Niadtong Pebrero ug Marso 1832, mipadayon si Joseph Smith sa iyang dinasig nga pag-usab sa Bag-ong Tugon. Samtang misugod siya sa pagtrabaho sa basahon sa Pinadayag, naghunahuna siya mahitungod sa kahulugan sa pipila ka mga bersikulo. Mihangyo siya sa Ginoo sa paghubad sa pipila sa mga simbolo ug mga panghitabo nga gihulagway ni Juan nga Tigpadayag. Agi og tubag sa mga pangutana ni Joseph Smith mahitungod sa mga kapitulo 1–11 sa basahon sa Pinadayag, ang Ginoo mihatag sa pinadayag nga narekord diha sa Doktrina ug mga Pakigsaad 77.
Pahinumdom: Samtang kini nga leksyon naghisgot sa sulod sa basahon sa Pinadayag, dili kini usa ka leksyon kabahin sa basahon sa Pinadayag. Igahin ang dakong sa panahon sa leksyon sa paghisgot sa mga doktrina ug mga baruganan nga gihulagway diha sa Doktrina ug mga Pakigsaad 77, dili ang basahon sa Pinadayag.
Ang Ginoo mitubag sa mga pangutana ni Joseph Smith mahitungod sa basahon sa Pinadayag
Hangyoa ang mga estudyante sa paghunahuna og hilum sa unsay ilang nakat-unan sa ilang personal nga pagtuon sa kasulatan sa milabay nga pipila ka adlaw. Dapita ang pipila kanila sa pagpaambit og usa ka panabut nga ilang naangkon. Dayon hangyoa ang pipila sa pagpaambit og mga pangutana nga sila aduna sa panahon o human sa ilang personal nga pagtuon. Tingali maglakip kini og mga pangutana mahitungod sa kahulugan sa usa ka pulong o hugpong sa mga pulong, sa background nga kasaysayan sa unsay ilang nabasa, o ang importansya sa piho nga bersikulo. (Ang katuyoan niini nga kalihokan dili ang pagtubag sa mga pangutana sa mga estudyante mahitungod sa mga kasulatan apan ang paghatag og gibug-aton sa kaimportante sa pagpangutana samtang magtuon kita.) Human sa pagpakigbahin sa pipila ka mga estudyante, ipangutana ang mosunod:
Unsa ang nakatabang kaninyo sa pagpangita og mga tubag sa inyong mga pangutana ug sa mas maayo nga pagsabut sa mga kasulatan?
Aron matabangan ang mga estudyante nga makasabut sa konteksto sa Doktrina ug mga Pakigsaad 77, dapita sila sa pagbasa sa pasiuna sa seksyon ug sa pagpangita kon nag-unsa si Propeta Joseph Smith sa diha nga nadawat niya kini nga pagpadayag. Human makareport ang mga estudyante sa unsay ilang nakit-an, mahimo nimong ipasabut nga ang mga pulong nga “kalabut sa paghubad sa mga Kasulatan” nagpasabut ngadto sa mando sa Ginoo nga si Joseph Smith maghimo og dinasig nga mga pag-usab sa King James Version sa Biblia. Kini nga mga pag-usab giila na karon isip ang Hubad ni Joseph Smith. Ipasabut nga samtang si Joseph Smith nagtrabaho sa basahon sa Pinadayag, nangutana siya sa Ginoo mahitungod sa kahulugan sa pipila ka mga bersikulo. Ang iyang mga pangutana ug ang mga tubag nga gipadayag sa Ginoo narekord diha sa Doktrina ug mga Pakigsaad 77. Awhaga ang mga estudyante sa pagpangita og mga panabut diha sa Doktrina ug mga Pakigsaad 77 nga makatabang nila sa pagpalambo sa ilang pagsabut sa mga kasulatan.
Dapita ang mga estudyante sa pagtan-aw sa Doktrina ug mga Pakigsaad 77, ug hangyoa sila sa pagpasabut kon sa unsang paagi ang pagkahan-ay niini nga seksyon lahi kay sa ubang mga seksyon sa Doktrina ug mga Pakigsaad. Kinahanglang makabantay sila sa mga letra nga P ug T tupad sa matag bersikulo o paragraph sa tibuok seksyon. Ipasabut nga ang matag P mag-una sa pangutana gikan ni Joseph Smith, ug ang matag T mag-una sa tubag sa Ginoo.
Pangutan-a ang mga estudyante kon may nakabasa na ba kanila og pipila o tanan sa basahon sa Pinadayag.
Unsa man ang lisud mahitungod sa pagbasa sa basahon sa Pinadayag? (Kon ang mga estudyante dili mohisgut niini, mahimo nimong ipasabut nga ang basahon sa Pinadayag mahimong lisud sabton tungod sa mga simbolo nga anaa niini.)
Aron mohatag og ehemplo sa simbolikanhong paglarawan diha sa basahon sa Pinadayag, dapita ang pipila ka mga estudyante nga magpuli-puli sa pagbasa og kusog sa Pinadayag 4:2–8. Hangyoa ang klase sa pagsunod, nga mangita sa mga simbolo niini nga mga bersikulo. Dapita ang klase sa paghingalan niining mga simbolo, ug hangyoa ang usa ka estudyante sa pagsulat niini sa pisara. (Ang mga tubag mahimong maglakip og usa ka bangaw nga nagliyok sa trono, upat ug baynte ka mga trono, mga korona nga bulawan, pito ka nagdilaab nga sulo sa kalayo, dagat nga bildo, ug upat ka mga buhing binuhat [mananap].)
Dapita ang usa ka estudyante sa pagbasa og kusog sa pangutana ni Joseph Smith diha sa Doktrina ug mga Pakigsaad 77:1. Hangyoa ang usa ka estudyante nga linginan diha sa pisara ang simbolo nga gihangyo ni Joseph Smith sa Ginoo nga tabangan siya nga makasabut (dagat nga bildo). Dayon hangyoa ang laing estudyante sa pagbasa sa pagpasabut sa Ginoo diha sa Doktrina ug mga Pakigsaad 77:1.
Sa unsang paagi nga kining tubag makatabang kanato nga mas makasabut sa Pinadayag 4:6?
Ipares-pares ang mga estudyante. Hangyoa ang matag pares sa pagdungan og basa sa Doktrina ug mga Pakigsaad 77:2–5, nga mangita sa dugang nga mga pangutana ni Joseph Smith mahitungod sa mga simbolo diha sa Pinadayag 4 ug sa mga tubag nga gihatag sa Ginoo niadto nga mga pangutana. Human sa igong panahon, dapita ang pipila ka estudyante sa pagpaambit kon sa unsang paagi ang mga tubag sa Ginoo sa mga pangutana ni Joseph Smith nakatabang kanila nga makasabut sa pipila ka simbolikanhong paglarawan diha sa Pinadayag 4:2–8.
Dapita ang mga estudyante sa pagpamalandong kon unsaon nila sa paggamit sa unsay ilang nakat-unan gikan sa Doktrina ug mga Pakigsaad 77 aron ma-summarize unsay gihulagway ni Juan diha sa Pinadayag 4:2–8. Dapita ang pipila ka mga estudyante sa pagpakigbahin sa ilang mga summary. Dayon ipangutana ang mosunod:
Unsa ang atong makat-unan gikan sa Doktrina ug mga Pakigsaad 77 mahitungod sa tahas sa usa ka propeta sa pagtabang kanato nga makasabut sa kahulugan sa kasulatan? (Bisan og ang mga estudyante mahimong mogamit og lahi nga mga pulong, kinahanglan silang mopahayag sa mosunod nga doktrina: Ang Ginoo mopadayag sa husto nga paghubad sa kasulatan pinaagi sa Iyang mga propeta. Mahimo nimong isugyot nga isulat sa mga estudyante kini nga doktrina diha sa ilang mga kasulatan.)
Aron matabangan ang mga estudyante nga makasabut niini nga doktrina, ipangutana ang mosunod:
Ngano kaha nga importanting makat-unan kon unsay gitudlo sa mga propeta kalabut sa unsay atong gitun-an diha sa mga kasulatan?
Aron matabangan ang mga estudyante nga makaangkon og dugang nga panabut niini nga pangutana, hangyoa ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:
Imahe
Elder Bruce R. McConkie
“Ang mga propeta ang mihatag sa kasulatan, ug ang mga propeta ang kinahanglang mohubad niini. Ang balaan nga mga tawo sa karaang panahon nakadawat og pagpadayag gikan sa Espiritu Santo, nga ilang girekord isip kasulatan; karon ang mga tawo kinahanglan gayud aduna sa samang Balaang Espiritu aron mapadayag kon unsay gipasabut sa kasulatan—kay kon dili adunay mahitabo nga daghan kaayong pribado nga mga interpretasyon ug tungod niini daghan nga nagkalain-lain ug nagkasumpaki nga mga simbahan, nga mao gayud ang kahimtang sa relihiyoso nga kalibutan karon” (sa Conference Report, Okt. 1964, 38).
Sumala ni Elder McConkie, nganong nagkinahanglan man kita og propeta nga mohubad sa eksaktong kahulugan sa kasulatan?
Asa man nato makita ang mga pagtulun-an sa mga propeta mahitungod sa kahulugan sa atong gibasa diha sa mga kasulatan? (Ang mga tubag mahimong maglakip nga makit-an nato kini nga mga pagtulun-an sa mga pakigpulong sa kinatibuk-ang komperensya ug sa mga magasin sa Simbahan ug sa ubang mga publikasyon sa Simbahan.)
Samtang motubag ang mga estudyante niini nga pangutana, ipasabut nga ang Doktrina ug mga Pakigsaad 77 nagpakita nga ang mga pulong sa mga propeta nga narekord diha sa mga kasulatan makatabang sa pagpasabut sa uban nga mga kasulatan. Sa makadaghan, ang mga pulong sa usa ka propeta nga narekord diha sa usa ka tudling sa kasulatan mopasabut o mohubad sa unsay gipadayag sa lain nga tudling. Ipasabut nga ang mga footnote nga anaa sa mga kasulatan kanunay nga naghatag og mga reference ngadto niining makatabang nga mga tudling.
Sa paghulagway niining punto, dapita ang mga estudyante sa pagbasa og hilum sa Pinadayag 5:1, nga mangita kon unsay nakita ni Juan diha sa kamot sa tawo nga naglingkod sa trono. Hangyoa ang mga estudyante sa pagreport kon unsay ilang makit-an. Dapita ang mga estudyante nga direkta nga mopakli ngadto sa Doktrina ug mga Pakigsaad 77: 6 human nila mahulagway unsay ilang nakit-an diha sa Pinadayag 5:1.
Dapita ang usa ka estudyante sa pagbasa og kusog sa Doktrina ug mga Pakigsaad 77:6–7. Hangyoa ang klase sa pagsunod, nga mangita sa mga pangutana ni Joseph Smith mahitungod sa Pinadayag 5:1, ingon man sa mga tubag sa Ginoo. (Tingali makatabang ang pagpasabut nga ang 7,000 ka tuig nagpasabut sa panahon sukad sa Pagkapukan ni Adan ug ni Eva. Wala kini magpasabut sa aktwal nga edad sa kalibutan lakip ang mga panahon sa paglalang.)
Hangyoa ang mga estudyante sa paggamit sa ilang kaugalingong mga pulong sa pag-summarize sa mga pangutana ug mga tubag. Human sa pagkompleto niining kalihokan, ipasabut kon sa unsang paagi nga ang paggamit sa mga footnote samtang kita magtuon sa mga kasulatan makatabang kanato sa pagdiskubre kon unsa ang gisulti sa mga propeta mahitungod sa mga kasulatan nga atong gibasa.
Ipasabut nga bisan og ang mga propeta lang ang dunay awtoridad sa paghubad sa mga kasulatan alang sa kalibutan, matag usa kanato kinahanglang mangita alang sa pagsabut ug sa personal nga paggamit samtang magtuon kita sa mga kasulatan sa indibidwal nga paagi.
Unsaon nato sa pagpahisama ang nabuhat ni Joseph Smith samtang nagtuon ug namalandong siya sa basahon sa Pinadayag ngadto sa atong personal nga pagtuon sa kasulatan? (Mahimong mahibaloan sa mga estudyante ang usa ka baruganan sama sa mosunod: Kon kita mangutana sa Ginoo, Siya makatabang kanato nga masabtan ang mga kasulatan.)
Nganong importante nga mangita sa hustong kahulugan sa mga kasulatan ug dayon tinguhaon ang personal nga paggamit niini?
Hangyoa ang mga estudyante sa pagpamalandong sa usa ka panahon sa dihang sila nangayo sa Ginoo aron tabangan sila nga masabtan ang mga kasulatan ug unsaon sa paggamit sa mga pagtulun-an diha sa mga kasulatan ngadto sa ilang kaugalingong mga kahimtang. Dapita ang pipila ka mga estudyante sa pagpakigbahin sa ilang mga kasinatian.
Ipasabut nga ang nahabilin diha sa Doktrina ug mga Pakigsaad 77 naglangkob og dugang nga mga pangutana nga gipangutana ni Joseph Smith mahitungod sa basahon sa Pinadayag ug ang mga tubag sa Ginoo niini nga mga pangutana. I-summarize ang Doktrina ug mga Pakigsaad 77:8–15 pinaagi sa pagsulti sa mga estudyante nga kini nga pagpadayag nagtugot ni Joseph Smith sa pagkat-on mahitungod sa pipila ka mga panghitabo nga mahitabo sa dili pa ang Ikaduhang Pag-anhi sa Manluluwas.
Pahibaloa ang mga estudyante nga kon sila magtuon sa basahon sa Pinadayag sa umaabut, ang mga tubag sa Ginoo diha sa Doktrina ug mga Pakigsaad 77 makatabang kanila nga makasabut sa kahulugan sa simbolikanhong paglarawan diha sa basahon.
Tapusa kini nga leksyon pinaagi sa pagpaambit sa imong pagpamatuod sa mga doktrina ug mga baruganan nga gihisgutan niini nga leksyon o sa pagpaambit og kasinatian nga imong nasinati isip resulta sa pagdangup ngadto sa Ginoo alang sa tabang nga makasabut sa mga kasulatan.
Si Juan, kinsa nailhan usab isip si Juan ang Hinigugma ug si Juan ang Tigpadayag, nakadawat og pagpadayag samtang nabilanggo sa isla sa Patmos tungod sa pagpamatuod mahitungod ni Jesukristo ug sa Iyang ebanghelyo (tan-awa sa Pinadayag 1:9–10). Kini nga pagpadayag narekord diha sa basahon sa Pinadayag.
Ang mosunod nga paghulagway makatabang sa pagpasabut sa basahon sa Pinadayag:
“Nailhan usab isip ang Apokalipsis, usa ka pulong nga Griyego nga nagpasabut nga gipadayag o gibutyag. Ang mensahe sa Pinadayag susama sa tanang kasulatan; adunay mahitabo nga kadaugan sa Dios batok sa yawa dinhi sa yuta; usa ka permanente nga kadaugan sa maayo batok sa dautan, sa mga Santos batok sa ilang mga tiglutos, sa gingharian sa Dios batok sa mga gingharian sa tawo ug ni Satanas. Kini ang hilisgutan nga adunay gisulat si Amos, Isaias, Jeremias, Ezequiel, Daniel, Pablo, Pedro, ug ang tanan nga mga propeta. Namulong sila kabahin sa usa ka panahon sa kadaugan nga moabut, ug nga ang katapusan mas maayo (mas mahimayaon) kay sa sinugdanan. Ang kadaugan maangkon pinaagi ni Jesukristo.
“Ingon niana ang tema sa Pinadayag. Ang mga detalye mahitungod sa mga buhing binuhat [mga mananap], mga gubat, mga anghel, mga tawo, ubp., nakadugang og impormasyon kabahin niini nga tema. Pinaagi sa gamay nga pagtuon, ang tema mahimong masabtan bisan kon ang mga detalye wala hingpit nga mailhi. Tingali sa ingon niini nga pagsabut nga si Propeta Joseph Smith miingon nga ang Pinadayag mao ang ‘usa sa pinakayano nga mga basahon nga gisugo sa Dios nga mahisulat’ (History of the Church 5:342). Hinoon, kon mas hingpit nga nasabtan ang mga detalye, mas dako ang pagsabut sa tema. Kon mapakyas kita sa pagsabut sa tema bisan gamay lang, mapakyas kita sa atong pagsabut, bisan unsa pa kadaghan ang mga detalye nga atong nasabtan” (Bible Dictionary, “Revelation of John”).
Si Propeta Joseph Smith mideklarar nga ang basahon sa Pinadayag mao ang “usa sa pinakayano nga mga basahon nga gisugo sa Dios nga mahisulat” (sa History of the Church, 5:342). Dihang gihimo niya kini nga pamahayag, namulong siya sa usa ka kinatibuk-ang komperensya sa Simbahan. Gitumong niya ang pipila sa iyang mga komentaryo ngadto ni Elder Pelatiah Brown, kinsa giakusahan nga nagsangyaw og sayop nga doktrina mahitungod sa basahon sa Pinadayag. Gipahimangnoan niya si Elder Brown ug ang ubang mga misyonaryo nga dili motudlo mahitungod sa piho nga mga simbolo ug mga detalye diha sa basahon ug mosangyaw hinoon sa sukaranang mga baruganan sa ebanghelyo. Ang tambag sa Propeta importante usab kanato samtang magtuon ug magtudlo kita gikan sa mga kasulatan:
Imahe
Prophet Joseph Smith
“Dili kaayo mahinungdanon alang sa mga elder nga makabaton og kahibalo kalabut sa kahulugan sa mga mananap, ug sa mga ulo ug mga sungay, ug ubang mga butang nga gihisgutan sa mga pagpadayag [ni Juan nga Tigpadayag]. …
“… Ipahayag ang unang mga baruganan, ug ayaw paghisgut og mga misteryo, basin pa unya og kamo maglibug. Ayaw panghilabut sa mga panan-awon sa mga mananap ug mga hilisgutan nga kamo wala makasabut. Elder Brown, kon moadto kamo sa Palmyra, ayaw paghisgot kabahin sa upat ka mga mananap, apan isangyaw ang mga butang nga gisugo kanimo sa Ginoo nga maoy isangyaw—paghinulsol ug bunyag alang sa kapasayloan sa mga sala” (sa History of the Church, 5:340, 344).