Ang Plano sa Kaluwasan–Pagtuon sa mga Kasulatan (Unit 1)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod mao ang summary sa mga panghitabo, mga doktrina, ug mga baruganan nga nakat-unan sa mga estudyante samtang gikompleto nila ang upat ka mga leksyon sa estudyante sa home-study alang sa unit 1. Kon makahibalo unsay gitun-an sa mga estudyante makatabang nimo nga makaandam sa klase. Ang summary dili kabahin sa leksyon ug wala gitumong nga ipakigbahin sa mga estudyante. Tungod kay ang leksyon nga imong itudlo alang sa unit 1 magtutok lamang sa pipila niining mga doktrina ug mga baruganan, mahimong dunay higayon nga madasig ka sa pagribyu o paghisgot og lain sumala sa mga pag-aghat sa Espiritu ug sa mga panginahanglan sa imong mga estudyante.

Day 1 (Ang Plano sa Kaluwasan)

Ang pagtuon sa plano sa Langitnong Amahan bahin sa kaluwasan nakatabang sa mga estudyante nga makahibalo nga ang katuyoan sa plano mao ang paghatag og paagi alang kanato aron makadawat og imortalidad ug kinabuhing dayon. Nakat-on ang mga estudyante nga ang Langitnong Amahan mipadala kanato dinhi sa yuta aron makaangkon og mga lawas ug makabaton og kasinatian ug molambo. Ang Pag-ula ni Jesukristo makapahimo kanato nga makabuntog sa mga epekto sa sala ug kamatayon.

Day 2 (Ang Dakong Apostasiya)

Samtang nagkat-on mahitungod sa Dakong Apostasiya, ang mga estudyante nakadiskubre nga ang mga propeta ug mga apostoles ang nagporma sa pundasyon sa Simbahan ni Jesukristo ug nagtabang sa pagpabilin sa Simbahan nga lunsay pinaagi sa pagtudlo sa husto nga doktrina. Dugang pa, ang awtoridad sa priesthood ug mga yawe gikinahanglan aron madawat ang mga pakigsaad ug mga ordinansa sa kaluwasan, diin tanan niini nadawat diha sa Simbahan ni Jesukristo. Ang apostasiya nahitabo sa dihang ang mga katawhan mibiya gikan sa mga kamatuoran sa ebanghelyo ug misalikway sa awtorisado nga mga sulugoon sa Ginoo. Usa ka pagpahiuli sa kamatuoran ug sa awtoridad sa priesthood ug sa mga yawe ang gikinahanglan aron mabuntog ang mga epekto sa Dakong Apostasiya.

Day 3 (Doktrina ug mga Pakigsaad 1)

Sa ilang pagtuon sa pasiuna sa Ginoo ngadto sa Doktrina ug mga Pakigsaad, nakat-unan sa mga estudyante nga gipamulong sa Ginoo ang Iyang mga pahimangno ngadto sa tanang katawhan pinaagi sa Iyang pinili nga mga disipulo ug nga Ang Simbahan ni Jesukristo sa mga Santos sa Ulahing mga Adlaw mao ang bugtong tinuod ug buhi nga simbahan dinhi sa yuta. Natino sa mga estudyante nga kinahanglan natong siksikon ang mga kasugoan nga nahatag sa Ginoo, ang tanang mga pulong sa Ginoo matuman, ug ang mga pulong sa Ginoo tinuod gipahayag man kini Niya o pinaagi sa Iyang mga sulugoon.

Day 4 (Pagtuon sa mga Kasulatan)

Niini nga leksyon nakat-unan sa mga estudyante nga ang mga kasulatan nahisulat aron sa pagpreserbar sa mahangturon nga mga kamatuoran nga naila isip mga doktrina ug mga baruganan. Nakakat-on sila nga aron makaplagan kining mahangturon nga mga kamatuoran makatabang nga masabtan una ang konteksto ug ang sulod nga teksto sa kasulatan. Nakakat-on ang mga estudyante nga sa higayon nga masabtan kining mga elemento, makatabang na dayon ang pagpahayag sa mga doktrina ug mga baruganan nga ilang nahibaloan sa klaro, yanong mga pamahayag sa kamatuoran. Sa katapusan, nakakat-on ang mga estudyante nga ang tinuod nga bili sa pagtuon sa kasulatan moabut gikan sa paggamit sa mga doktrina ug mga baruganan sa ilang mga kinabuhi nga ilang nadiskubre diha sa mga kasulatan.

Pasiuna

Kini nga leksyon mopaila sa mga estudyante ngadto sa Doktrina ug mga Pakigsaad gamit ang pasiuna ngadto sa Doktrina ug mga Pakigsaad ug sa seksyon 1. Ang mga estudyante makat-on nga ang Doktrina ug mga Pakigsaad gilangkuban sa “balaan nga mga pagpadayag ug dinasig nga mga pahayag nga gihatag aron sa pagpahimutang ug pagdumala sa gingharian sa Dios dinhi sa yuta sa ulahing mga adlaw” (pasiuna ngadto sa Doktrina ug mga Pakigsaad). Ang pagtuon sa Doktrina ug mga Pakigsaad ug Kasaysayan sa Simbahan makapalig-on sa mga pagpamatuod sa mga estudyante kabahin ni Jesukristo.

Pahinumdom: Kay mahimong mao pa kini ang unang klase sa mga estudyante nga magkauban, mahimo nimo silang dapiton nga mangutana mahitungod sa proseso sa home-study ug kon unsaon nga makatuon sa epektibong paagi sa mga kasulatan sa ilang kaugalingon.

Mga Sugyot alang sa Pagtudlo

Pasiuna sa Doktrina ug mga Pakigsaad ug Kasaysayan sa Simbahan

Ang Doktrina ug mga Pakigsaad naglangkob sa mga pinadayag nga nadawat ni Propeta Joseph Smith ug sa mga misunod kaniya

Mahimo nimong sugdan ang leksyon pinaagi sa pagpangutana sa mga estudyante kon unsa nga mga libro nga sa ilang hunahuna makabenepisyo ang tibuok kalibutan gikan sa pagbasa ug ngano. (Ikonsiderar ang pagdala og pipila ka mga libro nga imong isugyot.) Human makatubag ang mga estudyante, hangyoa ang usa ka estudyante sa pagbasa sa mosunod nga pamahayag ni Propeta Joseph Smith ug dapita ang klase sa pagpaminaw kon unsay gitudlo sa Propeta mahitungod sa Doktrina ug mga Pakigsaad:

Imahe
Prophet Joseph Smith

“[Ang mga pagpadayag diha sa Doktrina ug mga Pakigsaad mao] ang pundasyon sa Simbahan niining katapusang mga adlaw, ug usa ka kaayohan sa kalibutan, nagpakita nga ang mga yawe sa mga misteryo sa gingharian sa atong Manluluwas gisalig na usab ngadto sa tawo” (Mga Pagtulun-an sa mga Presidente sa Simbahan: Joseph Smith [2007], 231).

Awhaga ang mga estudyante nga atol sa leksyon karon mangita og mga paagi nga ang pagtuon sa Doktrina ug mga Pakigsaad makahatag og kaayohan sa kalibutan ug sa ilang kaugalingong mga kinabuhi.

Hangyoa ang mga estudyante sa pagpakli ngadto sa ulohang pahina sa Doktrina ug mga Pakigsaad. Ipasabut nga aron ang Doktrina ug mga Pakigsaad mahimong mapuslanon, una kinahanglan natong masabtan kon unsa ang mga doktrina ug mga pakigsaad. Hangyoa ang usa ka estudyante sa pagbasa og kusog sa ulohan nga pahina. Dayon pangutan-a ang mga estudyante sa mosunod:

Unsaon ninyo sa pagpasabut sa pulong nga doktrina?
Unsa man ang usa ka pakigsaad?
Unsa ang pagpadayag?

Kon gikinahanglan, ipasabut nga ang doktrina usa ka sukaranan, dili mausab-usab nga kamatuoran sa ebanghelyo ni Jesukristo; ang pakigsaad usa ka sagradong kasabutan tali sa Dios ug sa Iyang mga anak diin ang Dios mitakda sa tanang kondisyon sa mga saad nga gihimo; ug ang pagpadayag mao ang pakigkomunikasyon gikan sa Dios ngadto sa Iyang mga anak. Mahimo nimong isugyot nga isulat sa mga estudyante kini nga mga pagpasabut diha sa ilang ulohan nga pahina.

Hangyoa ang mga estudyante sa pagpakli ngadto sa ikawalo nga paragraph sa pasiuna sa Doktrina ug mga Pakigsaad (nagsugod kini sa “Diha sa mga pagpadayag …”). Ipasabut nga kining paragraph dunay lista sa mga ehemplo sa pipila ka mga hisgutanan sa doktrina nga anaa sa Doktrina ug mga Pakigsaad. Hangyoa ang mga estudyante sa pagbasa og hilum sa unang sentence ug motino sa usa o mas daghang hisgutanan sa doktrina nga sila interesado nga makat-on. Dayon ipangutana ang mosunod:

Hain sa hilisgutan sa doktrina nga kamo mas interesadong makat-on?
Sa unsang paagi nga kamo makabenepisyo gikan sa pagkahibalo ug mas masabtan kadto nga mga doktrina?

Hangyoa ang usa ka estudyante sa pagbasa og kusog sa katapusang sentence sa ikawalo nga paragraph (nagsugod kini sa “Sa katapusan, ang pagpamatuod nga gihatag …”), ug dapita ang klase sa pagpangita kon unsa ang nakapahimo sa Doktrina ug mga Pakigsaad nga bililhon kaayo. Dayon ipangutana ang mosunod:

Unsa ang nakapahimo sa Doktrina ug mga Pakigsaad nga “mahinungdanon ang bili”?
Ngano kaha nga ang pagpamatuod sa Manluluwas bililhon kaayo?
Unsa kaha ang mahitabo sa inyong pagpamatuod kang Jesukristo samtang magtuon kamo sa Doktrina ug mga Pakigsaad?

Isulat ang mosunod nga baruganan diha sa pisara: Pinaagi sa pagtuon sa mga pagpadayag sa Doktrina ug mga Pakigsaad, kamo makalig-on sa inyong pagpamatuod ni Jesukristo. Dapita ang mga estudyante sa paghunahuna kon sa unsang paagi nga ang mas lig-on nga pagpamatuod sa Manluluwas makaapekto sa ilang mga kinabuhi. Ikonsiderar ang pagpakigbahin kon sa unsang paagi nga ang pagtuon sa Doktrina ug mga Pakigsaad nakapalig-on sa imong pagpamatuod ni Jesukristo.

Hangyoa ang usa ka estudyante sa pagbasa og kusog sa unang paragraph sa pasiuna sa Doktrina ug mga Pakigsaad samtang ang nahibilin sa klase magsunod. Dayon ipangutana: Samtang magtuon kita sa Doktrina ug mga Pakigsaad, kansang tingog ang atong madunggan?

Isulat ang mosunod nga baruganan diha sa pisara: Samtang magtuon kita sa Doktrina ug mga Pakigsaad, atong madungog ang tingog sa Manluluwas. Dayon basaha ang Doktrina ug mga Pakigsaad 18:34–36 ngadto sa mga estudyante.

Hangyoa ang usa ka estudyante sa pagbasa og kusog sa ikatulo nga paragraph sa pasiuna sa Doktrina ug mga Pakigsaad. Hangyoa ang klase sa pagsunod ug mangita sa mga pulong nga naghulagway sa tingog sa Manluluwas. (Mahimo nimong isugyot nga ilang markahan kon unsay ilang makit-an.) Dayon ipangutana ang mosunod:

Unsa nga mga pulong ang gigamit sa paghulagway sa tingog sa Manluluwas?
Unsa nga mga kaayohan ang mahimong moabut sa inyong kinabuhi gumikan sa pagkadungog ug pag-ila sa Iyang tingog?

Ipakita ang mga hulagway sa pipila ka mga tawo kinsa ang mga pagpadayag sa Doktrina ug mga Pakigsaad gitumong (tan-awa sa Libro sa mga Hulagway sa Ebanghelyo [2009], nu. 87, 88, 93, 94, 95; tan-awa usab sa LDS.org). Samtang imong ipakita kining mga hulagway, ipasabut nga makat-unan sa mga estudyante ang mahitungod niining mga tawhana samtang magtuon sa Doktrina ug mga Pakigsaad.

Hangyoa ang usa ka estudyante sa pagbasa og kusog sa unang duha ka mga sentence sa ikaunom nga paragraph sa pasiuna sa Doktrina ug mga Pakigsaad (nagsugod kini sa “Kining sagrado nga mga pagpadayag …”). Dapita ang klase sa pagsunod ug mangita sa mga kahimtang diin nadawat ang pagpadayag. (Mahimo nimong isugyot nga ilang markahan kon unsay ilang makit-an.)

Unsa nga mga pulong dinhi niining mga sentence nga gihulagway ang mga kahimtang diiin kining mga pagpadayag nadawat?

Ipakita ang usa ka piraso sa papel ngadto sa mga estudyante nga dunay pulong nga Ikaw nga gisulat niini. Ipasabut nga sama sa mga indibidwal gikan sa kasaysayan sa Simbahan, makasinati usab kita og mga sitwasyon diin nagkinahanglan kita og balaan nga giya.

Kon atong sundon ang mga ehemplo niining nag-unang mga Santos, unsay angay gayud natong buhaton aron madawat ang balaan nga giya? (Mag-ampo ug magtinguha niini.)

Ipasabut nga ang usa ka paagi sa pagtinguha sa balaan nga giya mao ang pagtuon sa mga kasulatan. Hangyoa ang mga estudyante sa pagpakli ngadto sa Doktrina ug mga Pakigsaad 1:37–38, nga usa ka scripture mastery passage. Pahinumdumi sila nga ang Ginoo mihatag niini nga pagpadayag isip Iyang pasiuna sa Doktrina ug mga Pakigsaad.

Hangyoa ang usa ka estudyante sa pagbasa og kusog sa Doktrina ug mga Pakigsaad 1:37–38 samtang ang klase magsunod ug mangita sa sugo sa Ginoo kanato mahitungod sa Doktrina ug mga Pakigsaad.

Unsay gisugo sa Ginoo nga atong buhaton sa Doktrina ug mga Pakigsaad? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kinahanglan kitang mangita sa mga kasugoan nga gihatag sa Ginoo.)

Dapita ang mga estudyante sa pagpakigbahin kon sa unsang paagi nga sila nahatagan og kaayohan pinaagi sa pagsiksik sa mga kasulatan atol niining semanaha sa pagtuon. I-follow up ang mga estudyante sa mga tumong nga ilang gitakda sa pagtuon sa Doktrina ug mga Pakigsaad kada adlaw atol sa tuig nga tingklase. Pangutan-a sila bahin sa ilang mga plano sa pagsunod sa sugo sa Ginoo nga “siksika kini nga mga sugo” (D&P 1:37). Mahimo nimong tapuson pinaagi sa pagpakigbahin sa imong pagpamatuod sa kaimportante sa pagkadungog sa tingog sa Ginoo ug sa pagdawat og giya gikan Kaniya pinaagi sa pagtuon sa Doktrina ug mga Pakigsaad.

Sunod nga Unit (Joseph Smith—Kasaysayan 1; Doktrina ug mga Pakigsaad 2)

Dunggon ug tubagon sa Dios ang mga pag-ampo. Ang Unang Panan-awon miabut agi og resulta sa mapainubsanong pag-ampo ni Joseph Smith. Wala madugay, ang mga anghel mitudlo ni Propeta Joseph Smith sa pagpatungha sa Basahon ni Mormon ug sa pagpahiuli sa priesthood. Human mipakita si Juan Bautista ngadto ni Joseph Smith ug Oliver Cowdery, si Oliver misulat, “Hunahunaa sa makadiyot, unsa nga kalipay ang mipuno sa among mga kasingkasing … sa diha nga kami nakadawat ubos sa iyang kamot sa Balaang Pagkapari” (Joseph Smith—Kasaysayan 1:71, mubo nga sulat).