Niining bahina sa seksyon 20, ang Ginoo mihatag og mga instruksyon kabahin sa pagdumala sa Iyang Simbahan, lakip ang mga pagpasabut mahitungod sa mga kinahanglanon alang sa bunyag ug pagkumpirma ug ang hustong paagi sa pagpahigayon sa mga ordinansa sa bunyag, kumpirmasyon, ug sa sakrament.
Ang Ginoo mipadayag sa mga kinahanglanon alang sa mga indibidwal sa wala pa ug sa pagkahuman na sa bunyag
Dapita ang mga estudyante sa paghunahuna mahitungod sa unsay ilang isulti sa mosunod nga sitwasyon:
Usa ka higala nga miyembro sa laing simbahan nakaangkon og pagpamatuod sa gipahiuli nga ebanghelyo. Nangutana siya kanimo, “Unsay angay nakong buhaton aron ko mabunyagan ug mahimong miyembro sa inyong simbahan?”
Hangyoa ang mga estudyante sa pagsulat sa ilang mga tubag niini nga pangutana diha sa ilang mga class notebook o mga scripture study journal. Dayon dapita sila sa pagbasa sa Doktrina ug mga Pakigsaad 20:37, nga mangita sa mga kinahanglanon alang niadtong nagtinguha nga mabunyagan. Mahimo nimong isugyot nga markahan sa mga estudyante ang matag kinahanglanon nga ilang madiskubrihan. Aron matabangan ang mga estudyante nga mas makasabut sa kahulugan niini nga bersikulo, mahimo nimong ipasabut nga ang mga tawo nga adunay “masulub-on nga kasingkasing ug mahinulsulon nga espiritu” mapainubsanon ug andam nga modawat sa kabubut-on sa Dios. Mobati sila og hilabihan nga kasubo tungod sa sala ug sinsero nga tinguha nga maghinulsol.
Isulat sa pisara ang mosunod nga dili kompleto nga pamahayag: Sa dili pa bunyagan ang mga tawo, kinahanglan sila nga …
Dapita ang usa ka estudyante sa pagduol sa pisara ug maoy mahimong tigsulat. Pangutan-a ang klase sa mosunod:
Base sa Doktrina ug mga Pakigsaad 20:37, unsay kinahanglang ipakita sa usa ka tawo sa dili pa siya mabunyagan? (Samtang motubag ang mga estudyante niini nga pangutana, hangyoa ang tigsulat sa pagkompleto sa pamahayag sa pisara. Ang tigsulat mahimong mosulat og sama niini: Sa dili pa bunyagan ang mga tawo, kinahanglan sila nga mapainubsanon, mahinulsulon, andam sa pagdala diha kanila sa ngalan ni Jesukristo, ug determinado sa pagserbisyo Kaniya hangtud sa katapusan.)
Ngano kaha nga ang usa ka tawo kinahanglang aduna niini nga mga kinahanglanon sa dili pa bunyagan?
Ipasabut nga ang Doktrina ug mga Pakigsaad 20:37 naglatid usab sa pakigsaad nga atong gihimo sa dihang kita gibunyagan. Dapita ang mga estudyante sa pagpamalandong sa unsay ilang gibuhat karon aron magpuyo sumala sa ilang pakigsaad sa bunyag.
Dapita ang mga estudyante sa paghunahuna nga ang mao gihapon nga higala nangutana kon unsay mahitabo kon ang usa ka tawo bunyagan. Human makatubag ang pipila ka mga estudyante, dapita ang usa ka estudyante sa pagbasa og kusog sa Doktrina ug mga Pakigsaad 20:72–74. Mahimo nimong isugyot nga markahan sa mga estudyante ang paagi sa bunyag nga gihulagway sa Ginoo.
Sumala sa mga bersikulo 72–74, sa unsang paagi gusto sa Ginoo nga ipahigayon ang mga bunyag? (Ang mga tubag sa mga estudyante kinahanglang magpakita sa mosunod nga baruganan: Ang bunyag kinahanglang himoon pinaagi sa pagpaunlod ug ipahigayon pinaagi sa tawo nga naghupot sa tukma nga awtoridad. Isulat kini nga baruganan sa pisara ubos sa nag-una nga baruganan.)
Dapita ang mga estudyante nga hilum nga mobasa sa Doktrina ug mga Pakigsaad 20:68–69, nga ilhon ang mga gilauman sa Ginoo alang sa matag usa kanato human kita mabunyagi. Mahimo nimong isugyot nga markahan sa mga estudyante kini nga mga gilauman.
Unsa ang pipila ka butang nga inyong nadiskubrihan nga gilauman sa Ginoo kanato human kita mabunyagi?
Pahinumdom: Ang mga estudyante tingali mangutana mahitungod sa kinahanglanon diha sa bersikulo 68 nga ang bag-ong nabunyagan nga mga miyembro kinahanglang tudloan sa mga elder sa dili pa sila kumpirmahan. Ipasabut nga ang buhat karon sa pagtudlo sa mga leksyon sa misyonaryo ngadto sa mga investigator sa wala pa ang bunyag nagtugot sa mga tawo nga makumpirmahan ug modawat sa gasa sa Espiritu Santo human sila mabunyagi.
Gikan sa bersikulo 69, unsa ang inyong nakat-unan kon unsaon nato sa pagpakita sa Ginoo sa atong katakus human kita mabunyagi? (Ang mga tubag sa mga estudyante tingali magkalahi, apan kinahanglan silang mahibalo sa mosunod nga baruganan: Human sa bunyag, mapakita nato sa Ginoo ang atong katakus pinaagi sa atong matarung nga kinabuhi ug sinultihan. Isulat kini nga kamatuoran diha sa pisara ubos sa duha nga nag-una.)
Unsa kaha ang gipasabut nga “mopakita … sa matarung nga kinabuhi ug sinultihan [panultihon]”? (Tingali kinahanglan nimong ipasabut nga makapakita ang usa ka tawo “sa matarung nga kinabuhi ug sinultihan” pinaagi sa mga lihok, kinaiya, ug pinulongan nga masulundon sa Dios.)
Base sa mga panginahanglan sa imong mga estudyante, ikonsiderar ang paghangyo kanila sa pagdangup ngadto sa usa ka seksyon sa Alang sa Kalig-on sa mga Kabatan-onan alang sa piho nga tambag kon sa unsang paagi ang usa ka batan-on mahimong makapakita “sa matarung nga kinabuhi ug sinultihan.”
Kanus-a kamo nakakita sa uban nga “[mi]pakita … sa matarung nga kinabuhi ug sinultihan”? Sa unsang paagi kaha nga ang ilang mga lihok ug kinaiya nakaimpluwensya sa uban libut kanila?
Aron matabangan ang mga estudyante nga makagamit niini nga baruganan, awhaga sila sa pagpamalandong kon sa unsang paagi sila mas hingpit nga makapakita og “matarung nga kinabuhi ug sinultihan” sa sunod nga pipila ka mga adlaw. Kon adunay mga estudyante nga komportable nga mopaambit kon unsaon nila sa pagbuhat niini, dapita sila sa pagpaambit sa ilang mga ideya diha sa klase. Mahimo ka usab nga mobuhat niini, mopaambit sa imong pagpamatuod mahitungod sa mga panalangin nga moabut kon kita motahud sa atong pakigsaad sa bunyag.
Ang Ginoo mihatag og mga instruksyon kabahin sa pagpahigayon sa sakrament
Pagdapit og duha ka estudyante nga moduol sa atubangan sa klase. Hangyoa ang usa sa mga estudyante nga morepresentar sa usa ka higala kinsa motambong sa miting sa sakrament sa unang higayon ug gustong mahibalo ngano nga ang pan ug tubig ipaambit ngadto sa kongregasyon. Hangyoa ang laing estudyante sa pagpasabut sa ordinansa sa sakrament ngadto sa higala. Human mopakigbahin ang estudyante sa iyang mga hunahuna, awhaga ang klase sa pagpangita og suporta gikan sa kasulatan alang sa unsay gipasabut sa estudyante, ingon man ang bisan unsang dugang nga mga panabut nga ilang magamit sa pagpasabut sa sakrament, samtang magtuon sila sa mosunod nga pipila ka mga bersikulo.
Dapita ang usa ka estudyante sa pagbasa sa Doktrina ug mga Pakigsaad 20:75, hangyoa ang klase sa pagsunod. (Mahimo nimong ipasabut nga naggamit kita karon og tubig imbis bino diha sa sakrament. Tan-awa sa D&P 27:1–2.)
Ngano kaha nga gisugo kita nga kanunay nga moambit sa sakrament?
Isip kabahin niini nga diskusyon, dapita ang usa ka estudyante sa pagbasa sa mosunod nga pamahayag ni Elder Melvin J. Ballard sa Korum sa Napulog Duha ka mga Apostoles. (Mahimo nimong ipasabut nga dihang si Elder Ballard namulong kabahin sa “pagtungha diha sa lamesa sa sakrament,” siya naghisgot lamang sa buhat sa pag-ambit sa sakrament.)
Imahe
Elder Melvin J. Ballard
“Usa ka butang nga makapahimong luwas sa kada lalaki ug babaye mao ang pagtungha diha sa lamesa sa sakrament sa kada adlawng Igpapahulay. Dili kaayo kita mahilayo sulod sa usa ka semana—dili sobra kalayo nga, pinaagi sa proseso sa pag-imbistigar sa kaugalingon, dili na nato mahusto ang mga sayop nga atong nabuhat. … … Ang dalan ngadto sa lamesa sa sakrament mao ang agianan sa kahilwasan alang sa mga Santos sa Ulahing mga Adlaw” (Bryant S. Hinckley, Sermons and Missionary Services of Melvin Joseph Ballard [1949], 151).
Isulat ang mosunod nga mga ulohan sa pisara:
Unsa ang atong gisaad Unsa ang gisaad sa Ginoo
Hangyoa ang katunga sa klase sa pagbasa sa Doktrina ug mga Pakigsaad 20:77–79, nga mangita sa unsay atong gisaad samtang kita moambit sa sakrament. Dapita ang laing katunga sa pagbasa sa sama nga mga bersikulo, nga mangita kon unsay mga gipangsaad sa Ginoo. Human ang mga estudyante nakagahin na og igong panahon sa pagtuon sa tudling, hangyoa sila sa pagreport sa unsay ilang nakit-an. Dapita ang usa ka estudyante sa pagsulat sa ilang mga tubag diha sa pisara ubos sa tukma nga mga ulohan. Samtang kompletuhon sa mga estudyante kini nga mga lista, mahibalo sila sa mosunod nga mga baruganan:
Kon moambit kita sa sakrament, kita mosaksi nga andam kitang modala diha sa atong kaugalingon sa ngalan ni Jesukristo, nga kita kanunay mohinumdom Kaniya, ug nga kita mosunod sa Iyang mga sugo.
Kon magmatinud-anon kita sa mga saad nga atong gihimo atol sa sakrament, kanunay kitang makabaton sa Espiritu uban kanato.
Mahimo kang mosugyot nga markahan sa mga estudyante kini nga mga kamatuoran diha sa ilang mga kasulatan.
Sa pagtandi sa mga lista sa pisara ngadto sa Doktrina ug mga Pakigsaad 20:37, unsa nga mga pagkapareha ang inyong makita sa mga saad nga gihimo atol sa sakrament ug sa pakigsaad sa bunyag?
Ipasabut nga kon kita moambit sa sakrament, kita nagbag-o sa mga pakigsaad nga atong gihimo sa dihang kita gibunyagan ug gikumpirmahan.
Unsaon nato sa pagpakita ang atong kaandam sa pagdala diha sa atong mga kaugalingon sa pangalan ni Jesukristo? (Ang mga tubag mahimong maglakip sa pagbarug sa unsay matarung, pagsulti sa uban nga kita mga miyembro sa Simbahan ni Jesukristo sa mga Santos sa Ulahing mga Adlaw, pagpaambit sa atong pagtuo diha Kaniya, ug pag-apil sa Iyang buhat.)
Unsa ang pipila ka butang nga atong mahimo aron kanunay nga mohinumdom sa Manluluwas?
Sa unsang paagi nga ang pag-ambit sa sakrament makatabang kanato nga “mopakita … sa matarung nga kinabuhi ug sinultihan”?
Aron matabangan ang mga estudyante nga makasabut sa bili sa pagbaton sa Espiritu uban kanato, hangyoa ang usa ka estudyante sa pagbasa sa mosunod nga pamahayag gikan sa Matinud-anon sa Tinuhoan. Hangyoa ang klase sa pagpaminaw alang sa mga panalangin sa pagbag-o sa atong pakigsaad sa bunyag.
“Ikaw makadawat og dakong mga panalangin kon imong huptan ang pakigsaad sa bunyag. Samtang imo kining gibag-o, ang Ginoo mobag-o sa gisaad nga kapasayloan sa imong mga sala. Nalimpyo gikan sa sala, makahimo ka nga ‘kanunay makabaton sa iyang Espiritu uban [kanimo]’ (D&P 20:77). Ang makanunayon nga panag-uban sa Espiritu maoy usa sa pinakamahinungdanon nga mga gasa nga imong madawat niini nga pagka-mortal. Ang Espiritu mogiya kanimo diha sa mga dalan sa pagkamatarung ug kalinaw, magdala kanimo sa kinabuhing dayon uban sa imong Amahan sa Langit ug ni Jesukristo” (Matinud-anon sa Tinuhoan: Usa ka Pakisayran sa Ebanghelyo [2004], 217).
Dapita ang mga estudyante sa pagpamalandong (o pagsulat) kon unsaon nila pag-andam ang ilang mga kaugalingon sa pag-ambit sa sakrament karong semanaha. Mahimo ka nga mopaambit sa imong pagpamatuod sa kaimportante sa pagbag-o sa atong pakigsaad sa bunyag matag semana.
Ang Ginoo misugo sa mga lider sa Simbahan sa pagtipig og tukma nga mga rekord sa pagkamiyembro sa Simbahan
I-summarize ang Doktrina ug mga Pakigsaad 20:81–84 pinaagi sa pagpahibalo sa mga estudyante nga ang mga tighupot sa priesthood sa unang Simbahan gisugo sa pagrekord sa mga ngalan sa mga tawo nga mipasakop sa Simbahan. Gitipigan nila kini nga mga ngalan diha sa usa ka libro. Ang mga ngalan niadtong mibiya sa Simbahan gipapas gikan sa libro. Agig dugang, ang mga miyembro sa Simbahan kinsa mibalhin gikan sa usa ka dapit ngadto sa lain magdala og sertipiko sa ilang pagkamiyembro aron ihatag ngadto sa ilang bag-ong mga lider sa priesthood. Sa atong panahon, ang mga lider sa Simbahan padayon nga nagtipig og tukma nga mga rekord sa pagkamiyembro, apan ang pamaagi sa pagbuhat niini mas maayo.
Mahimo nimong tapuson pinaagi sa pagpaambit sa imong pagpamatuod sa mga doktrina ug baruganan nga nahisgutan niini nga leksyon.
Niadtong Abril 6, 1830, isip kabahin sa miting sa pag-organisar sa gipahiuli nga Simbahan ni Jesukristo, si Joseph Smith ug Oliver Cowdery mikumpirma niadtong nabunyagan na ug mihatag kanila sa gasa sa Espiritu Santo (tan-awa sa History of the Church, 1:61).
Ang mga ginikanan ni Joseph Smith nabunyagan ug nakumpirmahan nianang adlawa. Usa kini ka panahon sa hingpit nga kalipay alang sa Propeta, kinsa midayeg, “Halangdon ang akong Dios! nga nabuhi pa ako aron makita ang akong kaugalingon amahan nga nabunyagan ngadto sa tinuod nga Simbahan ni Jesukristo!” (sa Lucy Mack Smith, History of Joseph Smith by His Mother, ed. Preston Nibley [1958], 168; tan-awa usab sa History of the Church, 1: 79).
Si Elder David A. Bednar sa Korum sa Napulog Duha ka mga Apostoles mitudlo nga ang pag-ampo ug pagtuon sa kasulatan motabang kanato sa pagtuman sa atong pakigsaad sa bunyag nga kanunay mohinumdom sa Ginoo.
Imahe
Elder David A. Bednar
“Ikonsiderar ang mga rason sa atong pag-ampo ug pagtuon sa mga kasulatan. … Kining balaan nga mga naandang buhaton una sa tanan maoy mga paagi diin kita kanunay nga makahinumdom sa Langitnong Amahan ug sa Iyang Hinigugma nga Anak ug kini mga kinahanglanon alang sa umaabut nga pakig-uban sa Espiritu Santo. (“Dawata ang Espiritu Santo,”Liahona, Nob. 2010, 96).
Ang mosunod nga pamahayag ni Presidente James E. Faust sa Unang Kapangulohan nagtabang kanato sa pagsabut sa kaimportante sa pakig-uban sa Espiritu Santo:
Imahe
President James E. Faust
“Ang bunyag pinaagi sa pagpaunlod sa tubig mao ang ‘pasiuna nga ordinansa sa ebanghelyo, ug kinahanglang pagasundan sa bunyag sa Espiritu aron mahingpit.’ [Bible Dictionary, Baptism,” 618.] …
“Kon takus, kadtong naghupot niining espirituhanong gasa makatagamtam og mas dako nga pagsabut ug paglambo ug paggiya sa tanan nga mga kalihokan sa kinabuhi, sa espirituhanon ug temporal. Ang Espiritu Santo mopamatuod kanato sa kamatuoran ug mopatuhop diha sa atong mga kalag sa katinuod sa Dios nga Amahan ug Iyang Anak, si Jesukristo, nga sigurado kaayo nga walay yutan-ong gahum o awtoridad ang makapabulag kanato gikan niana nga kahibalo. [Tan-awa sa 2 Ne. 31:18.] Sa pagkatinuod, ang wala makaangkon og gasa sa Espiritu Santo daw sama sa pagkaangkon og lawas nga walay immune system. …
“Kadtong nagbaton sa gasa sa Espiritu Santo human sa bunyag ug kumpirmasyon makadawat og dugang kahayag ug pagpamatuod. Tungod kini kay ang gasa sa Espiritu Santo mao ang ‘usa ka permanente nga saksi ug mas taas nga pagtuga kay sa ordinaryo nga pag-impluwensya sa Espiritu Santo.’ [Sa James R. Clark, comp., Messages of the First Presidency of The Church of Jesus Christ of Latter-day Saints, 6 vols. (1965–75), 5:4.] Mas taas kini nga pagtuga tungod kay ang gasa sa Espiritu Santo makalihok isip ‘makalimpyong himan sa pagputli sa usa ka tawo ug pagbalaan kaniya gikan sa tanang sala.’ [Bible Dictionary, “Holy Ghost,” 704.]” (“Born Again,”Ensign, Mayo 2001, 55, 58).