Doktrina ug mga Pakigsaad 90–97 (Unit 20)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 90–97 (unit 20) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 90–92)

Niini nga leksyon nakat-unan sa mga estudyante nga kon taphaw lang ang atong pagtagad sa mga pagpadayag nga gihatag sa Dios pinaagi sa Iyang mga propeta, kita mahagba ug mapukan. Nahibaloan usab nila nga kon magkugi kita sa pagpangita, mag-ampo kanunay, magmatuohon, ug motuman sa atong mga pakigsaad, ang tanang mga butang mahimo alang sa atong kaayohan. Gikan sa pagtuon sa usa ka pagpadayag bahin sa Apokripa, nakat-unan sa mga estudyante nga ang Espiritu Santo makatabang kanato nga masayud kon ang mga butang nga atong nabasa tinuod. Agig dugang, nahibaloan sa mga estudyante ang baruganan nga kon kita magmatinud-anon sa pagtuman sa mga sugo sa Ginoo, nan mapanalanginan kita hangtud sa kahangturan.

Day 2 (Doktrina ug mga Pakigsaad 93)

Sa ilang pagtuon sa Doktrina ug mga Pakigsaad 93, nakat-unan sa mga estudyante nga si Jesukristo mao ang Unang Natawo sa tanang espiritu nga mga anak sa Langitnong Amahan ug pinaagi sa pagdawat sa kahayag ug kamatuoran, kita mahimong sama ni Jesukristo ug sa Langitnong Amahan. Nakat-unan usab nila nga kita makadawat sa kamatuoran ug kahayag samtang kita motuman sa mga sugo ug nga ang pagkamasinupakon ug sayop nga mga tradisyon makahimo kanato nga mawad-an sa kahayag ug kamatuoran. Gikan sa tambag sa Ginoo ngadto sa pipila ka mga lider sa Simbahan, nakat-unan usab sa mga estudyante nga kinahanglan gayud kita nga mag-ampo kanunay ug magkugi ug magpakabana sa panimalay, o ang dautan makaangkon og gahum batok kanato.

Day 3 (Doktrina ug mga Pakigsaad 94-96)

Gikan sa pagbadlong nga gihatag sa Ginoo ngadto sa mga Santos tungod sa ilang pagbaliwala sa pagtukod og Templo sa Kirtland, nakat-unan sa mga estudyante nga ang Dios mopanton niadtong Iyang gihigugma. Nakat-unan usab nila nga diha sa mga templo, ang Ginoo nag-andam sa Iyang mga sulugoon sa pagbuhat sa Iyang buluhaton ug mituga kanila og gahum. Agig dugang, nadiskubrihan sa mga estudyante nga kon motuman kita sa mga sugo, makabaton kita og gahum sa pagbuhat sa unsay gipabuhat sa Ginoo kanato.

Day 4 (Doktrina ug mga Pakigsaad 97)

Gikan sa instruksyon sa Ginoo ngadto sa mga Santos didto sa Missouri, nakat-unan sa mga estudyante nga kon magmapainubsanon kita sa atong kaugalingon ug magtinguha sa pagkugi nga makat-on, maangkon nato ang kaalam ug kamatuoran. Nahibaloan usab sa mga estudyante kon unsa gayud ang atong buhaton aron madawat sa Ginoo ug nakakat-on nga diha sa templo, ang Dios mopakita sa Iyang kaugalingon niadtong kinsa putli og kasingkasing. Agig dugang, nakat-unan sa mga estudyante nga ang Zion mao ang putli og kasingkasing, ug kon kita magmasulundon makalingkawas kita sa panimalos sa Ginoo ug makadawat og daghang mga panalangin.

Pasiuna

Ang Ginoo mihatag sa pagpadayag nga nahilakip diha sa Doktrina ug mga Pakigsaad 93 niadtong Mayo 6, 1833. Kini nga leksyon nag-fucos sa Doktrina ug mga Pakigsaad 93:1–20, nga gihisgutan lang sa daklit diha sa mga leksyon sa estudyante sa Doktrina ug mga Pakigsaad 93. Niining mga bersikulo gitudlo ni Jesukristo kon unsaon nato sa pagkaila Kaniya ug kon sa unsang paagi nga kita mahisama Kaniya ug sa atong Langitnong Amahan.

Mga Sugyot alang sa Pagtudlo

Doktrina ug mga Pakigsaad 93:1–5

Si Jesukristo nagtudlo kon sa unsang paagi nga ang mga indibidwal makakita sa Iyang nawong ug masayud nga Siya buhi

I-display ang litrato sa usa ka ilado nga tawo nga mailhan sa imong mga estudyante, ug pangutan-a sila kon nakahibalo ba sila sa ngalan sa tawo. (Kon wala kay ika-display nga litrato, isulat ang ngalan sa tawo diha sa pisara ug pangutan-a ang mga estudyante sa pagpasabut kon si kinsa ang maong tawo ug unsay nakapahimo niyang inila.)

Ngano man nga daghan kaayong tawo nga nakaila kon si kinsa kining tawhana?
Importante kaha nga masayran kon si kinsa kining tawhana? Ngano man?

I-display ang litrato ni Jesukristo (mahimo nimong gamiton ang Jesukristo sa [Libro sa mga Hulagway sa Ebanghelyo (2009), nu. 1]; tan-awa usab sa LDS.org), ug ipasabut nga daghang mga tawo karon nga wala makaila kon si kinsa Siya.

Ngano kaha nga importante man nga makaila kon si kinsa si Jesukristo?

Ipasabut nga diha sa Doktrina ug mga Pakigsaad 93 ang Ginoo mitudlo kon sa unsang paagi kita makapalambo sa atong kahibalo mahitungod Kaniya ug sa Iyang gahum sa pagpanalangin kanato, karon ug hangtud sa kahangturan. Isulat ang mosunod nga duha ka pangutana diha sa pisara, pagbilin og luna para masulatan sa mga estudyante sa ilang mga tubag sa ubos sa mga pangutana:

Unsa ang kinahanglan gayud natong buhaton aron makabaton og usa ka pagpamatuod ni Jesukristo?

Unsa ang atong mahibaloan bahin Niya kon mobuhat kita niining mga butanga?

Dapita ang usa ka estudyante sa pagbasa og kusog sa Doktrina ug mga Pakigsaad 93:1–5. Sa dili pa magsugod ang estudyante sa pagbasa, hangyoa ang katunga sa mga estudyante sa pagpangita sa mga tubag ngadto sa unang pangutana ug ang laing katunga mangita sa mga tubag sa ikaduhang pangutana. Human mabasa ang mga bersikulo, dapita ang pipila ka mga estudyante sa pagduol sa pisara ug ipasulat ang ilang mga tubag sa mga pangutana. Dayon ipangutana sa klase ang mosunod:

Unsaon nimo sa pagpahayag sa saad diha sa bersikulo 1 isip usa ka “kon–nan” nga baruganan? (Kinahanglang makita diha sa mga tubag sa mga estudyante ang mosunod nga baruganan: Kon isalikway nato ang atong mga sala, moduol kang Kristo, motawag sa Iyang ngalan, mosunod sa Iyang tingog, ug motuman sa Iyang mga sugo, nan makakita kita sa Iyang nawong ug makaila Kaniya.)

Mahimo nimong hatagan og gibug-aton nga kining panalangin moabut sa kaugalingong panahon sa Ginoo, sa Iyang kaugalingong paagi, ug sumala sa Iyang kaugalingong kabubut-on (tan-awa sa D&P 88:68; tan-awa usab sa Enos 1:27).

Sa unsang paagi nga ang matag usa sa mga buhat diha sa Doktrina ug mga Pakigsaad 93:1 makatabang nato nga makaila ni Jesukristo?
Gikan sa unsay inyong nakat-unan sa bersikulo 3, unsa ang importanting doktrina nga angayang masabtan mahitungod sa Amahan ug sa Anak? (Ang mga estudyante kinahanglang mahibalo sa mosunod nga doktrina: Ang Amahan ug ang Anak usa ra.)
Unsa ang gipasabut nga ang Amahan ug ang Anak usa ra?

Tabangi ang mga estudyante nga makasabut nga ang Amahan ug Anak duha ka managlahi nga binuhat, ang matagusa adunay nahimaya nga lawas (tan-awa sa D&P 130:22). Hinoon, ang Amahan ug ang Anak usa sa katuyoan ug doktrina. Hingpit silang nagkahiusa sa pagpahinabo sa plano sa Amahan bahin sa kaluwasan.

Ipasabut ang mosunod nga mga pulong sa Doktrina ug mga Pakigsaad 93:4: “Ang Amahan tungod kay gihatag niya kanako ang iyang kahingpitan.” Dapita ang mga estudyante sa pagbasa sa Doktrina ug mga Pakigsaad 93:17, 26. Ipangutana ang mosunod:

Unsa ang buot ipasabut nga nadawat ni Jesukristo ang kahingpitan sa Amahan? (Tan-awa sa D&P 93:16–17, 26.)

Doktrina ug mga Pakigsaad 93:6–20

Ang rekord ni Juan nagamit aron sa pagtabang kanato nga makasabut kon sa unsang paagi nga nadawat ni Jesukristo ang kahingpitan sa himaya sa Langitnong Amahan

Ikonsiderar ang paghan-ay daan sa mosunod nga paghulagway aron maandam ang mga estudyante nga masabtan kon sa unsang paagi nga nadawat sa Manluluwas ang kahingpitan sa Amahan. Dapita ang usa ka estudyante kinsa nakapalambo og partikular nga kahanas, sama sa pagdula og piho nga sport o instrumento sa musika o pagmugna og matang sa artwork, aron ihulagway sa daklit ang kahanas. Dayon hangyoa ang estudyante sa pagsulti sa klase mahitungod sa gutlo nga siya daling nakapalambo niana nga kahanas. (Ang tubag sa estudyante kinahanglang makatabang sa klase nga makasabut nga aron mahimong usa ka hanas nga atleta, musikero, o artist usa ka proseso nga nagkinahanglan og makanunayon nga paningkamot ug dili diha-diha mahitabo sa usa ka gutlo.)

Dapita ang usa ka estudyante sa pagbasa og kusog sa Doktrina ug mga Pakigsaad 93:12–17. Hangyoa ang klase sa pagsunod ug motino kon sa unsang paagi nga si Jesukristo nahimong sama sa Iyang Amahan.

Sa unsang paagi nga si Jesukristo nahisama sa Iyang Amahan? (Kinahanglang makita diha sa mga tubag sa mga estudyante ang mosunod nga baruganan: Si Jesukristo milambo sa pag-angkon og grasya ug dugang pa nga grasya hangtud nga Siya nakadawat og kahingpitan sa himaya sa Amahan. Mahimo nimong isugyot nga markahan sa mga estudyante kini nga baruganan diha sa bersikulo 13.)
Unsa kaha ang gipasabut nga si Jesukristo nagpadayon sa pag-angkon og grasya ug dugang pa nga grasya hangtud Siya nakadawat sa kahingpitan?

Tabangi ang mga estudyante nga makasabut nga ang grasya mao ang kalig-on ug gahum gikan sa Dios nga makatugot kanato nga makaangkon og kinabuhing dayon ug kahimayaan. Dapita ang usa ka estudyante sa pagbasa og kusog sa Doktrina ug mga Pakigsaad 93:19–20. Hangyoa ang klase sa pagsunod ug motino sa rason nga nahatag sa Manluluwas sa pagbutyag kon sa unsang paagi Siya nakadawat sa kahingpitan sa Amahan.

Sumala sa bersikulo 19, nganong gipadayag sa Manluluwas kon sa unsang paagi Siya nakadawat sa kahingpitan sa Amahan?

Tabangi ang mga estudyante nga makita nga ang Manluluwas mipadayag kon sa unsang paagi Siya nakadawat og kahingpitan aron nga kita “masayud ug makahibalo” Kaniya ug sa Langitnong Amahan ug makahibalo unsaon sa pagsimba sa Amahan ug makadawat sa Iyang kahingpitan. Isulat diha sa pisara ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. (Kini nga pamahayag makita sa The Promised Messiah: The First Coming of Christ [1978], 568.)

“Ang hingpit nga pagsimba mao ang pagsunod. Mipasidungog kita niadtong kinsa atong gisunod” (Elder Bruce R. McConkie).

Unsa kaha ang gipasabut sa pagsimba?
Unsaon nato sa pagsimba ang Langitnong Amahan? (Mahimong mopahayag ang mga estudyante sa mosunod nga baruganan: Kinahanglang mosimba kita sa Langitnong Amahan pinaagi sa pagsunod sa ehemplo ni Jesukristo. Mahimo nimong isugyot nga isulat sa mga estudyante kini nga baruganan diha sa margin sa ilang mga kasulatan.)
Sa unsang paagi nga ang pag-uswag sa Manluluwas sa pag-angkon og grasya ug dugang pa nga grasya susama ngadto sa proseso sa pagkat-on ug pag-uswag nga atong masinati?
Unsa nga saad ang gihatag diha sa Doktrina ug mga Pakigsaad 93:20 niadtong kinsa mosunod sa ehemplo ni Jesukristo ug motuman sa Iyang mga sugo? (Kinahanglang mopahayag ang mga estudyante sa mosunod nga baruganan: Kon motuman kita sa mga sugo, makadawat kita og kahingpitan sa Amahan, sama sa naangkon ni Jesukristo.)

Guniti pataas ang hulagway sa Manluluwas nga imong gi-display sa sinugdanan sa klase.

Nganong importante man nga makabaton og usa ka pagpamatuod sa ehemplo, mga pagtulun-an, ug Pag-ula ni Jesukristo?
Unsa ang inyong mabuhat aron makapadayon “[pag-angkon] og grasya ug dugang pa nga grasya” (D&P 93:13) ug mas mahisama Kaniya?

Hangyoa ang mga estudyante sa paghunahuna og piho nga paagi nga sila magtinguha sa pag-uswag ug paglambo pinaagi sa pagsunod sa ehemplo sa Manluluwas. Dapita sila nga himoon kana isip usa ka tumong ug maningkamot sa pagtuman niini.

Sunod nga Unit (Doktrina ug mga Pakigsaad 98–101)

Aron maandam ang mga estudyante sa ilang pagtuon sa Doktrina ug mga Pakigsaad 98–101, mahimo nimo silang dapiton sa pagkonsiderar sa mosunod: Nasulayan ba ninyo sukad nga gipasipad-an ug naghunahuna kon unsay inyong buhaton kalabut niini? Sa sunod nga mga leksyon makat-unan ninyo ang mahitungod sa pagpanglutos ug kasakit nga nasinati sa mga Santos didto sa Missouri. Makat-unan usab ninyo kon unsay gitudlo sa Ginoo sa mga Santos mahitungod sa pagtubag sa pagpanglutos, lakip na sa Iyang mga pagbati mahitungod sa pagpakiggubat.