1 Ug nahitabo nga namulong ako ngadto sa akong mga igsuong lalaki, nga nag-ingon: Manungas na usab kita ngadto sa Jerusalem, ug ^amagmatinud-anon kita sa pagtuman sa mga sugo sa Ginoo; kay tan-awa mas gamhanan siya kay sa tibuok yuta, nan nganong dili man siya ^bmas gamhanan kay ni Laban ug sa iyang kalim-an, oo, o gani sa iyang mga napulo ka liboan?

2 Busa manungas kita; ^amagmalig-on kita sama kang ^bMoises; kay siya sa pagkatinuod namulong ngadto sa katubigan sa ^cPulang Dagat ug nabahin kini ngadto ug ngari, ug ang atong mga amahan nanglabang, pagawas gikan sa pagkabihag, subay sa uga nga yuta, ug ang kasundalohan ni Paraon misunod ug nangalumos sa katubigan sa Pulang Dagat.

3 Karon tan-awa nasayod kamo nga tinuod kini; ug kamo nasayod usab nga ang usa ka ^aanghel namulong nganha kaninyo; mao nga magduha-duha pa ba kamo? Manungas kita; ang Ginoo makahimo sa pagluwas kanato, sama sa atong mga amahan, ug sa paglaglag ni Laban, sama sa mga Ehiptohanon.

4 Karon sa diha nga nakapamulong na ako niini nga mga pulong, nasuko pa gihapon sila, ug nagpadayon sa pagbagulbol; bisan pa niana, misunod gihapon sila kanako hangtod nga miabot kami sa gawas sa mga paril sa Jerusalem.

5 Ug gabii kadto; ug ako silang gipatago ngadto sa gawas sa mga paril. Ug human nga ila nang natago ang ilang mga kaugalingon, ako, si Nephi, mabinantayon nga misulod sa siyudad ug mipaduol sa balay ni Laban.

6 Ug ^agigiyahan ako sa Espiritu, kay wala ako ^bmasayod sa mga butang nga angay nakong buhaton.

7 Bisan pa niana mipadayon ako, ug dihang didto na ko duol sa balay ni Laban nakakita ako og tawo, ug nalup-og siya sa yuta sa akong atubangan, kay hubog siya sa bino.

8 Ug sa diha nga giduol nako siya akong nakita nga si Laban kadto.

9 Ug akong nakita ang iyang ^aespada, ug akong gihulbot kini gikan sa sakoban; ug ang puloan niini usa ka lunsay nga bulawan, ug ang pagkahimo niini hilabihan kaanindot, ug akong nakita nga ang suwab niini hinimo sa labing mahal nga asero.

10 Ug nahitabo nga ako ^agipugos sa Espiritu sa pagpatay ni Laban; apan miingon ako sa akong kasingkasing: Wala pa gayod mahitabo nga nakapaagas ko og dugo sa tawo. Ug mikulo ako ug dili ko gusto nga mopatay kaniya.

11 Ug ang Espiritu miingon kanako pag-usab: Tan-awa ang ^aGinoo mitugyan kaniya sa imong mga kamot. Oo, ug nasayod usab ako nga nagtinguha siya sa paghunos sa kaugalingon nakong kinabuhi; oo, ug dili siya mopatalinghog sa mga sugo sa Ginoo; ug siya usab ^bmikuha sa among mga kabtangan.

12 Ug nahitabo nga ang Espiritu miingon na usab kanako: Patya siya, kay ang Ginoo mitugyan kaniya sa imong mga kamot;

13 Tan-awa ang Ginoo ^amopatay sa mga ^bdaotan aron ipahitabo ang iyang matarong nga mga katuyoan. Mas ^cmaayo pa nga ang usa ka tawo mamatay kay sa ang usa ka nasod magkakunhod ug malaglag tungod sa pagkawalay pagtuo.

14 Ug karon, sa diha nga ako, si Nephi, nakadungog niini nga mga pulong, akong nahinumdoman ang mga pulong nga gipamulong sa Ginoo ngari kanako didto sa kamingawan, nga nag-ingon: ^aKon ang imong binhi motuman sa akong mga ^bsugo, sila ^cmouswag sa ^dyuta nga saad.

15 Oo, ug ako usab naghunahuna nga dili sila makatuman sa mga sugo sa Ginoo sumala sa balaod ni Moises, gawas kon sila adunay balaod.

16 Ug nahibalo usab ako nga ang ^abalaod gikulit diha sa mga palid nga tumbaga.

17 Ug usab, nahibalo ako nga ang Ginoo mitugyan kang Laban sa akong mga kamot tungod niini nga katuyoan—aron akong makuha ang mga talaan sumala sa iyang mga sugo.

18 Busa akong gisunod ang tingog sa Espiritu, ug migunit sa buhok ni Laban, ug giputol nako ang iyang ulo gamit ang kaugalingon niyang ^aespada.

19 Ug human nako maputol ang iyang ulo gamit ang kaugalingon niyang espada, akong gikuha ang mga sapot ni Laban ug gisul-ob kini sa kaugalingon nakong lawas; oo, gani ang matag tipik; ug akong gitaod ang iyang taming libot sa akong bat-ang.

20 Ug human sa akong paghimo niini, miadto ko sa tipiganan sa bahandi ni Laban. Ug samtang nagpadulong ako sa tipiganan sa bahandi ni Laban, tan-awa, akong nakita ang ^asulugoon ni Laban nga nagkupot sa mga yawe sa tipiganan sa bahandi. Ug gisugo nako siya sama sa tingog ni Laban, nga mokuyog siya kanako ngadto sa tipiganan sa bahandi.

21 Ug nagtuo siya nga ako ang iyang agalon nga si Laban, kay iyang nakita ang mga sapot ug espada nga gibakos sa akong bat-ang.

22 Ug namulong siya kanako kabahin sa katigulangan sa mga Judeo, kay nahibalo siya nga ang iyang agalon nga si Laban, migawas sa pagkagabii nga nakig-uban kanila.

23 Ug namulong ako kaniya sama og ako mao si Laban.

24 Ug namulong usab ako kaniya nga akong dad-on ang mga kinulit, nga anaa sa mga ^apalid nga tumbaga, ngadto sa akong mga magulang nga lalaki, nga tua sa gawas sa mga paril.

25 Ug gihangyo usab nako siya nga mosunod siya kanako.

26 Ug siya, nagtuo nga naghisgot ako bahin sa kaigsuonan sa simbahan, ug nga ako mao gayod si Laban kinsa akong gipatay, mao nga misunod siya kanako.

27 Ug namulong siya kanako sa makadaghang higayon kabahin sa katigulangan sa mga Judeo samtang nagpadulong ako sa akong mga igsuong lalaki, nga didto sa gawas sa mga paril.

28 Ug nahitabo nga sa dihang si Laman nakakita kanako nalisang siya sa hilabihan, ug mao usab si Lemuel ug si Sam. Ug nanagan sila palayo sa akong atubangan; kay nagtuo sila nga si Laban kadto, ug nga siya mipatay kanako ug nagtinguha usab sa paghunos sa ilang kinabuhi.

29 Ug nahitabo nga gitawag nako sila, ug nakadungog sila kanako; mao nga nanghunong sila sa pagpalayo sa akong atubangan.

30 Ug nahitabo nga diha nga ang sulugoon ni Laban nakakita sa akong mga igsuong lalaki nagsugod siya sa pagkurog, ug modagan na unta palayo kanako ug mobalik sa siyudad sa Jerusalem.

31 Ug karon ako, si Nephi, kay dako man nga tawo, ug kay nakadawat usab og hilabihan nga ^akusog gikan sa Ginoo, busa gigunitan nako ang sulugoon ni Laban, aron dili siya makadagan.

32 Ug nahitabo nga namulong ako kaniya, nga kon mopatalinghog siya sa akong mga pulong, sama kasegurado nga buhi ang Ginoo, ug samtang buhi ako, gani kon maminaw siya sa among mga pulong, dili kami mohunos sa iyang kinabuhi.

33 Ug namulong ako kaniya, gani uban sa ^apanumpa, nga siya dili angay nga mahadlok; nga siya mahimo nga usa ka tawong gawasnon sama kanamo kon molugsong siya ngadto sa kamingawan uban kanamo.

34 Ug namulong usab ako kaniya, nga nag-ingon: Sa pagkatinuod ang Ginoo ^amisugo kanamo sa pagbuhat niini nga butang; ug dili ba angay nga magkugi kami sa pagtuman sa mga sugo sa Ginoo? Busa, kon molugsong ka sa kamingawan ngadto sa akong amahan ikaw adunay luna uban kanamo.

35 Ug nahitabo nga si ^aZoram nadasig sa mga pulong nga akong gipamulong. Karon ang ngalan sa sulugoon mao si Zoram; ug misaad siya nga molugsong sa kamingawan ngadto sa among amahan. Oo, ug nanumpa usab siya kanamo nga magpabilin siya uban kanamo sukad niana nga higayon.

36 Karon matinguhaon kami nga magpabilin siya uban kanamo tungod niini nga katuyoan, aron ang mga Judeo dili masayod kabahin sa among paglayas ngadto sa kamingawan, basin unya og gukoron nila kami ug pamatyon kami.

37 Ug nahitabo nga sa diha nga ^anakapanumpa na si Zoram ngari kanamo, ang among mga kahadlok nawala kabahin kaniya.

38 Ug nahitabo nga among gidala ang mga palid nga tumbaga ug ang sulugoon ni Laban, ug mibiya padulong sa kamingawan, ug mipanaw ngadto sa tolda sa among amahan.