Sa dihang nadawat ni Propeta Joseph Smith ang pagpadayag nga narekord diha sa Doktrina ug mga Pakigsaad 124 niadtong Enero 19, 1841, ang mga Santos didto na sa Nauvoo, Illinois, sulod sa dul-an duha ka tuig. Human sa mga pagpanggukod ug mga kalisud nga ilang nasinati, ang mga Santos karon aduna nay dapit diin sila mahimong magpundok ug magtukod og siyudad diha sa kalinaw. Ang Doktrina ug mga Pakigsaad 124 mao ang unang pagpadayag nga nadawat ni Joseph Smith didto sa Nauvoo nga opisyal nga gitugutan. Kini nga seksyon bahinon sa tulo ka leksyon. Kini nga leksyon maghisgot sa mga bersikulo 1–21. Niini nga mga bersikulo, misugo ang Ginoo nga usa ka pamahayag ang ipadala ngadto sa mga tigdumala sa yuta kalabut sa Pagpahiuli sa ebanghelyo ug sa stake sa Zion didto sa Nauvoo. Gidayeg usab Niya ug mihatag og tambag ngadto sa nag-unang mga lider sa Simbahan.
Nagsugo ang Ginoo nga usa ka pamahayag bahin sa ebanghelyo ang ipadala ngadto sa mga tigdumala sa yuta
Isulat ang pulong nga Lig-on diha sa pisara. Pangutan-a ang mga estudyante kon unsa nga matang sa tawo, sumala sa kalibutanong mga sumbanan, ang kasagaran nga gikonsiderar nga lig-on. Samtang motubag ang mga estudyante, isulat sa pisara ang ilang mga tubag ubos sa Lig-on. Isulat ang pulong nga Huyang diha sa pisara. Pangutan-a ang mga estudyante kon unsa nga mga kinaiya, sumala sa kalibutanong mga sumbanan, ang kasagaran nga may kalabutan sa pagkahuyang.
Sa unsang mga paagi nga ang kalibutan misulay sa paghimo sa usa ka batan-ong lalaki o batan-ong babaye nga mobati nga huyang sumala sa mga sumbanan niini?
Dapita ang mga estudyante sa pagbasa og hilum sa Doktrina ug mga Pakigsaad 124:1, nga mangita kon kinsay gihulagway sa Ginoo isip huyang. Dapita ang mga estudyante sa pagreport kon unsa ang ilang nadiskubrihan.
Sa unsa kaha nga mga paagi nga si Joseph Smith huyang sa dihang gitawag siya nga ipahiuli ang ebanghelyo? Sumala sa bersikulo 1, nganong tawagon man sa Ginoo ang huyang nga mohimo sa Iyang buhat? (Samtang motubag ang mga estudyante, i-summarize ang ilang mga tubag pinaagi sa pagsulat og usa ka baruganan nga susama sa mosunod diha sa pisara: Mapakita sa Ginoo ang Iyang kaalam pinaagi sa mga huyang nga mga butang sa yuta.)
Sa unsang mga paagi nga mapakita sa Ginoo ang Iyang kaalam pinaagi ni Propeta Joseph Smith?
Giunsa pagpalambo sa Ginoo ang mga abilidad ni Joseph Smith?
Hangyoa ang mga estudyante sa paghingalan og pipila ka calling o buluhaton nga mahimo nilang madawat samtang anaa pa sila sa ilang kabatan-on. (Ang mga tubag mahimong maglakip sa home teacher, sakop sa usa ka presidency sa klase o korum, misyonaryo, mamulong sa sakrament miting, o pag-fellowship sa usa ka tawo diha sa ilang ward o branch.)
I-refer ngadto sa baruganan nga gisulat diha sa pisara, ug ipangutana ang mosunod:
Sa unsang paagi nga ang paghinumdom niining kamatuoran makatabang kanato samtang modawat kita og nagkalain-laing mga tawag ug buluhaton nga moserbisyo diha sa Simbahan?
Sa unsang paagi nga napanalanginan kamo niadtong matinud-aong miserbisyo sa Ginoo bisan pa kon mahimong makita sila nga huyang sa mga mata sa kalibutan?
Pahinumdumi ang mga estudyante nga atol sa winter sa 1838–39, ang mga Santos mipahawa sa Missouri ug nanimuyo didto sa Illinois sa may Suba sa Mississippi. Didto ang mga Santos nagsugod pagtukod sa siyudad sa Nauvoo. Human makalahutay sa pagpanggukod ug daghang kalisud, ang mga Santos sa katapusan aduna nay dapit diin sila mahimong magpundok ug magtukod og siyudad diha sa kalinaw. Niadtong Disyembre 1840, ang lehislatura sa estado sa Illinois mihatag og charter ngadto sa siyudad sa Nauvoo, nga mitugot sa mga Santos sa pag-organisar og lokal nga gobyerno, pag-establisar og usa ka unibersidad, ug gani pagporma og lokal nga militia.
Dapita ang usa ka estudyante sa pagbasa og kusog sa Doktrina ug mga Pakigsaad 124:2–3. Hangyoa ang klase sa pagsunod ug sa pagpangita kon unsay gusto sa Ginoo nga buhaton ni Joseph Smith karon nga ang mga Santos nahimutang na didto sa Nauvoo. (Mahimo nimong ipasabut nga ang termino nga niini nga istaka diha sa bersikulo 2 nagpasabut sa Nauvoo.)
Unsa ang gipanawagan sa Ginoo nga buhaton ni Joseph Smith? (Mohimo og usa ka pamahayag bahin sa ebanghelyo ngadto sa mga tigdumala sa yuta.)
Dapita ang mga estudyante sa paggahin og pipila ka minuto sa pagsulat diha sa ilang mga class notebook o mga scripture study journal kon unsay ilang ilakip diha sa pamahayag bahin sa ebanghelyo ngadto sa mga tigdumala sa yuta. Aron matabangan ang mga estudyante, mahimo nimo silang hangyoon sa pagpamalandong sa unsay ilang nahibaloan nga tinuod sa ebanghelyo, ug isugyot nga ilang ilakip ang pagpamatuod bahin niadtong mga kamatuoran diha sa ilang mga pamahayag. Human sa pipila ka minuto, dapita ang pipila ka estudyante sa pagpakigbahin ngadto sa klase kon unsay ilang gisulat.
Hangyoa ang mga estudyante sa paghingalan og lain-laing mga paagi diin mapakigbahin nato ang ebanghelyo ngadto sa uban. (Ang mga ehemplo mahimong maglakip sa pagpakigbahin pinaagi sa social media, pagsulat og pagpamatuod sa usa ka Basahon ni Mormon ug dayon ihatag kini sa usa ka higala, ug sa pagdapit sa usa ka tawo ngadto sa simbahan o ngadto sa seminary.) Ilista sa pisara ang tubag sa mga estudyante.
Unsa man ang pipila sa labing epektibong mga paagi nga inyong napakigbahin ang ebanghelyo ngadto sa uban?
Isulat ang mosunod nga duha ka ulohan diha sa pisara: Unsaon Man? ug Ngano Man?
Dapita ang mga estudyante sa pagbasa og hilum sa Doktrina ug mga Pakigsaad 124:4–8. Hangyoa ang katunga sa klase sa pagpangita kon sa unsang paagiha gusto sa Ginoo nga isulat ang pamahayag, ug hangyoa ang laing katunga sa pagpangita kon nganong gusto sa Ginoo nga isulat ang pamahayag. Human makabaton ang mga estudyante og igong panahon sa pagtuon sa mga bersikulo, dapita ang pipila kanila sa pag-adto sa pisara ug sa pagsulat sa unsay ilang nadiskubrihan ubos sa tukma nga ulohan.
Dapita ang mga estudyante sa pagtino og usa ka baruganan gikan sa bersikulo 4 nga nagtudlo kon sa unsang paagiha gusto sa Ginoo nga atong ipakigbahin ang ebanghelyo ngadto sa uban. (Ang mga estudyante mahimong mogamit og lain-laing mga pulong, apan kinahanglan nilang mahibaloan ang butang sama sa mosunod nga baruganan: Kinahanglan natong isangyaw ang ebanghelyo diha sa kalumo ug pinaagi sa gahum sa Espiritu Santo.)
Unsa kaha ang gipasabut sa pagsangyaw sa ebanghelyo diha sa kalumo? Unsa kaha ang gipasabut sa pagsangyaw sa ebanghelyo pinaagi sa gahum sa Espiritu Santo?
I-refer ngadto sa lista sa mga paagi sa pagpakigbahin sa ebanghelyo diha sa pisara. Unsaon nato sa pagpakigbahin sa ebanghelyo diha sa kalumo ug pinaagi sa gahum sa Espiritu Santo gamit kining mga pamaagi?
Hangyoa ang usa ka estudyante sa pagbasa og hilum sa Doktrina ug mga Pakigsaad 124:9 ug sa pagpangita kon unsay gisulti sa Ginoo nga Iyang buhaton samtang gisangyaw sa mga Santos ang ebanghelyo.
Dapita ang mga estudyante sa pagtino sa usa ka doktrina nga gitudlo diha sa bersikulo 9 kalabut kon unsay mabuhat sa Ginoo alang niadtong maminaw sa ebanghelyo. Ang mga estudyante mahimong mogamit og lain-laing mga pulong, apan kinahanglan nilang mahibaloan ang butang nga susama sa mosunod nga kamatuoran: Ang Ginoo makapahumok sa kasingkasing niadtong maminaw sa ebanghelyo.
Sa unsang paagi nga kining doktrina dunay kalabutan mahitungod kon unsaon nato pagsangyaw ang ebanghelyo diha sa kalumo ug pinaagi sa gahum sa Espiritu Santo?
I-summarize ang Doktrina ug mga Pakigsaad 124:10–14 pinaagi sa pagpasabut nga ang Ginoo miingon nga manawagan Siya sa mga tigmando sa yuta sa paghatag og tabang ngadto sa mga Santos samtang nagsangyaw ang mga Santos sa ebanghelyo ngadto kanila. Agig dugang, gisugo sa Ginoo si Robert B. Thompson sa pagtabang kang Joseph Smith sa pagsulat sa pamahayag bahin sa ebanghelyo.
Ipasabut nga bisan kon ang buhat sa pagsulat niini nga pamahayag nagsugod dayon human nadawat ang pagpadayag nga narekord diha sa Doktrina ug mga Pakigsaad 124, pipila ka butang ang nakapugong nga mahuman kini ug mamantala hangtud sa pipila pa ka tuig human niana. Namatay si Robert B. Thompson pito ka bulan human masugdi ang pagsulat. Ang iyang kamatayon, ang panahon nga gigahin sa pagtukod sa Templo sa Nauvoo, ug ubang mga obligasyon nakapugong sa pagkahuman sa pamahayag sa wala pa mamatay si Propeta Joseph Smith. Ang pamahayag nahuman ra sa katapusan ni Parley P. Pratt ug namantala isip usa ka pamphlet didto sa Siyudad sa New York niadtong Abril 6, 1845, ug pinaagi sa Millennial Star niadtong Oktubre 22, 1845. (Tan-awa sa Ezra Taft Benson, “A Message to the World,” Ensign, Nob. 1975, 32–34.)
Naghatag ang Ginoo og mga instruksyon ngadto sa mga lider sa Simbahan didto sa Nauvoo
Hangyoa ang mga estudyante sa paghunahuna og usa ka higayon nga ang usa ka tawo mihatag kanila og sinsero nga komplimento. Dapita ang pipila ka mga estudyante sa pagpakigbahin sa ilang mga kasinatian ug nganong kining mga komplimento makahuluganon ngadto kanila.
Ipasabut nga namulong ang Ginoo sa pipila ka indibidwal diha niini nga pagpadayag ug midayeg kanila pinaagi sa pagpasabut sa ilang mga kalig-on ug mga kontribusyon. Dapita ang mga estudyante sa pagsiksik og hilum sa Doktrina ug mga Pakigsaad 124:15–20 ug sa pagpangita kon unsay gisulti sa Ginoo mahitungod niining mga indibidwal. Mahimo nimong isugyot nga markahan nila ang mga pulong nga mas nabantayan nila. Human sa igong panahon, dapita ang mga estudyante sa pag-atubang ngadto sa usa ka partner ug ipakigbahin ang ilang nadiskubrihan, lakip na kon hain nga mga pamahayag nga mas nabantayan nila ug ngano man.
Mahimo nimong ipasabut nga diha sa Doktrina ug mga Pakigsaad 124:19 namahayag ang Ginoo nga tulo ka matinud-anong mga lalaki nga bag-ohay lang nga namatay (David W. Patten, Edward Partridge, ug Joseph Smith Sr., ang amahan sa Propeta) ang gidawat ngadto sa presensya sa Ginoo.
Dapita ang mga estudyante sa pagribyu kon unsay gisulti sa Ginoo mahitungod nila ni Hyrum Smith ug George Miller diha sa Doktrina ug mga Pakigsaad 124:15, 20.
Unsay gibati sa Ginoo mahitungod niadtong kinsa dunay kaligdong? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Gihigugma ug gisaligan sa Ginoo kadtong dunay kaligdong sa kasingkasing. Mahimo nimong isugyot nga markahan sa mga estudyante ang mga pulong nga nagtudlo niini nga baruganan diha sa mga bersikulo 15 ug 20.)
Unsaon ninyo pag-define sa kaligdong sa kasingkasing?
Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles:
Imahe
Elder Joseph B. Wirthlin
“Para nako, ang kaligdong nagpasabut nga kanunayng maghimo kon unsa ang husto ug maayo, bisan unsa pa man ang hinanaling mga sangputanan. Nagpasabut kini nga magmatarung gikan gayud sa kahiladman sa atong kalag, dili lamang sa atong mga lihok apan, mas importante, diha sa atong mga hunahuna ug sa atong mga kasingkasing. Ang personal nga kaligdong nagpasabut sa maong pagkamasaligan ug dili madala sa kahiwian nga kita dili makahimo sa ingon nga sayop sa usa ka pagsalig o pakigsaad”(“Personal Integrity,” Ensign, Mayo 1990, 30).
Base sa depinisyon ni Elder Wirthlin, ngano kaha nga ang Ginoo nahigugma niadtong dunay kaligdong sa kasingkasing?
Dapita ang mga estudyante sa pagpamalandong og aspeto sa ilang kinabuhi diin sila dunay dugang nga kaligdong. Awhaga sila nga maghimo og personal nga tumong sa pagpalambo sa ilang kaligdong nianang dapita.
Tapusa pinaagi sa pagpakigbahin sa imong pagpamatuod bahin sa mga kamatuoran nga nahibaloan sa mga estudyante karon.
Niadtong 1975 si Presidente Ezra Taft Benson nagserbisyo isip Presidente sa Korum sa Napulog Duha ka mga Apostoles. Sa ngalan sa iyang mga kaigsoonan diha sa Korum sa Napulog Duha, gipamatud-an niya pag-usab ang mensahe sa pamahayag nga gisulat sa mga Apostoles niadtong 1845 agig tubag sa sugo diha sa Doktrina ug mga Pakigsaad 124:2–3. (Tan-awa sa Ezra Taft Benson, “A Message to the World,” Ensign, Nob. 1975, 33–34.)