Niadtong Disyembre 1830, gimanduan sa Ginoo ang mga Santos nga magpundok ngadto sa Ohio (tan-awa sa D&P 37:3). Pagka-Enero 1831, misaad Siya nga madawat nila ang Iyang balaod (tan-awa sa sa D&P 38:32). Pagka-Pebrero 9, 1831, wala madugay human miabut sa Kirtland, 12 ka elder sa Simbahan ang nagpundok ug naghiusa sa pag-ampo, sigun sa gisugo sa Ginoo kanila (tan-awa sa D&P 41:2–3). Niining higayuna, si Joseph Smith nakadawat og pagpadayag nga naglangkob karon sa Doktrina ug mga Pakigsaad 42:1–73. Nakadawat siya og dugang instruksyon pagka-Pebrero 23 (tan-awa sa D&P 42:74–93). Gihiusa, kining mga pagpadayag nailhan isip “ang balaod sa Simbahan” (D&P 42 ulohan sa seksyon. Ang Doktrina ug mga Pakigsaad 42 bahinon sa tulo ka leksyon. Kini nga leksyon naglangkob sa mga bersikulo 1–29, nga naghatag sa instruksyon bahin sa pagtudlo sa ebanghelyo ug nagtakda sa kinatibuk-ang mga balaod sa kinaiya alang sa mga miyembro sa Simbahan.
Sugdi pinaagi sa pagpangutana sa mga estudyante sa pagkonsiderar kon hain sa mga pulong diha sa pisara ang mahimo nilang gamiton sa paghulagway sa mga balaod ug mga sugo. Dapita ang pipila ka estudyante sa pagpakigbahin og pulong o mga pulong nga ilang gipili ug ipasabut kon ngano. Human mapakigbahin sa mga estudyante ang ilang mga hunahuna, ipangutana ang mosunod:
Ngano nga usahay lisud man ang pagsunod sa mga sugo?
Ngano nga ang ubang tawo mobati man nga ang mga balaod ug mga sugo usa ka gasa o panalangin?
Pahinumdumi ang mga estudyante nga human gisugo sa Ginoo ang mga Santos sa New York paingon ngadto sa Ohio, misaad Siya nga sa higayon nga tua na sila didto, Iyang ihatag kanila ang Iyang balaod (tan-awa sa D&P 38:32). Kadaghanan sa mga Santos sa New York misunod sa sugo nga magpundok sa Ohio. Human nga ang pipila kanila miabut sa Kirtland, 12 ka elder nakighimamat ni Propeta Joseph Smith ug nangamuyo sa Ginoo. Dapita ang usa ka estudyante sa pagbasa og kusog sa Doktrina ug mga Pakigsaad 42:1–3. Awhaga ang klase sa pagsunod, nga mangita sa rason nganong nagpundok ang mga elder.
Nganong nagpundok ang mga elder niining panahona? (Ang Ginoo misugo kanila nga magpundok aron modawat sa Iyang balaod.)
I-summarize ang Doktrina ug mga Pakigsaad 42:4–10 pinaagi sa pagpasabut nga ang Ginoo misugo sa mga elder sa paglakaw nga magtinagurha isip mga misyonaryo sa pagsangyaw sa ebanghelyo ug sa pagtukod sa Simbahan sa matag rehiyon kon asa sila gitawag hangtud nga ang tanang tawo gitawag nga maghiusa pagpundok.
Gitakda sa Ginoo ang mga baruganan sa pagtudlo sa ebanghelyo
Hangyoa ang mga estudyante sa paghunahuna nga naglingkod sila sa chapel nga naghulat nga magsugod ang sakrament miting. Ang mga miyembro sa bishopric o branch presidency nalangay ug wala pa moabut. Dunay tawo sa kongregasyon nga mibarug ug mipasabut nga gusto niyang mopadangat og pipila ka calling ug motudlo og bag-ong doktrina nga gipadayag ngadto kaniya.
Unsa ang inyong reaksyon niana nga sitwasyon? Ngano man?
Dapita ang usa ka estudyante sa pagbasa og kusog sa Doktrina ug mga Pakigsaad 42:11, ug hangyoa ang klase sa pagpangita kon kinsa ang giingon sa Ginoo nga awtorisado sa pagtudlo ug sa pagtukod sa Iyang Simbahan.
Kinsa ang giingon sa Ginoo nga awtorisado sa pagtudlo ug sa pagtukod sa Iyang Simbahan? (Ang mga estudyante kinahanglang mahibalo sa mosunod nga doktrina: Kadtong nagtudlo ug nagtukod sa Simbahan kinahanglang tawagon gayud sa Dios ug ordinahan o i-set apart sa awtorisado nga mga lider sa Simbahan.)
Sumala sa bersikulo 11, kadtong gitawag sa pagtudlo sa ebanghelyo kinahanglang mahibaloan sa Simbahan ang ilang mga calling. Sa unsang paagi nga ang mga miyembro sa Simbahan mahibalo karon nga ang tawo nakadawat og calling sa ward o stake ug i-set apart o i-orden sa mga lider sa Simbahan? (Ang mga ngalan niadtong gitawag ipresentar sa mga miyembro sa Simbahan alang sa pagpaluyo nga boto. Nailhan kini isip ang baruganan sa inuyunan sa kadaghanan. Tan-awa sa D&P 26:2.)
Sa unsang paagi nga ang pamaagi sa pag-sustain sa mga lider ug mga magtutudlo manalipod sa Simbahan ug sa mga miyembro niini. (Ang pag-sustain sa mga lider sa Simbahan makatabang kanato nga mahibalo kon kinsa ang gitawag nga mangulo ug motudlo diha sa Simbahan. Makatabang usab kini nga mapugngan ang mga indibidwal sa paghimo sa mga responsibilidad nga wala ma-assign ngadto kanila ug diin sila walay awtoridad.)
Dapita ang usa ka estudyante sa pagbasa og kusog sa Doktrina ug mga Pakigsaad 42:12–13. Hangyoa ang klase sa pagsunod, nga mangita sa mga responsibilidad nga gihatag ngadto sa mga tawo nga nagtudlo ug nangulo diha sa Simbahan, lakip na ang full-time nga mga misyonaryo.
Sumala niining mga bersikulo, unsa nga mga responsibilidad ang gihatag sa Ginoo ngadto niadtong Iyang gitawag nga motudlo o mangulo diha sa Simbahan?
Ngano kaha nga importante alang sa mga magtutudlo ug mga lider nga motudlo sa mga baruganan sa ebanghelyo nga makita diha sa mga kasulatan?
Sa unsang paagi nga napanalanginan kamo sa dihang ang inyong mga magtutudlo o mga lider nagsunod sa mga doktrina ug mga baruganan nga ilang gitudlo?
Hangyoa ang mga estudyante sa pagribyu og hilum sa Doktrina ug mga Pakigsaad 42:13, nga mangita kon unsay angayang mogiya kanato samtang magtudlo kita sa ebanghelyo ngadto sa uban. Human makareport ang mga estudyante sa unsay ilang nakit-an, dapita ang usa ka estudyante sa pagbasa og kusog sa Doktrina ug mga Pakigsaad 42:14. Hangyoa ang klase sa pagsunod, nga mangita kon unsay kinahanglan nga buhaton niadtong nagtudlo sa ebanghelyo aron makabaton sa impluwensya sa Espiritu.
Unsaon nato pagbaton sa impluwensya sa Espiritu aron motabang kanato sa pagtudlo sa ebanghelyo ngadto sa uban? (Kon mag-ampo kita nga dunay hugot nga pagtuo, makadawat kita sa Espiritu aron motabang kanato sa pagtudlo sa uban. Mahimo nimong isugyot nga markahan sa mga estudyante ang mga pulong diha sa bersikulo 14 nga nagtudlo niini nga baruganan. Ipasabut nga agig dugang sa pag-ampo nga dunay hugot nga pagtuo, kinahanglan kitang mahimong takus nga modawat sa Espiritu.)
Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Ang mga kasulatan nag-ingon, ‘Ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (D&P 42:14). Kini nagtudlo dili lamang nga ikaw dili magtudlo o nga ikaw dili makatudlo o nga kini dili kaayo maayo nga pagtudlo. Dili, mas lig-on pa kini kay sa niana. Kini usa ka porma sa verb nga naghatag og mahinungdanong mando. ‘Kamo dili magtudlo.’ Butangi og thou diha alang sa ye ug ikaw makahimo sa sinultihan sa Bukid sa Sinai. Kini usa ka kasugoan” (“Teaching, Preaching, Healing,” Ensign, Ene. 2003, 41).
Sumala sa Doktrina ug mga Pakigsaad 42:14 ug sa pamahayag ni Elder Holland, kinsa ang tinuod nga magtutudlo sa bisan asa nga classroom sa Simbahan? (Ang Espiritu.)
Unsa ang pipila ka mga paagi nga ang mga estudyante makatabang sa pagtudlo pinaagi sa Espiritu?
Dapita ang usa ka estudyante sa pagbasa og kusog sa Doktrina ug mga Pakigsaad 42:16–17. Hangyoa ang klase sa pagsunod, nga mangita sa tahas sa Espiritu Santo. Sa dili pa mobasa ang estudyante, mahimong makatabang ang pagpahinumdom sa mga estudyante nga ang termino nga Maghuhupay nga gigamit dinhi niining mga bersikulo mao ang laing ngalan sa Espiritu Santo.
Sumala sa bersikulo 17, unsay nasayran ug buhaton sa Espiritu Santo? (Mahimo nimong isugyot nga markahan sa mga estudyante ang mosunod nga doktrina diha sa ilang mga kasulatan: Ang Espiritu Santo nasayud sa tanan nga mga butang ug nagpamatuod sa Amahan ug sa Anak.
Base niini nga doktrina, nganong importante man alang kanato nga makabaton kita sa Espiritu Santo uban kanato kon magtudlo sa ebanghelyo?
Sa unsang paagi nga ang pagbaton sa Espiritu Santo uban kaninyo makatabang niadtong inyong tudloan?
Dapita ang mga estudyante nga mamalandong sa mosunod nga mga pangutana (mahimo nga imong isulat sa pisara kining mga pangutana sa dili pa magklase o andama kini isip usa ka handout):
Kanus-a ninyo nasinati ang gahum ug impluwensya sa Espiritu Santo samtang nagtudlo kamo (nagpakigbahin, nagpasabut, o nagpamatuod bahin) sa ebanghelyo?
Kanus-a ninyo nabati ang Espiritu Santo nga nagpamatuod kaninyo bahin sa Langitnong Amahan ug ni Jesukristo?
Human sa igo nga panahon, dapita ang pipila ka estudyante sa pagpili og usa sa mga pangutana ug ipakigbahin ang ilang mga kasinatian ngadto sa klase. Mahimo nimong idugang ang imong pagpamatuod bahin sa mahinungdanong tahas sa Espiritu sa pagtudlo ug sa pagkat-on sa ebanghelyo.
Ipasabut nga niini nga pagpadayag, ang Ginoo mipadayag sa mga balaod ug mga sugo kalabut sa tanang miyembro sa Simbahan. Bahina ang klase ngadto sa mga grupo nga tinagutlo o tinagun-om. I-assign ang matag estudyante sa usa o duha sa mga pakisayran sa kasulatan nga gilista sa pisara, ug ipasabut nga ang matag tudling naglangkob sa mga instruksyon sa Ginoo kalabut sa usa ka piho nga sugo. Hangyoa ang mga estudyante sa pagtuon sa na-assign ngadto nila nga mga tudling ug dayon gamita ang outline sa ubos sa pag-andam sa pagtudlo sa ilang grupo sa unsay ilang nadiskubrihan. (Mahimo nimong i-display ang outline diha sa pisara o andama kini isip usa ka handout.) Mahimo nimong awhagon ang mga estudyante sa paggamit sa booklet nga Alang sa Kalig-on sa mga Kabatan-onan o sa Giya ngadto sa mga Kasulatan alang sa dugang nga tabang. Kon gamay ra ang imong klase, mahimo nimong dapiton ang mga estudyante sa pagtudlo sa tibuok klase imbis nga sa ilang mga grupo.)
Dapita ang usa ka sakop sa inyong grupo sa pagbasa og kusog sa na-assign nga tudling sa kasulatan. Mahimo nimong isugyot nga markahan sa mga sakop sa inyong grupo ang sugo o balaod diha sa tudling.
Itino ang usa ka doktrina o baruganan nga atong makat-unan gikan sa mga bersikulo.
Ipasabut nganong gibati ninyo nga importante kini nga sugo ug sa unsang paagi nga ang atong pagkamasulundon ngadto niini makaapekto sa atong espirituhanong kaayohan.
Ipakigbahin ang ideya bahin sa usa ka butang nga mabuhat natong tanan aron mas hingpit nga makatuman niini nga sugo (o magbantay batok sa paglapas niini). Mahimo usab nimong dapiton ang uban sa inyong grupo sa pagpakigbahin sa ilang mga ideya.
Siguroa nga mahatagan og igong panahon ang mga estudyante sa pag-andam ug dayon sa pagtudlo sa ilang mga grupo. Samtang nagtudlo ang mga estudyante sa usag usa, lakaw-lakaw ug hatag og tabang ug pag-awhag kon gikinahanglan.
Pagkahuman og tudlo sa mga estudyante sa ilang mga grupo, isulat sa pisara ang mosunod nga dili kompleto nga pamahayag: Pinaagi sa pagserbisyo sa Dios ug sa pagtuman sa Iyang mga sugo, atong gipakita …
Dapita ang usa ka estudyante sa pagbasa og kusog sa Doktrina ug mga Pakigsaad 42:29. Hangyoa ang klase sa pagsunod, nga mangita sa mga pulong nga mokompleto niini nga baruganan. Dapita ang usa ka estudyante sa pagpuno sa blangko diha sa pisara aron ang pamahayag susama sa mosunod nga baruganan: Pinaagi sa pagserbisyo sa Dios ug sa pagtuman sa Iyang mga sugo, atong gipakita ang atong gugma ngadto sa Dios. (Mahimo nimong isugyot nga markahan sa mga estudyante kini nga baruganan diha sa ilang mga kasulatan.)
Sa unsang paagi nga ang pagtuman sa mga balaod ug mga sugo sa Dios nagpakita sa atong gugma alang Kaniya?
Sa unsang paagi nga ang pagtuman sa mga sugo mas nakapaduol kaninyo ngadto sa Ginoo?
Hangyoa ang klase sa pagpamalandong bahin sa ilang mga kinaiya ngadto sa mga balaod ug mga sugo sa Ginoo. Dapita sila sa pagpili og usa ka sugo nga ilang paningkamutan nga matuman sa mas hingpit nga paagi isip usa ka paagi sa pagpakita sa ilang gugma ngadto sa Langitnong Amahan ug sa Manluluwas. Taposa pinaagi sa pagpakigbahin kon sa unsang paagi nga ang mga sugo nakapalig-on sa imong relasyon ngadto sa Ginoo.
Si Presidente Thomas S. Monson mihatag og gibug-aton sa sugo sa Ginoo nga ang mga elder mosangyaw sa ebanghelyo. Gipasabut usab niya ang tahas sa mga sister diha sa misyonaryo nga buhat:
Imahe
President Thomas S. Monson
“Una, ngadto sa batan-ong mga lalaki sa Aaronic Priesthood ug nganha kaninyo batan-ong mga lalaki nga mahimo nang mga elder: akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo. Imintinar ang inyong kahimsug ug kalig-on. Pagtuon sa mga kasulatan. Kon kini anaa, apil sa seminary o institute. Himoa nga kamo mapamilyar sa handbook sa misyonaryo nga Isangyaw ang Akong Ebanghelyo.
“Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo” (“Samtang Kita Nagkatigum Pag-usab,”Liahona, Nob. 2010, 5–6).
Si Presidente Boyd K. Packer sa Korum sa Napulog Duha ka mga Apostoles mipasabut og usa ka rason nganong importante ang pag-sustain niadtong gitawag sa mga posisyon diha sa Simbahan.
Imahe
President Boyd K. Packer
“Kining sagad nga pamaagi mahitabo sa higayon nga ang mga lider o mga magtutudlo tawagon o i-release gikan sa katungdanan o sa higayon nga adunay pag-organisar og usab sa usa ka stake o usa ka ward o usa ka korum o diha sa mga auxiliary (tan-awa sa D&P 124:123, 144; tan-awa usab sa D&P 20:65–67; 26:2). Talagsaon kini sa Ang Simbahan ni Jesukristo sa mga Santos sa Ulahing mga Adlaw.
“Kita kanunay nga masayud kon si kinsa ang tawagon o motudlo ug adunay oportunidad sa pag-sustain o sa pagsupak sa aksyon. Kini wala moabut ingon nga inimbento sa tawo apan gipasabut diha sa mga pinadayag … ([tan-awa sa] D&P 42:11). Niining paagiha, ang Simbahan giproteksyunan gikan ni bisan kinsa nga impostor kinsa gustong mokontrolar sa usa ka korum, usa ka ward, usa ka stake, o sa Simbahan” (“Ang Huyang ug ang Yano sa Simbahan,”Liahona, Nob. 2007, 6).
“‘Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain’ (D&P 42:22). Sa akong nahibaloan dunay usa lamang ka laing butang sa tibuok kasulatan nga gisugo kita sa paghigugma sa tibuok natong kasingkasing, ug mao kana ang Dios Mismo. Hunahunaa kon unsa ang gipasabut niana!
“Kining matang sa gugma mapakita sa inyong mga asawa sa daghan kaayong paagi. Una ug labaw sa tanan, walay lain gawas sa Dios Mismo ang nag-una kay sa inyong asawa diha sa inyong kinabuhi—dili trabaho, dili kalingawan. Ang inyong asawa bililhon, mahangturong kauban—inyong kompanyon.
“Unsa ang buot ipasabut sa paghigugma sa usa ka tawo sa tibuok ninyong kasingkasing? Nagpasabut kini sa paghigugma sa tibuok ninyong emosyonal nga mga pagbati ug sa tibuok ninyong debosyon. Sa tinuod kon gihigugma ninyo ang inyong asawa sa tibuok ninyong kasingkasing, dili ninyo siya pakaulawan, sawayon siya, pangitaan siya og sayop, o abusohan siya pinaagi sa mga pulong, ngil-ad nga batasan, o mga lihok.
“Unsa man ang buot ipasabut sa ‘unong ngadto kaniya’? Nagpasabut kini nga magpaduol kaniya, magmatinuoron ug magmatinud-anon kaniya, makigsulti kaniya, ug mopadayag sa inyong gugma ngadto kaniya” (“To the Fathers in Israel,” Ensign, Nob. 1987, 50).
Si Elder Jeffrey R. Holland sa Korum sa Napulog Duha ka mga Apostoles mipahayag sa mosunod bahin sa gugma ug kahigal:
Imahe
Elder Jeffrey R. Holland
“Nganong ang kahigal ingon usa man ka makamatay nga sala? Kana, agig dugang sa hingpit nga epekto niana diha sa atong mga kalag, nagtuo ako nga sala kini tungod kay mohugaw kini sa labing taas ug labing balaan nga pakigrelasyon nga gihatag sa Dios dinhi kanato sa mortalidad—ang gugma nga gibatunan sa lalaki ug sa babaye alang sa usag usa ug ang tinguha nga ang magtiayon kinahanglan magbaton og mga anak ngadto sa usa ka pamilya gituyo nga magmahangturon. Adunay miingon makausa nga ang tinuod nga gugma kinahanglan nga maglakip sa ideya sa pagkapermanente. Ang tinuod nga gugma molahutay. Apan ang kahigal dali nga mausab sama sa pagpakli og pahina nga malaw-ay o mopasiplat og lain pang butang alang sa tinguhang sekswal, lalaki o babaye. Mahinamon kaayo kami kabahin nianang tinuod nga gugma—sama nako ngadto kang Sister Holland; gisinggit namo kini gikan sa ibabaw sa mga atup. Apan ang kahigal naghatag og dagway sa kaulaw ug pagtago-tago ug nailhan kini sa dili kapugngan nga pagpanghulhog sa pagtago niini gikan sa uban—ang mas langan ug mas ngitngit mas maayo, nga may doble nga trangka sa pultahan basin pa unya. Ang gugma mohimo kanato og kinaiya sa pagduol ngadto sa Dios ug sa ubang mga tawo. Ang kahigal, sa laing bahin, dili gayud diosnon ug magmaya sa kaugalingong pagpatuyang. Ang gugma mohimo kanato nga manggihatagon ug bukas sa kasingkasing; ang kahigal mohimo kanato nga gutom.
Pipila lang kini sa mga rason nga nagdaot sa tinuod nga kahulugan sa gugma—sa atong imahinasyon man o sa laing tawo—makadaot kaayo. Kini moguba nianang ikaduha ka-importante sa atong hugot nga pagtuo sa Dios—sa ato pa, pagtuo diha sa atong gihigugma. Kini makapahuyang sa mga pundasyon sa pagsalig diin ang karon—o ang umaabut—nga gugma gitukod, ug kini molanat pa og taas nga panahon sa pagtukod pag-usab nianang pagsalig kon kini mawala. Kon kini nga problema mograbe—personal man kini isip sakop sa pamilya o sa publiko sa pinili nga mga opisyal, mga lider sa negosyo, mga artista, ug mga sikat sa sports—ug dayon sa katilingban nga gitukod unta alang sa moral nga responsibilidad moingon kita, ‘Kini wala nay kalig-on’” (“Walay Luna alang sa Kaaway sa Akong Kalag,”Liahona, Mayo 2010, 44–45).
Tan-awa usab ang Mormon Messages nga video nga “Watch Your Step” (LDS.org).