1 Áko shooh, shikʼiské ayóó ííníshʼníinii, nihaadeesháałgo bee shá lą́ azlį́į́ʼ, éí bąą tʼáá shí shizaadjí bee nihichʼįʼ hadeesdzih; aooʼ, tʼáá shí shizééʼ bee, díí éí tsʼídá áłtséedi shizaad bee nihichʼįʼ haasdziih, díí ánihwiitʼaahii-dahsídáádóó tʼóó ahayóíʼ shinaanish, éí biniinaa tʼahdoo nihaa nishááh da ńtʼę́ę́ʼ.

2 Áádóó kʼad ndi doo nihaa deeshááł da doo ńtʼę́ę́ʼ ánihwiiʼaahii dahsidáádóó doo łaʼ baa náádiitʼą́ą́góó, doo łaʼ shitsáskʼeh naahoodeezʼáágóó; áádóó Bóhólníihii bee ajoobaʼ ntsaago yee shá hoołʼaʼígíí biniinaa nihaaníyá.

3 Áádóó áko shooh, Diyin God bidááhdóó hojoobaʼ ádaʼdoołyaago tʼáá íiyisíí bee haʼíníshní dóó nihá laanaa nisin, dóó bibee ajoobaʼ tʼahdii bíká sodadoołzin, áko bidááhdóó bąąhági átʼéii doo nihąąhgóó hádídéeshʼįįł, áko nihikʼis Zarahemladi bee bichʼįʼ nitsohodinídéél yę́ęgi átʼáo doo baa ákodínéesįįł da.

4 Ákondi shiDiyin God, shił ííshjání íʼiilaa, aooʼ, éí diyinkʼehgo oodááł yee hashtʼeʼninákaiʼígíí shił ííshjání ályaago tʼáá íiyisíí baa shił hóózhǫǫd.

5 Áádóó Diyin God biʼIiʼ Sizį́ Diyinii shił hólónígíí biniinaa, nihaʼííníshłį́, áko ałdóʼ nihaa shił hózhǫ́; ákótʼée ndi nihikʼiské Zarahemladi bichʼįʼ ntsohodinideelígíí doo éí bitsʼą́ą́dóó nihikʼid shił hózhónígíí da, háálá áko shooh, yéego bichʼįʼ nidahwiisnáaʼgo yiyiʼndaaskaiʼígíí éí baa shił hózhǫ́.

6 Ákondi shooh, doo nihaa ayihooshłii da nihikʼiské nahalingo tʼáá íiyisíí doo daʼiinohdlą́ą da; doo nihaa ayohooshłii da nihijéí biyiʼdi ádaadeidzíínódlíí da; doo nihaa ayohooshłii da éí bee daʼatʼíinii dóó nahasdzáán bikááʼgóó tʼáadoo bee chodaaʼínígíí nihijéí biih dahołée da; aooʼ, doo nihaa ayihooshłii da tʼóó beidaʼilyáaʼígíí doo bichʼįʼ sodadilzin da, ákondi Diyin God tʼáá aanii hináanii bichʼįʼ sodadoołzin, dóó nihibąąhági ádaatʼéii bee nihaanídiʼdootʼaałgo bee bichįʼ dadinohʼį́į́ʼ, hoolʼáágóó niheʼoodląʼ bee, éí náásgóó áhodoonííł.

7 Háálá áko shooh, ląʼí da bééhodoozįįłígíí hólǫ́ nihidishní; dóó áko shooh, díí tʼáá ałtso bitsʼą́ą́dóó éí tʼááłáʼígo aláahdi ílį́—háálá áko shooh, Nináʼnídláii hiná dóó bidineʼé yaa doogáałgo doo nízaad hadziih da.

8 Áko shooh, doo éí tʼah atsʼíís bee hólǫ́ǫgo nihaadoogááł dishníi da; háálá áko shooh, Iiʼ Sizį́ Diyinii doo éí kóhodoonííł shiłníigo shił halneʼ da. Áko díí dóó baa shił bééhózin da; ákondi kónéélááʼ éí shił bééhózin, áko Bóhólníihii Diyin God adziilii dóó bizaad bikʼehgo tʼáá ałtsoní íidoolííł.

9 Ákondi shooh, Iiʼ Sizį́ Diyinii kóniłtsogo shił hoolneʼ, kóníigo: Díí diné bee bił hólneʼ, kódíníigo—Ádaa ńdaʼoohkąąh; dóó Bóhólníihii bá hashtʼeʼádaʼdoołnééh, dóó bedaʼatiingóó wohááł, éí kʼédaházdǫ́ǫ́n, háálá áko shooh, yáʼąąsh bił hazʼą́ bichʼįʼ hoołzhiizh, dóó Diyin God biYeʼ nahasdzáán yikááʼ doogááł.

10 Áádóó áko shooh, Mary éí bidoołchííł, Jerusalemdi nihizázíyę́ę bikédaayahdi, éí chʼikę́ę́h tʼah doo diné bee haléehii nilį́, ílíinii dóó bikʼihoodiiniiʼii nilį́, éí éí Iiʼ Sizį́ Diyinii bibeʼadziilii bikʼi hooleʼgo yiltsąąd, dóó biyáázh hodooleeł, aooʼ, éí tʼáá aaníí Diyin God biYeʼ nilį́.

11 Áádóó éí dah didoogááł, tiʼdahoonííh dóó achʼįʼ nidahwiiʼná dóó nahoʼdinitaah ałʼąą ádaatʼéii yikʼee tiʼhwiidoonih; dóó díí éí saad bohodoolnííł éí áníigo éí bidineʼé tiʼdahooníhígíí dóó bitahdahoneezgaaʼígíí ákʼiididootʼááł.

12 Áádóó anoonééł ákʼiidididootʼááł, áko anoonééł bitłʼóól bidineʼé dabótąʼígíí kʼíídiyooʼah; doo nihitah dahółdzilii ákʼijįʼ kwíyiilaa, áko biʼaa joobaʼ biiʼ hadidoobį́į́ł tsʼísee kʼehgo, áko tsʼíseekʼehgo háitʼáo bidineʼé yíkáʼadoolwołgo bił bééhodoozįįł éí doo bitah dahoołzilígíí bikʼehgo.

13 Áko Iiʼ Sizį́ Diyinii tʼáá áłtsoní bił bééhózin; ákondi Diyin God biYeʼ tsʼísee kʼehgo tiʼhoozniiʼ bidineʼé bibąąhági ádaatʼéii yá ákʼiididootʼááł biniyé, áko ndaʼiisííʼ yę́ę beʼadziilii yee yisdéidoonił éí bikʼehgo nahjįʼ kwíidoolíił; dóó áko shooh, díí éí tʼáá aaníigo shiiʼ hólǫ́.

14 Áko nihił chʼihonishaah ádaa ńdaʼoohkąąh, dóó diyingo náánihidiʼdoochííł; háálá Iiʼ Sizį́ Diyinii ání doo náánihiʼdizhchį́į́góó doo yáʼąąshdi niháhwiidooʼaał da; éí bąą wóshdę́ę́ʼ dóó ádaa ńdaʼoohkąąhgo tó bee danihidiʼdoolzį́į́ł, áko nihibąąhági ádaatʼéii nahjįʼ nihąąh tʼáádadoogis, áko Diyin God biDibé Yázhí deinohdlą́ą doo, éí nahasdzáán bibąąhági ádaatʼéii nahjįʼ kódeileʼ, éí yisdádooʼniłgo bidziil dóó doo ákótʼéego oodááł nihąąh téidoogis.

15 Aooʼ, ánihidishní hóshdę́ę́ʼ dóó tʼáadoo nídaałdzidí, dóó bąąhági átʼéii nahjįʼ kodaołééh, éí danihidoołchxǫǫłgo danihótąʼ, aooʼ, háago dóó náás dookááh, dóó nihiDiyin God nihibąąhági ádaatʼéii baa ádaa ńdaʼoohkąąhígíí bił ííshją́ą́ ádaołééh dóó bibee hazʼáanii bikʼeh dahonołʼį́įgo bił ahadaʼdinoohtʼaah, dóó díí jį́ tó bee nihiʼdiilzį́į́hgo bił ííshją́ą́ ádaohłééh.

16 Áádóó tʼáá háí shį́į́ díí yeʼiilaago, dóó Diyin God bibee hazʼáanii kódóó yikʼeh hół’į́įgo, bee bichʼįʼ haasdzíʼę́ę tʼáá bí yéédoolnih, aooʼ, bee bichʼįʼ haasdzíʼę́ę tʼáá bí yéédoolnih, hoolʼáágóó iiná yoosbą́ą dooleeł, Iiʼ Sizį́ Diyinii tʼáá aaníigo yaa hoolneʼígíí bikʼehgo, éí tʼáá aaníigo shił hoolneʼ.

17 Áádóó áko shikʼiské ayóó ííníshʼníinii, díísh deinóhdlą́? Áko shooh, ánihidishní, aooʼ, deinóhdlą́ągo shił bééhózin; dóó deinóhdlánígíí éí kótʼáo shił bééhózin éí Iiʼ Sizį́ Diyinii shił ííshją́ą́ áyiilaa éi shił hólǫ́. Áádóó áko éí bitsʼą́ą́dóó niheʼoodląʼ daniłdzil, aooʼ, bee hahadziih yę́ę bąąh, tsʼídá yéego baa shił hózhǫ́.

18 Háálá tʼáá níléídę́ę́ʼ bee nihił hashneʼ, áko nihikʼiské bichʼįʼ ntsohodinídéél yę́ęgi átʼáo tʼáá íiyisíí doo nihá nisin da, ákótʼée ndi baa ákoniizį́į́ʼ nisinígíí éí bohoolyaa.

19 Háálá diyinkʼehgo oodááł biiʼ deínóhkáahgo baa ákoniizį́į́ʼ; Diyin God bił hazʼą́ągo deínóhkáahgo baa ákoniizį́į́ʼ; aooʼ, kʼeházdongóó bichʼįʼ deínóhkááhígíí baa ákoniizį́į́ʼ.

20 Nihił ííshją́ą́ ályaago baa ákoniizį́į́ʼ, bizaad tʼáá aanínígíí bee, áko tʼáá kʼéházdongóó tʼéiyá naaghá; dóó yee haadzíʼígíí doo łahgo áyoolíił da; nishʼnáájí dóó nishtłʼají doo chahaʼoh náhoodleełígi átʼée da, éí doodago yáʼátʼééhjí dóó doo yáʼátʼéehjįʼ doo áłnánádááh da, éí bąą, bihoogááł éí tsʼídá tʼááłáʼí ahoolʼáá góneʼ bee áhóótʼiʼ.

21 Áádóó atsʼíís doo biiʼ hodílzinígíí doo yiiʼ hólǫ́ǫ da; áádóó tʼóó baaʼihígíí éí doodago bąąh chinígíí Diyin God bił hazʼą́ądi doo yah adoogááł da; éí bąą ánihidishní baa hodoolzhiizh, aooʼ, dóó éí nihóníyáadi, tʼáá háí shį́į́ tʼóó baaʼihígíí éí áadi tʼahdii tʼoo baaʼih doo.

22 Áádóó áko shikʼéí ayóó ííníshʼníinii, díí ánihidishnínígíí éí Diyin God bá naałnishígíí baa ákodinóhsįįł bichʼįʼ chʼéédóhdziłgo nihá nisin, áko doo nihąąh chingóó deiyinóhkááh doo, áko Diyin God hodílzingo óʼoolʼįįł bikééʼ wohááł doo, díí bikʼehgo yah ooyáa doo.

23 Ákohgo hojoobaʼ ádanohsin doo, dóó akʼeh dahonołʼį́ dóó aa ákodanohsin; doo nanitłʼahgo lą́ danosin; tʼah hwiindzin nihee dahólǫ́ǫ doo dóó nízaadgóó tiʼdahoohnííh, dóó tʼáá ałtsojįʼ tʼah danohsin; tʼáá áłahjįʼ Diyin God bibee hazʼáanii bikʼeh dahonołʼį́ʼ; tʼáá áłtso íiyisíí danohsinígíí bíká sodadołzin, iiʼ sizíinii dóó atsʼíískʼehjí; áłahjįʼ Diyin God nihaa yiiléhígíí baa nátʼą́ą́ʼ bichʼįʼ ahééh danohsin.

24 Áádóó oodląʼ, haʼólní, dóó diyingo ayóóʼóʼóʼní nihee dahólǫ́ dóó áłahjįʼ yáʼátʼéehgo dahinohná.

25 Áádóó Bóhólníihii nikʼihojídlíi doo, nihiʼééʼ tʼáadoo daachiní, áko índa Abraham, Isaac, dóó Jacob, dóó Diyin yá yádaałtiʼii dadiyinii hodeeyáádą́ą́ʼ yę́ę bił nahisóótą́ą doo, nihiʼééʼ doo daachingóó azhą́ nihiʼééʼ chin bąąh ádaadingo, yá ąąsh bił hazʼą́ądi doo chʼídoohááł nohsingóó.

26 Áádóó áko shikʼéí ayóó ííníshʼníinii, díí saad Iiʼ Sizį́ Diyinii bikʼehgo nihichʼįʼ haasdzííʼ éí tʼáá aaníigo shił hoolneʼ, dóó shiiʼ sizíinii tʼáá íiyisíí bił hóózhǫǫd, háálá shizaad tsʼídá yéego bíká ádaohtʼįįd dóó bikʼeh dahonoołʼįįdígíí biniinaa.

27 Áádóó áko, Diyin God biʼáhodiilzéeh nihikʼi hólǫ́ǫ doo, dóó danihghan dóó nihikédaayah bikʼi ałdóʼ, dóó nihilį́į́ʼ dóó nihinaaldloosh, dóó tʼáá ałtso niheeh dahólóonii bikʼi, nihizáanii dóó nihaʼáłchíní, niheʼoodląʼ dóó nihinaanish yáʼátʼéehii bikʼehgo, kodóó dóó ahoolʼáágóó. Dóó áko haasdzííʼ Amen.