Ang Doktrina ug mga Pakigsaad 132 naglangkob og usa ka pagpadayag bahin sa bag-o ug walay katapusan nga pakigsaad sa kaminyoon. Bisan kon kini nga pagpadayag narekord niadtong Hulyo 12, 1843, ang pipila ka kamatuoran diha sa pagpadayag nahibaloan ug gitudlo na ni Propeta Joseph Smith sa sayong bahin sa 1831. Ang pagpadayag pagahisgutan sa duha ka leksyon. Kini nga leksyon naghisgot sa mga kondisyon sa bag-o ug walay katapusan nga pakigsaad sa kaminyoon ug sa mga saad nga ipadangat ngadto niadtong motahud niini. Ang sunod nga leksyon maghisgot sa baruganan bahin sa dinaghan nga kaminyoon.
Nagtakda ang Ginoo sa mga kondisyon sa bag-o ug walay katapusang pakigsaad
Pahinumdom: Ang Doktrina ug mga Pakigsaad 132:1–2 mahisgutan sa leksyon 140 isip kabahin sa panaghisgutan bahin sa dinaghan nga kaminyoon.
Sa dili pa magsugod ang klase, isulat ang mosunod nga mga pangutana diha sa pisara:
Nganong importante man kaninyo ang mahangturong kaminyoon?
Unsa may inyong buhaton, sugod karon, aron maandam ang inyong kaugalingon nga mosulod sa templo ug maminyo karon ug sa tibuok kahangturan?
Unsa nga mga panalangin ang moabut niini nga kinabuhi ngadto niadtong nagsunod sa balaod sa Dios nga ma-sealed sa templo?
Dapita ang mga estudyante sa pagpamalandong niining mga pangutana samtang magtuon sila sa Doktrina ug mga Pakigsaad 132 karon.
Sugdi pinaagi sa pagpangutana sa mosunod:
Unsa man ang bag-o ug walay katapusan nga pakigsaad?
Aron matabangan ang mga estudyante nga makasabut sa kahulugan sa mga pulong nga “ang bag-o ug walay katapusan nga pakigsaad,” basaha ang mosunod nga pamahayag ni Presidente Joseph Fielding Smith:
Imahe
President Joseph Fielding Smith
“Karon dunay klaro nga detalyadong kahulugan sa bag-o ug walay katapusan nga pakigsaad. Mao kini ang tanan—ang kahingpitan sa ebanghelyo. Busa ang kaminyoon kon tukma nga napahigayon, bunyag, ordinasyon ngadto sa priesthood, ang uban pa—matag kontrata, matag obligasyon, matag pagbuhat nga may kalabutan sa ebanghelyo ni Jesukristo, nga nasilyo pinaagi sa Balaang Espiritu sa saad sumala sa iyang balaod nga gihatag dinhi, kabahin sa bag-o ug walay katapusan nga pakigsaad” (Doctrines of Salvation, comp. Bruce R. McConkie, 3 vols. [1954–56], 1:158; mga italic gitangtang).
Dapita ang mga estudyante sa pagbasa og hilum sa Doktrina ug mga Pakigsaad 132:3-5, nga mangita sa resulta sa pagsalikway sa bag-o ug walay katapusan nga pakigsaad, nga naglakip sa pakigsaad sa celestial nga kaminyoon.
Unsa man ang resulta sa bag-o ug walay katapusan nga pakigsaad? (Samtang motubag ang mga estudyante, mahimo nimong ipasabut nga ang pulong nga silotan nagpasabut nga ang tawo mapugngan diha sa iyang mahangturong pag-uswag.)
Dapita ang usa ka estudyante sa pagbasa og kusog sa Doktrina ug mga Pakigsaad 132:6. Hangyoa ang klase sa pagsunod ug mangita sa panalangin nga gisaad sa Ginoo niadtong matinud-anon sa bag-o ug walay katapusan nga pakigsaad.
Sumala sa bersikulo 6, unsay atong madawat kon matinud-anon kita sa bag-o ug walay katapusan nga pakigsaad? (Samtang motubag ang mga estudyante niini nga pangutana, mahimo nimong ipasabut nga ang kalainan tali sa pagkasinilotan, o mapugngan sa pag-uswag, ug pagdawat “sa kahingpitan sa himaya [sa Ginoo].”)
Ipasabut nga ang mga tawo kasagaran mohimo og mga kontrata, o mga kasabutan, sa usag usa. Dapita ang usa ka estudyante sa pagbasa og kusog sa Doktrina ug mga Pakigsaad 132:7. I-assign ang katunga sa klase sa pagpangita sa unsay mahitabo sa hinimo sa tawo nga mga kontrata kon ang mga tawo mamatay. Dapita ang laing katunga sa pagtino sa duha ka kondisyon aron mahimong epektibo ang mga pakigsaad human kita mamatay.
Unsay mahitabo sa hinimo sa tawo nga mga kontrata? (Matapos kini sa kamatayon.)
Sumala sa bersikulo 7, unsa ang duha ka butang nga kinahanglang mahitabo gayud aron mahimong epektibo ang mga pakigsaad human kita mamatay? (Kinahanglan gayud kining himoon pinaagi sa awtoridad sa priesthood, ug kinahanglan gayud nga kini “nasulod ngadto ug nabugkos pinaagi sa Balaang Espiritu sa saad.”)
Ipasabut nga “ang Espiritu Santo mao ang Balaang Espiritu sa Saad. … Ang Balaang Espiritu sa Saad mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan” (Giya ngadto sa mga Kasulatan, “Balaan nga Espiritu sa Saad,” scriptures.lds.org). Dapita dayon ang mga estudyante sa pagbasa og usab sa bersikulo 7 ug i-summarize kini sa usa ka pamahayag sa doktrina. Isulat ang ilang tubag diha sa pisara. Pananglitan, mahimong mosulat ka og butang nga susama sa mosunod: Gawas kon ang usa ka pakigsaad gihimo pinaagi sa tukma nga awtoridad sa priesthood ug nasilyo pinaagi sa Balaang Espiritu sa Saad, matapos kini sa kamatayon.
Aron matabangan ang mga estudyante nga mas makasabut niini nga doktrina, hangyoa sila sa pag-rephrase niini sa positibo nga paagi. Isulat ang ilang tubag diha sa pisara. Pananglitan, mahimong mosulat ka og butang nga susama sa mosunod: Kon ang usa ka pakigsaad gihimo pinaagi sa tukma nga awtoridad sa priesthood ug nasilyo pinaagi sa Balaang Espiritu sa Saad, molungtad kini sa kahangturan.
I-summarize ang Doktrina ug mga Pakigsaad 132:8–14 pinaagi sa pagpasabut nga ang Ginoo nagpadayon sa pagtakda og mga kondisyon sa Iyang mga balaod ug mga ordinansa. Namahayag siya nga ang tanan nga Iyang giestablisar magpabilin sa kahangturan apan ang uban sa katapusan pagalaglagon.
Dapita ang upat ka estudyante nga magpuli-puli sa pagbasa og kusog sa Doktrina ug mga Pakigsaad 132:15–18. Hangyoa ang klase sa pagsunod, nga mangita sa duha ka lain-laing mga paagi nga ang usa ka lalaki ug usa ka babaye mahimong mosulod sa kaminyoon nga manag-uban. Basaha dayon og kusog ang mosunod nga mga ehemplo. Human sa matag ehemplo, pangutan-a ang mga estudyante kon unsa nga mga kamatuoran nga gitudlo diha sa Doktrina ug mga Pakigsaad 132:15–18 ang magamit niana nga sitwasyon.
Ehemplo 1: Usa ka lalaki ug usa ka babaye ang nagkahigugmaay, nagtuman sa balaod sa kaputli, ug malipayong naminyo pinaagi sa lokal nga lider sa gobyerno. Wala sila ma-sealed sa templo. Ang seremonya sa ilang kaminyoon naglakip sa mga pulong nga “hangtud ang kamatayon mobulag kanato.” Pipila ka tuig ang milabay, ang bana namatay sa usa ka aksidente. Unsa nga mga kamatuoran nga gitudlo diha sa Doktrina ug mga Pakigsaad 132:15–17 ang magamit? (Ang bana ug asawa dili na minyo.)
Ehemplo 2: Usa ka lalaki ug usa ka babaye naminyo. Misaad sila sa usag usa nga kanunay silang mohigugma sa usag usa ug kanunay silang magkauban, apan wala sila ma-sealed sa templo. Nagtuo sila nga tungod sa ilang gugma, ang Dios motugot kanila nga mag-uban sa kahangturan. Unsa nga mga kamatuoran nga gitudlo diha sa Doktrina ug mga Pakigsaad 132:18 ang magamit? (Ang ilang kaminyoon dili magpadayon human sila mamatay.)
Ang Ginoo misaad og mga panalangin niadtong kinsa motuman sa balaod sa celestial nga kaminyoon
Dapita ang usa ka estudyante sa pagbasa og kusog sa mosunod nga kasinatian nga gipakigbahin ni Elder Enrique R. Falabella of the Seventy. Hangyoa ang klase sa pagpaminaw kon unsay nakapasubo nila ni Elder ug Sister Falabella ug unsay nakapalipay kanila.
Imahe
Elder Enrique R. Falabella
“Sa dihang mipauli ko gikan sa akong misyon, nahimamat nako ang matahum nga batan-ong babaye. … Nadani ko niya sa unang higayon nga nakita nako siya.
“Ang akong asawa dunay tumong nga magminyo sa templo, bisan kaniadto ang pinakaduol nga templo biyahion pa og kapin sa mga 4,000 ka milya (6,400 km).
“Ang among sibil nga kaminyoon malipayon ug masulub-on, kay naminyo kami nga dunay kinutuban. Ang opisyal misulti sa mga pulong ‘Ug karon ako modeklarar kaninyo nga bana ug asawa,’ apan human dayon niana, siya misulti, ‘hangtud sa kamatayon kamo magbulag.’
“Mao nga nagsakripisyo mi aron makapalit og tiket padulong ra ngadto sa Templo sa Mesa Arizona.
“Didto sa templo, samtang nagluhod mi sa altar, ang awtorisado nga sulugoon misulti sa mga pulong nga akong gihandom, nga nagdeklarar namo nga bana ug asawa alang sa karon ug sa tibuok kahangturan” (“Ang Panimalay: Ang Eskwelahan sa Kinabuhi,”Liahona, Mayo 2013, 102).
Nganong ang mga Falabella wala man matagbaw sa ilang sibil nga kaminyoon?
Dapita ang usa ka estudyante sa pagbasa og kusog sa Doktrina ug mga Pakigsaad 132:19–21. Hangyoa ang klase sa pagsunod, nga mangita sa mga panalangin nga gisaad sa Ginoo niadtong matinuoron sa bag-o ug walay katapusan nga pakigsaad sa kaminyoon. Tungod kay kining tudling taas ug medyo lisud sabton, mahimong kinahanglan nimong mohunong kadali og pipila ka higayon aron makahatag og mga pagpasabut ug motubag sa mga pangutana. Ang mosunod nga impormasyon mahimong makatabang kanimo:
Ang pulong nga mosunod nagpasabut nga modawat o magpadayon, mao nga ang mga pulong nga “mosunod sa akong pakigsaad” (bersikulo 19) ug“mosunod sa akong balaod” (bersikulo 21) nagpasabut nga magpabiling matinuoron ngadto sa pakigsaad ug balaod sa Ginoo.
Ang bersikulo 19 naglangkob sa saad nga kon ang lalaki ug babaye maminyo diha “sa bag-o ug walay katapusan nga pakigsaad” ug “gibugkos ngadto kanila pinaagi sa Balaan nga Espiritu sa saad,” nan sila “mobangon sa unang pagkabanhaw; ug … makapanunod og mga trono, mga gingharian, mga kayutaan, ug mga kagamhanan,” kon sila “mosunod [sa] pakigsaad, ug dili makahimo sa pagpatay diin makapaagas og dugo sa walay sala.” (Tan-awa usab sa D&P 132:27.)
Ang mga pulong nga “pagpadayon sa mga binhi hangtud sa hangtud” (bersikulo 19) ug “sila nagpadayon” (bersikulo 20) nagpasabut sa saad nga ang atong mga pamilya ug atong kaliwatan magpadayon sa kahangturan.
Isulat ang Kon nan diha sa pisara. Dapita ang mga estudyante nga sulatan ang mga blangko sa pag-summarize sa mga saad nga gihatag diha sa Doktrina ug mga Pakigsaad 132:19–21. Isulat ang ilang mga tubag diha sa pisara. Mahimo nilang mahibaloan ang mga baruganan sama sa mosunod:
Kon ang usa ka lalaki ug usa ka babaye motuman sa bag-o ug walay katapusang pakigsaad sa kaminyoon, nan makadawat sila og kahimayaan [exaltation] ug himaya [glory].
Kon ang usa ka lalaki ug usa ka babaye motuman sa bag-o ug walay katapusang pakigsaad sa kaminyoon, nan sila dunay mahangturong pagsanay sa kaliwatan.
Kon ang usa ka lalaki ug usa ka babaye motuman sa bag-o ug walay katapusang pakigsaad sa kaminyoon, nan ang ilang kaminyoon molungtad sa tibuok kahangturan.
Kon ang usa ka lalaki ug usa ka babaye motuman sa bag-o ug walay katapusang pakigsaad sa kaminyoon, nan mahisama sila sa Dios.
Basaha ang mosunod nga ehemplo:
Ehemplo 3: Usa ka batan-ong lalaki ug batan-ong babaye na-sealed sa balaang templo pinaagi sa awtoridad sa priesthood. Pareho silang matinud-anong nagpakabuhi ug nagtuman sa ilang mga pakigsaad. Unsa nga mga kamatuoran nga gitudlo diha sa Doktrina ug mga Pakigsaad 132:19–21 ang magamit human sila mamatay? (Ang ilang kaminyoon magpadayon hangtud sa kahangturan. Mahisama sila sa ilang Amahan sa Langit ug mapanalanginan og himaya [glory], kahimayaan [exaltation], ug usa ka mahangturong pamilya.)
Unsa kaha ang kinahanglan gayud nga buhaton sa usa ka bana ug asawa aron matuman ang pakigsaad sa kaminyoon? (Ang mga tubag mahimong maglakip sa pagsunod sa pulong sa Dios, pagkahimong masulundon sa tanang ordinansa kaluwasan, pagkahimong mahiyason ug takus, paghigugma sa usag usa, pagtinabangay nga mahimong maayong mga ginikanan, pagpadako sa mga anak diha sa gugma ug pagkamatarung, ug kanunayng magkuyog sa pagbalik ngadto templo.)
Hangyoa ang mga estudyante sa pagbasa og hilum sa Doktrina ug mga Pakigsaad 132:22–25, nga maghatag og espesyal nga pagtagad sa paghulagway sa Ginoo sa “pultahan” ug sa “agianan” paingon sa kahimayaan. Sa dili pa sila mobasa, ipasabut nga ang pulong nga higpit sa bersikulo 22 nagpasabut og pig-ot o sakto ra gayud, nga dili motugot sa pagkahisalaag.
Sa unsang mga paagi nga ang imahe nga dakong pultahan ug lapad nga agianan nagrepresentar sa kasamtangang mga opinyon sa katilingban mahitungod sa mga relasyon ug kaminyoon sa managtiayon? Sa unsang paagi nga kining mga opinyon sukwahi sa bag-o ug walay katapusang pakigsaad sa kaminyoon?
Sumala sa mga bersikulo 22 ug 25, nganong daghan man ang mapakyas sa pagsulod sa higpit nga agianan paingon sa kahimayaan? (Wala sila modawat ni Jesukristo, moila Kaniya, o mosunod sa Iyang balaod.)
Sumala sa mga bersikulo 21–24, unsa ang kinahanglan gayud natong buhaton aron makadawat og kinabuhing dayon? (I-summarize ang mga tubag sa mga estudyante pinaagi sa pagsulat sa pisara sa mosunod nga baruganan: Aron makadawat og kahimayaan ug kinabuhing dayon, kinahanglan gayud kitang makaila sa Langitnong Amahan ug ni Jesukristo, mahimong sama Kanila, ug mosunod sa Ilang balaod.)
I-summarize ang Doktrina ug mga Pakigsaad 132:29–33 pinaagi sa pagpasabut nga si Abraham matinud-anon ug masulundon sa balaod sa Ginoo bahin sa mahangturong kaminyoon ug nga nakadawat siya sa saad nga mahangturong pagsanay sa kaliwatan.
Ipamatuod nga samtang magsunod kita sa mga balaod sa Dios, makapuyo kita uban Kaniya ug makabaton og kinabuhing dayon.
I-refer ngadto sa mga pangutana nga imong gisulat diha sa pisara sa wala pa magklase. Dapita ang mga estudyante sa pagtubag niining mga pangutana diha sa ilang mga class notebook o mga scripture study journal. Human sa igo nga panahon, mahimo usab nimong dapiton ang usa o duha ka estudyante sa pagpakigbahin sa ilang mga pagbati ngadto sa tibuok klase.
Tapusa pinaagi sa pagpakita og litrato sa imong pamilya. Ipakigbahin ang imong mga pagbati ug pagpamatuod sa mga panalangin sa mahangturong kaminyoon. Awhaga ang mga estudyante nga mangandam karon sa pag-adto sa templo ug maminyo alang sa kahangturan. Ipakigbahin ang imong pagpamatuod sa mga panalangin nga gisaad diha sa Doktrina ug mga Pakigsaad 132 ug sa kalipay nga moabut tungod sa pagpangandam alang sa kaminyoon sa templo.
Si Elder Russell M. Nelson sa Korum sa Napulog Duha ka mga Apostoles mipapakigbahin sa mosunod nga mga kamatuoran mahitungod sa kaminyoon ug pamilya:
Imahe
President Russell M. Nelson
“Ang yuta gilalang ug kini nga Simbahan gipahiuli aron ang pamilya maporma, mabugkos, ug mahimaya sa kahangturan. …
“… Ang kaminyoon sa templo dili lamang tali sa bana ug asawa; naglakip kini og pakigkumbuya uban sa Dios.
“… Kon ang usa ka pamilya nabugkos diha sa templo, kana nga pamilya mahimo nga ingon ka mahangturon sama mismo sa gingharian sa Dios” (“Celestial nga Kaminyoon,”Liahona, Nob. 2008, 93).
Si Elder Nelson mitudlo usab:
Imahe
President Russell M. Nelson
“Ang kaminyoon nagdala og dagkong kahigayunan sa kalipay kay sa bisan unsa pang laing tawhanong pakigrelasyon. …
“Ang kaminyoon mao ang sinugdanan sa katilingban, ang tinubdan sa pagkamaayo, ug ang pundasyon sa mahangturong himaya” (“Pag-amuma sa Kaminyoon,”Liahona, Mayo 2006, 36).
“Ang Balaang Espiritu sa Saad mao ang Espiritu Santo kinsa nagbutang sa silyo sa pagtugot diha sa matag ordinansa: bunyag, kumpirma, pag-orden, kaminyoon. Ang saad mao nga ang mga panalangin madawat pinaagi sa pagkamatinud-anon.
“Kon ang usa ka tawo molapas og pakigsaad, sa bunyag, ordinasyon, kaminyoon,o bisan unsa pa, ang Espiritu mokuha sa silyo sa pagtugot, ug ang mga panalangin dili madawat.
“Ang matag ordinansa gi-sealed uban ang usa ka saad sa usa ka ganti nga gipasikad diha sa pagkamatinud-anon. Ang Balaang Espiritu mokuha sa silyo sa pagtugot diin ang mga pakigsaad gilapas [tan-awa sa D&P 76:52–53; 132:7]” (Doctrines of Salvation, comp. Bruce R. McConkie, 3 vols. [1954–56], 1:45).
Si Elder Parley P. Pratt sa Korum sa Napulog Duha ka mga Apostoles naghisgot kon sa unsang paagi nga nausab ang iyang kinabuhi sa dihang nakadawat siya og panabut bahin sa doktrina sa mahangturong kaminyoon:
Imahe
Parley P. Pratt
“Si Joseph Smith ang nagtudlo kanako unsaon sa paghatag og bili sa maanindot nga mga relasyon sa amahan ug inahan, bana ug asawa; sa mga igsoon, anak nga lalaki ug anak nga babaye.
“Gikan kaniya nga ako nakakat-on nga ang asawa nga akong gimahal mahimo nga mahiusa kanako sa karon ug hangtud sa kahangturan; ug nga ang lunsay nga mga simpatiya ug mga pagbati nga nakahimo namo sa paghigugmaay sa usag usa nagagikan sa tubod sa balaanong mahangturon nga gugma. Gikan kaniya nga ako nakakat-on nga kita mahimo nga makaugmad niini nga mga pagbati, ug motubo ug molambo sa gihapon hangtud sa kahangturan; samtang ang resulta sa atong walay katapusan nga panaghiusa mao ang mga anak nga sama sa gidaghanon sa mga bitoon sa langit, o sa mga balas sa baybayon sa dagat.
“Gikan kaniya nga ako nakakat-on sa tinuod nga kaligdong ug padulngan sa anak sa Dios, gisul-uban sa mahangturon nga priesthood, isip patriyarka ug tigmando sa iyang dili maihap nga mga anak. Gikan kaniya nga akong nakat-unan nga ang labing taas nga kaligdong sa pagkababaye mao, ang pagbarug isip usa ka rayna ug pari nga babaye sa iyang bana, ug sa pagmando sa kahangturan isip inahan nga rayna sa iyang daghan ug magkadaghan nga mga anak.
“Nahigugma ako kaniadto, apan wala ko masayud kon ngano. Apan karon ako nahigugma—uban sa kaputli—hilabihan ka taas, nahimaya nga pagbati, nga mobayaw sa akong kalag gikan sa temporaryo nga mga butang sa ubos og kahimtang nga kalibutan ug mopalapad niini sama sa kadagatan. Mibati ko nga ang Dios mao gayud ang akong langitnong Amahan; nga si Jesus mao ang akong igsoong lalaki, ug nga ang asawa nga akong gimahal usa ka imortal, mahangturon nga kauban; usa ka mabinationg tigpangalagad nga anghel, gihatag ngari kanako isip usa ka kahupayan, ug korona sa himaya hangtud sa kahangturan. Sa laktud, ako karon makahigugma uban sa espiritu ug uban sa pagsabut usab.
“… Si Joseph Smith … mibukas og usa ka bahin sa tabil ug mipatan-aw kanako sa daklit ngadto sa kahangturan” (Autobiography of Parley P. Pratt, ed. Parley P. Pratt Jr. [1938], 297–98).
Niadtong 1916, si Presidente Joseph F. Smith, ang iyang mga magtatambag sa Unang Kapangulohan, ug ang mga sakop sa Korum sa Napulog Duha ka mga Apostoles namahayag:
“Kay ang mga yugto sa mahangturong pag-uswag ug paglampus gipahibalo na man pinaagi sa balaanong pagpadayag, kinahanglan natong masabtan nga bugtong nabanhaw ug nahimaya nga mga nilalang ang mahimong mga ginikanan sa espiritu nga mga anak. Ang mao lamang nga nahimayang mga kalag ang nakakab-ot sa pagkahamtong sa gitudlo nga panahon sa mahangturong kinabuhi; ug ang mga espiritu nga natawo ngadto kanila sa mahangturong mga kalibutan moagi sa tukma nga pagkasunod agi sa pipila ka yugto o kahimtang diin ang nahimayang mga ginikanan nakaangkon og kahimayaan” (“The Father and the Son: A Doctrinal Exposition by the First Presidency and the Quorum of the Twelve Apostles,” gikutlo sa Ensign, Abr. 2002, 18).
“Kadtong kinsa makaangkon og kinabuhing dayon (kahimayaan) makaangkon usab og mahangturong mga kinabuhi, nga buot ipasabut nga sa pagkabanhaw makabaton sila og mahangturong ‘pagsanay,’ ‘usa ka pagpadayon sa mga binhi,’ usa ka ‘pagpadayon sa mga kinabuhi.’ Ang ilang espiritu nga mga anak ‘magpadayon nga dili maihap sama sa mga bitoon; o, kon kamo moihap sa balas sa baybayon dili kamo makaihap niini.’ (D. & P. 131:1–4; 132:19–25, 30, 55.)” (Mormon Doctrine, 2nd ed. [1966], 238; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 330).
Si Presidente Joseph Fielding Smith mipasabut:
Imahe
President Joseph Fielding Smith
“Ang termino nga ‘mga kamatayon’ nga nahisgutan dinhi [sa Doktrina ug mga Pakigsaad 132:25] nagpasabut sa paglaglag sa tanan niadtong misalikway niining mahangturong pakigsaad sa kaminyoon ug sa ingon gihikawan sila sa gahum sa kahimayaan ug sa pagpadayon sa kaliwatan. Ang mahikawan og kaliwatan ug sa organisasyon sa pamilya moresulta sa ‘mga kamatayon,’ o sa katapusan sa pagsanay sa kinabuhi nga moabut (Church History and Modern Revelation, 2 vols. [1953], 2:360; tan-awa usab sa Doctrine and Covenants Student Manual, 330).