Wase 32
Na veika sa vakatakilai vei Josefa Simici na Parofita, me tukuni vei Pali P. Pereta kei Saiba Petesoni, e Menijesita mai Niu Ioka ena itekivu ni Okotova, 1830. Era sa marau ka gagadre vakalevu ko ira na italatala qase ena vukudra na Leimanaiti, io era sa nanuma na Lotu mai na veika sa tukuni ena iVola i Momani me baleta na nodra vakalougatataki. Oqori na vuna era sa vakatakekere kina vua na Turaga me vakatakila mai na Lomana ena vuku ni nodra talai na italatala qase ena gauna ko ya ki vei ira na yavusa Idia mai na yasayasa vaka-Ra. Sa tukuni e ra na veika sa vakatakilai.
1–3, Erau sa lesi ko Pali P. Pereta kei Saiba Petesoni me rau laki vunau vei ira na Leimanaiti ka me rau tomani Oliva Kaudari kei Pita Witima Lailai; 4–5, Me ratou masulaka me ratou kila na ivolanikalou.
1 Ia oqo na veika e baleti Pali P. Pereta na noqu tamata, raica au sa kaya vakaidina vua, me vaka niu bula tiko sa lomaqu dina me vunautaka na noqu kosipeli ka vuli vei au, ka me yalomalua ka yalomalumalumu.
2 Kei na veika au sa lesia vua sai koya me lako vata kei rau na noqu italai ko Oliva Kaudari kei Pita Witima Lailai, kivei ira na Leimanaiti ena lekutu.
3 Ka me lako vata tale ga kei iratou ko Saiba Petesoni; ia au na lako vata talega kei iratou koi au ka tiko ena kedratou maliwa; kau na dautataro vei Tamaqu ena vukudratou, ka na sega na ka e rawai iratou.
4 Ka me ratou muria na veika sa volai, ka me ratou kakua ni tukuna ni ratou ciqoma eso tale na ivakatakila; ia me ratou masu ga vagumatua me rawa niu tevuka ena nodratou vakasama na veika vata oqori.
5 Ka me ratou muria na veivosa oqo ka kakua ni vakaweleweletaka, kau na qai vakalougatataki iratou. Emeni.