Niadtong Enero 21, 1836, si Propeta Joseph Smith nakigmiting didto sa kwarto sa taas sa hapit na mahuman nga Templo sa Kirtland uban sa iyang mga magtatambag sa Unang Kapangulohan, sa mga bishopric gikan sa Kirtland ug Missouri, sa iyang amahan, ug sa iyang tigsulat. Kini nga mga lalaki nagpundok alang sa pagpangalagad sa mga ordinansa agig pagpangandam sa pagpahinungod sa templo. Niini nga okasyon nakakita ang Propeta og panan-awon sa celestial nga gingharian ug nakadungog sa Ginoo nga mipahayag kon unsaon Niya sa paghukom kadtong nangamatay nga wala makahibalo sa ebanghelyo. Si Warren Parrish, ang tigsulat ni Joseph Smith, mirekord sa panan-awon diha sa journal sa Propeta. Kabahin sa rekord sa panan-awon gilakip sa wala madugay diha sa Doktrina ug mga Pakigsaad isip seksyon 137.
Nakakita si Joseph Smith og usa ka panan-awon sa celestial nga gingharian
Hangyoa ang mga estudyante sa pagpamalandong sa mosunod nga mga pangutana. (Mahimo nimong dapiton sila sa pagsulat sa ilang mga tubag diha sa ilang mga class notebook o mga scripture study journal.)
Kinsa ang pipila sa labing importante nga mga tawo sa inyong kinabuhi? Nganong importante man sila kaninyo?
Human ang mga estudyante dunay panahon sa pagpamalandong, dapita ang pipila sa pagpakigbahin sa ilang mga tubag diha sa klase.
Nganong importante kaninyo nga makahibalo nga ang mga tawo nga inyong gihigugma dunay oportunidad nga makapuyo sa celestial nga gingharian?
Ipasabut nga ang Doktrina ug mga Pakigsaad 137 naglakip sa deskripsyon sa usa ka panan-awon ni Joseph Smith diin iyang nakita ang celestial nga gingharian. Niini nga deskripsyon, gihinganlan niya ang pipila sa mga tawo nga iyang nakita didto. Dapita ang mga estudyante sa pagbasa sa seksyon sa pasiuna sa Doktrina ug mga Pakigsaad 137 aron mahibaloan ang background sa kasaysayan niini nga pagpadayag.
Dapita ang usa ka estudyante sa pagbasa og kusog sa Doktrina ug mga Pakigsaad 137:1–4. Hangyoa ang klase sa pagsunod ug pag-ila sa mga pulong nga naghulagway sa celestial nga gingharian. Hangyoa ang mga estudyante sa pagreport unsay ilang nakit-an.
Dapita ang usa ka estudyante sa pagbasa og kusog sa Doktrina ug mga Pakigsaad 137:5–6. Hangyoa ang klase sa pagsunod ug pag-ila kinsa ang nakita ni Jospeh Smith didto sa celestial nga gingharian.
Kinsa ang nakita ni Joseph Smith didto sa celestial nga gingharian? (Langitnong Amahan, Jesukristo, Adan, Abraham, inahan ug amahan ni Joseph, ug ang igsoon ni Joseph nga si Alvin. Tingali makatabang sa pagpasabut nga ang amahan ug inahan ni Joseph buhi pa niining higayuna, gani, ang iyang amahan diha sa kwarto uban kaniya panahon niini nga panan-awon. Kini nagpakita nga kini nga panan-awon dili alang niadtong atua na sa celestial nga gingharian apan niadtong kinsa sa katapusan makaadto didto.)
Sumala sa bersikulo 6, ngano nga si Joseph natingala sa dihang iyang nakita nga ang iyang igsoong lalaki nga si Alvin makaadto sa celestial nga ginaharian?
Aron matabangan ang mga estudyante nga mas masabtan nganong kini nga kasinatian makahuluganon kaayo ngadto ni Joseph Smith, dapita ang usa ka estudyante sa pagbasa sa mosunod nga pamahayag:
Gihigugma ug gidayeg ni Joseph Smith ang iyang magulang nga igsoong lalaki, si Alvin. Gihigugma usab ni Alvin si Joseph, ug gisuportahan niya si Joseph sa iyang pagpangandam sa pagdawat sa bulawan nga mga palid gikan ni anghel Moroni. Niadtong Nobyembre 1823, sa dihang si Alvin nag-edad og 25 anyos ug si Joseph 17, kalit nga grabeng nasakit si Alvin. Sa dihang migrabe ang iyang kondisyon ug klaro nga mamatay na siya sa dili madugay, gitambagan niya si Joseph: “Ako buot nga ikaw magbinuotan, ug mohimo sa tanang butang nga nag-agad sa imong gahum sa pagkuha sa talaan. Pagmatinud-anon sa pagdawat og mga panudlo ug sa paghupot sa tanang sugo nga gihatag kanimo” (kinutlo sa Mga Pagtulun-an sa mga Presidente sa Simbahan: Joseph Smith [2007], 401; tan-awa sa usa sa Church History in the Fulness of Times Student Manual, 2nd ed. [manwal sa Church Educational System, 2003], 41–42).
Ang kamatayon ni Alvin nakahatag og dakong kasubo sa pamilyang Smith. Usa ka ministro sa Presbyterian sa Palmyra, New York, mipahigayon sa haya ni Alvin. “Tungod kay si Alvin wala man mahimong sakop sa kongregasyon sa ministro, ang pari nangusog sa iyang sermon nga si Alvin dili maluwas. Si William Smith, ang manghod nga lalaki ni Joseph, nahinumdom: “[Ang ministro] … mipasabot og maayo nga [si Alvin] maadto sa impyerno, tungod kay si Alvin dili man miyembro sa simbahan, apan siya usa ka buotan nga bata ug ang akong amahan wala makagusto niini.’” (kinutlo sa Mga Pagtulun-an sa mga Presidente sa Simbahan: Joseph Smith, 401, 403).
Imahe
Alvin Smith gravestone
Lapida nagtimaan sa lubnganan ni Alvin Smith, ang kinamagulangan nga igsoong lalaki ni Propeta Joseph Smith.
Dapita ang mga estudyante sa paghunahuna mahitungod sa mga pagbati ni Joseph sa dihang iyang nakita si Alvin sa celestial nga gingharian.
Ang Ginoo mipadayag unsaon Niya sa paghukom ang mga tawo nga namatay nga wala makahibalo sa ebanghelyo
Isulat diha sa pisara ang mosunod nga pangutana: Ngano nga si Alvin nakasulod sa celestial nga gingharian bisan og wala siya mabunyagi panahon sa iyang kinabuhi?
Dapita ang usa ka estudyante sa pagbasa og kusog sa Doktrina ug mga Pakigsaad 137:7–8. Hangyoa ang klase sa pagsunod ug sa pag-ila sa kamatuoran nga makatabang sa pagtubag sa pangutana diha sa pisara.
Unsa nga kamatuoran ang gipadayag sa Ginoo ngadto ni Joseph Smith nga nakatubag sa pangutana nga anaa sa pisara? (Ang mga estudyante kinahanglang moila sa mosunod nga kamatuoran: Ang tanang mga tawo nga nangamatay nga wala makahibalo sa ebanghelyo, nga modawat unta niini, makapanunod sa celestial nga gingharian.)
Sa unsa kaha nga paagi kini nga kamatuoran makahupay niadtong adunay mga minahal nga nangamatay nga wala makahibalo sa ebanghelyo?
Itudlo nga ang Ginoo mipadayag sa kamatuoran diha sa Doktrina ug mga Pakigsaad 137:7–8 sa wala pa Niya gipadayag ang baruganan sa bunyag alang sa mga patay. Ang mga estudyante magtuon sa mga pagpadayag bahin sa bunyag alang sa mga patay sa umaabut nga mga leksyon.
Dapita ang usa ka estudyante sa pagbasa og kusog sa Doktrina ug mga Pakigsaad 137:9, ug hangyoa ang klase sa pag-ila unsay gitudlo sa Ginoo mahitungod sa paagi sa Iyang paghukom sa tanang mga tawo.
Sumala sa bersikulo 9, sa unsa nga paagi kita pagahukman sa Ginoo? (Ang mga estudyante mahimong mogamit og lain-laing mga pulong, apan ang ilang mga tubag kinahanglan magpakita sa mosunod nga baruganan: Ang Ginoo mohukom nato pinaagi sa atong binuhatan ug sa mga tinguha sa atong mga kasingkasing. Isulat sa pisara kini nga baruganan.)
Ngano sa inyong hunahuna nga ang atong mga tinguha ug ang atong mga binuhatan importante?
Basaha og kusog ang mosunod nga mga ehemplo. Human sa matag ehemplo, hangyoa ang mga estudyante sa pagtubag niini nga pangutana:
Sa unsa nga paagi kini nga ehemplo naghulagway sa kaimportante sa atong mga tinguha ug sa atong mga binuhatan?
Usa ka miyembro sa Simbahan adunay matarung nga tinguha nga maminyo sa templo. Human sa tibuok kinabuhi nga matinud-anong pagserbisyo sa Simbahan, kini nga miyembro namatay nga walay oportunidad nga mabugkos ngadto sa usa ka kapikas didto sa templo.
Usa ka batan-ong lalaki nagtuman gayud sa iyang mga pakigsaad sa bunyag ug nagpahigayon sa iyang mga katungdanan sa Aaronic Priesthood. Aduna siyay dakong tinguha sa pagserbisyo og full-time nga misyon apan dili makahimo tungod sa pisikal nga kakulangan.
Usa ka batan-ong babaye adunay pagdumot batok sa laing batan-ong babaye. Nagpakaaron-ingnon siya nga mahigalaon apan sa sekreto naglaum nga dunay mahitabo nga dautan sa laing batan-ong babaye.
Usa ka batan-ong lalaki naghunahuna og law-ay nga mga hunahuna, ug wala siya mangayo og tabang sa Ginoo nga mausab ang iyang dili maayo nga mga hunahuna ug mga pagbati.
Isip kabahin niini nga panaghisgutan, mahimo nimong basahon ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Nakasiguro ba kita nga walay sala ubos sa balaod sa Dios kon kita naglikay sa dautan nga mga buhat? Unsa kon kita mitagad og dautan nga mga hunahuna ug mga tinguha?
“Ang mga pagbati ba sa kasilag dili mamatikdan sa adlaw sa paghukom? Ang kahakog? Ang kasina? …
“Ang atong mga tubag sa maong mga pangutana maghulagway unsay tawagon nato nga dili maayo nga mga balita, nga kita makasala nga walay mga nabuhat, sa ato lamang nga mga pagbati ug mga tinguha sa atong mga kasingkasing.
“Adunay maayong balita usab. Ubos sa balaod sa Dios, mahatagan kita og ganti alang sa pagkamatarung bisan og dili mahimo ang buhat nga sa kasagaran may kalabutan sa maong mga panalangin.
“Kon adunay gusto nga mohimo og butang alang sa akong ugangan nga lalaki apan napugngan sa mga sirkumstansya, moingon siya, ‘Salamat. Dawaton nako ang maayong intensyon alang sa maayong buhat.’ Sa samang paagi, nagtuo ko nga ang atong Langitnong Amahan modawat sa tinuod nga mga tinguha sa atong mga kasingkasing isip puli alang sa mga aksyon nga imposible kaayo” (“The Desires of Our Hearts,” Ensign, Hunyo 1986, 66).
Sa unsa nga paagi kini nakaimpluwensya kaninyo nga kamo pagahukman pinaagi sa inyong mga binuhatan ug sa mga tinguha sa inyong mga kasingkasing?
Dapita ang usa ka estudyante sa pagbasa og kusog sa Doktrina ug mga Pakigsaad 137:10, ug hangyoa ang klase sa pagpangita sa laing kamatuoran nga gitudlo sa Ginoo mahitungod niadtong kinsa makapanunod sa celestial nga gingharian.
Sumala sa bersikulo 10, kinsa ang maluwas didto sa celestial nga gingharian? (Ang mga estudyante kinahanglang mopadayag sa mosunod nga doktrina: Ang tanang mga bata nga namatay sa wala pa mahimong may tulubagon maluwas didto sa celetial nga gingharian.)
Pahibaloa ang mga estudyante nga sa dihang nakadawat si Joseph Smith niini nga pagpadayag, siya ug si Emma namatyan og upat sa ilang mga anak, lakip sa sinagop nga bata. Unya, duha pa sa ilang mga anak namatay usab nga masuso pa.
Imahe
infant Alvin Smith gravestone
Lapida nagtimaan sa lubnganan ni Alvin Smith, ang masusong anak nila ni Joseph ug Emma Smith.
Dapita ang mga estudyante sa paghunahuna mahitungod sa unsa nga paagi nga ang gipadayag nga kamatuoran sa bersikulo 10 makahatag og kahupayan ngadto sa mga pamilya nga naguol sa kamatayon sa usa ka bata. Ikonsiderar ang paghatag kanila og panahon sa pagpamalandong sa mga kasinatian nga ilang nasinati o nasinati sa mga sakop sa pamilya sa dihang nakahatag og kahupayan kini nga kamatuoran.
Unsay inyong nakat-unan gikan sa Doktrina ug mga Pakigsaad 137 mahitungod sa mga paningkamot sa Ginoo sa paghatag sa tanang tawo sa oportunidad nga makapuyo didto sa celestial nga gingharian?
Pagpamatuod sa mga kamatuoran nga inyong nahisgutan karon. Mahimo usab nimong hatagan ang mga estudyante og oportunidad sa pagpakigbahin sa ilang mga pagpamatuod.
Si Elder Dallin H. Oaks sa Korum sa Napulog Duha ka mga Apostoles mipasidaan batok sa sayop nga pagsabut sa Doktrina ug mga Pakigsaad 137:9:
Imahe
Elder Dallin H. Oaks
“Una, kinahanglang hinumduman nato nga ang tinguha puli lamang kon imposible ang pagbuhat. Kon mosulay kita sa paggamit sa pagkaimposible sa aksyon aron sa pagtago sa atong kakulang sa tinuod nga tinguha ug unya dili mobuhat sa tanan nga atong mahimo sa paghimo sa buluhaton nga gisugo, giilad lang nato ang atong kaugalingon, apan dili kita makailad sa Matarung nga Maghuhukom.
“Aron mahimong puli sa buhat, ang tinguha dili mahimong artipisyal, madali-dalion, o temporaryo. Kinahanglan nga kinasingkasing, tinud-anay gayud. Aron mahimong epektibo alang sa mga panalangin, ang mga tinguha sa atong mga kasingkasing kinahanglan gayud nga tinud-anay nga mahimong tawagon nga diosnon.
“Ikaduha, kinahanglang dili nato sabton nga ang mga tinguha sa atong mga kasingkasing mahimong ikapuli alang sa usa ka ordinansa sa ebanghelyo. Ikonsiderar ang mga pulong sa Ginoo sa pagsugo sa duha ka mga ordinansa sa ebanghelyo: ‘Sa pagkatinuod, sa pagkatinuod, magaingon ako kanimo, gawas kon ang tawo igaanak sa tubig ug sa Espiritu, dili siya makasulod sa gingharian sa Dios.’ (Juan 3:5.) Ug bahin sa tulo ka ang-ang sa celestial nga himaya, ang moderno nga pagpadayag namahayag, ‘Aron makabaton sa labing taas, ang tawo kinahanglan mosulod ngadto niini nga kapunongan sa pagkapari [ang gipasabut mao ang bag-o ug walay katapusan nga pakigsaad sa kaminyoon].’ (D&P 131:2.) Walay eksepsyon ang gipasabot dinhi niini nga mga sugo o gitugutan bisan asa sa mga kasulatan.
“Sa hustisya ug kalooy sa Dios, kining estrikto nga mga sugo kalabut sa importante nga mga ordinansa gibalanse sa balaan nga pagtugot sa pagpahigayon niadtong mga ordinansa pinaagi sa proxy alang niadtong kinsa wala mahatagi niini nga kinabuhi. Sa ingon, ang usa ka tawo sa kalibutan sa espiritu kinsa nagtinguha mahimong makaangkon sa pag-apil sa ordinansa sama og personal siyang naghimo niini. Niining paagiha, pinaagi sa mahigugmaong pagserbisyo sa buhing mga proxy, ang mibiya na nga mga espiritu magantihan usab tungod sa mga tinguha sa ilang mga kasingkasing” (“The Desires of Our Hearts,” Ensign, Hunyo 1986, 67).
Si Elder Shayne M. Bowen sa Seventy miistorya og kasinatian nga naghulagway sa gahum sa kamatuoran nga gitudlo sa Doktrina ug mga Pakigsaad 137:10:
Imahe
Elder Shayne M. Bowen
“Samtang nagserbisyo isip batan-ong mga misyonaryo sa Chile, ang akong kauban ug ako nakahimamat og pamilya nga dunay pito ka sakop diha sa branch. Ang inahan magtambongan kada semana uban sa iyang mga anak. Sa hunahuna namo dugay na silang mga miyembro sa Simbahan. Human sa pipila ka semana among nahibaloan nga wala pa sila mabunyagi.
“Dali namong gikontak ang pamilya ug mihangyo kon pwede ba nga moadto kami sa ilang balay ug magtudlo nila. …
“Si Sister Ramirez daling nahuman sa mga leksyon. Gusto kaayo siyang makat-on sa tanang doktrina nga among gitudlo. Usa ka gabii sa among pagtudlo bahin sa bunyag sa gagmay nga mga bata, nagtudlo kami nga ang gagmay nga mga bata inosente ug wala magkinahanglan og bunyag. Amo siyang gidapit nga mobasa sa basahon ni Moroni: …
Apan ang gagmay nga mga bata buhi diha kang Kristo, bisan gikan sa katukuran sa kalibutan; kon dili pa, ang Dios usa ka may pinalabi nga Dios, ug usab usa ka mabalhinon nga Dios, ug usa ka may pagtamud sa tawo; unsa ka daghan sa gagmay nga mga bata ang namatay nga walay bunyag! [Moroni 8:12.]
“Human magbasa niining kasulatan, si Sister Ramirez nagsugod pagbakho. Ang akong kauban ug ako naglibug. Nangutana ko, ‘Sister Ramirez, duna ba mi nasulti o nabuhat nga nakapasilo nimo?’
“Miingon siya, ‘Wala, Elder, wala moy nahimong sayop. Unom ka tuig na ang milabay duna koy anak nga lalaki. Namatay siya sa wala pa namo siya mapabunyagi. Ang among pari misulti namo nga kay wala man siya mabunyagi, maadto siya sa dapit diin dili siya mahimutang hangtud sa hangtud. Unom ka tuig nakong gidala kanang kasakit ug kakonsensya. Human magbasa niining kasulatan, nasayud ko pinaagi sa gahum sa Espiritu Santo nga kini tinuod. Migaan ang akong gibati, ug mga luha kini sa kalipay.’ …
“Human sa unom ka tuig nga pag-antus sa hapit dili mapas-an nga kasakit, ang tinuod nga doktrina, nga gipadayag sa mahigugmaong Amahan sa Langit pinaagi sa buhing propeta, nagdala og kalinaw niining nahasol nga babaye. Siyempre, si Sister Ramirez ug iyang mga anak nga nag-edad og walo ka tuig ug magulang pa nabunyagan” (“Tungod kay Ako Buhi, Kamo usab Mabuhi,”Liahona, Nob. 2012, 15–16).