1 Me vaka ni sa vakatakila vei au na Turaga ni ra sa baci vakasaqarai au tiko ko ira na noqu meca, mai Misuri, ka vakakina ena Yasana oqo, ia, me vaka ni sega ni dua na vuna me ra vakasaqarai au kina, ka sega talega ni dua na dodonu e tu vei ira me ra beitaki au; ka me vaka ni sa yavutaki kecega ena veika lasu butobuto duadua na veika era kaya, sa noqu lewa yalomatua ni sa kilikili me’u tei biuta mada vakalekaleka na vanua oqo, me’u taqomaki au kina kei ira tale ga na tamata oqo. Ia au na tukuna ga vei ira kece ka’u a dauveivoli kei ira, ni’u sa solia tu na kaukauwa kece ni veivoli oqori me baleti au vei ira na kena itini kei na vunivola, ia era na qarava kusarawa ka qarava vakadodonu na veika kece, io era na raica tale ga ni sa saumi na noqu dinau ena kena gauna, ena kena soli yani na iyaubula, se kevaka ena gadrevi vakakina, se kevaka e veitaudonui kei na veika ena yaco. Ia ni’u sa na kila ni sa maravu tale na draki, au na qai lesu tale mai vei kemudou.

2 Ia me vaka na veika dredre sa lesi meu na sota kaya, era sega soti ni dua na ka vei au, me vaka ni’u sa dau sota kaya tu mai na cudru kei na veivakararawataki ni tamata ena veisiga kecega ni noqu bula; ia na vuna e sega ni dau macala, e kena irairai ga ni’u sa lesi tu ni bera ni tauyavutaki ko vuravura ki na dua na ilesilesi; ia se vinaka se ca dou qai lewa. Raica sa kila na ka kecega oqo na Kalou, se vinaka se ca. Ia se cava ga, sa matau vei au me’u qalo voli ena wai titobu. Sa yaco me matau vei au na itovo ni bula oqori; kau sa vakataki Paula kina, ni sa reki ena vuku ni veika rarawa; ni sa dau sereki au mai na veika kece oqori na nodra Kalou na noqu qase me yacova mai na siga oqo, ia ena dau sereki au tiko mai na gauna oqo ka lako yani; raica ka kila, au na qaqa mai vei ira kecega na noqu meca, ni sa kaya na Turaga na Kalou.

3 Me ra reki kina na yalododonu kecega, ka marau vakalevu sara; ni sa nodra Kalou na Kalou i Isireli, ia ena sauma vakadodonu ko koya na veika era sa kitaka ena uludratou na nomudou meca.

4 Kei na dua tale, sa kaya vakaidina vakaoqo na Turaga: Me vakayacori tiko ga ka kakua ni mudu koso na cakacaka ni noqu valetabu, kei na cakacaka kecega au a lesia vei kemudou; ia me vakaruataki na nomudou gugumatua, na nomudou sasaga tikoga, na nomudou vosota kei na nomudou cakacaka vakaukauwa, raica dou na sega ni calata vakaidina na kemudou isau, sa kaya na Turaga ni Lewevuqa. Ia kevaka era sa vakacacani kemudou, era a sa vakacacani ira tale ga na parofita kei ira na tamata yalododonu era a bula e liu vei kemudou. Raica sa tu vakaidina na isau ni ka kecega oqo mai lomalagi.

5 Kei na dua tale, au sa solia vei kemudou oqo e dua na vosa me baleta na nodra papitaisotaki na nomudou mate.

6 Sa kaya vakaidina vakaoqo vei kemudou na Turaga me baleti ira na nomudou mate: Kevaka e dua vei kemudou sa papitaisotaki ena vukudra na nomudou mate, sa kilikili me dua na vunivola, ia me raica ko koya ka vakadinadinataka na nomudou veipapitaisotaki; me rogoca sara e daligana, me ivakadinadina ni ka dina, sa kaya na Turaga;

7 Ia na veika dou sa vola me volai tale ga mai lomalagi; io na ka kecega dou sa vauca e vuravura, sa vauci mai lomalagi; a ka kecega dou sa sereka e vuravura, ena sereki mai lomalagi.

8 Ni sa voleka meu vakalesuya mai ki vuravura e vuqa na ka, me baleta na matabete, sa kaya na Turaga ni Lewevuqa.

9 Kei na dua tale, me maroroi vakavinaka tu na kena itukutuku kece, ka karoni ena vanua sa dau maroroi kina na itukutuku ena noqu valetabu, me dau ivakananumi tu mai na itabatamata ki na itabatamata, sa kaya na Turaga ni Lewevuqa.

10 Au a gadreva me tukuni vei ira na yalododonu, ni’u gadreva, ena gagadre levu sara, me’u a vosa vei ira mai na vatavata ena ulutaga me baleta na nodra papitaisotaki na mate, ena Siga Tabu ka tu mai. Ia me vaka ni sa sega ni rawa oqori, au sa vola ga kina na vosa ni Turaga ena veigauna e so me baleta na ka oqo, ka vakauta yani vei kemudou ena meli, kei na itukutuku ni veika tale e so.

11 Au sa na tinia mada eke na noqu ivola oqo, ni sa lekaleka sara na gauna; raica era sa vakasaqaqara tiko na meca, ia me vaka ga sa kaya na iVakabula, Sa lako mai na turaga ni vuravura oqo, ia sa sega na ka sa rawata vei au.

12 Raica, na noqu masu vua na Kalou mo dou vakabulai kecega. Ia au sa vola kina na yacaqu me’u nomuni tamata ena vuku ni Turaga, na parofita ka daurairai ni Lotu i Jisu Karisito ni Yalododonu Edaidai.