Sa Hunyo 1831, ang Ginoo mimando ni Joseph Smith ug sa ubang mga elder sa pagtawag og komperensya sa Simbahan sa Missouri (tan-awa sa D&P 52:2). Masulundon sa mando, si Joseph Smith ug ang uban mibiyahe og mga 1,448 ka kilometro gikan sa Ohio ngadto sa Missouri. Human moabut ang Propeta sa Missouri, nakadawat siya og pagpadayag nga karon gi-rekord sa Doktrina ug mga Pakigsaad 57. Niini nga seksyon gipadayag sa Ginoo ang dapit alang sa siyudad sa Zion, nagtuman sa usa ka saad nga Iyang gihimo sa una ngadto sa mga Santos (tan-awa sa D&P 52). Ang Ginoo nagtudlo usab og daghang mga indibidwal kalabut sa ilang mga tahas sa pagtukod sa Zion.
Dapita ang mga estudyante sa paghunahuna og usa ka panahon nga sila naghinam-hinam og paabut sa usa ka butang, sama sa pagsaulog og piyesta opisyal o adlaw nga natawhan, pagserbisyo og misyon, pagbisita sa templo, pagdawat og regalo, o pagbisita og minahal. Pangutan-a ang mga estudyante unsay ilang gibati samtang ang hitabo nga ilang gipaabut nagsingabut.
Nganong kini nga hitabo importante kaayo kaninyo?
Sa unsa nga paagi ang inyong mga lihok nagpakita sa inyong kahinam alang niini nga hitabo?
Pahinumdumi ang mga estudyante nga pinaagi sa mga pagpadayag nga gihatag ngadto ni Joseph Smith, nakat-unan sa mga Santos nga ang Zion ibutang sa usa ka dapit sa Missouri (tan-awa sa D&P 52:2, 5, 42). Ipasabut nga human ang Ginoo mitawag og pipila sa unang mga Santos sa pagbiyahe gikan sa Ohio ngadto sa Missouri, daghang mga miyembro sa Simbahan naghinam-hinam og paabut nga makahibalo sa eksakto nga dapit sa siyudad sa Zion.
Aron matabangan ang mga estudyante nga makaangkon og pagbati sa kahinam sa mga Santos alang sa pagtukod sa Zion, dapita ang usa ka estudyante sa pagbasa sa mosunod nga istorya mahitungod ni Sister Polly Knight. Hangyoa ang klase sa pagpaminaw kon sa unsa nga paagi ang mga lihok ni Sister Knight nagpakita sa iyang kahinam alang sa pagtukod sa Zion.
“Si Sister Knight, inahan ni Newel ug usa ka miyembro sa branch sa Colesville, mirisgo sa iyang kinabuhi sa pagbiyahe ngadto sa Zion. Ang panglawas ni Polly nagkaluya, apan ang iyang tinguha nga motan-aw sa gisaad nga yuta hilabihan ka dako nga midumili siya nga magpabilin sa Ohio. … Misulat ang iyang anak nga lalaki, ‘Ang iya lamang , o ang iyang labing dakong tinguha, mao ang makatunob diha sa yuta sa Zion, ug magpalubong sa iyang lawas diha niana nga yuta.’ … Sa kadugayan mireport ang iyang anak nga ‘gihatag sa Ginoo ang tinguha sa iyang kasingkasing, ug siya nabuhi nga nakabarug diha niana nga yuta’ [Scraps of Biography: Tenth Book of the Faith-Promoting Series (1883), 70; tan-awa usab sa History of the Church,1:199]. Namatay si Polly duha ka semana human sa iyang pag-abut sa yuta sa Zion ug mao ang unang Santos sa Ulahing mga Adlaw nga gilubong sa Missouri” (Church History in the Fulness of Times, 2nd ed. [manwal sa Church Educational System , 2003], 105).
Pahinumdumi ang mga estudyante nga tulo ka grupo ang gitawag sa pagbiyahe og duol sa 1, 448 ka kilometro ngadto sa Missouri: ang Propeta ug usa ka gamay nga grupo sa mga elder (tan-awa sa D&P 52, 53); usa ka grupo sa mga misyonaryo nga gitawag sa pagsangyaw sa dalan nga maagian (tan-awa sa D&P 52); ug ang mga Santos sa Colesville, gipangulohan ni Newel Knight (tan-awa sa D&P 54).
Ipasabut nga human moabut sa Missouri, mihangyo ang Propeta sa Ginoo nga mahibalo pa mahitungod sa asa mahimutang ang siyudad sa Zion ug kanus-a kini pagatukuron. Ang tubag sa Ginoo girekord diha sa Doktrina ug mga Pakigsaad 57. Dapita ang usa ka estudyante sa pagbasa og kusog sa Doktrina ug mga Pakigsaad 57:1–3. Hangyoa ang klase sa pagsunod, nga mangita sa gisulti sa Ginoo kon asa pagatukuron ang siyudad sa Zion.
Asa pagatukuron ang siyudad sa Zion? (Independence, Jackson County, Missouri.)
Asa pagatukuron ang templo kalabut ngadto sa yuta sa Zion? (Sa Independence, Missouri, ang tunga-tunga nga dapit sa Zion.)
Dapita ang mga estudyante sa pagbasa og usab sa hilum sa Doktrina ug mga Pakigsaad 57:3, nga mangita sa unsay gisulti sa Ginoo nga kinahanglan mahimutang sa Independence, Missouri, ang tunga-tunga nga dapit sa Zion.
Unsay gipasabut sa Ginoo nga kinahanglan mahimutang sa Independence, Missouri, o sa tunga-tunga nga dapit sa Zion? (Samtang ang mga estudyante nagtubag, isulat ang mosunod nga kamatuoran diha sa pisara: Ang templo anaa sa tunga-tunga nga dapit sa Zion.)
I-summarize ang Doktrina ug mga Pakigsaad 57:4–6 pinaagi sa pagpasabut nga gimandoan sa Ginoo ang mga Santos sa pagpalit sa yuta diha ug libut sa Jackson County, Missouri, nga makahimo kanila sa pagsugod og tukod sa Zion ug pagtukod sa templo.
Ang Ginoo nagtudlo usab og mga indibidwal kalabut sa ilang mga tahas sa pagtukod sa Zion
Dapita ang duha ka mga estudyante sa pag-role play sa mosunod nga sitwasyon diha sa atubangan sa klase (mahimo kang makigsulti sa duha ka estudyante sa dili pa magsugod ang klase ug sa paghatag kanila og panahon sa pag-andam):
Ang usa ka estudyante mangutana sa laing usa kon nganong siya wala na mag-anhaan sa mga miting ug mga kalihokan sa Simbahan sa bag-ohay. Motubag ang ikaduha nga gibati niya nga wala siya kinahanglana. Ang estudyante dili lider sa usa ka klase sa kabatan-onan o korum ug wala mobati og ingon nga siya importante ngadto sa uban diha sa grupo.
Human ang ikaduhang estudyante nakigbahin niini nga mga kabalaka, pangutan-a ang klase unsaon nila pagtubag aron matabangan kini nga estudyante. Human sila nakigbahin sa ilang mga hunahuna, dapita sila sa pagpangita og baruganan nga makatabang niining batan-ong lalaki o babaye samtang sila magtuon sa nahibiling bahin sa Doktrina ug mga Pakigsaad 57.
Ipares-pares ang mga estudyante ug i-assign ang matag pares og usa sa mga reference nga gilista diha sa pisara. Hangyoa ang mga estudyante sa pagbasa sa mga tudling nga gi-assign kanila ug sa pagpangita sa mga tubag sa mosunod nga mga pangutana. Mahimo nimong isulat kining mga pangutana diha sa pisara.
Kinsa ang gi-assign sa Ginoo sa pagtabang sa pagtukod sa Zion?
Unsa ang gi-assign niini nga tawo nga buhaton?
Human sa igong panahon, hangyoa ang mga estudyante sa pagreport sa ilang mga nakit-an. Ipasabut nga ang kada tawo kinsa gitambagan sa pagpuyo sa Missouri adunay mga gasa ug mga talento nga gikinahanglan aron sa pagtukod sa Zion.
Unsa ang gitudlo kanato sa tambag sa Ginoo mahitungod sa paagi nga Siya nagtukod sa Iyang gingharain? (Mahimong mogamit ang mga estudyante og lahi nga mga pulong, apan kinahanglan nga ilang mapahayag ang mosunod nga baruganan: Kita kinahanglan nga mogamit sa atong indibidwal nga mga kalig-on aron sa pagtabang og tukod sa gingharian sa Ginoo samtang Siya nagtawag kanato sa pagbuhat sa mao. Isulat kini nga baruganan diha sa pisara. Mahimo nimong isugyot nga ang mga estudyante mosulat niini diha sa margin sa ilang kasulatan duol sa mga bersikulo 8–13.)
Sa unsa nga paagi nga ang pagsabut niini nga kamatuoran nagtabang sa batan-ong lalaki o babaye diha sa role play?
Aron matabangan ang mga estudyante nga mas makasabut niini nga kamatuoran ug sa unsa nga paagi kini may kalabutan kanila, isulat ang mosunod nga mga pangutana diha sa pisara ug hangyoa ang mga estudyante sa pagtubag niini diha sa ilang mga class notebook o mga scripture study journal:
Unsay imong mga kalig-on?
Sa unsa nga paagi ang imong mga kalig-on mahimong usa ka panalangin sa imong pamilya ug ngadto sa Simbahan?
Human sa igo nga panahon, hangyoa ang pipila ka mga estudyante sa pagpakigbahin sa ilang mga tubag diha sa klase.
Dapita ang mga estudyante sa pagpakigbahin og mga ehemplo sa mga tawo nga ilang kaila kinsa nagtukod sa Simbahan pinaagi sa paggamit sa personal nga mga kalig-on, espirituhanong mga gasa, o mga kahanas nga anaa kanila. Tapusa pinaagi sa pagpamatuod nga kada usa sa imong mga estudyante adunay importanting tahas nga buhaton sa pagtukod sa gingharian sa Ginoo. Awhaga sila sa paggamit sa ilang indibidwal nga mga kalig-on sa pagpanalangin sa ilang mga pamilya ug sa Simbahan.
Gipasabut ni Presidente Spencer W. Kimball ang usa ka butang nga atong mabuhat nga magpabiling nakatutok diha sa templo ug sa pagtabang sa mga kabataan sa pagtutok diha niini gikan sa batan-ong edad:
Imahe
President Spencer W. Kimball
“Nindot kaayo kon … ang mga ginikanan magbutang og litrato sa templo sa kada kwarto sa ilang balay aron ang ilang mga anak gikan sa ilang pagkamasuso makatan-aw sa litrato kada adlaw hangtud nga mahimo kining kabahin sa ilang kinabuhi. Kon moabut siya sa edad nga kinahanglan siyang mohimo [og] importante kaayong desisyon [kalabut sa pagminyo diha sa templo], kini nahimo na” (The Teachings of Spencer W. Kimball, ed. Edward L. Kimball [1982], 301).
Gipahayag ni Presidente Howard W. Hunter ang importansya sa templo alang sa mga miyembro sa Simbahan:
Imahe
Presidente Howard W. Hunter
“Magmahimo kita nga usa ka katawhan nga nagtambong ug mahigugmaon sa templo. … Atong himoon ang templo, uban ang pagsimba diha sa templo ug mga pakigsaad sa templo ug kaminyoon diha sa templo, nga atong labing importanting yutan-ong tumong ug ang labing nindot nga mortal nga kasinatian” (“A Temple-Motivated People,” Ensign, Peb. 1995, 5).