Ang Doktrina ug mga Pakigsaad 127 naglangkob og usa ka sulat gikan ni Propeta Joseph Smith nga gipetsahan og Septyembre 1, 1842, nga nagsugo sa mga Santos sa pagtipig og mga rekord sa mga bunyag nga ilang gipahigayon alang sa mga patay. Mga usa ka semana human niana, mihimo si Joseph og laing sulat kalabut sa hilisgutan bahin sa bunyag alang sa mga patay. Ang Doktrina ug mga Pakigsaad 128 naglangkob niini nga sulat, nga nagtudlo nganong magtipig kita og mga rekord sa makaluwas nga mga ordinansa.
Si Joseph Smith mihimaya sa pagpanggukod ug sa kalisdanan
Sugdi ang klase pinaagi sa pag-display og usa ka dako, klaro nga sudlanan nga markahan og mortalidad ug usa ka pitsel sa tubig nga markahan og mga kalisdanan. Pangutan-a ang mga estudyante kon unsa nga mga kalisdanan ang ilang nasinati o nakita nga nasinati sa uban. Alang sa matag kalisdanan nga ilang mahisgutan, pagbu-bu og tubig gikan sa pitsel ngadto sa klaro nga sudlanan.
Dapita ang usa ka estudyante sa pagbasa og kusog sa Doktrina ug mga Pakigsaad 127:1. Hangyoa ang klase sa pagsunod, nga mangita kon unsa nga kalisdanan ang nasinati ni Joseph Smith didto sa Nauvoo niadtong 1842. Dapita ang mga estudyante sa pag-report kon unsay ilang makit-an.
Ipasabut nga niadtong Mayo 1842, si Lilburn W. Boggs, ang kanhi gobernador sa Missouri nga miisyu og sugo sa pagpatay batok sa mga Santos, nasamdan sa wala mailhi nga mamumuno. Ang mga awtoridad sa Missouri mipasangil kang Joseph Smith sa pagpakigsabut og usa ka tawo nga mopatay kang Boggs ug misulay sa pagdala sa Propeta balik ngadto sa Missouri aron husayon. Mibiya si Joseph Smith sa Missouri mga katuigan na ang milabay ug nagpuyo sa dapit sa Nauvoo, Illinois, nianang panahona. Kay nasayud nga kon mibalik pa siya sa Missouri patyon siya, gilikayan sa Propeta ang mga opisyales sa Missouri sulod sa usa ka higayon aron malikayan nga maaresto sa ilegal nga paagi. Pagka-Enero 1843 natino nga ang mga pamaagi sa pag-aresto ni Joseph Smith ug ang pagdala kaniya ngadto sa Missouri ilegal.
Ipasabut nga ang Doktrina ug mga Pakigsaad 127 usa ka sulat nga gihimo ni Joseph Smith ngadto sa mga miyembro sa Simbahan samtang nagbalhin-balhin siya aron makalikay sa dili pinasubay sa balaod nga pag-aresto pinaagi sa mga opisyales sa Missouri. Kini nga sulat gibasa ngadto sa mga Santos didto sa Nauvoo pipila ka adlaw ang milabay.
Ipakita ngadto sa mga estudyante ang duha ka bola nga susama og gidak-on, ang usa niini molutaw ug ang usa dili molutaw. (Pananglitan, makagamit ka og usa ka hollow, plastik nga bola sa golf ug usa ka regular nga bola sa golf.) Ibutang ang duha ka bola sa sudlanan sa tubig, ug ipangutana ang mosunod:
Sa unsa kaha nga paagi nga kining duha ka bola nagrepresentar sa lain-laing mga reaksyon sa mga tawo ngadto sa mga kalisdanan?
Dapita ang usa ka estudyante sa pagbasa og kusog sa Doktrina ug mga Pakigsaad 127:2. Hangyoa ang klase sa pagpangita sa reaksyon ni Joseph ngadto sa mga kalisdanan.
Hain nga bola ang nagrepresentar gayud sa reaksyon ni Joseph ngadto sa mga kalisdanan? Ngano man?
Giunsa pagkahibalo ni Joseph nga magmadaugon siya batok sa iyang mga kalisdanan ug katalagman?
Sumala sa unsay gisulat ni Joseph ngadto sa mga Santos, unsay makatabang kanato aron makalahutay sa kalisdanan? (Human makatubag ang mga estudyante, i-summarize ang ilang mga pamahayag pinaagi sa pagsulat sa mosunod nga baruganan diha sa pisara: Ang pagsalig diha sa Langitnong Amahan makatabang kanato aron makalahutay sa kalisdanan.)
Dapita ang mga estudyante sa paghunahuna og usa ka tawo nga ilang nailhan (o nahibaloan) kinsa nakalahutay og kalisdanan tungod kay misalig siya sa Langitnong Amahan. Hangyoa ang pipila ka estudyante sa pagpakigbahin kon si kinsa ang ilang nahunahunaan ug sa unsang paagi nga ang pagsalig diha sa Langitnong Amahan nakatabang niining tawhana aron makalahutay sa kalisdanan.
Dapita ang usa ka estudyante sa pagbasa og kusog sa Doktrina ug mga Pakigsaad 127:3–4. Hangyoa ang klase sa pagsunod, nga mangita kon unsay gisulti sa Propeta ngadto sa mga Santos. Dapita ang mga estudyante sa pagtino ug sa pagpakigbahin og mga pulong nga makahuluganon ngadto kanila.
Sumala sa bersikulo 3, nganong angay man nga magmaya ang mga Santos atol sa kalisdanan?
Diha sa bersikulo 4, unsay gisaad sa Ginoo niadtong makalahutay sa pagpanggukod?
Sa unsang paagi nga ang pagsalig diha sa Langitnong Amahan nakatabang kaninyo aron makalahutay sa lisud nga mga panahon sa inyong kinabuhi?
Gitambagan ni Propeta Joseph Smith ang mga Santos sa pagtipig og mga rekord sa mga bunyag nga ilang gipahigayon alang sa mga patay
Pahinumdumi ang mga estudyante nga mga usa ka tuig ug tunga sa wala pa gihimo ni Joseph Smith kini nga sulat, gisultihan sa Ginoo ang mga Santos nga ang ordinansa sa bunyag alang sa mga patay kinahanglang ipahigayon diha sa templo (tan-awa sa D&P 124:30). Hinoon, gitugutan sa Ginoo ang mga Santos sa pagpahigayon sa mga bunyag alang sa mga patay diha sa duol nga suba ug mga sapa sulod sa mubo nga panahon. Gisultihan sila sa Ginoo nga sa higayon nga andam na ang templo, ang ordinansa sa bunyag alang sa mga patay madawat lamang kon ipahigayon diha sa templo. Nagsugod ang mga Santos sa pagpahigayon og mga bunyag alang sa mga patay didto sa Templo sa Nauvoo niadtong Nobyembre 1841.
Pangutan-a ang mga estudyante sa paghunahuna mahitungod sa katapusang higayon nga miapil sila sa mga bunyag alang sa mga patay. Dapita sila sa paghulagway sa kasinatian, lakip na kon duna bay naglingkod duol sa bunyaganan atol sa mga bunyag.
Dapita ang usa ka estudyante sa pagbasa og kusog sa Doktrina ug mga Pakigsaad 127:5–9. Hangyoa ang klase sa pagsunod, nga mangita kon si kinsa ang kinahanglang anaa kon ang mga bunyag alang sa mga patay ipahigayon. Dapita ang mga estudyante sa pagreport kon unsay ilang nakit-an.
Sumala sa bersikulo 7, nganong importante nga usa ka tigsulat [recorder] ang mahimong saksi sa mga bunyag?
Isulat ang mosunod nga dili kompletong pamahayag diha sa pisara: Ang mga ordinansa sa templo nga atong gipahigayon dinhi sa yuta …
Hangyoa ang mga estudyante sa pagkompleto sa pamahayag base sa mga bersikulo 5–9. (Ang mga estudyante kinahanglang mokompleto niining pamahayag aron masusama kini sa mosunod nga kamatuoran: Ang mga ordinansa sa templo nga atong gipahigayon dinhi sa yuta mabugkos didto sa langit.)
Unsa kaha ang gipasabut nga ang mga ordinansa sa templo mabugkos didto sa langit?
Sa unsa kaha nga paagi nga ang pagkasayud niining kamatuoran makatabang kaninyo sa pagtuman sa inyong responsibilidad sa pagpahigayon sa mga ordinansa sa templo alang sa “inyong mga patay”?
I-summarize ang Doktrina ug mga Pakigsaad 127:10–12 pinaagi sa pagpasabut nga gusto ni Joseph Smith nga motudlo og dugang pa mahitungod sa bunyag alang sa mga patay, apan tungod kay nagtago-tago siya dili siya makahimo sa ingon. Misaad siya nga mosulat sa mga Santos og dugang mga sulat mahitungod sa mga bunyag alang sa mga patay ug ubang importante nga mga hilisgutan.
Gipasabut ni Joseph Smith nganong magtipig kita og mga rekord alang sa mga ordinansa sa kaluwasan
Mga usa ka semana human niya gihimo ang sulat diha sa Doktrina ug mga Pakigsaad 127, mihimo si Joseph og laing sulat ngadto sa mga Santos kalabut sa mga bunyag alang sa mga patay. Kini nga sulat anaa sa Doktrina ug mga Pakigsaad 128.
I-summarize ang Doktrina ug mga Pakigsaad 128:1–5 pinaagi sa pagpasabut nga nagtudlo si Joseph nga ang lokal nga mga tigsulat [recorder] kinahanglan nga matudlo nga mosaksi ug morekord sa ordinansa sa bunyag alang sa mga patay. Nagtudlo usab siya nga usa ka kinatibuk-ang tigsulat [general recorder] kinahanglan nga matudlo aron mohugpong sa lokal nga mga rekord ngadto sa kinatibuk-ang rekord sa simbahan.
Pakita og usa ka pasaporte (o litrato sa usa ka pasaporte). Ipangutana kon unsang mga matang sa mga pribilehiyo ang madawat sa naghupot sa pasaporte.
Nganong ang pasaporte sa laing tawo dili man makapahimo ninyong kwalipikado nga mosulod sa laing nasud?
Unsa may mahitabo kon misulay kamo pagsulod sa laing nasud apan ang impormasyon sa sulod sa inyong pasaporte dili kompleto?
Dapita ang usa ka estudyante sa pagbasa og kusog sa Doktrina ug mga Pakigsaad 128:6–7. Hangyoa ang klase sa pagpangita kon unsa nga mga rekord ang gamiton aron matino kon kwalipikado ba kita nga makasulod sa presensya sa Dios. Dapita sila sa pag-report sa ilang nakit-an. Ipasabut nga si Juan ug si Joseph Smith nahisgutan sa daghang mga rekord: “ang mga basahon gibuksan” ug “lain nga basahon gibuksan, … nga mao ang basahon sa kinabuhi.”
Sumala sa bersikulo 7, unsa man ang unang mga basahon nga gihisgutan ni Juan? (Mga rekord nga gitipigan dinhi sa yuta.)
Unsa man ang basahon sa kinabuhi? (Ang rekord nga gitipigan didto sa langit.)
Unsa ang narekord diha niining mga basahon? (Ang atong mga binuhatan.)
Unsa nga mga binuhatan ang kinahanglan gayud nga marekord diha sa mga basahon aron makasulod sa presensya sa Dios?
Human mapakigbahin sa mga estudyante ang ilang mga hunahuna kalabut niini nga pangutana, dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Ang mga ordinansa ug mga pakigsaad nahimo natong mga kredensyal aron makasulod sa presensya sa [Dios]” (“Covenants,” Ensign, Mayo 1987, 24).
Sumala sa pamahayag ni Presidente Packer, unsay mahitabo sa adlaw sa paghukom kon ang mga rekord sa usa ka tawo nagpakita nga wala gayud siya makadawat sa ordinansa sa bunyag?
Isulat ang mosunod nga mga pulong diha sa pisara: Bisan unsa ang inyong bugkuson dinhi sa yuta, pagabugkuson didto sa langit. Dapita ang usa ka estudyante sa pagbasa og kusog sa Doktrina ug mga Pakigsaad 128:8. Hangyoa ang klase sa pagsunod, nga mangita kon giunsa pagpasabut ni Propeta Joseph Smith kining pamahayag ngadto sa mga Santos. Samtang gi-report sa mga estudyante ang ilang mga nakit-an, ilisi ang pulong nga bugkuson sa pulong nga irekord ug pagabugkuson sa narekord diha sa pisara.
Unsa may atong makat-unan gikan sa bersikulo 8 mahitungod sa pagrekord sa mga ordinansa nga atong madawat? (Mahimo nimong ipasabut nga ang mga pulong nga “propria persona” nagpasabut sa mga tawo nga nabunyagan alang sa ilang kaugalingon ug ang mga pulong nga “kaugalingon nga mga tinugyanan” nagpasabut niadtong nabunyagan isip mga proxy.)
Isulat ang mosunod diha sa pisara: Kon ang usa ka ordinansa gipahigayon pinaagi sa ug usa ka tukma nga ang gitipigan, ang ordinansa mabugkos dinhi sa yuta ug didto sa langit.
Sumala sa bersikulo 8, unsay kinahanglang mahitabo aron ang mga ordinansa mahimong mabugkos dinhi sa yuta ug didto sa langit? (Samtang motubag ang mga estudyante, dapita ang usa ka estudyante sa pagkompleto sa kamatuoran diha sa pisara sama sa mosunod: Kon ang usa ka ordinansa gipahigayon pinaagi sa awtoridad sa priesthood ug usa ka tukma nga rekord ang gitipigan, ang ordinansa mabugkos dinhi sa yuta ug didto sa langit.
Unsa nga paglaum ang mahatag niining baruganan ngadto niadtong kinsa namatay nga wala makahibalo sa ebanghelyo?
Unsa ang atong responsibilidad aron matuman kini nga baruganan?
Dapita ang usa ka estudyante sa pagbasa og kusog sa Doktrina ug mga Pakigsaad 128:9. Hangyoa ang klase sa pagpangita kon unsay gisulti ni Joseph Smith mahitungod niining baruganan.
Unsa ang gibuhat sa Ginoo sa matag dispensasyon sa priesthood? (Ang Ginoo mitugot sa dili mominus sa usa Niya ka sulugoon sa paghupot ug paggamit sa mga yawe sa sealing sa priesthood.)
Sumala sa bersikulo 9, unsay mahitabo kon ang usa ka ordinansa gipahigayon pinaagi sa awtoridad sa priesthood ug usa ka tukma nga rekord ang gitipigan? (Mahimo kining usa ka balaod dinhi sa yuta ug didto sa langit ug dili makanselar gawas lamang kon ang tawo nga nakadawat niini magpakabuhi nga dili takus.)
I-summarize ang Doktrina ug mga Pakigsaad 128:10–11 pinaagi sa pagpasabut nga ingon nga ang Manluluwas mihatag sa mga yawe sa sealing sa priesthood ngadto ni Pedro, gihatag na usab Niya ang mga yawe sa atong panahon.
Sa pagtapos sa leksyon, isulat ang mosunod nga mga pangutana diha sa pisara ug dapita ang mga estudyante sa pagtubag niini diha sa ilang mga class notebook o mga scripture study journal:
Sa unsang paagi nga ang mga bunyag alang sa mga patay ug ang mga yawe sa sealing dunay kalabutan sa usag usa?
Unsa man ang inyong buhaton nga kamo nadasig tungod sa inyong nakat-unan karon?
Dapita ang pipila ka estudyante sa pagpakigbahin ngadto sa klase kon unsa ang ilang gisulat. Mahimo usab nimong ipakigbahin ang imong pagpamatuod mahitungod sa mga bunyag alang sa mga patay.
Komentaryo ug Background nga Impormasyon
Ang pag-apil sa nag-unang mga lider sa Simbahan sa mga Masons
Bisan kon si Propeta Joseph Smith ug daghang miyembro sa Simbahan ang mibiya sa Missouri niadtong 1839, ang pagpanggukod gikan sa mga taga-Missouri padayon nga nagsunod sa Propeta samtang naningkamot siya sa pagtukod sa siyudad sa Nauvoo, Illinois. Sa sayong bahin niadtong 1842, si Joseph Smith ug pipila ka laing mga lumulupyo sa Nauvoo miapil sa fraternal nga organisasyon nga gitawag og Masons. Mahimong gibuhat nila kini aron maestablisar ug mapalig-on ang ilang mga relasyon sa estado ug sa nasudnong mga lider kinsa mga Masons ug mahimong makatabang sa pagpanalipod sa mga Santos batok sa padayon nga mga pagpanghulga gikan sa ilang mga tigpanggukod didto sa Missouri. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 264.)
Si Elder W. Grant Bangerter sa Seventy mipasabut nga nagpahigayon kita sa mga bunyag alang niadtong namatay na sa pisikal nga paagi apan kinsa buhi gihapon diha sa espiritu:
Imahe
Elder W. Grant Bangerter
“Unta kanunay natong hinumduman nga nagpahigayon kita sa mga ordinansa sa templo alang sa mga tawo ug dili alang sa mga pangalan. Kadtong atong gitawag og ‘ang patay’ buhi pa diha sa espiritu ug anaa sa templo” (“What Temples Are For,” Ensign, Mayo 1982, 72).