Human miabut sa Far West, Missouri, niadtong Marso 1838, si Propeta Joseph Smith nakadawat og pagpadayag nga narekord diha sa Doktrina ug mga Pakigsaad 113. Diha sa pagpadayag, gitubag sa Ginoo ang mga pangutana mahitungod sa mga tudling gikan sa basahon ni Isaias. Niadtong Abril 11, 1838, si Joseph Smith nakadawat og pagpadayag nga narekord diha sa Doktrina ug mga Pakigsaad 114, diin ang Ginoo mimando ni David W. Patten, usa ka sakop sa Korum sa Napulog Duha ka mga Apostoles, sa pag-andam sa pagserbisyo og misyon.
Gitubag sa Ginoo ang mga pangutana mahitungod sa mga tudling diha sa basahon ni Isaias
Sugdi ang klase pinaagi sa pagpangutana sa mga estudyante sa mosunod:
Naglisud ba kamo sa pagsabut sa unsay inyong nabasahan diha sa mga kasulatan?
Ipasabut nga ang ubang mga panagna diha sa mga kasulatan naglakip sa mga simbolo nga lisud sabton. Ipasabut nga didto sa Far West, Missouri, ang ubang kaigsoonan mihangyo kang Joseph Smith sa pagpatin-aw sa mga tudling diha sa mga kapitulo 11 ug 52 sa basahon ni Isaias. Ang mga tubag sa Ginoo niadtong mga pangutana narekord diha sa Doktrina ug mga Pakigsaad 113. Mahimo nimong ipasabut nga sa dihang unang mibisita si Moroni kang Joseph Smith, gikutlo niya ang panagna diha sa Isaias 11. Gisultihan ni Moroni si Joseph nga ang panagna hapit na matuman (tan-awa sa Joseph Smith—Kasaysayan 1:40).
Dapita ang usa ka estudyante sa pagbasa og kusog sa Isaias 11:1. Hangyoa ang klase sa pagsunod, nga mangita sa upat ka mga butang nga gihisgutan niini nga bersikulo.
Unsa nga mga butang ang inyong nakit-an? (Ang mga estudyante kinahanglang mohisgot og usa ka saha, usa ka punoan, usa ka sanga, ug mga gamot. Ipasabut nga ang Doktrina ug mga Pakigsaad 113 naglangkob og mga pagpasabut sa saha, sa punoan, ug sa mga gamot.)
Imahe
stump
Ipasabut nga ang pulong nga punoan diha sa Isaias 11:1 usa ka hinubad gikan sa Hebreohanon nga pulong nga nagpasabut sa lawas o tuod sa kahoy—usa ka kahoy nga giputol o usa ka kahoy nga gitanom. Hangyoa ang usa ka estudyante sa pagdrowing og tuod diha sa pisara ug isulat ang Punoan duol sa hulagway. Dayon hangyoa ang estudyante nga dugangan og mga gamot ug butangan kini og ngalan nga Mga Gamot.
Sumala sa Isaias 11:1, unsa ang migula gikan sa punoan? (Usa ka saha—sa laing mga pulong, bag-ong mitubo.)
Hangyoa ang estudyante sa pagdrowing og bag-ong mitubo gikan sa punoan ug butangan kini og ngalan nga Saha.
Ipasabut nga kining mga butanga mga simbolo. Dapita ang mga estudyante sa pagbasa og hilum sa Doktrina ug mga Pakigsaad 113:1–6, nga mangita sa mga kahulugan sa mga simbolo.
Sumala sa mga bersikulo 1–2, kinsay girepresentar sa punoan ni Jese?
Dapita ang usa ka estudyante sa pagsulat og Jesukristo diha sa pisara tupad sa pulong nga Punoan.
Ipasabut nga si Elder Bruce R. McConkie sa Korum sa Napulog Duha ka mga Apostoles mipakigbahin sa usa ka interpretasyon sa mga gamot ug sa saha—nga kining duha nagrepresentar kang Joseph Smith. Dapita ang usa ka estudyante sa pagbasa og kusog sa mosunod nga pamahayag:
Imahe
Elder Bruce R. McConkie
“Nasayop ba kita sa pag-ingon nga ang propeta nga gihisgutan dinhi mao si Joseph Smith, kang kinsa miabut ang priesthood, kinsa nakadawat sa mga yawe sa gingharian, ug kinsa mipataas sa bandila alang sa pagpundok sa katawhan sa Ginoo sa atong dispensasyon? Ug dili ba siya mao man usab ang usa ka ‘sulugoon diha sa mga kamot ni Kristo, kinsa mao ang usa ka bahin sa kaliwat ni Jese ingon usab ni Ephraim, o sa balay ni Jose, kang kinsa adunay gitugyan nga dakong gahum’? (D&P 113:4–6.) Kadtong mga tawo nga nagpakabana og maayo sa walay kinutuban nga balaang mga butang masayud sa kahulugan niining mga butang” (The Millennial Messiah: The Second Coming of the Son of Man [1982], 339–40).
Dapita ang usa ka estudyante sa pagsulat og Joseph Smith diha sa pisara tupad sa mga pulong nga Mga Gamot ug Saha.
Unsa ang ubang mga butang nga nabuhat ni Joseph Smith isip “usa ka sulugoon diha sa mga kamot ni Kristo”? (D&P 113:4).
Diha sa Doktrina ug mga Pakigsaad 113:6, unsa ang katuyoan nga gihatag alang sa mga yawe sa gingharian nga gihatag ngadto ni Joseph Smith? (Samtang maghisgot ang mga estudyante niining pangutana, isulat ang mosunod nga kamatuoran diha sa pisara: Nadawat ni Joseph Smith ang mga yawe sa gingharian alang sa pagpundok sa Israel sa katapusang mga adlaw. Mahimo usab nimong dapiton ang mga estudyante sa pagbasa sa Doktrina ug mga Pakigsaad 110:11.)
Ipasabut nga human mapadayag sa Ginoo ang mga tubag sa mga pangutana mahitungod sa Isaias 11, nangutana si Elias Higbee kalabut sa Isaias 52. Dapita ang katunga sa klase sa pagbasa og hilum sa Doktrina ug mga Pakigsaad 113:7–8. Dapita ang laing katunga sa pagbasa og hilum sa Doktrina ug mga Pakigsaad 113:9–10. Hangyoa ang duha ka grupo sa pagpangita sa mga tinguha sa Ginoo alang sa katawhan sa Zion.
Sumala sa mga bersikulo 7–8, unsa ang kinahanglan natong “[i]sul-ob”? Sumala sa bersikulo 8, unsa man ang kusog sa Zion? (Ang mga estudyante kinahanglang mapahayag sa mosunod nga kamatuoran: Ang awtoridad sa priesthood mao ang kusog sa Zion.)
Ipasabut nga ang bersikulo 9 naglakip og pangutana mahitungod sa Zion nga “nagbadbad sa iyang kaugalingon gikan sa mga higot sa iyang liog.” Dinhi niini nga bersikulo, ang pulong nga mga higot nagpasabut sa materyal nga gigamit aron mapabiling ulipon ang usa ka tawo.
Sumala sa bersikulo 10, unsa man ang kahulugan sa mga pulong nga “sa mga higot sa iyang liog”?
Unsa ang pipila ka paagi nga ang awtoridad sa priesthood nakatabang kanatong tanan sa “pagsul-ob sa [atong] kusog”?
Unsa ang pipila ka butang nga atong mahimo aron mabadbaran ang atong kaugalingon sa “mga higot”? Sa unsang paagi nga makatabang kita sa uban sa paghimo niining mga butanga?
Gimanduan sa Ginoo si David W. Patten sa pagpangandam sa pag-alagad og usa ka misyon
Ipasabut nga ang usa ka tawo nga gipili sa Ginoo sa pagtabang sa Zion “sa pagsul-ob sa iyang kusog” mao ang tawo nga ginganlan og David W. Patten. Dapita ang usa ka estudyante sa pagbasa og kusog sa mosunod nga paghulagway:
Mipasakop si David W. Patten sa Simbahan niadtong Hunyo 15, 1832. Naordinahan siya nga usa ka Apostol niadtong 1835. Siya walay kahadlok sa iyang pagdepensa sa pagtuo ug kang Propeta Joseph Smith. Sa pagdepensa sa mga Santos batok sa manggugubot nga panon didto sa Missouri, nailhan si David W. Patten isip “Walay Kahadlok nga Kapitan.” (Tan-awa sa Lycurgus A. Wilson, Life of David W. Patten: The First Apostolic Martyr [1900], 5, 32, 52, 62.)
Ipasabut nga mihangyo si Elder Patten kang Joseph Smith nga magtinguha og usa ka pagpadayag alang kaniya. Dapita ang usa ka estudyante sa pagbasa og kusog sa Doktrina ug mga Pakigsaad 114:1. Hangyoa ang klase sa pagpangita sa unsay gusto sa Ginoo nga buhaton ni Elder Patten.
Unsa ang gusto sa Ginoo nga buhaton ni Elder Patten?
Sumala sa bersikulo 1, pila man ang gitawag sa Ginoo nga mopahigayon niini nga misyon? (Napulog Duha. Kini nga bersikulo nagpasabut sa Korum sa Napulog Duha ka mga Apostoles ug sa ilang umaabut nga misyon ngadto sa England.)
Kanus-a man kinahanglang mobiya ni Elder David Patten alang sa iyang misyon? Tan-awa sa pasiuna sa seksyon ug bantayi ang petsa nga gihatag kini nga pagpadayag. Unsa kadugaya ang hulaton ni David sa dili pa siya mobiya? (Mga usa ka tuig.)
Sultihi ang mga estudyante nga usa ka trahedya ang nahitabo unom ka bulan human nahatag ang pagpadayag ngadto ni David Patten. Dapita ang usa ka estudyante sa pagbasa og kusog sa mosunod nga istorya bahin sa gubat sa Crooked River:
Sa tinglarag sa 1838, ang mga pagbatok ug pagpanggukod misaka na usab batok sa mga Santos didto sa Missouri. Pagka-Oktubre 24, usa ka manggugubot nga panon ang mi-kidnap og tulo sa mga Santos, klaro nga nagplano sa pagpatay kanila nianang gabhiona. Sa pagkadungog niini, usa ka lokal nga huwes nga ginganlan og Elias Higbee, usa ka miyembro sa Simbahan, mimando kang Lieutenant Colonel George M. Hinkle sa militia sa estado, nga usa usab ka miyembro sa Simbahan, sa pag-organisar og grupo sa kalalakin-an sa pagbugaw sa manggugubot nga panon ug sa pagluwas sa mga bihag. Setenta y singko ka kalalakin-an ang nagpundok sa tungang gabii, uban ni David W. Patten isip ilang kapitan. Gilauman ni Elder Patten ang pagsurprisa sa manggugubot nga panon ug pagluwas sa mga bihag nga walay mobanaw nga dugo, apan samtang nagkaduol ang kalalakin-an sa Crooked River, usa ka nagtago nga sakop sa manggugubot nga panon ang mipabuto og kausa. Si Patrick O’Banion, usa ka sakop sa militia sa mga Santos, napusilan. Si Kapitan Patten, kinsa nangulo og 15 ka kalalakin-an nga layo sa grupo, nakadungog sa buto ug nangulo sa grupo paingon sa dapit. Usa dayon ka kumbati ang miresulta, ug pipila ka kalalakin-an ang nasamdan. Si Gideon Carter namatay diha-diha, ug si Patrick O’Banion namatay nianang gabhiona. Si Elder Patten naapil usab sa nasamdan.
Si Elder Patten namatay pipila ka oras human sa gubat. Ang iyang pagtuo sa gipahiuli nga ebanghelyo ingon gayud ka dako nga kausa mipahayag siya ngadto ni Propeta Joseph Smith og tinguha nga mamatay sa kamatayon sa usa ka martir. “Ang Propeta, nga hilabihan nga naapektuhan, mipahayag og grabe kaayo nga kaguol, ‘kay,’ miingon siya ngadto ni David, ‘kon ang usa ka tawo nga dunay pagtuo sama nimo mangayo sa Ginoo og bisan unsa, kasagaran iya kining makuha’” (Church History in the Fulness of Times Student Manual, 2nd ed. [manwal sa Church Educational System, 2003], 200; nagkutlo kang Joseph Smith, sa Life of David W. Patten, 53). Sa wala pa ang lubong ni Elder Patten didto sa Far West, gitudlo ni Joseph Smith ang lawas ni Elder Patten ug miingon, “Anaa naghigda ang tawo nga nakahimo sa unsa gayuy iyang giingon nga iyang himoon—gitugyan niya ang iyang kinabuhi alang sa iyang mga higala” (sa History of the Church, 3:175).
Ipasabut nga nianang higayuna sa pagkamatay ni Elder Patten, nangandam siya sa iyang kaugalingon, pinaagi sa iyang pagkamatinud-anon, nga moserbisyo og misyon. Hangyoa ang mga estudyante nga magpares-pares ug maghisgot sa mosunod nga mga pangutana:
Sa inyong hunahuna sa unsang paagi nga ang mando sa Ginoo nga mangandam alang sa usa ka misyon nakaimpluwensya kang Elder Patten? Sa unsa kaha nga paagi nga kining mando nahimong usa ka panalangin alang kang Elder Patten, bisan kon wala gayud siya nakatuman sa misyon nga gilauman nga iyang matuman?
Unsa nga mga baruganan ang atong makat-unan gikan niini? (Ang mga estudyante mahimong mopakigbahin og pipila ka lain-laing mga ideya ug mga kamatuoran, lakip na ang mosunod nga baruganan: Kon mopatalinghug kita sa direksyon sa Ginoo, mahimo kitang andam alang sa bisan unsa nga Iyang giplano alang kanato.)
Kanus-a kamo misunod sa tambag sa Ginoo ug nakabantay nga nakaandam kini ninyo alang sa usa ka butang nga wala ninyo damha?
Dapita ang usa ka estudyante sa pagbasa og kusog sa Doktrina ug mga Pakigsaad 114:2. Hangyoa ang klase sa pagpangita sa unsay gisulti sa Ginoo nga mahitabo kon ang mga tawo dili motuman sa ilang mga calling. (Mahimo nimong ipasabut nga niining bersikulo, ang pulong nga katungdanan [bishopric] nagpasabut sa responsibilidad sa usa ka tawo, dili sa usa ka bishop ug sa iyang mga counselor. Tan-awa sa Salmo 109:8; Mga Buhat 1:20.)
Unsa ang atong makat-unan gikan sa bersikulo 2 mahitungod sa unsay mahitabo kon dili kita magmatinud-anon sa atong mga calling? (Laing tawo ang tawagon aron motuman sa atong mga responsibilidad.)
Ipasabut nga sa dihang si Elder David W. Patten himatyon na diha sa iyang higdaanan, naghisgot siya bahin sa iyang isigka mga Santos, apil na ang mga sakop sa Korum sa Napulog Duha ka mga Apostoles, kinsa wala magmatinud-anon. Mituaw siya, “O nga sila pa unta ang naa sa akong sitwasyon! Kay gibati nako nga napabilin nako ang pagtuo, natapos nako ang akong gimbuhaton, sukad karon dunay ginatagana alang kanako nga purongpurong, nga niadto unyang adlawa iganti kanako sa Ginoo, ang matarung nga maghuhukom.” Ngadto sa iyang asawa, miingon siya, “Bisan unsa pa man ang imong buhaton, palihug ayaw ilimud ang pagtuo” (kinutlo ni Heber C. Kimball, sa Life of David W. Patten, 69).
Aron matabangan ang mga estudyante nga mobati sa kaimportante sa pagpili karon nga magmatinud-anon, dapita sila sa pagsulat diha sa ilang mga class notebook o mga scripture study journal kon unsay ilang buhaton aron makasunod sa tambag sa Ginoo ug makatuman sa Iyang mga gilauman alang kanila.
Ang mga simbolo diha sa mga kasulatan mahimong dunay daghang kahulugan. Pananglitan, ang dinasig nga interpretasyon sa Isaias 11:1, 10 nga makita diha sa Doktrina ug mga Pakigsaad 113:1–6 nagpakita sa katumanan niini nga panagna sa ulahing mga adlaw (tan-awa sa Joseph Smith—Kasaysayan 1:40). Hinoon, ang Isaias 11:1, 10 mahimo usab nga ma-interpret sa hustong paagi sama sa mosunod: ang punoan ug gamot ni Jese mahimong nagrepresentar sa balay ni David, ug ang saha ug sanga mahimong nagpasabut ngadto ni Jesukristo.
Sa pagpadayag nga narekord diha sa Doktrina ug mga Pakigsaad 114, gihisgutan sa Ginoo ang mga Santos sa Ulahing mga Adlaw nga molimud sa Iyang ngalan. Usa niini mao si Oliver Cowdery, kinsa miapostasiya ug gi-excommunicate niadtong 1838 didto sa Far West, Missouri. Tungod kay si Oliver Cowdery nahimong usa ka Apostol, ang iyang pag-apostasiya nangahulugan nga iyang gibiyaan kining halangdon ug balaang tawag ug dili na usa ka linain nga saksi sa ngalan ni Kristo. Si Presidente Wilford Woodruff sa wala madugay namulong bahin ni Oliver Cowdery isip ehemplo sa usa ka tawo nga napukan gikan sa pagkamakanunayon diha sa pagtuo:
Imahe
President Wilford Woodruff
“Kon ang Presidente sa Simbahan o ang iyang mga magtatambag o ang mga apostoles o bisan kinsa nga tawo nagtuo diha sa iyang kasingkasing nga ang Dios walay mahimo kon wala siya, ug nga siya importante gayud kaayo aron mapadayon ang buluhaton sa Ginoo, peligro siya nga mapukan. Nakadungog ako ni Joseph Smith nga miingon nga si Oliver Cowdery, kinsa mao ang ikaduha nga apostol niini nga Simbahan, miingon ngadto kaniya, ‘Kon mobiya ako niini nga Simbahan kini mapukan.’
“Si Joseph miingon, ‘Oliver, sulayi kana.’ Gisulayan ni Oliver. Napukan siya; pero ang gingharian sa Dios wala maunsa. Nakaila ako sa ubang mga apostoles sa akong higayon ug panahon kinsa mibati nga walay mahimo ang Ginoo kon wala sila; pero ang Ginoo nagpadayon sa iyang buluhaton bisan og wala sila.
“Akong nakit-an si Oliver Cowdery ingon nga anaa kaniya ang gahum sa Dios. Wala pa gyud ko makadungog og tawo nga mas lig-ong mipamatuod kay kaniya kon ubos sa impluwensya sa Espiritu. Pero sa dihang mibiya siya sa gingharian sa Dios, niadtong gutloa nawala ang iyang gahum. … Gikuhaan siya sa iyang kusog, sama ni Samson nga diha sa sabakan ni Delilah. Nawala kaniya ang gahum ug pagpamatuod nga iyang naangkon, ug wala na gayud kini mabalik kaniya sa hingpit samtang buhi pa siya, bisan og namatay siya nga [usa ka miyembro sa] Simbahan” (Mga Pagtulun-an sa mga Presidente sa Simbahan: Wilford Woodruff [2004], 115).