Niadtong Mayo 6, 1833, nadawat ni Propeta Joseph Smith ang pinadayag nga girekord diha sa Doktrina ug mga Pakigsaad 93. Kini nga pinadayag itudlo sa duha ka bahin. Kini nga leksyon nagtutok sa mga bersikulo 1–20, diin si Jesukristo mipasabut sa katuyoan sa pagpadayag: “Ako mihatag nganha kanimo niini nga mga sanglitanan aron ikaw masayud ug makahibalo unsaon sa pagsimba, ug masayud unsa ang imong gisimba, nga aron ikaw makaadto ngadto sa Amahan diha sa akong ngalan, ug sa tukma nga higayon makadawat sa iyang kahingpitan” (D&P 93:19).
Si Jesukristo nagtudlo kon sa unsang paagi nga ang mga indibidwal makakita sa Iyang nawong ug masayud nga Siya buhi
I-display ang litrato sa usa ka ilado nga tawo nga mailhan sa imong mga estudyante, ug pangutan-a sila kon nakahibalo ba sila sa ngalan sa tawo. (Kon wala kay ika-display nga litrato, isulat ang ngalan sa tawo diha sa pisara ug pangutan-a ang mga estudyante sa pagpasabut kon si kinsa ang maong tawo ug unsay nakapahimo niyang inila.)
Ngano man nga daghan kaayong tawo nga nakaila kon si kinsa kining tawhana?
Importante kaha nga masayran kon si kinsa kining tawhana? Ngano man?
Pagpakita og hulagway ni Jesukristo (mahimo nimong gamiton ang Si Jesukristo [Libro sa mga Hulagway sa Ebanghelyo (2009), nu. 1]; tan-awa usab sa LDS.org), ug ipasabut nga daghang mga tawo karon wala makaila kinsa Siya.
Imahe
Jesus Christ
Ngano kaha nga importante man nga makaila kon si kinsa si Jesukristo?
Pagpamatuod nga dili kita makahimo sa pagkab-ot sa atong hingpit nga potensyal isip mga anak sa Dios gawas kon mahibalo kita mahitungod ni Jesukristo. Ipasabut nga diha sa Doktrina ug mga Pakigsaad 93 ang Ginoo mitudlo kon unsaon nato nga mapalambo ang atong kahibalo mahitungod Kaniya ug sa Iyang gahum sa pagpanalangin kanato karon ug hangtud sa kahangturan. Isulat ang mosunod nga duha ka pangutana diha sa pisara, nga magbilin og luna aron ang mga estudyante makasulat sa ilang mga tubag ubos sa mga pangutana.
Unsa ang kinahanglan natong buhaton aron makaangkon og pagpamatuod kang Jesukristo?
Unsa ang atong mahibaloan bahin Niya kon mobuhat kita niining mga butanga?
Dapita ang usa ka estudyante sa pagbasa og kusog sa Doktrina ug mga Pakigsaad 93:1–5. Sa dili pa magsugod ang estudyante sa pagbasa, hangyoa ang katunga sa mga estudyante sa pagpangita sa mga tubag ngadto sa unang pangutana ug ang laing katunga mangita sa mga tubag sa ikaduhang pangutana. Human mabasa ang mga bersikulo, dapita ang pipila ka mga estudyante sa pagduol sa pisara ug ipasulat ang ilang mga tubag sa mga pangutana. Dayon ipangutana sa klase ang mosunod:
Unsaon nimo sa pagpahayag sa saad diha sa bersikulo 1 isip usa ka “kon–nan” nga baruganan? (Kinahanglang makita diha sa mga tubag sa mga estudyante ang mosunod nga baruganan: Kon isalikway nato ang atong mga sala, moduol kang Kristo, motawag sa Iyang ngalan, mosunod sa Iyang tingog, ug motuman sa Iyang mga sugo, nan makakita kita sa Iyang nawong ug makaila Kaniya.)
Mahimo nimong hatagan og gibug-aton nga kining panalangin moabut sa kaugalingong panahon sa Ginoo, sa Iyang kaugalingong paagi, ug sumala sa Iyang kaugalingong kabubut-on (tan-awa sa D&P 88:68; tan-awa usab sa Enos 1:27).
Sa unsang paagi nga ang matag usa sa mga buhat diha sa Doktrina ug mga Pakigsaad 93:1 makatabang nato nga makaila ni Jesukristo?
Gikan sa unsay inyong nakat-unan diha sa bersikulo 3, unsa ang importante nga doktrina nga angayng sabton mahitungod sa Amahan ug sa Anak? (Ang mga estudyante kinahanglang mahibalo sa mosunod nga doktrina: Ang Amahan ug ang Anak usa ra.)
Unsay gipasabut nga ang Amahan ug ang Anak usa ra?
Tabangi ang mga estudyante nga makasabut nga ang Amahan ug ang Anak duha ka managbulag ug managlahing binuhat, ang matag usa adunay nahimaya nga pisikal nga lawas (tan-awa sa D&P 130:22). Hinoon, ang Amahan ug Anak usa ra sa katuyoan ug doktrina. Hingpit silang nagkahiusa sa pagpahinabo sa plano sa Amahan bahin sa kaluwasan.
Unsa ang buot ipasabut nga nadawat ni Jesukristo ang kahingpitan sa Amahan? (Tan-awa sa D&P 93:16–17, 26.)
Sa unsang mga paagi ang mga kamatuoran sa mga bersikulo 4–5 makatabang kanato nga mas makasabut unsay gipasabut nga ang Amahan ug ang Anak usa ra?
Ipasabut nga tungod kay ang Amahan ug ang Anak usa ra, makaila kita sa Langitnong Amahan ug ni Jesukristo samtang atong buhaton ang gisulti sa Ginoo diha sa Doktrina ug mga Pakigsaad 93:1.
Ang rekord ni Juan gigamit sa pagtabang kanato nga makasabut kon sa unsang paagi si Jesukristo nakadawat sa kahingpitan sa himaya sa Langitnong Amahan
Ipasabut nga mas makakat-on pa kita mahitungod ni Jesukristo pinaagi sa pagtuon sa impormasyon nga gihatag sa Ginoo gikan sa rekord ni Juan diha sa Doktrina ug mga Pakigsaad 93. Tingali makatabang nga ipasabut usab nga si Apostol Juan usa ka disipulo ni Juan Bautista sa dihang gisugdan ni Jesukristo ang Iyang mortal nga pangalagad. Sa iyang mga sinulat, si Apostol Juan mihatag og tipik nga saysay sa saksi nga gipamatuod ni Juan Bautista kabahin sa Manluluwas.
Igrupo-grupo ang mga estudyante nga magtinagup-at. Ipabasa sa matag grupo ang Doktrina ug mga Pakigsaad 93:6–11 nga mag-uban ug ipaila ang mga ngalan nga gigamit sa paghulagway sa Manluluwas. Ang mga ngalan nga makit-an sa mga estudyante kinahanglang maglakip sa “ang Pulong, gani ang sinugo sa kaluwasan” (bersikulo 8), “ang kahayag ug ang Manunubos sa kalibutan” (bersikulo 9), “ang Espiritu sa kamatuoran” (bersikulo 9), ug “ang Bugtong Anak sa Amahan” (bersikulo 11).
Kon mahuman na sila sa pagbasa sa mga bersikulo, hatagi ang matag estudyante og kopya sa mosunod nga impormasyon mahitungod sa mga ngalan nga gihisgutan sa ibabaw. Papilia ang matag sakop sa grupo og usa sa mga ngalan ug patun-i sa hilum ang kalabut nga impormasyon. Sultihi ang mga estudyante nga mangandam sa pagpasabut sa ilang mga grupo kon unsa ang kahulugan niana nga ngalan ug sa pagpaambit sa ilang mga tubag sa mosunod nga pangutana. Mahimo nimong isulat ang pangutana diha sa pisara o ilakip kini sa handout aron ang mga estudyante maka-refer ngadto niini kon gikinahanglan.)
Sa unsang paagi kini nga impormasyon makatabang kaninyo nga mas makaila, makadayeg, ug makasunod ni Jesukristo?
“Ang Pulong, gani ang sinugo sa kaluwasan”
Si Jesukristo mao ang gipasabut nga “ang Pulong” diha sa Juan 1:1. Si Elder Russell M. Nelson sa Korum sa Napulog Duha ka mga Apostoles mipasabut:
Imahe
President Russell M. Nelson
“Sa pinulongan nga Griyego diha sa Bag-ong Tugon, kana nga Pulong mao ang Logos, o ‘ekspresyon.’ … Kana nga terminolohiya daw katingad-an, apan haum. Mogamit kita og mga pulong sa pagpahayag sa atong ekspresyon ngadto sa uban. Mao nga si Jesus mao ang Pulong, o ekspresyon, sa Iyang Amahan ngadto sa kalibutan” (“Jesus the Christ: Our Master and More,” Ensign, Abr. 2000, 4). Si Jesukristo gitawag nga sinugo sa kaluwasan tungod kay Siya ang nagpahayag sa mga pulong sa Amahan ngari kanato, ug kadtong maminaw ug mosunod sa Iyang mensahe makadawat og kaluwasan (tan-awa sa Juan 12:49–50).
“Ang kahayag ug ang Manunubos sa kalibutan”
Pinaagi sa Kahayag ni Kristo, si Jesukristo naghatag og kinabuhi ug kahayag sa tanan nga mga butang. Siya usab gitawag nga Kahayag sa Kalibutan tungod kay naghatag Siya sa hingpit nga ehemplo kon sa unsang paagi ang tanang tawo magpakabuhi. Si Jesukristo mao ang Manunubos sa kalibutan tungod kay pinaagi sa Iyang Pag-ula gibayaran Niya ang bili sa mga sala sa tanang katawhan ug gihimo nga posible ang pagkabanhaw sa tanang katawhan.
“Ang Espiritu sa kamatuoran”
Ang ngalan nga “ang Espiritu sa kamatuoran” makatabang kanato nga makasabut nga si Jesukristo dili mamakak ug nga nagbaton Siya og kahingpitan sa kamatuoran (tan-awa sa Enos 1:6; D&P 93:26). Siya mopadayag og kamatuoran ngadto sa katawhan (tan-awa sa D&P 76:7–8). Kini nga ngalan gigamit usab nga nagpasabut sa Espiritu Santo, kinsa nagpamatuod kabahin ni Jesukristo (tan-awa sa Juan 15:26).
“Ang Bugtong Anak sa Amahan”
Si Jesukristo mao ang labing gamhanan nga binuhat nga natawo dinhi sa yuta. Ang Dios mao ang Amahan sa mga espiritu sa tanang katawhan, apan si Jesukristo mao ang bugtong tawo nga natawo dinhi sa kalibutan isip ang literal nga Anak sa Dios diha sa unod. Tungod kay si Jesukristo natawo gikan sa usa ka imortal nga amahan, Siya adunay gahum batok sa kamatayon (tan-awa sa Juan 5:26). Kini nga gahum nagtugot Kaniya nga mahimo ang Pag-ula ug Pagkabanhaw alang sa tanang katawhan.
Human ang mga grupo nakaangkon og igong panahon sa paghuman sa ilang mga diskusyon, dapita ang usa ka estudyante sa pagbasa og kusog sa Doktrina ug mga Pakigsaad 93:12–17. Hangyoa ang klase sa pagsunod ug sa pagtino kon sa unsang paagi si Jesukristo nahimong sama sa Iyang Amahan.
Sa unsang paagi si Jesukristo nahimong sama sa Iyang Amahan? (Ang mga tubag sa mga estudyante kinahanglang magpakita sa mosunod nga baruganan: Si Jesukristo nakaangkon og grasya ug dugang pa nga grasya hangtud nga siya nakadawat og kahingpitan sa himaya sa Amahan.)
Unsa kaha ang gipasabut nga si Jesukristo nagpadayon sa pag-angkon og grasya ug dugang pa nga grasya hangtud Siya nakadawat sa kahingpitan?
Tabangi ang mga estudyante nga makasabut nga ang grasya mao ang kalig-on ug gahum gikan sa Dios nga makatugot kanato nga makaangkon og kinabuhing dayon ug kahimayaan. Dapita ang usa ka estudyante sa pagbasa og kusog sa Doktrina ug mga Pakigsaad 93:19–20. Hangyoa ang klase sa pagsunod ug motino sa rason nga nahatag sa Manluluwas sa pagbutyag kon sa unsang paagi Siya nakadawat sa kahingpitan sa Amahan.
Sumala sa bersikulo 19, nganong gipadayag sa Manluluwas kon sa unsang paagi Siya nakadawat sa kahingpitan sa Amahan?
Tabangi ang mga estudyante nga makakita nga ang Manluluwas mipadayag kon giunsa Niya pagkadawat og kahingpitan aron kita “makasabut ug makaila” Kaniya ug sa Langitnong Amahan ug makahibalo unsaon sa pagsimba sa Amahan ug pagdawat sa Iyang kahingpitan. Isulat ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles diha sa pisara. (Kini nga pamahayag makita diha sa The Promised Messiah: The First Coming of Christ [1978], 568.)
“Ang hingpit nga pagsimba mao ang pagsunod. Mipasidungog kita niadtong kinsa atong gisunod” (Elder Bruce R. McConkie).
Unsa kaha ang gipasabut sa pagsimba?
Unsaon nato sa pagsimba ang Langitnong Amahan? (Ang mga estudyante kinahanglang mopahayag sa mosunod nga baruganan: Atong simbahon ang Langitnong Amahan pinaagi sa pagsunod sa ehemplo ni Jesukristo.)
Sa unsang paagi nga ang pag-uswag sa Manluluwas sa pag-angkon og grasya ug dugang pa nga grasya susama ngadto sa proseso sa pagkat-on ug pag-uswag nga atong masinati?
Unsa nga saad ang gihatag diha sa Doktrina ug mga Pakigsaad 93:20 niadtong kinsa mosunod sa ehemplo ni Jesukristo ug motuman sa Iyang mga sugo? (Kinahanglang mopahayag ang mga estudyante sa mosunod nga baruganan: Kon motuman kita sa mga sugo, makadawat kita og kahingpitan sa Amahan, sama sa naangkon ni Jesukristo.)
Guniti pataas ang hulagway sa Manluluwas nga imong gi-display sa sinugdanan sa klase.
Nganong importante man nga makabaton og usa ka pagpamatuod sa ehemplo, mga pagtulun-an, ug Pag-ula ni Jesukristo?
Unsay inyong mabuhat aron makapadayon sa pag-angkon og “grasya ug dugang pa nga grasya” (D&P 93:13) ug mahimong mas sama Kaniya?
Dapita ang usa ka estudyante sa pagbasa og kusog sa mosunod nga pamahayag ni Presidente Lorenzo Snow, ug hangyoa ang klase sa paghunahuna kon unsa ang gusto nilang buhaton aron mahimong mas sama sa Manluluwas:
Imahe
President Lorenzo Snow
“Ayaw pagdahum nga mahimong hingpit sa usa lamang ka higayon. Kon kamo nagdahum, kamo masagmuyo. imong mas maayo karon kay sa kagahapon, ug mas maayo ugma kay sa unsa kamo karon. Ang mga tintasyon nga medyo mibuntog kanato karon, ayaw tuguti nga mobuntog usab kanato ugma. Apan padayon nga mahimong mas maayo og gamay matag adlaw; ug ayaw tuguti nga ang inyong kinabuhi matapos nga walay nahimong maayo ngadto sa uban ingon man usab sa atong kaugalingon” (Mga Pagtulun-an sa mga Presidente sa Simbahan: Lorenzo Snow [2012], 103).
Dapita ang mga estudyante nga mosulat sa ilang mga class notebook o mga scripture study journal og piho nga paagi nga magtinguha sila nga mouswag ug molambo pinaagi sa pagsunod sa ehemplo sa Manluluwas.
Si Elder Jeffrey R. Holland sa Korum sa Napulog Duha ka mga Apostoles mipasabut nga ang importanting katuyoan sa mortal nga pangalagad ni Jesukristo mao ang pagtabang kanato nga makaila sa atong Amahan sa Langit:
Imahe
Elder Jeffrey R. Holland
“Kini mao ang mahinungdanong kamatuoran nga sa tanang gisulti ug gibuhat ni Jesus, lakip na ug ilabi na sa Iyang matubsanong pag-antus ug sakripisyo, Siya nagpakita kanato kung kinsa ug unsa gayud ang Dios nga atong Mahangturong Amahan, unsa ka hingpit ang Iyang pagkamaunungon ngadto sa Iyang mga anak sa tanang dispensasyon ug nasud. Sa pulong ug sa buhat si Jesus nagtinguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit.
“Iya kining gibuhat sa usa ka bahin tungod kay kaniadto ug karon kitang tanan nagkinahanglan nga mas hingpit nga makaila sa Dios aron mas bug-os nga mohigugma Kaniya ug mas hingpit nga mosunod Kaniya. …
“Busa ang pagpakaon sa gigutom, pag-ayo sa masakiton, pagpanton sa pagkahipokrito, pagpangamuyo alang sa hugot nga pagtuo—kini mao si Kristo nga nagpakita kanato sa agianan ngadto sa Amahan, Siya kinsa ‘maloloy-on ug mapuangoron, dili dali masuko, mainantuson ug puno sa kaayo’ [Lectures on Faith 1985), 42.]” “Ang Kahalangdon sa Dios,” Liahona, Nob. 2003, 70, 72).
Si Elder Dallin H. Oaks sa Korum sa Napulog Duha ka mga Apostoles mipasabut kon sa unsang paagi kita mamahimo kon unsay gusto sa atong Langitnong Amahan nga kita mamahimo ug makadawat sa Iyang kahingpitan:
Imahe
Elder Dallin H. Oaks
“Ang ebanghelyo ni Jesukristo usa ka plano nga nagpakita kanato kon unsaon nga mamahimo sa unsay gitinguha sa atong Langitnong Amahan nga kita mamahimo.
“Usa ka sambingay nagpakita niini nga panabut. Usa ka adunahan nga amahan nasayud nga kon itugyan niya ang iyang katigayunan ngadto sa usa ka anak nga wala pa mapalambo ang gikinahanglan nga kaalam ug kahamtong, ang kabilin tingali mausik lang. Miingon ang amahan ngadto sa iyang anak:
“‘Ang tanang anaa nako akong gitinguha nga ihatag nimo—dili lang ang akong katigayunan, apan ang ako usab nga posisyon ug kahimtang taliwala sa katawhan. Kanang unsay anaa nako dali ra nakong mahatag nimo, apan kanang unsa ko kinahanglan gayud nimong maangkon sa imong kaugalingon. Makasarang ka alang sa imong kabilin pinaagi sa pagkat-on kon unsay akong nakat-unan ug pinaagi sa pagpakabuhi sama sa akong pagpakabuhi. Ihatag nako nimo ang mga balaod ug mga baruganan pinaagi diin akong naangkon ang akong kaalam ug kahimtang. Sunda ang akong ehemplo, mobuntog sa unsay akong nabuntog, ug mahimo ka kon unsa ko, ug ang tanan nga anaa nako maimo.’
“Kini nga sambingay misubay sa sumbanan sa langit. Ang ebanghelyo ni Jesukristo misaad sa dili matupngan nga kabilin sa kinabuhing dayon, sa kahingpitan sa Amahan, ug mipadayag sa mga balaod ug mga baruganan pinaagi diin maangkon kini” (The Challenge to Become,” Ensign, Nob. 2000, 32).
Ang pagpakig-angay ni Jesukristo naglakip nga bisan Siya, usa ka sakop sa Dios nga Kapangulohan, moagi sa tabil ngadto sa mortalidad, mahimong sama sa matag usa kanato, ug sa sinugdan wala makahibalo sa Iyang balaan nga pagkatawo isip ang Bugtong Anak sa Dios nga Amahan. Mipasabut si Presidente Lorenzo Snow: “Sa diha nga si Jesus naghigda sa pasungan, usa ka huyang nga masuso, Siya wala mahibalo nga Siya mao ang Anak sa Dios, ug nga sa kaniadto Siya milalang sa yuta. Sa diha nga ang balaod ni Herodes gipagawas, Siya walay kalibutan niini; Siya walay gahum sa pagluwas sa Iyang Kaugalingon; ug si [Jose ug Maria] kinahanglan nga modala Kaniya ug [mokagiw] ngadto sa Ehipto sa pagpanalipod Kaniya gikan sa mga epekto niana nga balaod. … Siya mitubo ngadto sa pagkahamtong, ug sa panahon sa Iyang pag-uswag kini gipadayag diha Kaniya kon kinsa Siya, ug sa unsa nga katuyoan Siya ania sa kalibutan. Ang himaya ug gahum nga anaa Kaniya sa wala pa Siya mianhi sa kalibutan gipahibalo nganha Kaniya” (Mga Pagtulun-an sa mga Presidente sa Simbahan: Lorenzo Snow [2012], 327).
Ang mosunod nga pamahayag ni Propeta Joseph Smith nagpatin-aw sa usa ka aspeto sa pagtubo gikan sa grasya ug dugang pa nga grasya hangtud nga kita makadawat og kahingpitan:
Imahe
Prophet Joseph Smith
“Dili kaalam nga kita makabaton dayon sa tanang kahibalo sa higayon nga itudlo kini kanato; apan kita kinahanglan makabaton niini sa inanay; dayon kita mahimong makasabut niini” (Mga Pagtulun-an sa mga Presidente sa Simbahan: Joseph Smith [2007], 322).
Siya midugang pagsulti:
Imahe
Prophet Joseph Smith
“Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtud ikaw moabut sa ibabaw; ug ingon usab niini ang mga prinsipyo sa ebanghelyo—kinahanglan nga ikaw magsugod sa sinugdanan, ug mopadayon hangtud nga ikaw makakat-on sa tanang mga prinsipyo sa kahimayaan. Apan mahimo nga madugay-dugay nga ikaw makaaninag sa luyo sa tabil sa dili pa ikaw makakat-on niini. Dili ang tanan mahimong masabtan dinhi sa kalibutan; may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan” (Mga Pagtulun-an sa mga Presidente sa Simbahan: Joseph Smith [2007], 323).