianang taas nga katungdanan nga gisangon kaniya, diin makabaton siya og gahum sa ‘paghan-ay sa balay sa Dios, ug sa paghan-ay pinaagi sa pagripa sa mga kabilin sa mga Santos’; sa laing pagkasulti, usa ka tawo nga mohimo sa buhat nga si Bishop Edward Partridge gitudlo sa paghimo, apan napakyas sa pagtuman. …
“… Ug kay pinaagi sa iyang paghinulsol ug mga sakripisyo ug pag-antus, si Bishop Edward Partridge sa walay duda nakadawat og ubos-ubos nga silot sa gihulga nga paghukom batok kaniya nga mamatay ‘pinaagi sa pana sa kamatayon, sama sa usa ka kahoy nga naigo sa liti sa kilat,’ mao nga ang okasyon sa pagpadala og lain nga mopuli sa iyang posisyon—‘usa ka makagagahum ug malig-on sa paghan-ay sa balay sa Dios ug sa paghan-ay pinaagi sa pagripa sa mga kabilin sa mga Santos’—makonsiderar usab nga milabay na ug ang tibuok panghitabo sa propesiya nahuman na” (sa James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:112, 113, 115, 117; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 186–87).
Ang mga pulong nga “paghunong sa arka sa Dios” nagpasabut sa “usa ka insidente atol sa paghari ni Haring David sa karaang Israel. Nakuha sa mga Filistehanon ang arka sa pakigsaad diha sa pagpakigubat apan giuli kini sa dihang gihampak sila og mga kasakitan (tan-awa sa 1 Samuel 4–6). Si David ug ang mga tawo sa wala madugay midala sa arka ngadto sa Jerusalem diha sa usa ka karomata sa mga baka, nga gimaneho ni Uzza ug Ahio. ‘Ug sa diha nga nahiabut sila sa giukan sa Nachon, gibutang ni Uzza ang iyang kamot sa arca sa Dios ug nakakupot siya niini; kay ang mga vaca nahapangdol. Ug ang kasuko sa Ginoo misilaub batok kang Uzza; ug ang Dios naglaglag kaniya didto tungod sa iyang sayop; ug didto namatay siya tupad sa arca sa Dios’ (2 Samuel 6:6–7; tan-awa sa bb. 1–11). Ang arka mao ang simbolo sa presensya sa Dios, Iyang himaya ug kaharianon. Sa dihang unang gihatag ngadto sa Israel, ang arka gibutang sa Labing Balaang Dapit sa tabernakulo, ug bisan gani ang pari wala tuguti nga makaduol niini. Bugtong ang halangdon nga pari, usa ka simbolo ni Kristo, ang makaduol niini, apan human lamang sa usa ka detalyado nga ritwal sa personal nga kalimpyo ug paghinulsol sa iyang mga sala. …
“Bisan unsa pa ka maayo sa mga intensyon ni Uzza, walay kataha niyang giduol ang mahimo lamang duolon ubos sa labing estrikto nga mga kondisyon. Wala siyay hugot nga pagtuo sa gahum sa Dios. Nagtuo siya nga nameligro ang arka, nakalimot nga kini ang pisikal nga simbolo sa Dios kinsa aduna sa tanang gahum. Dili kita maghunahuna sa pagluwas sa Dios ug sa Iyang gingharian pinaagi sa atong kaugalingong mga paningkamot.
“‘Ang sala ni Uzza mao ang paghikap sa arka uban sa walay kataha nga mga pagbati, bisan tuod adunay maayong mga intensyon, nga malikayan ang pagkatumba ug pagkahulog niini gikan sa karomata. Ang paghikap sa arka, ang trono sa balaang himaya ug makita nga panumpa sa dili makita nga presensya sa Ginoo, usa ka paglapas sa kahalangdon sa balaan nga Dios. “Busa si Uzzah usa ka simbolo sa tanan nga adunay maayong mga intensyon, namulong sa tawhanong paagi, apan uban sa dili balaanong mga hunahuna, nanghilabot sa mga kalihokan sa gingharian sa Dios, tungod sa hunahuna nga kini nameligro, ug uban sa paglaum nga moluwas niini” (O. V. Gerlach).’ (Keil ug Delitzsch, Commentary, bk. 2: Joshua, Judges, Ruth, 1 and 2 Samuel, ‘Second Book of Samuel,’ p. 333.)” (Doctrine and Covenants Student Manual, 2nd ed. [manwal sa Church Educational System, 2001], 188).
Ang Ginoo mihisgut niini nga panghitabo sa bag-ong pagpadayag aron sa pagtudlo sa baruganan nga dili nato angkunon sa atong kaugalingon ang responsibilidad sa paghatag og direksyon (“paghunong sa arka”) sa atong mga lider sa priesthood o sa uban kinsa gitawag ug gitudlo sa Dios (tan-awa sa D&P 85:8). Apan adunay mga tawo nga nahadlok nga katumbahon ang arka ug naghunahuna sa pagpugong niini. Ang ubang mga miyembro sa Simbahan tingali makakita og mga problema ug masagmuyo sa paagi sa ilang mga lider ug sa uban sa pagsulbad niadto nga mga problema. Tingali mobati sila nga bisan og sila walay awtoridad sa pagbuhat sa ingon, kinahanglan nilang mokorihir sa direksyon sa ilang ward o gani sa tibuok Simbahan. Hinoon, ang labing maayong mga intensyon dili igong rason sa ingon nga pagpanghilabot sa Simbahan sa Ginoo.
Si Presidente David O. McKay mitudlo:
Imahe
President David O. McKay
“Medyo peligruso alang kanato nga mogawas sa atong kaugalingong pagkabutang ug mosulay nga walay awtoridad sa pagdumala sa mga paningkamot sa ubang tawo. Hinumdumi ninyo ang kaso ni Uzza kinsa miisa sa iyang kamot sa pagpugong sa arka. [Tan-awa sa 1 Cronicas 13:7–10.] Daw aduna siyay rason sa pag-isa sa iyang kamot aron sa pagsagang nianang simbolo sa pakigsaad sa dihang nadagma ang mga baka. Karon atong mahunahuna nga grabe kaayo ang iyang silot. Bisan pa man, ang panghitabo naghatag og usa ka leksyon sa kinabuhi. Atong tan-awon ang atong palibut ug atong makita unsa ka dali nga mamatay sa espirituhanong paagi ang mga tawo nga mosulay sa pagpugong sa arka nga walay awtoridad. Nahimong masilagon ang ilang mga kalag, hiwi ang ilang panghunahuna, masalaypon ang ilang paghukom, ug magul-anon ang ilang espiritu. Ingon niana ang makalolooy nga kahimtang sa mga tawo kinsa, mibaliwala sa ilang kaugalingong mga responsibilidad, migahin sa ilang panahon sa pagpangita og sayop sa uban” (sa Conference Report, Abril 1936, 60).