Mormon Bizaad

1 Áádóó kʼad shí, Mormon, béésh tʼą́hí hashtʼeishłaa áko shiyeʼ Moroni bilákʼedeesłééł, áko shooh, shidineʼé, Nephi dineʼé kʼasdą́ą́ʼ tʼáá átʼé naaztsxeedgo yiiłtsá.

2 Áádóó ląʼí neeznaadiin nááhai Christ nádzáagóó díidi béésh tʼą́hí shiyeʼ bilákʼeenil, dóó shidineʼé tʼáá átʼé ndaaztseedgo yiidoołtsééł nisin. Ákondi Diyin God íínizingo yitsʼáádóó yisdádoogááł, áko yaa ndoozoh, dóó Christ ałdóʼ, áko háadi da hoolzhishgo yee nidadiʼdoolééł.

3 Áádóó kʼad, díidí saad nahazohígíí baa háásdzih; Nephi bibéésh tʼą́hí ahiiyínil dóó bikʼijį́ʼ, dóó aláahdi naatʼaanii Benjamin dah sidáajįʼ ahoolzhiizh, éí Amaleki yaa chʼíhoníʼą́, díí shilákʼeeʼnilgo haneʼ niséłkááʼ, dóó łaʼ béésh tʼą́hí bikʼíníyá, éí Diyin yá yádaałtiʼii ałchʼį́į́digo yaa dahalneʼgo biiʼ chʼétʼą́, Jacob dóó aláahdi naatʼáanii Benjamin dah sidáajįʼ ahoolzhiizh, áádóó Nephi bizaad ląʼí dabiyiʼ.

4 Áádóó díí béésh tʼąhí bikááʼ nahásdzohígíí shił yáʼátʼééh, háálá Christ doogááł níigo bikáʼ, dóó shizásí ląʼída adahoodooniłígíí bił béédahózinyę́ę bidahoolyaa, aooʼ, áádóó ałdóʼ shił bééhózin díí nihił ádahoodooniłígíí áádę́ę́ʼ dóó dííjį́į́jįʼ bidahoolyaa, dóó kʼad yoołkááł dabilááhgóóígíí tʼáá aaníí baa hodoolzhizh—

5 Ákohgo, díí nídiinilígíí, shahaneʼ ałtso bikááʼ ádeeshłííł, éí shahaneʼ yidziihígíí Nephi bibéésh tʼą́hí bitsʼą́ą́dééʼ nidideeshnił; dóó saad tįįhdigo shidineʼé bá nahideezoh.

6 Ákondi shooh, díí béésh tʼą́hí dahdideeshjih, díí Diyin bikʼeh áhodooníłígíí dóó ił ííshją́ą́ ádaalyaaígíí dabiyiʼ, dóó łaʼ shindahaasdzoh bił ndeeshnił, hááłá aláahdi shił nilį́; dóó tʼáá aníigo shikʼéí éí aláahdi bił danilį́į doo.

7 Áádóó díí baa hódzáánii biniyé áshtʼį́; hazhóoʼígo shichʼįʼ yałtiʼ, Diyin Bóhólníihii biʼIiʼ Sizį́ Diyinii shiiʼ naalnishígíí bikʼehgo. Áádóó, doo tʼáá ałtsoní shił bééhózin da; ákondi Diyin Bóhólníihii éí tʼáá ałtsóní náás ádahodooníłígíí bił bééhózin; ákohgo, Shiyiʼdi naalnishígíí bikʼehgo éʼéłʼį́.

8 Áádóó Diyin God bichʼįʼ shikʼéí bá sodiszin, Diyin God yaa ákóndadínóodzįįł biniyé, aooʼ, éí Christ nináʼnídlá; áko diné ayóó bá adahwiinítʼį́ ndadoodleeł.

9 Áádóó kʼad Shí, Mormon, díí naʼíísooh ałtso áshlééh, éí Nephi bibéésh tʼą́hí bitsʼą́ą́dééʼ háánil; dóó Diyin God yééhósinii dóó bibee akʼeʼdiitįįh bikʼehgo áshlééh.

10 Ákohgo, baa hoolzhiizh Amaleki díí béésh tʼą́hí aláahdi naatʼáanii Benjamin yeiníjaaʼ dóó bikéédééʼ, nááná łaʼ béésh tʼą́hí néidiijaaʼ dóó yił niinínił, éí ńdaʼazoh aláahdi naatʼáanii danilínii níléídééʼ deiníjaaʼ, są́ ndaʼooghą́ą́ʼdééʼ dóó kojįʼ aláahdi naatʼáanii Benjamin beiyínil.

11 Áádóó aláahdi naatʼáanii Benjamin beiyítʼą́, są́ nidaʼoogą́ą́ʼdóó shílákʼee yíltsʼid. Dóó shí, Mormon, Diyin God bichʼįʼ sodeeszin kodóó hoolzhishgo baaʼáháyą́ą doo. Dóó shił bééhózin baaʼáháyą́ą doo; háálá ayóó ádaatʼéí bikááʼ náháásdzoh, biyiʼdóó shidineʼé dóó bikʼéí tsʼídá akééʼdi yoołkáałdi bándahodiyootʼááł, Diyin God bizaad ńdaháasdzooígíí bikʼehgo.

12 Áádóó kʼad, aláahdi naatʼáanii Benjamin baa haneʼgo—bidineʼé ałchʼįʼ dahijah.

13 Áádóó baa hoolzhiizh Nephi dineʼé bikéyahdééʼ Laman dineʼé bindaabaahí hakʼijįʼ dadeezbaah. Ákondi shooh, aláahdi naatʼáanii Benjamin hondaabaahí ahíjiiʼeezh, dóó yiidááh níbaaʼ; dóó tʼáá bídóʼ bibeʼadziilii yee atah naazbaaʼ, Laban bibéésh hał yęę bee.

14 Áádóó Diyin Bóhóníihii bibeʼadziil bee beʼanaaʼ yíká ndaazbaaʼ, áko Laman dineʼé ląʼí dadimííl neistseed. Áádóó baa hoolzhiizh Laman dineʼé yikʼijiʼ ndaasbaaʼgo kéyah baadahaastʼánéedę́ę́ʼ chʼídeineeskaad.

15 Áádóó baa hoolzhiizh Christ ádaʼdilʼínígíí aheeskai, dóó doo yádaałtiʼgóó ádabiʼdiilyaa, dóó bee hazʼáanii kʼideyiztiʼígíí bikʼehgo bándawiistʼą́.

16 Áádóó Diyin yá yádaałtiʼí tʼóó ádaʼdilínígíí dahazlį́į́ʼ dóó bikʼijįʼ, dahalneʼé dóó ndaʼnitiní tʼóó adaʼdilʼinígíí diné yita dahazlį́į́ʼ, dóó tʼáá ałtso ndaʼiisíʼígíí bikʼehgo bándahwiistʼą́; dóó áłchʼįʼ bádahachįʼgo Laman dineʼé yídiikai, áko shooh, baa hoolzhiizh aláahdi naatʼáanii Benjamin, dóó Diyin God yá yádaałtiʼii dadiyinii diné yitahgóó naakaigo yíkáʼííjééʼ—

17 Háálá áko shooh, aláahdi naatʼáanii Benjamin hastįįh diyinii nilį́igo, bidineʼé diyinkʼeh oodááł yee naatʼáanii nilį́į́ ńtʼę́ę́ʼʼ; dóó ląʼí hastóí dadiyinii kéyah bikááʼ dahólǫ́ǫ́ ńtʼę́ę́ʼ, dóó Diyin bizaad adziilii dóó bee óhólnííhii yee yádaałtiʼ ńtʼę́ę́ʼ; dóó saad bikʼeh daʼashchʼíʼígíí yee hadahaasdzííʼ háálá diné bikʼos daniłdzilígíí biniinaa—

18 Ákohgo, díí ákaʼiijéʼígíí bił, aláahdi naatʼáanii Benjamin, bitsʼíís tʼáá átʼé dóó biiʼ sizíinii tʼáá yee haditʼée ńtʼę́ę́ʼyee naashnish, dóó ałdóʼ Diyin yá yádaałtiʼii, ahodiilzééh ninádeisdlá kéyah bikʼááʼgi.