Home-Study nga Leksyon: Gubat sa Utah ug ang Masaker sa Mountain Meadows, ang Pagtungha sa Perlas nga Labing Bililhon, Opisyal nga Pahayag 1, ug Doktrina ug mga Pakigsaad 138 (Unit 31)
Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod mao ang summary sa mga doktrina ug mga baruganan nga nakat-unan sa mga estudyante samtang sila nagtuon sa unit 31. Kini nga summary dili tuyo nga itudlo isip kabahin sa imong leksyon. Ang leksyon nga imong itudlo alang sa unit 31 magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Day 1 (Ang Gubat sa Utah ug ang Masaker sa Mountain Meadows)
Samtang nagkat-on ang mga estudyante sa usa ka subo nga panghitabo sa kasaysayan sa Simbahan, nakapamalandong sila sa baruganan nga kon atong sulbaron ang pakigsumpaki sa uban diha sa pamaagi sa Ginoo, nan makalikay kita sa makadaut nga mga epekto sa panagbingkil. Nakat-unan usab sa mga estudyante nga kon kita mobaliwala sa tambag sa pagbuhat og matarung, nan mas malagmit nga makahimo kita og sayop nga mga pagpili. Nadiskubrihan sa mga estudyante nga ang pagpili sa pagtago sa atong mga sala makadala kanato ngadto sa padayon nga pagpakasala ug mahimong moresulta sa pagmahay ug pag-antus. Sa katapusan, nakat-unan sa mga estudyante nga makapalambo kita og lig-on nga mga pagpamatuod pinaagi sa pagpalig-on sa atong pagtuo diha sa pundasyon ni Jesukristo.
Day 2 (Ang Pagtungha sa Perlas nga Labing Bililhon)
Nadiskubrihan sa mga estudyante nga ang Perlas nga Labing Bililhon mao ang ebidensya nga si Joseph Smith usa ka propeta, manalagna, ug tigpadayag. Ilang nakat-unan ang mahitungod sa pagtungha sa basahon ni Moises ug sa basahon ni Abraham. Natino usab nila ang pipila ka mga doktrina ug mga baruganan diha sa Mga Artikulo sa Hugot nga Pagtuo.
Samtang gitun-an sa mga estudyante ang Manifesto kalabut sa pagpahunong sa pagbuhat og dinaghan nga kaminyoon, ilang nakat-unan nga ang Ginoo naggiya sa Iyang Simbahan pinaagi sa pagpadayag ngadto sa Presidente sa Simbahan ug nga ang Ginoo dili gayud motugot sa Presidente sa Simbahan nga ipahisalaag ang Simbahan. Samtang nagkat-on mahitungod sa pag-uswag sa buhat sa templo niadtong mga 1890, nadiskubrihan usab sa mga estudyante nga kita mahimong ma-sealed ngadto sa atong mga sakop sa pamilya, lakip niadtong kinsa nag-una kanato ug kadtong moabut pa human kanato, pinaagi sa mga ordinansa sa sealing.
Pinaagi sa pagtuon sa kasinatian ni Presidente Joseph F. Smith sa pagdawat og pagpadayag, nadiskubrihan sa mga estudyante nga kon kita mobasa ug mamalandong sa mga kasulatan, giandam nato ang atong mga kaugalingon sa pagdawat og pagpadayag. Agig dugang, ilang nakat-unan nga pinaagi sa Pag-ula ni Jesukristo ug sa pagkamasulundon ngadto sa mga baruganan sa ebanghelyo, ang tanang mga katawhan mahimong maluwas. Nakat-unan usab sa mga estudyante nga pinaagi sa grasya sa Dios nga Amahan ug ni Jesukristo, makalingkawas kita gikan sa mga gapus sa kamatayon ug kita makadawat og kahingpitan sa kalipay pinaagi sa pagkabanhaw.
Pasiuna
Kini nga leksyon makatabang sa mga estudyante nga makasabut kon sa unsang paagi nga ang mga espiritu didto sa kalibutan sa mga espiritu gitudloan sa ebanghelyo. Makatabang usab kini sa mga estudyante nga makasabut kon sa unsang paagi nga sila mahimong kabahin sa dakong buhat sa kaluwasan sa mga patay.
Mga Sugyot alang sa Pagtudlo
Sa dili pa motudlo niini nga leksyon sa Doktrina ug mga Pakigsaad 138, mahimo nimong pangutan-on ang mga estudyante kon aduna ba silay mga pangutana bahin sa bisan unsang butang nga ilang natun-an atol sa semana. Sama pananglit, tingali aduna silay mga pangutana mahitungod sa Masaker sa Mountain Meadows o Opisyal nga Pahayag 1.
Nahibaloan ni Presidente Joseph F. Smith kon sa unsang paagi ang ebanghelyo gisangyaw didto sa kalibutan sa mga espiritu
Sultihi ang mga estudyante nga ang mga tawo sa tibuok kalibutan naghupot og lain-laing mga gituohan bahin sa unsay mahitabo kanato human kita mamatay. Ipangutana kon nakahimamat ba ang mga estudyante og usa ka tawo nga dunay lahi nga mga gituohan kalabut sa unsay mahitabo kanato human kita mamatay. Dapita ang pipila ka mga estudyante sa pagpakigbahin sa ilang mga kasinatian. (Pag-amping nga dili magsulti og negatibo o ipakaubos ang ubang mga gituohan kalabut sa relihiyon.)
Unsaon nato sa pagkahibalo kon hain sa mga gituohan mahitungod sa kinabuhi human sa kamatayon ang tukma? (Mahimo nimong ipasabut nga bisan gani ang pipila sa mga Santos sa Ulahing mga Adlaw adunay dili tukma nga mga gituohan bahin sa kinabuhi human sa kamatayon.)
Aron madugangan ang mga tubag sa mga estudyante, hangyoa ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:
Imahe
Elder D. Todd Christofferson
“Ang mga kasulatan mao ang sumbanan alang sa pagsukod sa kaeksakto ug kamatuoran” (“Ang Panalangin sa Kasulatan,”Liahona, Mayo 2010, 34).
Ipamatuod nga kita mahimong makahibalo sa katukma sa lain-laing mga gituohan kalabut sa kinabuhi human sa kamatayon pinaagi sa pagtandi niadtong mga gituohan ngadto sa mga kamatuoran nga gipadayag sa Ginoo diha sa mga kasulatan, sama sa Doktrina ug mga Pakigsaad 138.
Drowinga ang kauban nga diagram diha sa pisara. Mahimo nimong ipasabut sa daklit nga sa pipila ka mga paagi, ang tibuok kalibutan sa mga espiritu mahimong makonsiderar nga bilanggoan sa mga espiritu tungod kay bisan ang mga matarung naglantaw sa pagkabulag sa ilang mga lawas isip usa ka pagkabihag (tan-awa sa D&P 138:49–50).
Imahe
spirit paradise and spirit prison diagram
Aron matabangan ang mga estudyante nga maribyu sa daklit ang mga kamatuoran nga ilang natun-an sa seksyon 138, i-assign ang katunga sa klase sa pagpangita sa Doktrina ug mga Pakigsaad 138:12–15, 22 alang sa mga detalye kalabut kon si kinsa ang maadto sa paraiso sa mga espiritu panahon sa kamatayon ug sa mga kahimtang nga ilang masinati didto. I-assign ang laing katunga sa klase sa pagpangita sa Doktrina ug mga Pakigsaad 138:20–22 alang sa mga detalye kalabut kon si kinsa ang maadto sa bilanggoan sa mga espiritu panahon sa kamatayon ug ang mga kahimtang nga ilang masinati. Hangyoa ang mga estudyante sa pag-report kon unsay ilang makit-an.
Ipasabut nga dili lang ang mga dautan ug ang masinupakon nga maadto sa bilanggoan sa mga espiritu panahon sa ilang kamatayon, apan kadto usab nga mamatay diha sa ilang mga sala nga walay kasayuran sa ebanghelyo (tan-awa sa D&P 138:32). Pahinumdumi ang mga estudyante nga samtang si Presidente Joseph F. Smith namalandong sa mga tudling sa 1 Pedro, ang Ginoo mipadayag ngadto kaniya kon sa unsang paagi nga ang mga tawo didto sa bilanggoan sa mga espiritu makaangkon og oportunidad sa pagdawat sa mga panalangin sa ebanghelyo.
Dapita ang usa ka estudyante sa pagbasa og kusog sa Doktrina ug mga Pakigsaad 138:29–32, ug hangyoa ang klase sa pagpangita kon giunsa sa pagtudlo ang ebanghelyo didto sa kalibutan sa mga espiritu. Hangyoa ang mga estudyante sa pag-report kon unsay ilang makit-an. Kinahanglan ilang mahibaloan ang butang nga susama sa mosunod nga kamatuoran: Ubos sa direksyon ni Jesukristo, ang matarung nga mga mensahero nagtudlo sa ebanghelyo niadtong anaa sa bilanggoan sa mga espiritu.
Diha sa diagram sa pisara, drowinga ang usa ka arrow gikan sa paraiso sa mga espiritu ngadto sa bilanggoan sa mga espiritu sa pagrepresentar sa matarung nga mga mensahero sa Ginoo nga nagtudlo sa ebanghelyo didto sa bilanggoan sa mga espiritu.
I-summarize ang Doktrina ug mga Pakigsaad 138:33–37 pinaagi sa pagpasabut nga ang tanang anak sa Langitnong Amahan adunay oportunidad sa pagdawat sa mga baruganan ug mga ordinansa sa ebanghelyo ni Jesukristo, dinhi sa yuta o didto sa kalibutan sa mga espiritu.
Aron matabangan ang mga estudyante nga makasabut kon sa unsang paagi nga ang tanan makadungog sa ebanghelyo, ipasabut nga bisan ang Manluluwas nga mibisita sa kalibutan sa mga espiritu sulod sa mubo nga panahon human sa Iyang kamatayon, Siya miorganisar sa matarung nga mga espiritu sa pagsangyaw sa ebanghelyo niadtong anaa sa bilanggoan sa mga espiritu. Kini nga paningkamot nagpadayon karon. Kon ang mga tawo kinsa wala makadungog o makadawat sa ebanghelyo dinhi sa atong panahon mamatay, sila usab adunay oportunidad sa pagpaminaw ug sa pagdawat sa ebanghelyo didto sa kalibutan sa mga espiritu.
Pahinumdumi ang mga estudyante nga sa Doktrina ug mga Pakigsaad 138:38–49, si Presidente Joseph F. Smith milista og daghang ngalan sa mga “madungganon ug gamhanan” nga mga espiritu nga iyang nakita sa kalibutan sa mga espiritu nga nanaghulat alang sa Manluluwas nga mopakita ngadto kanila human sa Iyang kamatayon diha sa krus. Ang uban sa mga espiritu kinsa gibisita sa Manluluwas mao ang mga propeta sa Daang Tugon ug sa Basahon ni Mormon. Sugod sa bersikulo 53, atong mabasa nga nakita usab ni Presidente Smith ang pinili nga mga espiritu kinsa moabut sa katapusan nga dispensasyon, lakip ni Propeta Joseph Smith (iyang uyoan) ug ni Hyrum Smith (iyang amahan).
Dapita ang usa ka estudyante sa pagbasa og kusog sa Doktrina ug mga Pakigsaad 138:53–56. Hangyoa ang klase sa pagsunod ug mangita kon unsay gikatampo niining mga indibidwal samtang sila anaa pa sa kalibutan ngadto sa kaluwasan niadtong anaa sa bilanggoan sa mga espiritu.
Sa unsang paagi nga ang mga lider sa Simbahan sa ulahing mga adlaw nakatabang sa mga espiritu nga anaa sa bilanggoan?
Human nadiskubrihan sa mga estudyante nga ang mga propeta sa ulahing mga adlaw nakatabang diha sa katubsanan sa mga patay pinaagi sa pagtukod og mga templo ug sa pagpangalagad sa mga ordinansa sa templo alang sa mga patay, pagbutang o pagdrowing og hulagway sa usa ka templo sunod sa diagram diha sa pisara.
Dapita ang usa ka estudyante sa pagbasa og kusog sa Doktrina ug mga Pakigsaad 138:58–59. Hangyoa ang klase sa pagsunod, nga mangita kon unsay buhaton sa namatay aron matubos. Hangyoa ang mga estudyante sa pag-report kon unsay ilang makit-an.
Unsa ang mahitabo niadtong kinsa maghinulsol didto sa kalibutan sa mga espiritu? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Ang mga espiritu kinsa naghinulsol matubos pinaagi sa pagkamasulundon ngadto sa mga ordinansa sa templo, malimpyuhan pinaagi sa Pag-ula, ug madawat ang ilang ganti.)
Unsaon nato sa pagtabang sa buhat sa kaluwasan alang sa mga patay samtang ania kita dinhi sa yuta? (Pinaagi sa pagkompleto sa buhat sa family history ug pag-apil sa mga ordinansa sa templo alang sa mga patay.)
Tudloa ang hulagway sa templo diha sa pisara. Ipamatuod nga kon moadto kita sa templo aron sa pagpahigayon sa mga ordinansa alang niadtong mga nangamatay na, mitabang kita kanila—kon sila mopili sa pagdawat sa mga ordinansa—aron matubos gikan sa bilanggoan sa mga espiritu ug moapil sa matarung nga mga espiritu didto sa paraiso.
Diha sa diagram sa pisara, pagdrowing og arrow gikan sa bilanggoan sa mga espiritu hangtud sa paraiso sa mga espiritu sa pagrepresentar sa katubsanan sa mahinulsulon nga mga espiritu gikan sa bilanggoan sa mga espiritu.
Sa unsang paagi nga kining kahibalo makaimpluwensya sa inyong mga kasinatian sa templo ug sa buhat sa family history?
Sa unsang paagi nga kamo napanalanginan pinaagi sa pag-apil sa family history ug buhat sa templo? (Mahimo usab nimong ipakigbahin ang imong kaugalingong kasinatian.)
Dapita ang usa ka estudyante sa pagbasa og kusog sa Doktrina ug mga Pakigsaad 138:60. Hangyoa ang klase sa pagsunod, nga mangita sa pagpamatuod ni Presidente Joseph F Smith bahin sa mga kamatuoran nga iyang narekord.
Awhaga ang mga estudyante sa pag-iskedyul og panahon sa pagbuhat og pipila ka family history o buhat sa templo sa mosunod nga pipila ka semana.
Tapusa pinaagi sa pagpakigbahin sa imong pagpamatuod ni Ginoong Jesukristo ug sa mga panalangin sa Pag-ula nga magamit sa mga buhi ug sa mga patay.
Sunod nga Unit (Mga Organisasyon ug mga Programa sa Simbahan, Opisyal nga Pahayag 2, Pagpadali sa Buhat sa Kaluwasan, ang Pamahayag sa Pamilya, ug ang Buhi nga Propeta)
Pangutan-a ang mga estudyante kon sa unsang paagi nga sila nakahibalo nga ang Ginoo naggiya sa Iyang Simbahan karon. Nganong importante man nga dunay buhi nga propeta? Nganong importante ang mga pamilya? Dapita ang mga estudyante sa pagpangita sa mga tubag niining mga pangutana samtang sila magtuon sa mga leksyon sa umaabut nga semana.