Niadtong Enero 1847, nadawat ni Brigham Young ang pagpadayag nga narekord diha sa Doktrina ug mga Pakigsaad 136 didto sa Winter Quarters, Nebraska. Kini nga leksyon maghisgot sa Doktrina ug mga Pakigsaad 136:19–42, nga naglakip sa direksyon sa Ginoo ngadto sa mga Santos kon unsaon sa pagtinabangay ug sa pagdawat sa Iyang panalipod sa ilang biyahe paingon sa kasadpan.
Ang Ginoo mitudlo sa mga Santos kon unsay ilang buhaton diha sa ilang pagbiyahe
Sugdi ang leksyon pinaagi sa pagpangutana sa mosunod:
Unsa nga mga oportunidad ang inyong naangkon sa pakigdait uban sa laing mga tawo diha sa usa ka grupo? (Ang mga tubag mahimong maglakip sa mga pamilya, mga korum sa priesthood ug mga klase sa Young Women, mga team sa sport, mga klase sa eskwelahan, ug mga trabahante.)
Unsa ang pipila ka positibong mga aspeto sa pakig-uban og trabaho sa laing tawo diha sa usa ka grupo?
Ipasabut nga sa dihang ang mga Santos napugos sa pagbiya sa Nauvoo sa sayong bahin sa 1846 ug nagsugod sa pagbiyahe sa kasadpan, daghan ang wala maandam alang sa biyahe. Ang mga Santos sa sinugdanan nagkatag-katag og sobra sa pila ka milya, nga nakapaminos sa ilang abilidad sa pagtabang sa usag usa. Diha sa usa ka pinadayag nga nadawat ni Brigham Young didto sa Winter Quaters mga usa ka tuig human niana, ang Ginoo mitudlo sa mga Santos sa pag-organisar sa ilang mga kaugalingon aron sila mahimong magtinabangay sa usag usa samtang nagpadayon sa ilang biyahe.
Dapita ang mga estudyante sa pagribyu og hilum sa Doktrina ug mga Pakigsaad 136:2, 8–10 ug mo-report kon giunsa pagtudlo sa Ginoo ang mga Santos sa pagtinabangay sa usag usa.
Ipasabut nga bisan kon ang pakigtrabaho diha sa grupo makahimo nato nga magtinabangay sa usag usa, makamugna gihapon kini og mga hagit.
Sa inyong kasinatian, unsa ang pipila sa mga hagit sa pakigtrabaho diha sa mga grupo?
Ipares-pares ang mga estudyante. Dapita ang matag parisan nga dungan nga magbasa sa Doktrina ug mga Pakigsaad 136:19–27. Hangyoa sila sa pagpangita sa direksyon sa Ginoo alang sa mga Santos samtang nagbiyahe sila ug nagtinabangay. Human sa igong panahon, pangutan-a ang klase sa mosunod:
Unsa nga direksyon ang inyong nakita nga makatabang sa mga Santos sa pagbiyahe ug pagtinabangay? Ngano kaha nga kining direksyon gikinahanglan?
Unsaon ninyo sa paggamit niining direksyon sa inyong inter-aksyon ug pakigtinabangay sa ubang mga tawo?
Unsa ang mga sangputanan kon ang mga tawo mosupak niining tambag?
Dapita ang usa ka estudyante sa pagbasa og kusog sa Doktrina ug mga Pakigsaad 136:23–24. Hangyoa ang klase sa pagsunod. Mahimong kinahanglan nimong ipasabut nganong ang Ginoo mitudlo sa mga Santos sa “[pag]hunong sa paghubog” gani human nga nadawat nila ang Pulong sa Kaalam. Pahinumdumi sila nga ang mga Santos miuswag sa hinay-hinay sa ilang pagsunod sa Pulong sa Kaalam. Sa dihang nahatag ang pagpadayag diha sa Doktrina ug mga Pakigsaad 136, ang mga Santos sa Ulahing mga Adlaw wala did-i sa paggamit sa tanang makahubog nga ilimnon sama nato karon.
Sumala sa bersikulo 24, unsa ang mahimo sa atong mga pulong niadtong nagpalibut kanato? (Kinahanglang mahibaloan sa mga estudyante ang mosunod nga kamatuoran: Ang atong mga pulong kinahanglang mopalig-on sa uban. Mahimong kinahanglan nimong ipasabut nga ang paghatag og kaayohan nagpasabut sa pagpalig-on sa espiritwalidad o sa pagbati sa usa ka tawo.)
Ngano kaha nga importante alang sa mga Santos ang paggamit sa makapalig-on nga mga pulong samtang sila nag-uban sa pagbiyahe?
Kanus-a kamo nakakita og tawo nga migamit og mga pulong nga nakapalig-on sa laing tawo?
Dapita ang mga estudyante sa pagkonsiderar unsay ilang isulti nga makapalig-on niadtong anaa sa ilang palibut.
Dapita ang duha ka mga estudyante sa pagbasa og kusog sa usa sa mosunod nga mga istorya sa mga kasinatian sa mga Santos sa ilang pagbiyahe. Hangyoa ang klase sa paghunahuna mahitungod sa kinaiya niining matinud-anong mga Santos.
Si Mary Ann Weston Maughan misulat:
“Gitawag kami aron sa paglubong sa duha namo ka kauban kinsa namatay sa cholera niining buntaga, usa ka tawo nga ginganlan og Brown ug usa ka bata. Aduna pay daghang masakiton diha sa kampo. Nakita ang Platte River sa tibuok adlaw. Mibiyahe og 24 ka kilometros, nagkampo sa Salt Creek. Sa wala madugay pipila sa among mga kauban miduol dala ang laing patay nga bata. Milubong sila niini sa kilum-kilom diha sa daplin sa sapa. Aduna pay daghang masakiton. Nakapaguol kadto kanamo ang paglubong sa among kahigalaan diha sa kadalanan. Ang panahon init kaayo” (journal ni Mary Ann Weston Maughan, 3 vols., Hunyo 21, 1850, 2:1, Family History Library, Siyudad sa Salt Lake; gi-moderno ang pag-spelling, capitalization, ug ang punctuation).
Si Clarissa Young Spencer (anak nga babaye ni Brigham Young) misulat:
“Usa sa labing maanindot nga mga kalidad ni Papa isip usa ka lider mao ang paagi nga siya miatiman sa temporal ug sosyal nga kaayohan sa iyang mga tawo inubanan sa paggiya kanila sa ilang espiritwal nga panginahanglan. Sa talagsaong pagbaktas tabok sa mga kapatagan sa dihang ang tanan gawas sa mga tawo nga luya kaayo, ang mga Santos magpundok libot sa daub alang sa kalingawan sa gabii, kon ang panahon maayo kaayo. Didto ang mga kanta awiton, ang mga biyolinista motugtug sa musika, ug ang kalalakin-an ug kababayen-an mahikalimot sa kakapoy sa pagbaktas sa kinse ka milya o labaw pa diha sa disyerto nga wala pay dalan samtang miapil sila sa pagsayaw sa mga magtiayon. Mao kadto ang iyang pamaagi sa pagdugang sa ‘kadasig’ sa wala pa mamugna ang maong pulong” (uban ni Mabel Harmer, One Who Was Valiant [1940], 162).
Base niini nga mga istorya, unsaon ninyo paghulagway kining matinud-anon nga mga pioneer?
Pangutan-a ang mga estudyante kon unsa nga tambag ang anaa niining mga bersikulo. Human maka-report ang mga estudyante kon unsay ilang nakit-an, isulat ang mosunod nga mga kamatuoran diha sa pisara: Kon kita malipayon, atong daygon ug pasalamatan ang Langitnong Amahan. Kon kita masulub-on, kinahanglang mag-ampo kita nga ang atong mga kalag mahimong magmalipayon.
Sa unsang paagi kaha nga kining mga baruganan nakatabang sa mga Santos sa ilang biyahe?
Sa unsang paagi nga kini nga mga baruganan makatabang kanato karon?
Hangyoa ang mga estudyante sa paghunahuna sa mga panahon sa dihang ang Langitnong Amahan mitubag sa ilang mga pag-ampo pinaagi sa pagtabang kanila nga magmalipayon. Dapita ang pipila ka mga estudyante sa pagpakigbahin sa ilang mga kasinatian.
Awhaga ang mga estudyante sa pagdayeg ug pagpasalamat sa Ginoo kon sila malipayon ug sa pag-ampo alang sa tabang kon sila masulub-on.
Ang Ginoo mipasalig sa mga Santos ug nagtudlo kanila nga magkamakugihon sa pagsunod sa tanan Niyang mga sugo
Pahinumdumi ang mga estudyante nga ang mga Santos milahutay og grabe nga mga pagsulay ug nga sila nasayud nga ang ilang nagpadayon nga biyahe mahimo usab nga usa ka dakong hagit.
Unsa kaha ang nakatabang sa mga Santos nga magpabilin nga matinud-anon bisan ubos sa maong lisud nga mga kahimtang?
Bahina ang mga estudyante ngadto sa duha ka grupo. Dapita ang unang grupo sa pagbasa sa Doktrina ug mga Pakigsaad 136:30–33. Dapita ang ikaduha nga grupo sa pagbasa sa Doktrina ug mga Pakigsaad 136:34–40. Hangyoa ang duha ka grupo sa pagpangita sa mga baruganan nga tingali nakapadasig sa mga Santos.
Human sa igong panahon, dapita ang mga estudyante sa kada grupo sa pag-report. Isulat ang ilang mga tubag diha sa pisara. Ang ilang mga tubag mahimong maglakip sa mosunod nga mga baruganan ug mga doktrina:
Dili kita angay nga mahadlok sa atong mga kaaway, tungod ka sila anaa sa mga kamot sa Ginoo.
Ang atong mga pagsulay makaandam kanato sa pagdawat sa himaya sa Dios alang kanato.
Kon atong ipaubos ang atong mga kaugalingon ug motawag sa Dios, nan ang Espiritu molamdag kanato.
Kon kita magmatinud-anon sa pagsunod sa tanang mga pulong nga gihatag sa Ginoo kanato, usa ka adlaw makita nato ang Iyang himaya.
Ang Ginoo mohatag kanato sa Iyang pulong pinaagi sa Iyang mga propeta.
Ang Ginoo makatubos kanato gikan sa atong mga kaaway.
Sa unsang paagi kaha nga kining mga baruganan nakatabang sa mga Santos aron magpabilin nga matinud-anon?
Sa unsang paagi nga kining mga baruganan makatabang kanato nga magpabilin nga matinud-anon atol sa kaugalingon natong lisud nga mga kasinatian?
Dapita ang mga estudyante sa pagribyu sa daklit sa mga baruganan diha sa pisara. Hangyoa sila sa pagkonsiderar sa kinatibuk-an nga mensahe nga sa ilang hunahuna nakat-unan sa mga Santos. Hangyoa ang mga estudyante sa pag-report sa ilang mga tubag. Mahimong motino ang mga estudyante og lain-laing mga mensahe, apan tabangi sila nga makasabut nga ang Ginoo naghatag og kasiguroan sa mga Santos nga ang mga butang mamaayo ra.
Dapita ang usa ka estudyante sa pagbasa og kusog sa Doktrina ug mga Pakigsaad 136:41–42. Hangyoa ang klase sa pagsunod, nga mangita og dugang nga pasalig ug tambag gikan sa Ginoo.
Sa unsa kaha nga paagi nga ang mensahe sa Ginoo sa bersikulo 41 masaligan sa mga Santos?
Unsa ang atong makat-unan gikan sa sugo sa Ginoo nga narekord sa bersikulo 42? (Human makatubag ang mga estudyante, isulat ang mosunod nga baruganan diha sa pisara: Kon kita makugihon sa pagsunod sa kasugoan sa Ginoo, nan ang paghukom sa Ginoo dili moabut kanato, ang atong pagtuo mahimong lig-on, ug ang atong mga kaaway dili magmadaugon batok kanato.)
Sa unsang paagi kaha nga kining mga baruganan nakatabang sa mga Santos sa ilang biyahe? Sa unsang paagi kini makatabang kanato?
Ipasabut nga ang mga Santos misunod sa mga gisugo sa Ginoo. Ang unang grupo sa mga pioneer mibiya sa Winter Quarters niadtong Abril 5, 1847. Mibiyahe sila og sobra sa 1,600 ka kilometros ug miabut sa Walog sa Salt Lake niadtong ulahing bahin sa Hulyo 1847. Niadtong Hulyo 24, 1847, si Presidente Brigham Young misulod sa walog ug nakadawat og kumpirmasyon nga nakaplagan na sa mga Santos ang bag-o nilang kapuy-an. Nagsakay siya diha sa luyo sa karwahe ni Wilford Woodruff nianang higayuna tungod kay gihilantan siya.
Dapita ang usa ka estudyante sa pagbasa og kusog sa istorya ni Presidente Wilford Woodruff bahin ni Brigham Young nga naglantaw sa Walog sa Salt Lake:
Imahe
President Wilford Woodruff
“Sa dihang migawas mi … nga makita ang tibuok talan-awon sa walog, akong gipaatubang ang kilid sa akong karwahe, ngadto sa kasadpan, ug si Presidente Young mibarug ug milantaw og maayo sa palibot. Samtang nagtan-aw sa palibot diha sa among atubangan, giliminan siya sa panan-awon sa pipila ka minuto. Nakita na niya sa una ang walog diha sa panan-awon, ug karong higayuna nakita niya ang umaabut nga himaya sa Zion ug sa Israel. … Sa dihang ang panan-awon milabay na, miingon siya ‘Husto na kini. Kini mao ang hustong dapit. Padayon’” (Mga Pagtulun-an sa mga Presidente sa Simbahan: Wilford Woodruff [2004], 161–62).
Nganong importante man alang kang Brigham Young ug sa mga Santos ang pagdawat og kumpirmasyon nga ang Walog sa Salt Lake mao ang hustong dapit nga puy-an?
Tapusa pinaagi sa pagdapit sa mga estudyante sa pagpaningkamot sa pagtuman sa tanang kasugoan ug maminaw sa pasalig sa Ginoo sa ilang mga kinabuhi.
Pipila sa mga Santos nga pioneer migamit og mga butang nga gidili sa Pulong sa Kaalam, sama sa ilimnong makahubog ug tabako. Ang Ginoo sa sinugdanan wala naghatag sa Pulong sa Kaalam ngadto sa mga Santos isip usa ka sugo (tan-awa sa D&P 89:2). Si Presidente Joseph F. Smith mipasabut:
Imahe
Presidente Joseph F. Smith
“Kon gihatag pa [ang Pulong sa Kaalam] isip usa ka sugo mapaubos unta sa panghimaraut ang matag tawo, nga nag-umon sa paggamit sa makadaut nga mga butang; busa ang Ginoo maloloy-on ug mihatag kanila og kahigayunan sa pagbuntog, sa dili pa Niya ipaubos sila sa balaod” (sa Conference Report, Okt. 1913, 14).
Uban niini nga kasayuran, kinahanglan kitang mag-amping nga dili mohukom sa pipila sa nag-unang mga lider ug mga miyembro sa Simbahan kinsa migamit og mga butang nga gidili diha sa Pulong sa Kaalam. Sa unang bahin sa tibuok kasaysayan sa Simbahan, ang mga lider midapit sa mga Santos nga mas hingpit nga mosunod sa Pulong sa Kaalam. Sa kinatibuk-ang komperensya niadtong Septyembre 1851, si Brigham Young nanawagan sa mga miyembro nga normal nga mopakigsaad sa pagbiya gikan sa tsa, kape, tabako, whiskey, ug “tanang mga butang nga nahisgutan diha sa Pulong sa Kaalam” (tan-awa sa “Minutes of the General Conference,” Millenial Star, Peb. 1, 1852, 35). Niadtong 1919, ang Unang Kapangulohan, ubos ni Presidente Heber J. Grant, gihimong kinahanglanon ang pagsunod sa Pulong sa Kaalam sa pagdawat og usa ka temple recommend (tan-awa sa James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 5:163). Ang Pulong sa Kaalam nagpadayon nga nahimong importanting sugo karon, ug ang pagsunod niini gikinahanglan alang sa bunyag, pagtambong sa templo, misyonaryo nga pagserbisyo, ug ubang takus nga pagserbisyo diha sa Simbahan.
Samtang si Presidente Brigham Young anaa sa Winter Quarters, si Joseph Smith mipakita ngadto kaniya sa damgo ug miingon:
Imahe
President Brigham Young
“Sultihi ang mga tawo nga magpaubos ug magmatinud-anon, ug magsiguro sa pagbaton sa Espiritu sa Ginoo ug kini mogiya kanila sa matarung. Pag-amping ug dili mobaliwala sa hinay ligdong nga tingog; motudlo kini kaninyo unsay inyong buhaton ug asa paingon; makahatag kini sa mga bunga sa gingharian. Sultihi ang mga kaigsoonan sa pag-abli sa ilang mga kasingkasing sa pagtuo, aron nga kon ang Espiritu Santo moabut nganha kanila, ang ilang mga kasingkasing maandam sa pagdawat niini. Ilang mailhan ang Espiritu sa Ginoo gikan sa lain nga ubang mga espiritu; mohunghong kini og kalinaw ug kalipay sa ilang mga kalag; ug kini mokuha sa malisya, kasilag, panagbangi ug sa tanang dautan gikan sa ilang mga kasingkasing; ug ang ilang tibuok tinguha mao ang pagbuhat og maayo, mopahinabo sa pagkamatarung, ug molig-on sa gingharian sa Dios. Sultihi ang mga kaigsoonan nga kon sila mosunod sa Espiritu sa Ginoo sila mahimong husto. Siguroa sa pagsulti ang mga tawo sa paghupot sa Espiritu sa Ginoo; ug kon gusto nila, ilang masuta sa ilang kaugalingon sama nga sila giorganisar sa atong Amahan sa Langit sa wala pa sila mianhi sa kalibutan. …
“Sultihi ang mga tawo nga mosiguro sa paghupot sa Espiritu sa Ginoo ug mosunod niini, ug kini mogiya kanila sa husto” (sa Manuscript History of Brigham Young, 1846–1847, comp. Elden J. Watson [1971], 529–30).
Sa laing okasyon, sa wala pa mobiya ang mga Santos sa Nauvoo, si Propeta Joseph Smith mipakita diha sa usa ka panan-awon ngadto kang Presidente Young ug mipakita kaniya kon asa tukuron ang usa ka komunidad sa Walog sa Salt Lake. Si Presidente George A. Smith sa Korum sa Napulog Duha ka mga Apostoles nahinumdom:
Imahe
President George Albert Smith
“[Nakakita siya] og usa ka panan-awon ni Joseph Smith, kinsa mipakita kaniya sa bukid nga gitawag nato karon og Ensign Peak, sa amihanan gayud sa Siyudad sa Salt Lake, ug anaa didto nahimutang kana nga bandila, ug si Joseph miingon ‘Tukura ang siyudad ubos niana diin ang bandila mahimutang ug mouswag kamo ug makabaton ug kalinaw’” (“Historical Discourse,” Deseret News, Hun. 30, 1869, 248).