Sa Abril 1829, misugod si Oliver Cowdery sa pagtabang ni Propeta Joseph Smith sa paghubad sa bulawan nga mga palid pinaagi sa paglihok isip tigsulat. Tungod kay ang Ginoo mitanyag ni Oliver sa gasa sa paghubad kon siya nagtinguha sa mao (tan-awa sa D&P 6:25), si Oliver “nahimong nanobra ka matinguhaon nga makabaton sa gahum sa paghubad nga itugyan diha kaniya” (Joseph Smith, sa History of the Church, 1:36). Agi og tubag, miingon ang Ginoo nga Siya mohatag ni Oliver sa abilidad sa paghubad, sumala sa hugot nga pagtuo ni Oliver.
Nagsaad ang Ginoo ni Oliver Cowdery sa gasa sa pagpadayag
Sa dili pa magklase, isulat ang mosunod nga mga pangutana diha sa pisara. Hatagi og luna ubos sa matag pangutana aron masulatan og mga baruganan nga ilhon sa mga estudyante sa panahon sa leksyon.
Unsa ang atong mabuhat aron mahimong mas makahuluganon ang atong mga pag-ampo?
Unsaon nato pagkahibalo kon ang Dios nakigsulti kanato?
I-refer ang mga estudyante ngadto sa mga pangutana diha sa pisara.
Ngano kaha nga importante ang pagsabut sa mga tubag ngadto niini nga mga pangutana?
Ipasabut nga ang Doktrina ug mga Pakigsaad 8 naglangkob og pinadayag nga gihatag sa Ginoo ngadto ni Oliver Cowdery pinaagi ni Joseph Smith. Niini nga pinadayag atong makita ang mga panudlo gikan sa Ginoo nga nagtabang sa pagtubag sa mga pangutana diha sa pisara.
Dapita ang mga estudyante sa pagbasa og hilum sa Doktrina ug mga Pakigsaad 8:1 nga mangita kon giunsa sa Ginoo pagtudlo si Oliver sa pag-ampo.
Unsa nga panudlo ang gihatag sa Ginoo ngadto ni Oliver mahitungod kon unsaon sa pag-ampo?
Unsa kaha ang gipasabut sa “pangayoon sa hugot nga pagtuo, uban sa matinuoron nga kasingkasing”?
Ubos sa unang pangutana diha sa pisara, isulat ang mosunod: Kon kita mag-ampo , kita makadawat .
Base sa Doktrina ug mga Pakigsaad 8:1, unsaon nimo pagkompleto kini nga sentence? (Bisan og ang mga estudyante mopahayag niini sa lahi nga paagi, ang ilang mga tubag kinahanglan nga magpakita sa baruganan nga kon kita mag-ampo uban ang hugot nga pagtuo ug matinuoron nga kasingkasing, makadawat kita og kahibalo gikan sa Dios. Gamit ang ilang mga pulong, kompletoha ang sentence diha sa pisara.)
Ngano kaha ang atong hugot nga pagtuo ug sinseridad makaapekto sa atong abilidad sa pagdawat og kahibalo gikan sa Dios?
Dapita ang mga estudyante sa pagpamalandong og panahon nga sila nakasinati og mga panalangin samtang sila nag-ampo uban ang hugot nga pagtuo ug usa ka sinsero nga kasingkasing.
Aron matabangan ang mga estudyante sa pag-angkon og mga panabut ngadto sa ikaduhang pangutana diha sa pisara, dapita ang usa ka estudyante sa pag-asoy og dali sa istorya ni Moises nga naggiya sa mga anak ni Israel gikan sa pagka-ulipon nga gigukod sa kasundalohang Ehiptohanon (tan-awa sa Exodo 14).
Imahe
Moises Gibahin ang Pula nga Dagat
Dapita ang usa ka estudyante sa pagbasa og kusog sa Doktrina ug mga Pakigsaad 124:2–3. Awhaga ang klase sa pagpangita kon giunsa sa Dios pagpadayag ngadto ni Moises nga kinahanglang iyang dad-on ang mga anak ni Israel pinaagi sa Pulang Dagat.
Sa unsa nga paagi ang Dios nagdasig ni Moises sa pagbahin sa Pula nga Dagat? (Pinaagi sa espiritu sa pagpadayag.)
Unsa nga kamatuoran ang atong makat-unan gikan niini nga mga bersikulo mahitungod sa unsa nga paagi ang Ginoo mahimong makigsulti kanato? (Ang mga estudyante kinahanglang mopahayag nga ang Ginoo nagsulti sa atong mga salabutan ug mga kasingkasing pinaagi sa gahum sa Espiritu Santo. Isulat kini nga kamatuoran ubos sa ikaduhang pangutana diha sa pisara.)
Imahe
mind and heart diagram
I-drowing ang kauban nga diagram diha sa pisara. Pagdugang og mga arrow nga nagtudlo ngadto sa salabutan ug sa kasingkasing.
Sa unsa nga mga paagi nga ang Ginoo nagsulti sa atong mga salabutan? Sa unsa nga mga paagi ang Ginoo nagsulti sa atong mga kasingkasing?
Aron matabangan ang mga estudyante nga mas makasabut kon unsaon sa pagbati sa impluwensya sa Espiritu Santo, dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Kamo makakat-on na karon, sa inyong pagkabatan-on, nga magiyahan sa Espiritu Santo.
“Isip usa ka Apostol ako naminaw karon sa samang inspirasyon, nagagikan sa samang tinubdan, sa samang paagi, nga ako naminaw isip batang lalaki. Ang pakigsulti mas klaro karon” (“Prayers and Answers,” Ensign, Nob. 1979, 21).
Dayon hangyoa ang laing estudyante sa pagbasa og kusog sa mosunod nga pamayahag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Ang usa ka impresyon diha sa salabutan piho kaayo.
“Ang detalyadong mga pulong madungog o bation ug masulat sama og ang panudlo gidiktar.
“Ang usa ka komunikasyon ngadto sa kasingkasing usa ka mas kinatibuk-an nga impresyon. Ang Ginoo kasagaran nagsugod pinaagi sa paghatag og mga impresyon. Diin adunay pag-ila sa ilang importansya ug kini gisunod, ang usa ka tawo makaangkon og dakong kapasidad sa pagdawat og mas detalyadong panudlo ngadto sa salabutan. Ang usa ka impresyon ngadto sa kasingkasing, kon sundon, malig-on pinaagi sa mas piho nga panudlo ngadto sa salabutan” (“Helping Others to Be Spiritually Led” [pakigpulong ngadto sa CES religious educators, Ago. 11, 1998], 3–4, LDS.org).
Mahimo nimong ipasabut nga, alang sa uban, ang impresyon ngadto sa kasingkasing mahimong sama ka piho sa impresyon ngadto sa salabutan.
Nganong importante nga masabtan ug mailhan kon sa unsa nga paagi ang Ginoo nakigsulti kanato sa indibidwal nga paagi?
Dapita ang mga estudyante sa pagsulat diha sa ilang mga class notebook o mga scripture study journal mahitungod sa (1) usa ka panahon nga ang Langitnong Amahan namulong ngadto sa ilang mga salabutan ug mga kasingkasing pinaagi sa Espiritu Santo o (2) usa ka panahon nga ilang gibati ang impluwensya sa Espiritu Santo. Mahimo kang mohangyo og pipila ka estudyante nga mopakigbahin unsa ang ilang gisulat kon komportable silang mobuhat sa mao. Mahimo ka usab mopakigbahin og kasinatian nga imong naila nga ang Ginoo nakigsulti kanimo.
Ipasabut nga ang abilidad sa pagpaninguha ug pagdawat og personal nga pagpadayag anaa sa tanang mga anak sa Dios.
Giyahi ang atensyon sa mga estudyante ngadto sa Doktrina ug mga Pakigsaad 8:4. Basaha og kusog ang mosunod nga bahin sa bersikulo ngadto sa klase: “Busa kini mao ang imong gasa; gamita kini, ug bulahan ikaw.” Ipasabut nga dinhi niini nga bersikulo, ang pulong gasa nagpasabut ngadto sa abilidad ni Oliver sa pagdawat og pagpadayag.
Unsa kaha ang gipasabut sa “gamita kini” nga espiritu sa pagpadayag? (Ang pagpaninguha sa paggiya sa Espiritu Santo.)
Hangyoa ang mga estudyante sa pagpamalandong kon sa unsa nga paagi sila mas maayong makagamit sa espiritu sa pagpadayag diha sa ilang mga kinabuhi. Isulat ang mosunod diha sa pisara: Kon kita mogamit sa espiritu sa pagpadayag, .
Dapita ang usa ka estudyante sa pagbasa og kusog sa Doktrina ug mga Pakigsaad 8:4–5. Hangyoa ang klase sa pagsunod, nga mangita sa unsay gisaad sa Ginoo ni Oliver kon iyang “gamit[on] kini” nga gasa sa pagpadayag. Human matubag sa mga estudyante, isugyot nga usa ka paagi sa pagkompleto sa sentence mao tingali ang: Kon atong gamiton ang espiritu sa pagpadayag, kita mahimong maluwas gikan sa dautan ug kadaut. Kompletoha ang pamahayag diha sa pisara.
Sa unsa nga paagi gigamit sa Ginoo ang gahum sa pagpadayag sa pagpanalipod kaninyo o sa usa ka tawo nga inyong nailhan gikan sa dautan o kadaut?
Dapita ang mga estudyante sa paglista diha sa pisara og pipila ka mga paagi nga mas maayo natong “magamit kini” nga gasa sa pagpadayag aron makadawat og proteksyon batok sa dautan. Pangutana kanila kon sa unsa nga paagi ang ilang mga sugyot makadugang sa atong abilidad sa pagdawat ug pag-ila sa pagpadayag. Awhaga sila sa pagsulat diha sa ilang mga class notebook o mga scripture study journal og usa ka tumong sa pagsunod sa usa niini ka mga sugyot.
Mahimo nimong ipakigbahin ang imong kaugalingon nga pagpamatuod sa importansya sa pagpaningkamot alang sa espiritu sa pagpadayag ug sultihi ang mga estudyante kon sa unsa nga paagi nga ang pagbuhat sa mao nagpanalangin sa imong kinabuhi.
I-summarize ang Doktrina ug mga Pakigsaad 8:6–9 pinaagi sa pagsulti sa mga estudyante nga gipanalanginan sa Ginoo si Oliver Cowdery og mga gasa nga motabang kaniya sa pagtuman sa iyang tahas diha sa Pagpahiuli sa ebanghelyo. Apil niini nga mga gasa mao ang “gasa ni Aaron,” nga diin, ang Ginoo misulti ni Oliver, nga siya makahimo og “kahibulongan nga mga buhat.” Kita wala masayud sa sakto kon unsa ang dala sa “gasa ni Aaron”. Pahinumdumi ang mga estudyante nga si Aaron mao ang igsoong lalaki ni Moises sa Daang Tugon ug nga siya mitabang ni Moises sa pagtuman sa iyang propetikanhong mga responsibilidad.
Dapita ang mga estudyante sa pagbasa og hilum sa Doktrina ug mga Pakigsaad 8:7–8 nga mangita sa gahum nga nagpaluyo sa tanang espirituhanong mga gasa. Ipasabut nga bisan kanus-a ang Ginoo motawag o momando kanato sa pagbuhat og usa ka buluhaton, siya mopanalangin kanato og mga gasa ug mga abilidad sa paghuman niini.
Nagsaad ang Ginoo ni Oliver Cowdery sa gasa sa paghubad kon siya magpakita og hugot nga pagtuo
Giyahi ang atensyon sa mga estudyante ngadto sa baruganan nga gisulat diha sa pisara: Kon kita mag-ampo uban ang hugot nga pagtuo ug matinuoron nga kasingkasing, makadawat kita og kahibalo gikan sa Dios.” Dapita ang usa ka estudyante sa pagbasa og kusog sa Doktrina ug mga Pakigsaad 8:10–12. Hangyoa ang klase sa pagsunod, nga mangita og dugang nga mga panabut mahitungod sa pag-ampo. Human maka-report ang mga estudyante kon unsa ang ilang nadiskubre, ipangutana ang mosunod. Isugyot nga ang mga estudyante mopamalandong sa pangutana og makadiyut sa dili pa sila motubag:
Kon kamo ang anaa sa sitwasyon ni Oliver, sa unsa nga paagi kaha kini nga tambag motabang kaninyo?
Dapita ang mga estudyante sa pagsulat sa ilang mga class notebook o mga scripture study journal og pipila ka mga pangutana nga sila matinguhaong nangita og mga tubag. Mahimo usab silang mosulat og pipila ka piho nga mga kausaban nga ilang gustong buhaton sa paagi nga sila mag-ampo alang niadto nga mga tubag.
Pagpamatuod sa gugma sa Dios alang sa mga estudyante ug sa Iyang tinguha sa pagtubag sa ilang mga pag-ampo ug paghatag kanila og pagpadayag. Awhaga sila sa pagpangutana sa Langitnong Amahan sa ilang mga pangutana uban sa hugot nga pagtuo ug usa ka matinuorong intensyon sa pagbuhat sa mga tubag nga ilang nadawat.
Si Elder Richard G. Scott sa Korum sa Napulog Duha ka mga Apostoles miingon:
Imahe
Elder Richard G. Scott
“Ang pag-ampo labing epektibo kon kita nagtinguhang limpyo ug masulundon, uban sa angay nga motibo, ug andam mobuhat sa Iyang sugo. Mapainubsanon, masaligong pag-ampo maghatag og direksyon ug kalinaw” (“Ang Paggamit sa Langitnong Gasa sa Pag-ampo,”Liahona, Mayo 2007, 8).
Doktrina ug mga Pakigsaad 8:2. “Tan-awa, Ako mosulti kanimo diha sa imong hunahuna ug sa imong kasingkasing pinaagi, sa Espiritu Santo”
Imahe
Prophet Joseph Smith
“Ang usa ka tawo mahimong mabulahan pinaagi sa pag-ila sa unang pahayag sa espiritu sa pagpadayag; sama pananglit, kon imong gibati ang lunsay nga salabutan nagdagayday diha kanimo, kini mahimong mohatag kanimo og hinanaling pagsantup sa mga ideya … ; ug busa pinaagi sa pagkat-on sa Espiritu sa Dios ug sa pagsabut niini , ikaw mahimong molambo ngadto sa baruganan sa pagpadayag, hangtud nga ikaw mahimong hingpit diha ni Kristo Jesus” (Mga Pagtulun-an sa mga Presidente sa Simbahan: Joseph Smith [2007], 154–155).
Si Elder David A. Bednar sa Korum sa Napulog Duha ka mga Apostoles mipasabut nga ang mga mensahe gikan sa Dios kasagaran moabut sa hinay, nagkadugang nga mga paagi. Mitambag siya kanato nga dili mawad-an og kadasig kon kita walay kanunay, mahinuklugong mga kasinatian agi og tubag sa pag-ampo:
Imahe
Elder David A. Bednar
“Ang pagpasiga sa suga diha sa ngitngit nga kwarto susama sa dinalian nga pagdawat og mensahe gikan sa Dios, sa hingpit, ug sa hinanali. Ang kadaghanan kanato nakasinati niini nga sundanan sa pagpadayag dihang gitubag ang atong sinsero nga mga pag-ampo o gihatagan og mga direksyon o proteksyon, sumala sa kabubut-on ug panahon sa Dios. Ang mga paghulagway sa ingon nga diha-diha dayon ug klaro kaayo nga mga timailhan makita diha sa mga kasulatan, gisubli nga kasaysayan sa Simbahan, ug gipanghimatuod diha sa atong kaugalingon nga kinabuhi. Sa pagkatinuod, kining gamhanan nga mga milagro mahitabo. Bisan pa niana, kini nga sundanan sa pagpadayag maingon og dili na kaayo sagad kay sa nailhan.
“Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios ‘pagtulun-an human sa usa ka pagtulun-an, lagda human sa usa ka lagda’ (2 Nephi 28:30). Labing kasagaran, ang pagpadayag motubo og hinay-hinay sa pagdagan sa panahon ug ihatag sumala sa atong tinguha, katakus, ug pagpangandam. Ang ingon nga komunikasyon gikan sa Langitnong Amahan sa hinay-hinay ug sa kalumo ‘motuhop diha sa [atong mga kalag] ingon sa mga yamog nga gikan sa langit’ (D&P 121:45). Kini nga sumbanan sa pagpadayag daw mahimong mas sagad kay sa panagsa ra ug tataw nga makita diha sa mga kasinatian ni Nephi samtang siya misulay og daghan nga nagkalain-laing mga paagi sa wala pa magmalampuson sa pagkuha sa mga palid nga tumbaga [bronse] gikan ni Laban (tan-awa sa 1 Nephi 3–4). Sa katapusan, siya gigiyahan sa Espiritu ngadto sa Jerusalem, ‘wala masayud sa sinugdanan sa mga butang nga [siya] mobuhat’ (1 Nephi 4:6). Ug dili siya makamao nga mobuhat og barko nga maayong pagkahimo diha-diha dayon; hinoon, gipakita si Nephi sa Ginoo ‘matag karon ug unya sa unsa nga paagi nga [siya] kinahanglan molalik sa mga kahoy sa barko’ (1 Nephi 18:1). …
“Kita isip mga miyembro sa Simbahan daw mohatag og gibug-aton sa kahibulongan ug mahinuklugong espirituhanon nga mga pagpakita nga tingali kita napakyas sa pagdayeg ug gani sa pag-alinggat sa naandan nga sundanan diin ang Espiritu Santo nagbuhat sa Iyang buluhaton. Ang mao gayud nga ‘pagkayano sa paagi’ (1 Nephi 17:41) sa pagkadawat sa gamay ug nagtubo nga espirituhanong mga hunahuna nga sa kadugayan ug sa kinatibuk-an naghan-ay sa usa ka gitinguha nga tubag o sa direksyon nga atong gikinahanglan makahimo kanato sa pagtan-aw ‘lapas sa tumong’ (Jacob 4:14).
“Nakigsulti ako og daghang mga tawo kinsa nagduha-duha sa kalig-on sa ilang personal nga pagpamatuod ug gipakaubos ang ilang espirituhanong kapasidad tungod kay sila wala magdawat og kanunay, milagroso, o tataw nga mga hunahuna. Tingali samtang atong ikonsiderar ang mga kasinatian ni Joseph didto sa Sagradong Kakahoyan, ni Saulo didto sa dalan paingon sa Damascus, ug ni Alma ang Batan-on, moabut kita sa pagtuo nga adunay sayop o kulang diha kanato kon kita magkulang sa atong mga kinabuhi kabahin niining nabantug ug espirituhanong makapahinuklog nga mga ehemplo. Kon kamo adunay susama nga mga hunahuna o mga pagduda, palihug hibalo-i nga ikaw sa tinuod normal. Padayon lamang sa pagkamasulundon ug pagbaton og hugot nga pagtuo diha sa Manluluwas. Samtang kamo magbuhat sa ingon, kamo ‘dili molakaw nga masayop’ (D&P 80:3)” (“Ang Espiritu sa Pagpadayag,”Liahona, Mayo 2011, 88–89).
Si Elder Richard G. Scott sa Korum sa Napulog Duha ka mga Apostoles miingon:
Imahe
Elder Richard G. Scott
“Magmapailubon samtang inyong gihingpit ang inyong abilidad nga magiyahan sa Espiritu. Pinaagi sa mabinantayon nga pagbansay, pinaagi sa paggamit sa husto nga mga baruganan, ug pinaagi sa pagkasensitibo ngadto sa mga pagbati nga moabut, makabaton kamo og espirituhanong paggiya. Mohatag ko og pagsaksi nga ang Ginoo, pinaagi sa Espiritu Santo, makasulti diha sa inyong hunahuna ug kasingkasing. Usahay ang mga impresyon kasagaran lamang nga mga pagbati. Usahay ang direksyon moabut sa hilabihan ka klaro ug dili gayud masaypan nga mahimo kining isulat sama sa espirituhanong pagdiktar.
“Mohatag ko sa akong malumo nga pagsaksi nga samtang mag-ampo kamo sa tanang kadasig sa inyong kalag uban sa pagkamapainubsanon ug sa pasalamat, mahimo kamong makakat-on nga magiyahan kanunay sa Balaang Espiritu sa tanang aspeto sa inyong kinabuhi. Akong napamatud-an ang kamatuoran niana nga baruganan pinaagi sa kalisdanan ug pagsulay sa akong kaugalingong kinabuhi. Ako mopamatuod nga kamo personal nga makakat-on aron mahimong hanas sa mga baruganan nga magiyahan sa Espiritu. Niana nga paagi, ang Manluluwas makagiya kaninyo sa pagsulbad sa mga hagit sa kinabuhi ug magpahimulos og dakong kalinaw ug kalipay” (“Aron Makabaton og Espirituhanong Giya,”Liahona, Nob. 2009, 9).
Si Elder Jeffrey R. Holland sa Korum sa Napulog Duha ka mga Apostoles mipasabut kon ngano ang Ginoo migamit sa ehemplo sa pagtabok sa Pula nga Dagat isip usa ka ehemplo sa espiritu sa pagpadayag:
Imahe
Elder Jeffrey R. Holland
“Pangutana: Ngano nga ang Ginoo migamit sa ehemplo sa pagtabok sa Pula nga Dagat isip ang maayo kaayong ehemplo sa ‘espiritu sa pagpadayag’? Ngano nga wala Siya mogamit sa Unang Panan-awon? … O sa panan-awon sa igsoong lalaki ni Jared? Hinoon, Siya makagamit sa bisan hain niini, apan wala Siya migamit. Dinhi Siya adunay lain nga katuyoan sa salabutan.
“Una sa tanan, ang pagpadayag hapit tanan moabut agi og tubag sa usa ka pangutana, kasagaran dinalian nga pangutana—dili kanunay, apan kasagaran. Ang hagit ni Moises mao ang unsaon niya pagdala sa iyang kaugalingon ug sa mga anak ni Israel pagpagawas diha niining makalilisang nga kalisud nga sila anaa. Dihay mga karwahe nga nagsunod kanila, pinadpad nga mga balas sa tanang kilid, ug dakong katubigan diha dayon sa unahan. Nagkinahanglan siya og impormasyon sa tinuod—unsay buhaton—apan kini dili yano nga butang nga iyang gipangayo. Niini nga sitwasyon, kini sa tinuod usa ka butang kalabut sa kinabuhi ug kamatayon.
Kamo nagkinahanglan usab og impormasyon, apan sa mga butang nga dako kaayo og sangputanan kini ingon og dili moabut gawas kon kamo gusto niini sa dinalian, matinud-anon, mapainubsanon nga paagi. Gitawag kini ni Moroni og mangita ‘uban sa tinuod nga katuyoan’ (Moroni 10:4). Kon kamo makapangita niana nga paagi, ug magpabilin diha niana nga kinaiya, walay mahimo kaayo ang kaaway sa paggiya kaninyo palayo sa matarung nga dalan.
“Ang Pula nga Dagat moabli ngadto sa matinuoron nga tigpangita og pagpadayag. Ang kaaway adunay gahum sa pag-ali sa dalan, sa pagpundok sa kasundalohan ni Paraon ug pagsamok kanato hangtud gayud sa panahon sa atong pagkalingkawas, apan dili niya mabuntog kon atong pagbuot nga dili maingon niana. Kana mao ang leksyon numero uno mahitungod sa pagtabok sa Pula nga Dagat, inyong Pula nga Dagat, pinaagi sa espiritu sa pagpadayag” (“Remember How You Felt,” New Era, Ago. 2004, 7).