Niadtong Abril 26, 1838, si Propeta Joseph Smith nakadawat og pagpadayag nga anaa sa Doktrina ug mga Pakigsaad 115. Diha niana gipadayag sa Ginoo ang ngalan sa Simbahan, misugo sa mga Santos sa “[pag]tindog ug [pag]pakita” (D&P 115:5), ug gipadayag ang Iyang kabubut-on kalabut sa templo didto sa Far West. Pagka-Mayo 19, 1838, si Propeta Joseph Smith nakadawat og pagpadayag nga makita sa Doktrina ug mga Pakigsaad 116, nga mitino sa Spring Hill, Missouri, isip Adan-ondi-Ahman.
Ang Ginoo misugo sa mga miyembro sa Iyang Simbahan sa “[pag]tindog ug [pag]pakita”
Sa dili pa magsugod ang klase, isulat ang mosunod nga mga pangutana diha sa pisara:
Unsa ang gipasabut sa ngalan sa organisasyon?
Kinsa ang nangulo sa organisasyon?
Unsay gibuhaton sa organisasyon?
I-display ang mga ngalan o mga logo sa pipila ka angay nga mga kompanya o mga organisasyon nga tingali pamilyar ang imong mga estudyante. Hunong og kadali human nimo mapakita ang matag usa, ug hangyoa ang mga estudyante sa pagtubag sa mga pangutana nga gisulat sa pisara.
Ipakita ang ngalan o logo sa Simbahan. Dapita ang mga estudyante sa pagpangita og mga tubag sa mga pangutana diha sa pisara kalabut sa ngalan sa Simbahan samtang magtuon sila sa Doktrina ug mga Pakigsaad 115.
I-summarize ang Doktrina ug mga Pakigsaad 115:1–3 pinaagi sa pagpasabut nga kining pagpadayag gihatag pinaagi ni Joseph Smith ngadto sa kalalakin-an nga ginganlan diha sa mga bersikulo 1–2 ug ngadto sa tanang miyembro sa Simbahan. Dapita ang mga estudyante sa pagbasa og hilum sa Doktrina ug mga Pakigsaad 115:4, nga mangita sa ngalan nga gihatag sa Ginoo alang sa Iyang Simbahan. Samtang magreport ang mga estudyante sa unsay ilang nakit-an, isulat ang ngalan sa Simbahan diha sa pisara sama sa mosunod:
Ang
Simbahan ni Jesukristo
sa mga Santos
sa Ulahing mga Adlaw
Aron matabangan ang mga estudyante nga makasabut sa kaimportante sa ngalan sa Simbahan, dapita ang mga estudyante sa paghisgot kauban ang usa ka partner kon unsa sa ilang hunahuna ang gipasabut sa matag pulong o mga pulong nga gilista diha sa pisara. Human sa igo nga panahon, hangyoa ang pipila ka estudyante sa pagpakigbahin sa ilang mga ideya kalabut sa kahulugan sa matag pulong o mga pulong. Kon nagkinahanglan og tabang ang mga estudyante, mahimo nimong basahon ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:
Imahe
Elder M. Russell Ballard
“Ang pulong nga Ang nagpasabut sa pagkalahi nga posisyon sa gipahiuli nga Simbahan tali sa mga relihiyon sa kalibutan.
“Ang mga pulong nga Simbahan ni Jesukristo nagpahayag nga kini Iyang Simbahan. …
Sa Ulahing mga Adlaw nagpasabut nga pareho ra kini nga Simbahan sa Simbahan nga gitukod ni Jesukristo atol sa Iyang mortal nga pangalagad apan gipahiuli niining ulahing mga adlaw. …
“Ang Santos … dayag nga mao kadtong naningkamot sa paghimo sa ilang kinabuhi nga balaan pinaagi sa pagpakigsaad sa pagsunod kang Kristo” (“Ang Importansya sa Pangalan,”Liahona, Nob. 2011, 80).
Unsa ang pipila ka importante nga mga kamatuoran ang gipasabut pinaagi sa ngalan sa Simbahan?
Dapita ang usa ka estudyante sa pagbasa og kusog sa Doktrina ug mga Pakigsaad 115:5. Hangyoa ang klase sa pagsunod, nga mangita kon unsay gilauman sa Ginoo niadtong nahisakop sa Iyang Simbahan.
Unsa ang gilauman sa Ginoo kanato isip mga miyembro sa Iyang Simbahan?
Unsa kaha ang gipasabut sa “[pag]tindog ug [pag]pakita” isip mga miyembro sa Ang Simbahan ni Jesukristo sa mga Santos sa Ulahing mga Adlaw?
Sumala sa bersikulo 5, unsa ang panalangin nga moabut samtang ang mga miyembro sa Simbahan mosunod sa tambag sa Ginoo sa pagtindog ug pagpakita? (Ang mga estudyante kinahanglang mahibalo sa mosunod nga baruganan: Kon kita motindog ug mopakita, ang atong kahayag mahimong sukaranan [sumbanan] alang sa tanan nga mga nasud. Mahimo nimong isugyot nga markahan sa mga estudyante kini nga baruganan diha sa bersikulo 5.)
Aron matabangan ang mga estudyante nga mas makasabut niining baruganan, ipangutana ang mosunod:
Unsa kaha ang gipasabut nga ang atong kahayag, o ehemplo, mahimong “sukaranan [sumbanan] alang sa tanan nga mga nasud”? (Ang usa ka sukaranan [sumbanan] usa ka bandila o bandera nga nagsilbing dapit nga kapundukan o makapadasig nga simbolo. Ang atong ehemplo isip mga miyembro sa Simbahan makapadasig sa uban ug mapapaduol kanila ngadto sa Ginoo.)
Sa unsang paagi nga ang pagsunod sa sugo sa Ginoo sa pagtindog ug pagpakita makapadani sa uban sa Ang Simbahan ni Jesukristo sa mga Santos sa Ulahing mga Adlaw?
Aron matabangan ang mga estudyante nga makasabut kon sa unsang paagi nga ang atong kahayag makatabang sa uban, dapita ang usa ka estudyante sa pagbasa sa mosunod nga istoryanga gipakigbahin ni Presidente James E. Faust sa Unang Kapangulohan:
Imahe
President James E. Faust
“Pipila ka tuig ang milabay, si Constance, nga usa ka estudyante sa pagka-nars, gisangunan sa pagsulay ug sa pagtabang sa usa ka babaye kinsa nasamdan sa bitiis sa usa ka aksidente. Ang babaye mibalibad sa medikal nga tabang tungod kay aduna siyay usa ka negatibong kasinatian sa usa ka tawo didto sa ospital. Nahadlok siya ug nagsugod na sa paglikay sa ubang mga tawo. Sa unang higayon nga miadto si Constance, ang samarang babaye mipagawas kaniya. Sa ikaduhang pagsulay, iya nang gipadayon si Constance. Niining higayuna ang bitiis sa babaye napuno sa dagkong mga kabahong, ug ang pipila sa mga unod nadugta na. Pero sa gihapon dili siya gustong matambalan.
“Gihimo kini ni Constance nga usa ka butang nga angayang i-ampo, ug sulod sa usa o duha ka adlaw miabut ang tubag. Nag-andam siya og pipila ka foaming hydrogen peroxide alang sa iyang sunod nga pagbisita. Kay wala man kini sakit, ang tigulang nga babaye miuyon nga gamiton kini ni Constance sa iyang bitiis. Dayon nag-istoryahanay sila kabahin sa mas seryusong pagtambal didto sa ospital. Gipasaligan siya ni Constance nga sigurohon sa ospital nga maayo ang iyang pag-istar kutob sa mahimo. Sulod sa usa o duha ka adlaw nakabaton ang babaye og kaisug nga mosulod sa ospital. Sa dihang mibisita si Constance kaniya, mipahiyum ang babaye ug miingon, ‘Imo kong nakumbinser.’ Dayon, sa wala damha, nangutana siya kang Constance, ‘Unsang simbahana ka nahisakop?’ Giingnan siya ni Constance nga miyembro siya sa Ang Simbahan ni Jesukrito sa mga Santos sa Ulahing mga Adlaw. Miingon ang babaye: ‘Nakahibalo ko niini. Nakahibalo ko nga gipadala ka ngari nako sugod pa lang sa unang adlaw nga nakakita ko nimo. Adunay kahayag sa imong nawong nga ako usab nga nabantayan sa ubang sakop sa inyong tinuohan. Kinahanglan kong mohatag kanimo sa akong pagsalig.’
“Sulod sa tulo ka bulan kanang gikabahong nga bitiis hingpit gyud nga naayo. Ang mga miyembro sa ward diin nagpuyo ang tigulang nga babaye miremodel sa iyang balay ug milimpyo sa iyang nataran. Nakigkita kaniya ang mga misyonaryo, ug sa wala madugay nabunyagan siya [tan-awa sa Constance Polve, “A Battle Won,” New Era, Abr. 1980, 44–45]. Nahitabo kining tanan tungod kay nakabantay siya sa kahayag diha sa nawong nianang batan-ong estudyante sa pagka-nars” (“Ang Kahayag nga Anaa sa Ilang mga Mata,”Liahona, Nob. 2005, 22).
Unsay gibuhat ni Constance aron sa “pagtindog ug pagpakita”?
Sa unsang paagi nga ang kahayag diha sa panagway ni Constance nahimong sumbanan alang sa naangol nga babaye?
Aron matabangan ang mga estudyante nga mabati ang kamatuoran ug kaimportante niining baruganan, dapita sila sa paghunahuna og usa ka tawo nga ilang nailhan kinsa usa ka maayong ehemplo sa pagtindog ug pagpakita. Dapita ang pipila ka estudyante sa pagpakigbahin kon si kinsa ang ilang nahunahunaan ug sa unsang paagi nga ang ehemplo nianang tawhana nahimong panalangin ngadto kanila. Samtang ikaw maminaw sa ilang mga tubag, pangutana og pang-follow-up nga mga pangutana nga moawhag sa mga estudyante nga mopakigbahin og dugang sa unsay ilang gihunahuna ug gibati.
Dapita ang mga estudyante nga isulat sa ilang mga class notebook o mga scripture study journal kon unsay ilang buhaton aron mas mahimong sumbanan niadtong anaa sa ilang palibut.
Dapita ang usa ka estudyante sa pagbasa og kusog sa Doktrina ug mga Pakigsaad 115:6. Hangyoa ang klase sa pagpangita sa mga panalangin nga gisaad niadtong kinsa magpundok kauban sa Simbahan diha sa mga stake sa Zion.
Unsa nga mga panalangin ang gisaad niadtong kinsa magpundok ngadto sa mga stake sa Zion? (Human makatubag ang mga estudyante, isulat ang mosunod nga kamatuoran diha sa pisara: Magpundok kita ngadto sa mga stake sa Zion alang sa panalipod ug alang sa kadangpan.)
Unsa ang kinahanglan natong panalipdan sa atong kaugalingon? Unsa ang kinahanglan natong kadangpan? Sa unsang mga paagi nga inyong nakita nga ang panagpundok isip mga Santos makatabang kanato sa pagpanallipod sa atong kaugalingon ug sa pagpangita og kadangpan?
Dapita ang mga estudyante sa pagkonsiderar og tawo nga ilang nailhan nga makabenepisyo sa pakigpundok kauban sa mga Santos. Awhaga ang mga estudyante nga ipakita ang ilang kahayag aron ang uban madala ngadto sa kalinaw, kasiguroan, ug kadangpan nga gihatag sa Ang Simbahan ni Jesukristo sa mga Santos sa Ulahing mga Adlaw.
Gimanduan sa Ginoo ang mga Santos sa pag-establisar sa siyudad sa Far West ug sa pagtukod og usa ka templo
Ipasabut nga usa sa mga paagi nga mabatunan nato ang proteksyon ug kasiguroan sa Ginoo mao ang pinaagi sa pagsimba Kaniya diha sa templo. Human masugdi sa mga Santos ang pagbalhin ngadto sa Far West, Missouri, niadtong 1836, ang mga lider sa Simbahan naghimo og mga plano sa pagtukod og usa ka templo susama sa usa didto sa Kirtland, Ohio. Bisan kon dunay nasugdan nga pagkalot, ang padayon nga pagtukod gihunong hangtud nga makadawat si Joseph Smith og dugang nga instruksyon gikan sa Ginoo. Gipadayag sa Ginoo ang Iyang kabubut-on kalabut sa templo isip kabahin sa pagpadayag nga anaa sa Doktrina ug mga Pakigsaad 115.
I-summarize ang Doktrina ug mga Pakigsaad 115:7–16 pinaagi sa pagpasabut nga gipadayag sa Ginoo nga kinahanglang tukuron ang usa ka templo didto sa Far West sumala sa sundanan nga Iyang ihatag sa Unang Kapangulohan. Gitambagan usab sa Ginoo ang mga lider sa Simbahan nga dili mangutang aron itukod sa templo.
Dapita ang usa ka estudyante sa pagbasa og kusog sa Doktrina ug mga Pakigsaad 115:17–19. Hangyoa ang klase sa pagsunod, nga mangita kon unsay gusto sa Ginoo nga buhaton sa mga Santos ubos sa direksyon ni Joseph Smith didto sa Far West ug sa silingang mga rehiyon.
Unsay gusto sa Ginoo nga buhaton sa mga Santos didto sa Far West? Unsay kinahanglan nilang buhaton ubos sa direksyon ni Joseph Smith didto sa mga rehiyon nga naglibut sa Far West?
Sumala sa bersikulo 19, unsay nakapahimong kwalipikado sa Presidente sa Simbahan karon sa paggiya sa buhat sa Ginoo dinhi sa yuta? (Ang mga estudyante kinahanglang mahibalo sa mosunod nga doktrina: Ang Presidente sa Simbahan naghupot sa mga yawe sa paggiya sa buhat sa Ginoo dinhi sa yuta. Mahimo nimong isugyot nga markahan sa mga estudyante ang mga pulong nga nagtudlo niining doktrina diha sa bersikulo 19.)
I-refer ang mga estudyante ngadto sa mga pangutana diha sa pisara, ug hangyoa sila sa pagpasabut kon unsaon nila pagtubag niini base sa unsay ilang nakat-unan diha sa Doktrina ug mga Pakigsaad 115.
Gitino sa Ginoo ang Adan-ondi-Ahman isip ang lokasyon sa umaabut nga paghimamat tali sa Ginoo ug sa Iyang katawhan
Ipasabut nga gisunod ni Joseph Smith ang tambag sa Ginoo diha sa Doktrina ug mga Pakigsaad 115:18 ug gisusi ang mga dapit nga naglibut sa Far West. Dapita ang usa ka estudyante sa pagbasa og kusog sa pasiuna sa seksyon alang sa Doktrina ug mga Pakigsaad 116, ug hangyoa ang mga estudyante sa pagpangita sa ngalan sa lokasyon nga gisusi ni Joseph.
Dapita ang usa ka estudyante sa pagbasa og kusog sa Doktrina ug mga Pakigsaad 116:1, ug hangyoa ang klase sa pagpangita sa unsay gipadayag sa Ginoo bahin sa Spring Hill, Missouri. Mahimo nimong suguon ang mga estudyante nga mopakli ngadto sa mapa ug sa hulagway sa Adan-ondi-Ahman diha sa luyo sa ilang mga kasulatan (tan-awa sa Mga Mapa sa Kasaysayan sa Simbahan, Mapa 5, “Ang Missouri, Illinois, ug Iowa nga Dapit sa TBA” ug Mga Hulagway sa Kasaysayan sa Simbahan, Hulagway 10, “Adan-ondi-Ahman”).
Ipasabut nga kining pagpadayag nagtino sa lokasyon sa umaabut nga katumanan sa usa ka panagna nga gihimo sa karaang panahon pinaagi ni propeta Daniel (tan-awa sa Daniel 7:9–10, 13–14). Kana nga panagna naghulagway sa usa ka panghitabo sa ulahing mga adlaw diin ang Manluluwas ug si Adan mobisita sa yuta ug modumala sa usa ka panagtigum sa dili pa ang Ikaduhang Pag-anhi ni Jesukristo sa tibuok kalibutan (tan-awa sa D&P 27:5–14). Ikonsiderar ang pagtapos sa leksyon pinaagi sa pagdapit sa mga estudyante sa pagkanta sa himno nga “Adam-ondi-Ahman” (Hymns, nu. 49).
Bisan kon andam ang mga Santos sa pagtukod sa templo sa Far West, wala sila makabuhat sa ingon. Sumala sa sugo sa Ginoo, ilang gipahimutang ang mga cornerstone niadtong Hulyo 4, 1838. Apan wala sila makahuman sa pagtukod sa templo sugod niadtong Abril 26, 1839, sama sa gisugo sa Ginoo (tan-awa sa D&P 115:11), tungod kay gipugos sila sa pagpahawa sa estado sa Missouri pagka-Pebrero nianang tuiga. Hinoon, pipila ka apostoles ang mibalik sa luna sa templo niadtong Abril 26, 1839, agig pagsunod sa pagpadayag nga makita diha sa Doktrina ug mga Pakigsaad 118:5, sa ilang pagbiya alang sa ilang mga misyon ngadto sa England.
Si Elder Bruce R. McConkie sa Korum sa Napulog Duha ka mga Apostoles mipasabut:
Imahe
Elder Bruce R. McConkie
“Ang Ahman mao ang usa sa mga ngalan diin ang Dios nailhan ni Adan. Ang Adan-ondi-Ahman, usa ka ngalan nga giusab gikan sa tiunay nga pinulongang Adamic ngadto sa Iningles, mao ang usa nga wala kita mahatagi og gipadayag, literal nga hubad. Sa pinakaduol natong mahukman—ug kini nga opinyon gikan sa unang mga kaigsoonan nga nakauban ni Propeta Joseph Smith, kinsa mao ang unang migamit sa ngalan niining dispensasyon—ang Adan-ondi-Ahman nagpasabut og dapit o yuta sa Dios diin nagpuyo si Adan” (Mormon Doctrine, 2nd ed. [1966], 19–20).
Si Presidente Joseph Fielding Smith mitudlo mahitungod sa panahon nga si Adan moabut aron mobisita sa iyang katawhan:
Imahe
President Joseph Fielding Smith
“Kini nga panagpundok sa mga anak ni Adan, diin ang liboan, gatusan ka libo magtigum diha sa paghukom, mao ang usa sa labing mahinungdanong mga panghitabo nga sukad nakita niining samok nga yuta. Atol niining komperensya, o konseho, ang tanang nakahupot og mga yawe sa mga dispensasyon mohatag og report sa ilang pagkatinugyanan. Mao usab ang buhaton ni Adan, ug dayon itugyan niya kang Kristo ang tanang awtoridad. Dayon kumpirmahan si Adan diha sa iyang tawag isip prinsipe sa tibuok niyang kaliwatan ug opisyal nga mapahimutang ug makoronahan sa kahangturan niining tawag sa pagdumala. Dayon pagadawaton si Kristo isip Hari sa kaharian, ug Ginoo sa kaginoohan. Wala kita masayud kon unsa kadugay kini nga panagpundok, o pila ka sesyon kini ipahigayon niining dako nga konseho. Igo nang masayud nga usa kini ka panagpundok sa Priesthood sa Dios gikan sa sinugdanan niining yuta hangtud karon, diin ang mga report pagahimoon ug tanan nga gihatagan sa mga dispensasyon (mga talento) motugyan sa ilang mga yawe ug pangalagad ug mohimo og report sa ilang pagkatinugyanan sumala sa sambingay. Ang paghukom ihatag ngadto kanila kay panagpundok kini sa mga matarung, kadtong nakahupot ug naghupot sa mga yawe sa awtoridad sa Gingharian sa Dios dinhi sa yuta. Dili kini paghukom sa mga dautan. Kon ang tanang butang maandam ug tanang yawe ug gahum mahan-ay uban sa tibuok ug hingpit nga report sa pagkatinugyanan sa matag tawo, dayon si Kristo modawat niining mga report ug mapahimutang isip ang dunay katungod nga Magmamando niining yuta. Atol niining dakong konseho kuhaon niya ang iyang dapit pinaagi sa hiniusang tingog sa liboan kinsa pinaagi sa katungod sa Priesthood nanagpundok didto. Mag-una kini sa mahinungdanong adlaw sa kalaglagan sa mga dautan ug mahimong pagpangandam alang sa Milenyal nga Paghari” (The Progress of Man [1952], 481–82).
Si Elder Bruce R. McConkie sa Korum sa Napulog Duha ka mga Apostoles mitudlo:
Imahe
Elder Bruce R. McConkie
“Siya [si Kristo] moabut sa hilum ngadto sa iyang propeta ug sa mga apostoles nga buhi nianang higayuna. Kadtong nakahupot sa mga yawe ug mga gahum ug mga awtoridad sa tanang kapanahonan gikan ni Adan hangtud karon maanaa usab. Ug dugang pa, ang tanang matinud-anong mga miyembro sa Simbahan nga buhi nianang higayuna ug ang tanang matinud-anong mga santos sa tanang kapanahonan nga miagi maana. Mahimo kining labing dako nga kongregasyon sa matinud-anong mga santos nga sukad napundok niining kalibutana. Usa kini ka sakrament miting. Mahimo kining usa ka adlaw sa paghukom alang sa mga matinud-anon sa tanang kapanahonan. Ug mahitabo kini sa Daviess County, Missouri, sa usa ka dapit nga gitawag og Adan-ondi-Ahman” (The Millennial Messiah: The Second Coming of the Son of Man [1982], 578–79).