Doktrina ug mga Pakigsaad 84–87 (Unit 18)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 84–87 (unit 18) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 84:1–42)

Natun-an sa mga estudyante ang usa ka pinadayag mahitungod sa templo nga pagatukuron diha sa Bag-ong Jerusalem, ug nabasa usab nila ang mahitungod sa mga paningkamot ni Moises sa pag-andam sa iyang katawhan sa pagsulod diha sa presensya sa Dios. Nakat-unan sa mga estudyante ang mosunod nga mga baruganan: Aron mahimong sama sa Dios ug makapuyo diha sa Iyang presensya, kinahanglan gayud kita nga makadawat sa mga ordinansa sa Melchizedek Priesthood; ug kon kadtong kinsa nakadawat sa priesthood mopalambo sa ilang calling, ang Dios mopabalaan kanila ug mohatag kanila sa tanan nga anaa Kaniya.

Day 2 (Doktrina ug mga Pakigsaad 84:43–120)

Niini nga leksyon nakat-unan sa mga estudyante ang duha ka mga baruganan nga makatabang kanila nga makabalik ngadto sa presensya sa Dios: Kon kita magmakugihon sa pagpatalinghug sa pulong sa Dios, nan, malamdagan kita pinaagi sa Espiritu ni Kristo; ug kon kita maminaw sa Espiritu ni Jesukristo, makaduol kita ngadto sa Amahan. Nakat-unan usab sa mga estudyante nga ang atong mga hunahuna dili malamdagan ug panghimarauton kita kon taphaw ra ang atong pagtagad sa pulong sa Dios. Ang tambag nga tun-an ang mga kasulatan sa matinud-anong paagi ug sundon kon unsay gitudlo niini gibalik-balik usab dinhi niining leksyon. Dugang pa, nakat-unan sa mga estudyante nga ang tanang mga Santos sa Ulahing mga Adlaw adunay responsibilidad sa pagbuhat sa ilang bahin sa pagtabang nga masangyaw ang ebanghelyo sa tibuok kalibutan.

Day 3 (Doktrina ug mga Pakigsaad 85–86)

Niini nga leksyon gikonsiderar sa mga estudyante ang kaimportante sa mga rekord sa Simbahan. Ilang nakat-unan nga kon kita mosunod sa mga balaod sa Dios, ang atong mga pangalan mahisulat sa mga rekord sa Simbahan isip matinud-anon nga mga miyembro. Nakabaton usab ang mga estudyante og dugang panabut ngadto sa sambingay sa trigo ug sa mga bunglayon [tares] ug nadiskubrihan nga ang Ginoo mopundok sa mga matarung atol sa katapusang mga adlaw ug unya laglagon ang mga dautan sa Iyang Ikaduhang Pag-anhi. Agig dugang, nakat-unan sa mga estudyante nga makadala kita og kaluwasan ngadto sa uban pinaagi sa pagtabang kanila nga madawat ang mga panalangin sa ebanghelyo.

Day 4 (Doktrina ug mga Pakigsaad 87)

Natun-an sa mga estudyante ang panagna ni Propeta Joseph Smith kalabut sa gubat sa katapusang mga adlaw ug nakat-unan nga ang Ginoo makapadayag sa umaabut ngari kanato pinaagi sa Iyang mga propeta. Nakat-unan usab sa mga estudyante nga ang mga pulong sa Ginoo pinaagi ni Propeta Joseph Smith natuman ug sa mga pamaagi nga kini natuman. Gipamalandungan usab nila ang kaimportante sa pagbarug diha sa balaan nga mga dapit ug dili mobalhin hangtud moabut ang Ginoo.

Pasiuna

Kini nga leksyon motabang sa mga estudyante nga mas masabtan ug mapasabut ang doktrina sa priesthood. Makatugot usab kini sa mga estudyante sa mga oportunidad sa pagpakigbahin kon unsay ilang nakat-unan niining semanaha gikan sa ilang mga pagtuon kon sa unsang paagi nga mas makalihok kita isip mga instrumento sa Dios ug mopalambo sa priesthood.

Mga Sugyot alang sa Pagtudlo

Pahinumdom: Agig pagpangandam alang niining leksyon, dapita ang usa ka estudyante sa pagdala diha sa klase og usa ka kopya sa priesthood line of authority (sa usa ka sakop sa pamilya o sa ilang kaugalingon). Ang personal nga kopya sa Melchizedek Priesthood line of authority sa miyembro mahimong makuha gikan sa Member and Statistical Records sa Simbahan pinaagi sa pag-email og request ngadto sa lineofauthority@ldschurch.org nga may subject line nga PLA. Usa ka automated nga tubag magpadala og porma aron masulatan ug ibalik.

Doktrina ug mga Pakigsaad 84

Ang Ginoo mitino sa gigikanan sa priesthood ni Moises

Tabangi ang mga estudyante nga maribyu ang pipila ka terminolohiya nga ilang nakat-unan karong semanaha pinaagi sa pagpares-pares sa mga estudyante. Sa matag parisan, hangyoa ang usa ka estudyante nga motalikod gikan sa pisara aron dili siya makakita niini. Ipasabut nga imong isulat diha sa pisara ang importanting pulong o mga pulong kalabut sa sukaranang doktrina sa ebanghelyo. Ang mga estudyante nga nagtan-aw sa pisara motino o mohulagway sa importanting pulong o mga pulong sa hilum ngadto sa ilang mga kauban, ug ang ilang mga kauban motag-an sa pulong o mga pulong. Ang mga estudyante magbaylo dayon og mga tahas, ug imong ipadayon ang kalihokan pinaagi sa pagsulat og usa ka bag-ong pulong o mga pulong diha sa pisara.

Sugdi ang kalihokan ug isulat ang pulong nga priesthood diha sa pisara. Human natino sa mga estudyante kining pulong, ipadayon ang kalihokan gamit ang mosunod nga mga pulong: ordinansa, Aaronic Priesthood, pakigsaad, Melchizedek Priesthood, makaluwas nga mga ordinansa. (Kon imong gibati nga makatabang kini, mahimo ka nga mohunong human mahibaloan ang matag importanting pulong o termino ug ribyuhon sa daklit ang kahulugan niini isip usa ka klase. Ang mugbo nga mga kahulugan alang sa pipila niini magamit diha sa pares-pares nga kalihokan sa Unit 18: Day 1 diha sa giya sa pagtuon alang sa mga estudyante sa home-study seminary. Alang sa dugang pagpasabut, tan-awa ang “Priesthood ug mga Yawe sa Priesthood” o “Mga Ordinansa ug mga Pakigsaad” diha sa seksyon sa Sukaranang mga Doktrina sa appendix sa katapusan niining manwal.) Pagkahuman sa kalihokan, ipangutana ang mosunod:

Hain sa mga ordinansa sa ebanghelyo ang makaluwas nga mga ordinansa? (Samtang motubag ang mga estudyante, isulat ang mosunod nga mga ordinansa diha sa pisara: bunyag, kumpirmasyon, pagtugyan sa Melchizedek Priesthood [alang sa kalalakin-an], ang endowment sa templo, ug ang sealing sa templo.)

Ipasabut nga ang Doktrina ug mga Pakigsaad 84 nagtudlo nga ang gitinguha ni Moises mao ang pagtabang sa ubang mga tawo nga mas maduol sa Dios pinaagi sa makaluwas nga mga ordinansa sa priesthood. Dapita ang mga estudyante sa pagbasa sa Doktrina ug mga Pakigsaad 84:6–17 aron madiskubrihan kon sa unsang paagi nga nasubay ni Moises ang iyang awtoridad sa priesthood hangtud ni Adan, kinsa nakadawat niini gikan sa Dios.

Unsa man ang inyong nakat-unan mahitungod sa priesthood gikan niini nga mga bersikulo? (Mahimong mahibaloan sa mga estudyante ang lain-laing mga baruganan, apan siguroa ang paghatag og gibug-aton sa mosunod: Ang priesthood nagagikan sa Dios ug gitugyan pinaagi sa pagpandong sa mga kamot niadtong adunay awtoridad.)

Niining puntoha sa leksyon, dapita ang estudyante sa pagpakita og usa sa line of authority, mahimong pinaagi sa pagbasa niini o pagsulat niini diha sa pisara. Tabangi ang mga estudyante nga makasabut nga ang usa ka priesthood line of authority nagpakita kon sa unsang paagi nga ang awtoridad sa priesthood gitugyan gikan sa usa ka naghupot sa priesthood ngadto sa lain, gikan ni Jesukristo ngadto sa usa ka naghupot sa priesthood karon.

Ngano kaha nga importante nga ang mga naghupot sa priesthood makasubay sa ilang awtoridad sa priesthood balik ngadto sa Dios? (Tan-awa sa Mga Hebreohanon 5:4.)
Unsa nga mga kasinatian nga inyong naangkon nga nakapalig-on sa inyong pagpamatuod sa priesthood?

Dapita ang pipila ka mga estudyante nga magpuli-puli sa pagbasa og kusog sa panumpa ug pakigsaad sa priesthood diha sa Doktrina ug mga Pakigsaad 84:33–44.

Unsa ang gisaad sa Ginoo niadtong kinsa modawat sa priesthood ug mopalambo sa ilang calling? (Ang mga estudyante kinahanglang mahibalo sa mosunod nga baruganan: Kon kadtong nakadawat sa priesthood mopalambo sa ilang mga calling, ang Dios mopabalaan kanila ug mohatag kanila sa tanan nga anaa Kaniya.)
Unsa ang pipila ka mga paagi nga ang mga naghupot sa Aaronic Priesthood mopalambo sa ilang mga calling diha sa priesthood?
Kanus-a kamo napanalanginan tungod kay ang usa ka naghupot sa priesthood mipalambo sa iyang calling?

Aron matabangan ang mga estudyante sa pagpakigbahin og pipila ka mga ideya nga ilang naangkon atol sa ilang pagtuon niining semanaha, mahimo nimong ipangutana ang pipila o ang tanan sa mosunod nga mga pangutana. (Pahinumdom: Samtang nag-andam ka alang niining bahina sa leksyon, mahimo nimong ribyuhon ang day 2 niining unit diha sa giya sa pagtuon alang sa mga estudyante sa home-study seminary.)

Unsa ang inyong nakat-unan mahitungod sa kaimportante sa paghatag og makugihon nga pagpatalinghug sa pulong sa Dios? (Tan-awa sa D&P 84:43–45, 54–58.)
Unsa ang kalainan nga nahimo sa matinud-anon nga pagtuon ug paggamit sa pulong sa Dios diha sa inyong kinabuhi?
Unsay atong responsibilidad ngadto sa mga tawo sa kalibutan? (Tan-awa sa D&P 84:61–62, 85–88.)
Unsaon ninyo sa pagtabang nga matuman ang obligasyon sa pagdala sa ebanghelyo ngadto sa tibuok kalibutan?

Doktrina ug mga Pakigsaad 87

Si Joseph Smith nanagna nga ang gubat ipadangat sa tanang kanasuran

Hangyoa ang mga estudyante sa pag-summarize sa unsay ilang nakat-unan mahitungod sa panagna nga anaa sa Doktrina ug mga Pakigsaad 87.

Sa unsang paagi nga ang inyong pagtuon niining pinadayag nakapalig-on sa inyong pagtuo nga ang Ginoo makapadayag sa umaabut nga panghitabo pinaagi sa Iyang mga propeta?
Sa unsang paagi nga ang Doktrina ug mga Pakigsaad 87 makapalig-on sa inyong pagpamatuod nga si Joseph Smith usa ka tinuod nga propeta?

Ipamatuod nga ang matag panagna diha sa Doktrina ug mga Pakigsaad 87 natuman na o matuman pa. Dapita ang mga estudyante sa pagbasa sa Doktrina ug mga Pakigsaad 87:8 aron makakat-on kon unsa ang gimando sa Ginoo nga atong buhaton aron nga kita maandam alang sa mga gubat ug katalagman nga maanaa sa yuta sa katapusang mga adlaw.

Unsa ang ipabuhat sa Ginoo kanato? (Tabangi sila sa pagtino sa mosunod nga baruganan: Kita kinahanglang mobarug sa balaan nga mga dapit ug dili mobalhin hangtud ang Ginoo moabut.)
Unsa ang pipila ka balaan nga mga dapit nga makahatag kanato og kalinaw ug seguridad?
Sa unsang paagi nga kamo mibati nga napanalanginan og kalinaw ug seguridad pinaagi sa pagbarug diha sa usa niining balaan nga mga dapit?

Tapusa pinaagi sa pagpamatuod sa mga kamatuoran nga inyong gihisgutan.

Sunod nga Unit (Doktrina ug mga Pakigsaad 88–89)

Aron maandam ang mga estudyante sa ilang pagtuon sa Doktrina ug mga Pakigsaad 88–89, mahimo nimo silang dapiton sa pagkonsiderar sa mosunod: Mibati ba kamo sukad nga nag-inusara o nabalaka nga ang Langitnong Amahan wala magpakabana sa inyong personal nga kahimtang o panginahanglan? Samtang magtuon kamo sa Doktrina ug mga Pakigsaad 88, pangitaa ang mga tubag sa Ginoo niana nga mga pagbati. Unsa nga “mga dautan ug mga laraw … nga motungha diha sa mga kasingkasing sa dautan nga mga tawo” (D&P 89:4) sa katapusan nga mga adlaw? Samtang magtuon kamo sa Doktrina ug mga Pakigsaad 89, pangitaa ang tambag nga gihatag sa Ginoo nga makapanalipod kaninyo gikan niadtong mga dautan ug mga laraw.