Sa unang bahin sa panan-awon nga gipakita ngadto ni Joseph Smith ug Sidney Rigdon niadtong Pebrero 16, 1832, nakita nila ang himaya ni Jesukristo ug mipamatuod kabahin Kaniya. Nakita nila si Satanas nga gisalikway gikan sa presensya sa Dios didto sa kinabuhi nga wala pa dinhi sa yuta tungod sa rebelyon. Gipakita usab kanila ang mga anak sa kapildihan ug nakat-unan ang mahangturong mga sangputanan niadtong kinsa nagpili sa pagsunod ni Satanas.
Si Joseph Smith ug Sidney Rigdon nakakita og usa ka panan-awon sa Langitnong Amahan ug ni Jesukristo
Alang sa debosyonal nga himno, dapita ang klase sa pagkanta sa “I Know That My Redeemer Lives” (Hymns, nu. 136). Ang mga pulong niini nga himno mahimong motabang sa mga estudyante sa pagbati sa gahum sa mga kamatuoran nga ilang makat-unan karon.
Sugdi ang klase pinaagi sa pagdapit sa mga estudyante sa paghunahuna sa mosunod nga sitwasyon: Samtang naglingkod diha sa klase sa eskwelahan, ang inyong magtutudlo nagsugod sa paghisgot og mga relihiyon sa kalibutan. Nangutana ang magtutudlo kon aduna bay mga Kristyano sa klase kinsa andam sa pagpakigbahin sa ilang mga pagtuo mahitungod ni Kristo.
Kon kamo anaa niana nga sitwasyon, unsay inyong isulti nga kamo nagtuo ug nahibalo mahitungod ni Jesukristo?
Dapita ang mga estudyante sa pagtan-aw sa diagram nga ilang nadawat sa miaging leksyon, nga nag-outline sa panan-awon nga gi-rekord diha sa Doktrina ug mga Pakigsaad 76. Ipasabut nga sa leksyon karon makat-unan nila ang mahitungod sa unang tulo ka bahin sa panan-awon nga gipakita ngadto ni Joseph Smith ug Sidney Rigdon. Sa unang bahin sa panan-awon, nakita nila ang Amahan ug ang Anak diha taliwala sa ilang himaya. Isulat ang mosunod nga tulo ka mga ulohan diha sa pisara:
Unsay ilang nakita Unsay ilang nadungog Unsay ilang nakat-unan
Hangyoa ang mga estudyante sa pagsulat sa mga ulohan diha sa ilang mga class notebook o mga scripture study journal. Dayon dapita sila sa pagbasa og hilum sa Doktrina ug mga Pakigsaad 76:20–24 ug sa paglista sa mga pulong gikan sa mga bersikulo ubos sa tukma nga mga ulohan. Human sa igong panahon, dapita ang usa ka estudyante sa pag-adto sa pisara ug paglihok isip tigsulat. Hangyoa ang klase sa pagpakigbahin sa mga pulong nga ilang nailhan ubos sa unang duha ka mga ulohan samtang ang estudyante nagsulat niini ubos sa hustong mga ulohan diha sa pisara.
Unsa nga mga doktrina ang gitudlo niini nga mga bersikulo mahitungod ni Jesukristo? (Dapita ang estudyante nga tigsulat sa paglista sa mga tubag sa klase diha sa pisara ubos sa ulohan Unsay ilang nakat-unan.)
Ang mga estudyante mahimong moila og daghang mga doktrina, lakip ang mosunod: Si Jesukristo usa ka buhi, nahimaya nga binuhat; ang Langitnong Amahan ug si Jesukristo managlahi nga mga personahe; si Jesukristo mao ang Bugtong Anak sa Amahan; si Jesukristo mao ang Tiglalang niini nga kalibutan ug sa ubang mga kalibutan; ug kita anak nga mga lalaki ug mga babaye sa Dios.
Tabangi ang mga estudyante nga mangandam sa pagpaambit sa ilang mga pagbati ug mga pagpamatuod kabahin sa mga kamatuoran nga ilang naila diha sa mga bersikulo 20–24 pinaagi sa paghangyo kanila sa pagtubag sa usa sa mosunod nga mga pangutana diha sa ilang mga class notebook o mga scripture study journal (isulat kini nga mga pangutana diha sa pisara):
Hain niini nga mga kamatuoran kamo labi nga mapasalamaton ug ngano?
Hain niini nga mga doktrina kamo makapamatuod? Giunsa ninyo pagkahibalo nga kini tinuod?
Kompletoha kini nga sentence: Kabahin ni Jesukristo, ako nahibalo …
Human ang mga estudyante may igong panahon sa pagsulat, hangyoa ang usa ka estudyante sa pagbasa og kusog sa pagpamatuod ni Joseph Smith ug Sidney Rigdon diha sa D&P 76:22. Dayon dapita ang bisan hain nga mga estudyante kinsa andam sa pagpakigbahin sa ilang kaugalingong mga pagbati ug mga pagpamatuod mahitungod sa nabanhaw nga Manluluwas sa pagbuhat sa mao. Ikonsiderar ang pagpakigbahin sa imong pagpamatuod mahitungod usab sa Manluluwas.
Nakita ni Joseph Smith ug Sidney Rigdon ang usa ka panan-awon sa pagkalaglag ni Lucifer
Kon mahimo, hatagi ang kada estudyante og kopya sa mosunod nga tinuod/sayop nga eksamin, o isulat ang eksamin nga mga pamahayag diha sa pisara. Tudloi ang mga estudyante sa pagsulat diha sa ilang kopya o diha sa usa ka pirasong papel kon ang pamahayag tinuod o sayop.
____1. Nailhan si Satanas nga si Lucifer.
____2. Si Satanas usa ka espiritu nga may awtoridad diha sa presensya sa Dios.
____3. Dili tuyo ni Satanas ang pagsupak sa Langitnong Amahan ug ni Jesukristo.
____4. Dihay pagmaya sa langit sa dihang gisalikway si Satanas.
____5. Nakiggubat si Satanas sa mga Santos sa Dios.
Human makompleto sa mga estudyante ang eksamin, ipasabut nga ang Doktrina ug mga Pakigsaad 76:25–29 naghulagway sa panan-awon nga nakita ni Joseph Smith ug Sidney Rigdon sa pagkalaglag ni Lucifer. Dapita ang mga estudyante sa pagbasa og hilum niini nga mga bersikulo ug sa paghimo og bisan unsa nga mga kausaban sa ilang mga tubag base sa unsay ilang nabasa. Human masuta sa mga estudyante ang ilang mga tubag, ribyuha ang kada pamahayag isip usa ka klase, ug dapita ang mga estudyante sa pagpasabut sa ilang mga tubag naggamit sa unsay ilang nakat-unan. Ang pamahayag 1 tinuod (tan-awa sa D&P 76:26). Ang pamahayag 2 tinuod usab (tan-awa sa D&P 76:25–27). Mahimo nimong ipasabut ngadto sa mga estudyante nga ang pangalang Lucifer nagpasabut og tigdala og kahayag o usa ka mahayag. Nailhan usab siya isip ang “anak sa kabuntagon.” (Tan-awa sa Bible Dictionary, “Lucifer”; Ang Giya ngadto sa mga Kasulatan, “Lucifer,” scriptures.lds.org.)
Samtang ang mga estudyante nagpasabut sa ilang mga tubag sa pamahayag 3, nga sayop (tan-awa ang D&P 76:25, 28), tabangi silang makasabut nga si Satanas misukol. Naninguha siyang mapahawa sa trono ang Langitnong Amahan ug kuhaon ang Iyang gahum, gingharian, ug himaya.
Sumala sa bersikulo 25, unsa ang sangputanan sa pagsukol ni Lucifer batok sa Langitnong Amahan ug ni Jesukristo? Mahimo nimong dapiton ang mga estudyante sa pagsulat sa mosunod nga doktrina diha sa margin sa ilang mga kasulatan tupad sa bersikulo 25: Didto sa kinabuhi nga wala pa dinhi sa yuta, misukol si Lucifer batok sa Langitnong Amahan ug ni Jesukristo ug gisalikway.)
Human ipasabut sa mga estudyante ang ilang mga tubag sa pamahayag 4, nga sayop (tan-awa ang D&P 76:26), ipasabut nga ang Kapildihan, ang ngalan nga gihatag ngadto ni Lucifer, nagpasabut og kalaglagan o panghimaraut.
Samtang ang mga estudyante nagpasabut sa ilang mga tubag sa pamahayag 5, nga tinuod (tan-awa ang D&P 76:29), ikonsiderar ang pagdapit kanila sa pagmarka sa mga pulong diha sa bersikulo 29 nga nagtudlo nga si Satanas nakiggubat sa mga Santos sa Dios.
Kanus-a nagsugod kini nga gubat batok ni Satanas? (Didto sa kinabuhi nga wala pa dinhi sa yuta.) Unsa nga mga pulong gikan sa bersikulo 29 ang nagpasabut nga ang gubat nga nagsugod sa langit nagpadayon karon? (Ang mga pulong nagpasiugda ug nagliyok parehong gigamit sa present tense. Mahimo nimong ipasabut nga ang nagliyok nagpasabut og paglibut sa hingpit.)
Sa unsa nga paagi si Satanas nakiggubat batok sa mga Santos sa Dios karon?
Nakita ni Joseph Smith ug Sidney Rigdon ang usa ka panan-awon sa mga pag-antus sa mga anak sa kapildihan
Sa panahon sa gubat, unsa ang usa ka mabudhion?
Dapita ang mga estudyante sa pag-scan sa Doktrina ug mga Pakigsaad 76:30–32, nga mangita sa mga mabudhion ngadto sa Manluluwas nga gipakita sa Ginoo ngadto ni Joseph Smith ug Sidney Rigdon sa panan-awon. Hangyoa ang mga estudyante sa pag-report kon unsay ilang makit-an. Dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 76:30–35. Hangyoa ang klase sa pagsunod, nga mangita sa mga pagpili nga nagdala sa mga tawo nga mahimong mga anak sa kapildihan.
Unsa nga mga pagpili ang mosangput ngadto sa pagkahimong mga anak sa kapildihan? (Ang pagpili nga mosunod ni Satanas, paglimud sa kamatuoran, ug pagsupak sa gahum sa Dios human mahibalo niini [tan-awa sa D&P 76:31]; paglimud sa Balaan nga Espiritu human makadawat niini ug paglimud sa Manluluwas [tan-awa sa D&P 76:35].)
Usahay ang mga estudyante mabalaka nga ang mga minahal kinsa nahimong less active sa ebanghelyo mga anak sa kapildihan. Ipasabut nga ang mga anak sa kapildihan lahi gikan sa mga miyembro sa Simbahan kinsa adunay pagpamatuod sa usa ka panahon apan nahimo nang inactive sa ebanghelyo. Ang mga anak sa kapildihan nakahimo og dili mapasaylo nga sala sa paglimud sa Espiritu Santo.
Si Presidente Spencer W. Kimball mitudlo:
Imahe
President Spencer W. Kimball
“Ang sala batok sa Espiritu Santo nagkinahanglan og kahibalo nga kini imposible gyud kaayo alang sa ordinaryo nga tawo sa pagpakasala sa maong sala” (The Miracle of Forgiveness [1969], 123).
Dapita ang pipila ka mga estudyante sa pagpuli-puli sa pagbasa og kusog sa Doktrina ug mga Pakigsaad 76:36–38, 44–49. Hangyoa ang klase sa pagsunod, nga mangita sa kahimtang sa mga anak sa kapildihan.
Unsaon ninyo sa paghulagway ang pag-antus nga masinati sa mga anak sa kapildihan hangtud sa kahangturan?
Sumala sa bersikulo 37, unsa nga matang sa kamatayon nga ang mga anak sa kapildihan mao lamang ang makasinati?
Ipasabut nga ang mga anak sa kapildihan dili matubos gikan sa ikaduhang espirituhanong kamatayon ug dili makapanunod og gingharian sa himaya human sila mabanhaw. Hinoon, mag-antus sila sa kahangturan.
Ipasabut nga diha sa tunga-tunga sa panan-awon kalabut sa mga anak sa kapildihan, si Joseph Smith ug si Sidney Rigdon nakakat-on og malaumong kamatuoran. Aron matabangan ang mga estudyante sa pag-ila niini nga kamatuoran, hangyoa ang mga estudyante sa pag-asoy sa labing maayo nga balita nga ilang nadawat sa milabay nga semana. (Mahimo nimong dad-on ang pipila ka mga maayong panig-ingnan sa maayong balita gikan sa pamantalaan o sa ubang mga tinubdan.) Dapita ang usa ka estudyante sa pagbasa og kusog sa Doktrina ug mga Pakigsaad 76:39–43 ug hangyoa ang klase sa pagsunod, nga mangita og pipila ka maayong balita nga nadawat sa kalibutan.
Unsang maayo nga balita ang nadawat sa kalibutan? (Mahimo nimong ipasabut nga ang pulong nga ebanghelyo literal nga nangahulugan og maayong balita.)
Aron matabangan ang mga estudyante sa pag-ila sa mga doktrina nga gitudlo diha sa Doktrina ug mga Pakigsaad 76:39–43, hangyoa sila sa pagsulat og mubo nga ulohan diha sa ilang mga class notebook o mga scripture study journal nga nagtingub sa “maayong balita” nga gitudlo niini nga mga bersikulo. Human ang mga estudyante may igong panahon, dapita ang pipila sa pagpakigbahin sa ilang mga ulohan ngadto sa klase. Human makatubag ang mga estudyante, mahimo nimong isugyot nga ilang markahan ang mga pulong diha sa mga bersikulo 39–43 nga nagtudlo sa mosunod nga doktrina: Pinaagi sa Pag-ula ni Jesukristo, ang tanang mga anak sa Dios gawas sa mga anak sa kapildihan makapanunod og usa ka dapit diha sa gingharian sa himaya.
Nganong ang Pag-ula ni Jesukristo usa ka “maayong balita” nganha kaninyo?
Mahimo nimong tapuson kini nga leksyon pinaagi sa pagpakigbahin sa imong tubag niini nga pangutana.
Diha si Philo Dibble sa dihang nadawat ni Joseph Smith ug Sidney Rigdon ang ilang panan-awon. Gihulagway niya ang kasinatian ni Joseph ug Sidney:
“Ang panan-awon nga gi-rekord diha sa Basahon sa Doktrina ug mga Pakigsaad gihatag diha sa balay ni ‘Father Johnson,’ didto sa [Hiram], Ohio, ug sa panahon nga si Joseph ug Sidney ubos sa kadasig ug nakita nga ang kalangitan naabli, dihay lain nga mga tawo sa lawak, tingali napulog duha, kinsa ako usa sulod niana nga bahin sa panahon … akong nakita ang himaya ug gibati ang gahum, apan wala makakita sa panan-awon. …
“Si Joseph, matag karon og unya, mosulti: ‘Unsay akong nakita?’ sama nga ang usa tingali mosulti samtang nagtan-aw sa gawas sa bintana ug nagsud-ong sa dili makita sa tanan nga diha sa lawak. Dayon iyang isulti unsay iyang nakita o unsay iyang gitan-aw. Dayon mitubag si Sidney, ‘Parehas ang akong nakita.’ Sa pagkakaron si Sidney moingon ‘unsay akong nakita?’ ug balikon pagsulti unsay iyang nakit-an o gitan-aw, ug motubag si Joseph, ‘Parehas ang akong nakita.’
“Kining paagi sa panagsinultihay gibalik sa pagsulti sa matag karon ug unya hangtud sa katapusan sa panan-awon. …
“Si Joseph naglingkod nga walay lihok ug kalma sa tanang panahon taliwala sa halangdong himaya, apan si Sidney naglingkod nga walay umoy ug luspad, tataw nga sama ka luyluy sa trapo, nga sa dihang nakaobserbar, miingon si Joseph, nagpahiyom, ‘Si Sidney wala maanad niini sama kanako’” (sa “Recollections of the Prophet Joseph Smith,” The Juvenile Instructor, Mayo 15, 1892, 303–4).
Ang pagpamatuod ni Propeta Joseph Smith ug Sidney Rigdon diha sa Doktrina ug mga Pakigsaad 76:22 maoy usa ka modernong saksi sa katinuod sa Amahan ug sa Anak. Si Joseph ug Sidney wala lamang makakita apan nakadungog usab, ug ang ilang mga pagpamatuod nagbarug isip usa ka saksi ngadto sa tanang katawhan. Nagpasabut si Hyrum M. Smith ug Janne M. Sjodahl sa mga pulong “katapusan sa tanan” sa mosunod: “Kini mao ang katapusan nga pagpamatuod ngadto sa kamatuoran nga Siya buhi, usa ka nabanhaw ug gihimaya nga Binuhat; dili ang katapusan nga pagpamatuod, apan ang katapusan hangtud sa panahon niini nga panan-awon” (Komentaryo sa Doktrina ug mga Pakigsaad [1972], 448). Pinaagi sa pagsulti “katapusan sa tanan,” wala magpasabut si Joseph ug si Sidney nga sila ang katapusan nga modawat sa sama nga pagpamatuod ug pagsaksi.
Mikomentaryo si Presidente George Q. Cannon sa Unang Kapangulohan sa ngalan ni Satanas nga “anak sa kabuntagon”:
Imahe
President George Q. Cannon
“Ang pipila nagtawag kaniya nga ang anak sa kabuntagon, apan dinhi kini usa ka anak sa kabuntagon—usa sa daghan, walay pagduha-duha. Kini nga anghel usa ka gamhanang personahe, walay pagduha-duha. Ang rekord nga gihatag kanato kalabut kaniya dayag nga nagpakita nga siya nagbaton og dako kaayo nga posisyon; nga siya gitahud og maayo, ug nga siya gamhanan sa iyang kalibutan” (“Discourse by President George Q. Cannon,” Latter-day Saints’ Millennial Star, Sept. 5, 1895, 563–64).
Gitudlo ni Propeta Joseph Smith ang mosunod kalabut sa usa sa mga kinaiya nga naghimo sa usa ka tawo nga usa ka anak sa kapildihan—paglimud sa Espiritu Santo:
Imahe
Prophet Joseph Smith
Unsa ang kinahanglan gayud nga mabuhat sa usa ka tawo nga makahimo sa dili mapasaylo nga sala? Kinahanglan gayud nga nadawat niya ang Espiritu Santo, ang kalangitan naabli alang kaniya, ug nakaila sa Dios, ug dayon nakasala batok kaniya. Human ang tawo makasala batok sa Espiritu Santo, walay paghinulsol alang kaniya. Siya kinahanglang mosulti nga ang adlaw wala mosidlak samtang nakita niya kini; siya kinahanglan nga molimud ni Jesukristo bisan og ang kalangitan naabli ngadto kaniya, ug molimud sa plano sa kaluwasan bisan og nakakita siya og kamatuoran niini” (sa History of the Church, 6:314).
Si Presidente Spencer W. Kimball mihulagway niini sa mosunod:
Imahe
President Spencer W. Kimball
“Sila nahugno pag-ayo nga nawad-an na sa mga kahilig ug sa gahum sa paghinulsol” (The Miracle of Forgiveness [1969], 125).
Doktrina ug mga Pakigsaad 76:35. “Nga naglansang kaniya diha sa ilang mga hunahuna ug mga kasingkasing ug nagpakaulaw kaniya”
Si Elder Bruce R. McConkie sa Korum sa Napulog Duha ka mga Apostoles mipahayag:
Imahe
Elder Bruce R. McConkie
“Ang pagbuhat sa dili mapasaylo nga sala naglangkob sa paglansang pag-usab sa Anak sa Dios ug pagpakaulaw kaniya sa dayag. (Heb. 6:4–8; D. & P. 76:34–35.) … Sa ingon siya nakahimo og pagpatay pinaagi sa pagtugot sa kamatayon sa Ginoo, buot ipasabut, nakabaton og hingpit nga kahibalo sa kamatuoran siya dayag nga nagrebelde ug nagbutang sa iyang kaugalingon sa posisyon nga iyang ilansang si Kristo bisan hingpit nga nahibalo nianang panahona nga siya mao ang Anak sa Dios. Busa si Kristo gilansang pag-usab ug gipakaulawan sa dayag. (D. & P. 132:27.)” (Mormon Doctrine, 2nd ed. [1966], 816–17).
Gipasabut ni Elder Dallin H. Oaks sa Korum sa Napulog Duha ka mga Apostoles ang duha ka managlahi nga mga kahulugan sa pagkaluwas:
Imahe
Elder Dallin H. Oaks
“Alang sa mga Santos sa Ulahing mga Adlaw, ang ‘pagkaluwas’ nangahulugan usab og pagkaluwas o naluwas gikan sa ikaduhang kamatayon (buot ipasabut ang katapusang espirituhanon nga kamatayon) pinaagi sa kasigurohan sa usa ka gingharian sa himaya sa kalibutan nga moabut (tan-awa sa 1 Mga Taga Cor. 15:40–42). Sama nga ang Pagkabanhaw moabut sa tanan, kita nagpamatuod nga ang matag tawo nga sukad mipuyo ibabaw sa yuta—gawas sa pipila lamang—gipaniguro ang kaluwasan niini nga paagi. …
“Gitudlo ni propeta Brigham Young kana nga doktrina sa dihang siya mipahayag nga ang ‘matag tawo kinsa dili mosalikway sa adlaw sa grasya, ug dili mahimong usa ka anghel sa Yawa, pagadad-on aron makapanunod og gingharian sa himaya’ (Mga Pagtulun-an sa mga Presidente sa Simbahan: Brigham Young 1997], 45). Kining kahulugan sa naluwas nagpahalangdon sa tibuok katawhan pinaagi sa grasya sa atong Ginoo ug Manluluwas, si Jesukristo. …
“… Sa laing paggamit nga sinati ug talagsaon sa mga Santos sa Ulahing mga Adlaw, ang mga pulong nga naluwas ug kaluwasan gigamit usab sa pagpasabut og kahimayaan o kinabuhing dayon (tan-awa sa Abr. 2:11 Usahay gipasabut kini nga ‘kahingpitan sa kaluwasan’ (Bruce R. McConkie, The Mortal Messiah, 4 vols. [1979–81], 1:242). Kini nga kaluwasan nagkinahanglan og labaw pa kay sa paghinulsol ug pagbunyag pinaagi sa tukma nga awtoridad sa priesthood. Nagkinahanglan usab kini sa paghimo og sagradong mga pakigsaad, lakip na ang mahangturon nga kaminyoon, sulod sa mga templo sa Dios, ug sa pagkamatinud-anon niana nga mga pakigsaad pinaagi sa paglahutay hangtud sa katapusan” (“Have You Been Saved?” Ensign, Mayo 1998, 56–57).