Doktrina ug mga Pakigsaad 111

Pasiuna

Niadtong 1836 ang Simbahan dako kaayo og utang. Si Propeta Joseph Smith ug ang ubang mga lider sa Simbahan mibiyahe ngadto sa Salem, Massachusetts, diin naglaum sila nga makakita og kwarta nga ibayad sa mga utang sa Simbahan. Niadtong Agosto 6, 1836, nakadawat si Joseph Smith og pagpadayag nga narekord sa Doktrina ug mga Pakigsaad 111, diin ang Ginoo misiguro kaniya mahitungod sa kabalaka kabahin sa utang ug sa kaayohan sa Zion. Ang Ginoo mihatag usab og instruksyon sa Propeta kalabut sa pagpabilin sa mga lider sa Simbahan diha sa Salem.

Mga Sugyot alang sa Pagtudlo

Doktrina ug mga Pakigsaad 111

Ang Ginoo mihatag og inusab nga pasalig ug instruksyon alang kang Joseph Smith ug sa ubang mga lider sa Simbahan

Sugdi ang klase pinaagi sa paghangyo sa mga estudyante sa pagsulat og tubag sa mosunod nga pangutana diha sa ilang mga notebook sa klase o mga scripture study journal:

Unsa ang pipila ka mga butang nga makahatag og stress o kabalaka sa inyong kinabuhi?

Mahimo nimong hangyoon ang pipila ka mga estudyante sa pagpakigbahin sa ilang mga hunahuna uban sa klase. (Pahinumdumi ang mga estudyante nga pipila ka mga hunahuna ug mga kasinatian personal ra kaayo nga ipakigbahin.)

Ipasabut nga sa summer niadtong 1836, si Joseph Smith ug ang ubang mga lider sa Simbahan nakasinati og kabalaka sa panalapi sa Simbahan. Sa nangaging katuigan, ang Simbahan nakautang og dako sa dihang ang mga lider sa Simbahan misunod sa mga sugo sa Ginoo sa pagtukod sa Templo sa Kirtland, pagpalit og mga yuta sa Ohio ug sa Missouri, ug paggahin og pundo sa Kampo sa Zion. Ang Simbahan nagkinahanglan usab og pundo sa pagpalit og yuta alang sa mga Santos sa Missouri kinsa gipugos sa pagbiya sa ilang mga panimalay. Niadtong 1834, ang Ginoo misugo ni Joseph Smith ug sa ubang mga lider sa Simbahan sa “pagbayad sa tanan [nilang] mga utang” (D&P 104:78). Hinoon, ang ilang mga paningkamot sa pagbayad sa ilang mga utang nabalda tungod sa pagkawala sa mga negosyo didto sa Missouri. Sa ingon, ang mga lider sa Simbahan walay igong pundo nga ikabayad sa mga tigpautang sa Simbahan.

Dapita ang usa ka estudyante sa pagbasa og kusog sa Doktrina ug mga Pakigsaad 104:80. Hangyoa ang klase sa pagsunod, nga mangita kon unsay gisaad sa Ginoo nga buhaton aron matabangan ang mga lider sa Simbahan sa ilang mga problema sa utang. Dapita ang mga estudyante sa pagreport sa ilang nadiskubrihan.

Ipasabut nga niadtong 1836, usa ka miyembro sa Simbahan nga ginganlan og William Burgess miabut sa Kirtland, Ohio, ug misulti sa mga lider sa Simbahan mahitungod sa dakong kantidad sa kwarta nga anaa sa Salem, Massachusetts. Miingon siya nga ang kwarta nahimutang sa silong sa usa ka balay ug nga siya lamang ang buhi nga tawo ang nakahibalo mahitungod sa nahimutangan sa kwarta.

Pahibaloa ang mga estudyante nga sila si Joseph Smith, Sidney Rigdon, Oliver Cowdery, ug Hyrum Smith mibiya sa Kirtland niadtong Hulyo 25, 1836, aron makigkita sa mga tigpautang sa Simbahan didto sa New York. Human sa pipila ka adlaw didto sa New York, ang grupo mibiyahe ngadto sa Salem. Si Brother Burgess misugat nila didto, apan miingon siya nga dako na kaayo og kausaban ang siyudad sukad sa iyang katapusang pag-anha nga wala na siya makatultol sa balay nga gibutangan sa kwarta. Mibiya si Brother Burgess sa wala madugay.

Imahe

map, northeastern U.S.

Unsa kaha sa inyong hunahuna ang inyong bation human makabiyahe ngadto sa Salem sa panghinaut nga makakita og mga paagi sa pagtabang sa pagbayad sa utang sa Simbahan ug dayon wala diay? Unsa kaha ang inyong buhaton?

Ipasabut nga ang mga lider sa Simbahan migahin og panahon sa pagpangita sa balay nga gikareport nga dunay kwarta. Niadtong Agosto 6, 1836, samtang didto pa sila sa Salem, si Joseph Smith nakadawat sa pagpadayag nga narekord sa Doktrina ug mga Pakigsaad 111.

Dapita ang usa ka estudyante sa pagbasa og kusog sa Doktrina ug mga Pakigsaad 111:1. Hangyoa ang klase sa pagsunod, nga mangita kon unsa ang gibati sa Ginoo mahitungod sa biyahe niini nga mga kaigsoonan. Hangyoa ang mga estudyante sa pagreport unsay ilang nakit-an.

Unsay anaa sa biyahe ngadto sa Salem nga gikonsiderar nga walay hinungdan?

Pahibaloa ang mga estudyante nga bisan ang pagpangita og kwarta didto sa Salem wala magmalampuson, ang Ginoo misulti nga kini nga biyahe makabenepisyo gihapon ang Iyang gingharian. Dapita ang usa ka estudyante sa pagbasa og kusog sa Doktrina ug mga Pakigsaad 111:2. Hangyoa ang klase sa pagpangita unsay gisulti sa Ginoo nga Siya adunay butang diha sa siyudad sa Salem.

Unsay gisutli sa Ginoo nga Siya adunay butang diha sa Salem? (Daghang bahandi ug daghang mga tawo.)
Kanus-a misulti ang Ginoo nga Iyang pundukon ang Iyang katawhan diha sa Salem? (Sa tukma nga panahon.)

Pahibaloa ang mga estudyante nga si Joseph Smith ug kadtong uban niya migahin og pipila ka semana didto sa Salem, ug sila misangyaw sa ebanghelyo samtang didto pa sila. Lima ka tuig ang milabay, si Erastus Snow gitawag og misyon ngadto sa Salem, diin giorganisar niya ang usa ka branch sa 120 ka mga miyembro (tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 170–71).

Unsay atong makat-unan gikan sa kasinatian ni Joseph Smith didto sa Salem ug sa mga pagtulun-an sa Ginoo sa Doktrina ug mga Pakigsaad 111:1–2? (Ang mga estudyante mahimong mohatag og lain-laing maayong mga tubag. Isip kabahin sa ilang panaghisgutan, isulat ang mosunod nga baruganan diha sa pisara: Ang Ginoo makahatag og kaayohan gikan sa atong sinsero nga mga paningkamot.
Sa unsang paagi ang Ginoo makahatag og kaayohan gikan sa atong mga paningkamot, bisan sa una wala sila magiyahi? (Usa ka posibling tubag mao nga Siya makatabang nato nga makat-on gikan sa atong mga kasinatian.)
Sa unsang paagi kini makaimpluwensya kaninyo nga mahibalo nga ang Ginoo makahatag og kaayohan gikan sa inyong sinsero nga mga paningkamot?

Ipasabut nga ang Ginoo mohatag og mga instruksyon ngadto ni Joseph Smith ug sa iyang mga kompanyon aron matabangan sila nga makabuhat og maayo samtang diha pa sila sa Salem. Dapita ang usa ka estudyante sa pagbasa og kusog sa Doktrina ug mga Pakigsaad 111:5–8. Hangyoa ang klase sa pagsunod, nga mangita unsay gusto sa Ginoo nga buhaton ni Joseph Smith ug sa iyang mga kompanyon.

Giunsa sa Ginoo paghupay sila si Joseph Smith ug ang iyang mga kompanyon kabahin sa mga utang sa Simbahan ug sa kahimtang sa Zion?
Sumala sa bersikulo 8, sa unsa nga paagi nga si Joseph Smith ug ang ubang mga lider sa Simbahan nakahibalo asa moistar sa nahibiling mga adlaw sa ilang pagbisita sa Salem?
Unsa nga kamatuoran ang atong makat-unan gikan sa mga instruksyon sa Ginoo sa bersikulo 8? (Human makatubag ang mga estudyante, isulat ang mosunod nga baruganan diha sa pisara: Makadawat kita og direksyon sa Ginoo pinaagi sa kalinaw ug gahum sa Iyang Espiritu.)
Sa unsang paagi kini nga baruganan makatabang ninyo sa pag-atubang og mga kabalaka ug mga hagit?

Dapita ang mga estudyante sa pagbasa sa hilum sa Doktrina ug mga Pakigsaad 111:9–10 ug mangita sa dugang nga buluhaton nga gisugo sa Ginoo ni Joseph Smith ug sa iyang mga kompanyon nga tiwason samtang anaa pa sila sa Salem. Hangyoa ang mga estudyante nga moreport unsay ilang nakat-unan.

Pahibaloa ang mga estudyante nga si Joseph Smith ug ang ubang mga lalaki misunod sa tambag sa Ginoo sa “pagpakisayud mahitungod sa labing karaan nga mga lumulupyo ug mga magtutukod [niini] nga dakbayan” (D&P 111:9). Gibisitahan nila ang mga lugar sa kasaysayan samtang diha pa sila sa Salem. Gikan niini nga mga pagbisita nahibaloan nila nga ang pipila ka mga residente sa Salem, Massachusetts, ug sa naglibut nga dapit sa New England gigukod ug gipamatay tungod sa pagkapanatik sa relihiyon. (Tan-awa sa History of the Church 2:464–65.) Kini nga mga hitabo maoy nag-aghat ni Joseph Smith sa pagsulat sa iyang kasaysayan, “Kanus-a mohunong ang tawo sa pagpakiggubat, ug moilog [o mokuha] gikan kaniya sa iyang sagrado nga mga katungod sa pagsimba sa iyang Dios sumala sa gidiktar sa iyang tanlag?” (sa History of the Church, 2:4,65). Unya, ang Propeta misubli sa kaimportante sa pagtugot sa tanang mga tawo sa paggamit sa ilang katungod sa relihiyoso nga kagawasan (tan-awa sa Mga Artikulo sa Hugot nga Pagtuo 1:11). Bisan og si Joseph Smith ug ang iyang mga kompanyon wala makakuha og kwarta nga sa ilang pagtuo ilang makita sa Salem, nakaangkon sila og laing bahandi gikan niini nga biyahe, lakip na sa mga bahandi sa kahibalo.

Hangyoa ang usa ka estudyante sa pagbasa og kusog sa Doktrina ug mga Pakigsaad 111:11. Hangyoa ang klase sa pagsunod, nga mangita sa panapos nga tambag sa Ginoo niini nga pagpadayag. Ipasabut nga ang pulong mohan-ay sumala sa paggamit sa bersikulo 11 nagpasabut nga tarungon.

Unsaon ninyo sa pagsulti pag-usab sa tambag sa Ginoo sa bersikulo 11? (Bisan og ang mga estudyante mogamit og laing mga pulong, siguroha nga nakasabut sila sa mosunod nga baruganan: Kon kita magmaalamon ug maglikay sa sala, nan ang Ginoo mohan-ay sa tanan nga mga butang alang sa atong kaayohan. Mahimo nimong ipasabut nga bisan ang matarung nga mga tawo makasinati og mga pagsulay, ang Ginoo “makahan-ay [niining] mga butang alang sa [ilang] kaayohan.”)
Unsa ang pipila ka maalamon nga mga pagpili ang atong mahimo? (Mahimong mosugyot ang mga estudyante og lain-laing mga tubag, lakip sa pagpaningkamot sa pagsunod sa mga sugo.)
Unsa sa inyong hunahuna ang ipasabut nga ang Ginoo “mohan-ay sa tanan nga mga butang alang sa [atong] kaayohan”?
Kanus-a kamo nakakita og ehemplo niini nga baruganan?

Dapita ang mga estudyante sa pagribyu sa ilang gisulat nga mga tubag sa pangutana nga imong gipangutana sa sinugdanan sa klase. Hangyoa sila sa pagkonsiderar unsay ilang nakat-unan gikan sa ilang pagtuon sa Doktrina ug mga Pakigsaad 111 nga makatabang nila sa mga hagit nga ilang giatubang. Dapita sila sa pagrekord sa ilang mga hunahuna diha sa ilang mga notebook sa klase o scripture study journal.

Tapusa pinaagi sa pagpakigbahin sa imong pagpamatuod sa mga baruganan nga inyong nahisgutan. Awhaga ang mga estudyante sa pagsunod niini nga mga baruganan.

Komentaryo ug Background nga Impormasyon

Doktrina ug mga Pakigsaad D&P 111:9. “Kini nga dapit inyong maangkon pinaagi sa pag-abang”

Human si Joseph Smith ug ang iyang mga kompanyon miabut didto sa Salem, Massachusetts, nangabang sila og balay. Dili kini mao ang balay nga dunay kwarta sa silong. Kini ang balay nga giabangan nga maoy gipasabut sa Ginoo sa dihang miingon Siya, “Kini nga dapit inyong maangkon pinaagi sa pag-abang” (D&P 111:9).