Kini nga leksyon mao ang ikaduha sa duha kabahin sa pinadayag nga narekord sa Doktrina ug mga Pakigsaad 138. Samtang si Presidente Joseph F. Smith namalandong og pipila ka mga tudling sa Bag-ong Tugon, nakakita siya og panan-awon sa kalibutan sa espiritu ug sa matarung nga mga espiritu nga naghulat sa katubsanan tungod sa gapos sa kamatayon. Nakita usab ni Presidente Smith nga si Jesukristo, tali sa panahon sa Iyang kamatayon ug sa panahon sa Iyang Pagkabanhaw, miorganisar ug mihatag og awtoridad sa matarung nga mga sulugoon sa pagtudlo sa ebanghelyo ngadto sa mga espiritu nga anaa sa bilanggoan sa mga espiritu.
Nakat-unan ni Presidente Joseph F. Smith kon sa unsang paagi nga ang ebanghelyo nasangyaw sa kalibutan sa espiritu
Sultihi ang mga estudyante nga ang mga tawo sa tibuok kalibutan naghupot og lain-laing mga gituohan bahin sa unsay mahitabo kanato human kita mamatay. Ipangutana kon nakahimamat ba ang mga estudyante og usa ka tawo nga dunay lahi nga mga gituohan kalabut sa unsay mahitabo kanato human kita mamatay. Dapita ang pipila ka mga estudyante sa pagpakigbahin sa ilang mga kasinatian. (Pag-amping nga dili magsulti og negatibo o ipakaubos ang ubang mga gituohan kalabut sa relihiyon.)
Unsaon nato pagkahibalo hain sa mga tinuohan bahin sa kinabuhi human sa kamatayon ang tukma? (Mahimo nimong ipasabut nga bisan ang pipila sa mga Santos sa Ulahing mga Adlaw mahimong adunay dili tukma nga tinuohan bahin sa kinabuhi human sa kamatayon.)
Aron madugangan ang mga tubag sa mga estudyante, hangyoa ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:
Imahe
Elder D. Todd Christofferson
“Ang mga kasulatan mao ang sumbanan alang sa pagsukod sa kaeksakto ug kamatuoran” (“Ang Panalangin sa Kasulatan,”Liahona, Mayo 2010, 34).
Ipasalig nga kita makahibalo sa katukma sa nagkadaiyang mga tinuohan kalabut sa kinabuhi human sa kamatayon pinaagi sa pagtandi niadtong mga tinuohan ngadto sa mga kamatuoran nga gipadayag sa Ginoo diha sa mga kasulatan, sama sa Doktrina ug mga Pakigsaad 138.
I-drowing sa pisara ang kauban nga diagram. Mahimo nimong ipasabut sa daklit nga sa pipila ka mga paagi, ang tibuok kalibutan sa mga espiritu mahimong makonsiderar nga bilanggoan sa mga espiritu tungod kay bisan ang mga matarung naglantaw sa pagkabulag sa ilang mga lawas isip usa ka pagkabihag (tan-awa sa D&P 138:49–50).
Imahe
spirit paradise and spirit prison diagram
Aron matabangan ang mga estudyante nga maribyu sa daklit ang mga kamatuoran nga ilang nakat-unan sa miagi nga mga leksyon sa seksyon 138, i-assign ang katunga sa klase sa pagpangita sa Doktrina ug mga Pakigsaad 138:12–15, 22 alang sa mga detalye kalabut kon si kinsa ang makaadto sa paraiso sa mga espiritu inig kamatay ug ang mga kahimtang nga ilang masinati didto. I-assign ang laing katunga sa klase sa pagpangita sa Doktrina ug mga Pakigsaad 138:20–22 alang sa mga detalye kalabut kon si kinsa ang maadto sa bilanggoan sa espiritu inig kamatay ug ang mga kahimtang nga ilang masinati. Hangyoa ang mga estudyante sa pagreport sa ilang makit-an.
Ipasabut nga dili lamang ang mga dautan ug ang masinupakon ang maadto sa bilanggoan sa espiritu inig kamatay nila, kadto usab nga mga tawo nga namatay diha sa ilang mga sala nga walay kahibalo sa ebanghelyo (tan-awa sa D&P 138:32). Pahinumdumi ang mga estudyante nga samtang namalandong si Presidente Joseph F. Smith sa tudling diha sa 1 Pedro, gipadayag sa Ginoo ngadto kaniya kon sa unsang paagi nga ang mga espiritu diha sa bilanggoan sa espiritu makabaton sa oportunidad sa pagdawat og mga panalangin sa ebanghelyo.
Dapita ang usa ka estudyante sa pagbasa og kusog sa Doktrina ug mga Pakigsaad 138:7–10. Hangyoa ang klase sa pagsunod, nga mangita kon unsa ang giingon ni Pedro nga gibuhat sa Manluluwas human Siya “gipatay diha sa unod.”
Unsay giingon ni Pedro nga gibuhat sa Manluluwas sa dihang miadto Siya sa kalibutan sa espiritu?
Dapita ang usa ka estudyante sa pagbasa og kusog sa Doktrina ug mga Pakigsaad 138:25–28. Hangyoa ang klase sa pagsunod ug motino kon unsa ang gihunahuna ni Presidente Smith samtang siya namalandong sa buhat sa Ginoo didto sa kalibutan sa espiritu.
Unsa ang pangutana ni Presidente Smith? (Human makatubag ang mga estudyante, mahimo nimong isulat ang mosunod nga pangutana diha sa pisara: Sa unsa nga paagi nga nahimo sa Ginoo ang pagsangyaw sa ebanghelyo ngadto sa tanang katawhan sa bilanggoan sa espiritu sulod lang sa tulo ka adlaw?)
Dapita ang usa ka estudyante sa pagbasa og kusog sa Doktrina ug mga Pakigsaad 138:29–32, ug hangyoa ang klase sa pagpangita sa tubag nga nadawat ni Presidente Smith samtang siya namalandong.
Giunsa sa Manluluwas sa pagsangyaw ang ebanghelyo niadtong anaa sa bilanggoan sa espiritu sa ingon ka mubo nga panahon?
Hangyoa ang mga estudyante sa paggamit unsa ang ilang nakat-unan diha sa mga bersikulo 29–32 aron ipahayag ang usa ka kamatuoran mahitungod kon giunsa sa pagtudlo ang ebanghelyo didto sa kalibutan sa espiritu. Kinahanglan ilang mahibaloan ang usa ka butang nga susama sa mosunod nga kamatuoran: Ubos sa direksyon ni Jesukristo, ang matarung nga mga mensahero nagtudlo sa ebanghelyo ngadto niadtong anaa sa bilanggoan sa espiritu. Mahimo nimong dapiton ang mga estudyante sa pagmarka sa mga pulong sa bersikulo 30 nga nagtudlo niining kamatuoran.
Sa diagram diha sa pisara, pagdrowing og arrow gikan sa paraiso sa espiritu ngadto sa bilanggoan sa espiritu aron pagrepresentar sa matarung nga mga mensahero sa Ginoo nga nagsangyaw sa ebanghelyo didto sa bilanggoan sa espiritu.
Dapita ang usa ka estudyante sa pagbasa og kusog sa Doktrina ug mga Pakigsaad 138:33–34. Hangyoa ang klase sa pagsunod, nga mangita kon unsay gitudlo sa matarung nga mga mensahero sa Ginoo sa nabilanggo nga mga espiritu. Hangyoa ang mga estudyante sa pagreport kon unsay ilang makit-an.
Sa unsang paagi nga kining mga butanga ikatandi sa unsay gitudlo sa mga tawo samtang sila nangandam alang sa bunyag dinhi sa mortalidad?
Unsa ang “puli nga bunyag”?
Sumala sa bersikulo 34, nganong kining mga baruganan sa ebanghelyo kinahanglan nga isangyaw ngadto niadtong anaa sa bilanggoan sa espiritu? (Mahimong kinahanglan nimong ipasabut nga ang “mahukman sumala sa mga tawo diha sa unod” nagpasabut nga ang tanang mga anak sa Dios, buhi o patay, kinahanglang makabaton og oportunidad sa pagkat-on ug pagdawat sa ebanghelyo aron sila mahukman pinaagi sa samang sumbanan.)
Dapita ang usa ka estudyante sa pagbasa og kusog sa Doktrina ug mga Pakigsaad 138:35–37. Hangyoa ang klase sa pagsunod, nga mangita kon unsa ka daghan ang mga espiritu nga makaangkon og oportunidad sa pagdawat sa ebanghelyo ni Jesukristo.
Ngano kaha nga importanting makahibalo nga ang tanang anak sa Langitnong Amahan makaangkon og oportunidad sa pagpaminaw ug pagdawat sa ebanghelyo ni Jesukristo?
Aron matabangan ang mga estudyante nga makasabut kon sa unsang paagi nga ang tanan makadungog sa ebanghelyo, ipasabut nga bisan og ang Manluluwas mibisita sa kalibutan sa espiritu sulod lang sa mubo nga panahon human sa Iyang kamatayon, Iyang giorganisar ang matarung nga mga espiritu sa pagsangyaw sa ebanghelyo ngadto niadtong anaa sa bilanggoan sa espiritu. Kini nga paningkamot nagpadayon karon. Kon ang mga tawo kinsa wala makadungog o midawat sa ebanghelyo sa atong panahon mamatay, makaangkon usab sila og oportunidad sa pagdungog ug pagpaminaw sa ebanghelyo didto sa kalibutan sa mga espiritu.
Nakita ni Presidente Smtih ang halangdon ug talagsaon nga mga espiritu kinsa magsangyaw sa ebanghelyo didto sa bilanggoan sa espiritu
Hangyoa ang mga estudyante sa paghunahuna sa ilang matarung nga mga sakop sa pamilya o namatay nga katigulangan.
Naghunahuna ba kamo kon unsa ang ilang gibuhat didto sa kalibutan sa espiritu?
Pahinumdumi ang mga estudyante nga sa Doktrina ug mga Pakigsaad 138:38–49, si Presidente Joseph F. Smith milista sa mga ngalan sa daghan sa “mga dungganan ug gamhanan” nga mga espiritu iyang nakita sa kalibutan sa espiritu kinsa naghulat sa Manluluwas nga mopakita ngadto kanila human sa Iyang kamatayon didto sa krus. Pipila sa mga espiritu kinsa giduaw sa Manluluwas mga propeta sa Daang Tugon ug sa Basahon ni Mormon. Sugod sa bersikulo 53, atong mabasa nga nakita usab ni Presidente Smith ang pinili nga mga espiritu kinsa moabut sa ulahing mga adlaw, lakip na ni Propeta Joseph Smtih (iyang uyoan) ug ni Hyrum Smith (iyang amahan).
Dapita ang usa ka estudyante sa pagbasa og kusog sa Doktrina ug mga Pakigsaad 138:53–56. Hangyoa ang klase sa pagsunod ug mangita kon unsay gikatampo niining mga indibidwal samtang sila anaa pa sa kalibutan ngadto sa kaluwasan niadtong anaa sa bilanggoan sa mga espiritu.
Sa unsang paagi nga ang mga lider sa Simbahan sa ulahing mga adlaw nakatabang sa mga espiritu nga anaa sa bilanggoan?
Human madiskubrihan sa mga estudyante nga ang mga propeta sa ulahing mga adlaw mitabang sa katubsanan sa mga patay pinaagi sa pagtukod og mga templo ug nangalagad sa mga ordinansa sa templo alang sa patay, ibutang o drowinga ang usa ka hulagway sa templo sunod sa diagram diha sa pisara.
Sumala sa bersikulo 55–56, kanus-a nga kining mga lider nagsugod sa pagpangandam alang sa buhat nga ilang buhaton dinhi sa yuta?
Dapita ang usa ka estudyante sa pagbasa og kusog sa Doktrina ug mga Pakigsaad 138:57. Hangyoa ang klase sa pagsunod, nga mangita kon unsay ipadayon nga buhaton sa matinud-anon nga mga elder human sila mamatay.
Unsay ipadayon nga buhaton sa matinud-anon nga mga elder human sila mamatay?
Sa paghatag og katin-awan nga ang buhat didto sa kalibutan sa espiritu dili limitado niadtong kinsa naghupot sa Melchizedek Priesthood, dapita ang usa ka estudyante sa pagbasa sa mosunod nga pamahayag ni Presidente Joseph F. Smith. Hangyoa ang klase sa pagpaminaw alang sa unsay gibuhat sa kababayen-an didto sa kalibutan sa espiritu:
Imahe
Presidente Joseph F. Smith
“Kining buotan nga mga sister nga gi-set apart, gi-orden ngadto sa buhat, … hingpit nga hatagan og katungod ug gahum sa pagsangyaw sa ebanghelyo ug mangalagad ngadto sa kababayen-an samtang ang mga elder ug mga propeta nagsangyaw ngadto sa mga lalaki” (Gospel Doctrine 5th ed. [1939], 461).
Mahimo nimong dapiton ang mga estudyante sa pagmarka sa mga pulong sa besikulo 57 nga nagtudlo sa mosunod nga kamatuoran: Human sa pagbiya sa mortal nga kinabuhi, ang matinud-anon nga mga Santos magpadayon sa ilang paghago sa pagsangyaw sa ebanghelyo.
Dapita ang usa ka estudyante sa pagbasa og kusog sa Doktrina ug mga Pakigsaad 138:58–59. Hangyoa ang klase sa pagsunod, nga mangita kon unsay buhaton sa namatay aron matubos. Hangyoa ang mga estudyante sa pagreport sa ilang makit-an.
Unsa ang mahitabo niadtong kinsa maghinulsol didto sa kalibutan sa mga espiritu? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Ang mga espiritu kinsa naghinulsol matubos pinaagi sa pagkamasulundon ngadto sa mga ordinansa sa templo, malimpyuhan pinaagi sa Pag-ula, ug madawat ang ilang ganti.)
Sa unsang paagi nga makatabang kita sa buhat sa kaluwasan alang sa mga patay samtang ania pa kita dinhi sa yuta? (Pinaagi sa pagkompleto sa buhat sa family history ug pag-apil sa mga ordinansa sa templo alang sa mga patay.)
Isip kabahin niining panaghisgutan, mahimo nimong dapiton ang usa ka estudyante sa pagbasa og kusog sa pamahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug mas dagkong panalangin ang madawat.” (“Ang Hingpit nga Kalipay sa Pagtubos sa mga Patay,” Liahona, Nob. 2012, 94).
Tudloa ang hulagway sa templo diha sa pisara. Ipamatuod nga kon moadto kita sa templo aron sa pagpahigayon sa mga ordinansa alang niadtong mga nangamatay na, mitabang kita kanila—kon sila mopili sa pagdawat sa mga ordinansa—aron matubos gikan sa bilanggoan sa mga espiritu ug moapil sa matarung nga mga espiritu didto sa paraiso.
Diha sa diagram sa pisara, pagdrowing og arrow gikan sa bilanggoan sa mga espiritu hangtud sa paraiso sa mga espiritu sa pagrepresentar sa katubsanan sa mahinulsulon nga mga espiritu gikan sa bilanggoan sa mga espiritu.
Sa unsang paagi nga kining kahibalo makaimpluwensya sa inyong mga kasinatian sa pagbuhat sa buhat sa templo ug family history?
Sa unsang paagi nga kamo napanalanginan pinaagi sa pag-apil sa family history ug buhat sa templo? (Mahimo usab nimong ipakigbahin ang imong kaugalingong kasinatian.)
Dapita ang usa ka estudyante sa pagbasa og kusog sa Doktrina ug mga Pakigsaad 138:60. Hangyoa ang klase sa pagsunod, nga mangita sa pagpamatuod ni Presidente Joseph F Smith bahin sa mga kamatuoran nga iyang narekord.
Awhaga ang mga estudyante sa pag-iskedyul og panahon sa pagbuhat og pipila ka family history o buhat sa templo sa mosunod nga pipila ka semana.
Tapusa pinaagi sa pagpakigbahin sa imong pagpamatuod ni Ginoong Jesukristo ug sa mga panalangin sa Pag-ula nga magamit sa buhi ug sa patay.
Si Elder Richard G. Scott sa Korum sa Napulog Duha ka mga Apostoles mihatag sa mosunod nga saad ngadto sa mga batan-on kinsa miapil sa buhat sa family history ug sa templo:
Imahe
Elder Richard G. Scott
“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Ang Hingpit nga Kalipay sa Pagtubos sa mga Patay,”Liahona, Nob. 2012, 94).