1 Áádóó baa hoolzhiizh tádiin dóó baʼaan dį́į́ʼ éí ałtso nááhai; dóó tádiin dóó baʼaan ashdlaʼ ałdóʼ ałtso nááhai; áádóó áko shooh tʼáá ałtso kéyahgóó éí naakitsʼáadahii Jesus yikééʼ naazínígíí, Christ bisodizin bee dah daʼíldéehgo ádayiilaa. Áádóó diné éí tʼáá ałtso baa heeskaigo, dóó tʼáá aaníigo bąąhági ádáátʼįįdyę́ę yaa ńdaʼooskango éí, Jesus bízhiʼ binahjįʼ tó bee dabiʼdoolzį́į́ʼ; dóó éí ałdóʼ Iiʼ Sizį́ Diyinii baa dahaasyá.

2 Áádóó baa hoolzhiizh tádiin dóó baʼaan hastą́ą́ góneʼ yihahgo, kéyah bikááʼgóó tʼáá ałtso Nephi dineʼé dóó Laman dineʼé, Diyin Bóhólníihii deiyoosdląąd; dóó doo éí haitʼáo da ałchʼįʼ bá dahachįʼ da dóó doo ałkʼijįʼ danilį́į da, áko tʼáá ałtsogo diné tʼáá łaʼí nízínígo ahaa dajoobaʼ daazlį́į́ʼ.

3 Áádóó tʼáá ałtsoní éí yee ahaa dajoobaʼ ńtʼę́ę́ʼ; éí bąą doo łaʼ ayóó daʼatʼį́į da dóó doo éí łaʼ baa dahojoobáʼí da ńtʼę́ę́ʼ, índa ąąh asdá dóó tʼáá bínííkʼeh ndaakaiʼígíí, ndi tʼáá ájíłtso tʼáá bínííkʼeh ndajikaigo ádahoʼdiilyaa, dóó yáʼąąshdę́ę́ʼ bikʼidahojídlíigo ályaa.

4 Áádóó baa hoolzhiizh tádiin dóó baʼaan tsostsʼid éí ałdóʼ ałtso nááhai, dóó tʼahdii kéyah bikááʼgóó kʼé bee náás hoolzhish ńtʼę́ę́ʼ.

5 Dóó naakitsʼáadah Jesus yikééʼ naazínígíí éí ląʼída naanish ayóó átʼéii ádayiilaa; áko índa bitah dahoneezgaiígíí bitah yáʼádahootʼéehgo áńdayiidlaa dóó daneeznánéedóʼ dahináago áńdayiidlaa, dóó doo ndaakaiyę́ę éí ndaakaigo áńdayiidlaa índa doo daʼooʼínée, daʼooʼį́įgo áńdayiidlaa, dóó bijééhdaakałę́ę éí daʼdiitsʼaʼgo áńdayiidlaa; dóó álílee tsʼídá tʼáá ałtso ałʼąą ádaatʼéego éí bílaʼashdlaʼii baʼáłchíní bitahgóó yee ndaalnish ńtʼę́ę́ʼ; dóó Jesus bízhiʼ binahjįʼ tʼéiyá díí álílee yee ndaalnish ńtʼę́ę́ʼ.

6 Dóó kótʼáo tádiin dóó baʼaan tseebíí ałtso nááhai, dóó tádiin dóó baʼaan náhástʼéí ałdóʼ ałtso nááhai; dóó dízdiin dóó baʼaan tʼááłáʼí, dóó dízdiin dóó baʼaan naaki ałtso nááhai; aooʼ, ńléí dízdiin dóó baʼaan náhástʼéijįʼ ałtso nááhai ndi, dóó ałdóʼ ashdladiin dóó baʼaan tʼááłáʼí éí ałtso nááhai, dóó ashdladiin dóó baʼaan naaki ałtso nááhai; aooʼ, ńléí ashdladiin dóó baʼaan náhástʼéijįʼ ałtso nááhai ndi.

7 Áádóó Diyin Bóhólníihii éí kéyah bikááʼgóó diné tsʼídá tʼáá íiyisíí yikʼihojídlíigo ałʼąą náádíneestʼą́; áko índa kintah adahideezkʼą́ʼą́ągóó, ląʼída kin hadaasʼá ándeiyiidlaa.

8 Aooʼ, Zarahemla tsʼídá ayóó átʼáo kin haalʼáhą́ą ndi áńdayiidlaa.

9 Ákondi ląʼída éí kin hadaasʼáhą́ą adah haazdááz, dóó tó bił deiyeʼ; áko díí áńdadoolnííłgo, éí doo bohónéedzą́ą da.

10 Áádóó, áko shooh, baa hoolzhiizh Nephi bidineʼé ayóó daʼatʼį́, dóó tsʼídá tʼáadoo hodíinaʼí ałʼąą dineestʼą́; dóó diné tsʼídá danizhóní dóó baa ádahwiinítʼį́ daazlį́į́ʼ.

11 Áádóó daʼahisgeh, dóó baʼáłchíní ahaa dayiizeezh, dóó Diyin Bóhólníihii ląʼígo yee yił ałhadaʼdeestʼánígíí bikʼehgo bikʼidahojídlíí ńtʼę́ę́ʼ.

12 Áádóó Moses bibee hazʼáanii bikʼehgo óʼoolʼįįłę́ę éí doo bikʼehgo ooldah da silį́į́ʼ, ndi biDiyin Bóhólníihii dóó biDiyin God bee hazʼáanii baa yiizláhą́ą éí yikʼehgo deíkááh ńtʼę́ę́ʼ; dóó tʼáá áłahjįʼ diyinkʼehgo chʼiyáán ádąąh deitʼį́įgo sodadilzin, áko tʼáá áłahjįʼ ahínéíkahgo sodadilzin dóó Diyín Bóhólníihii bizaad deididootsʼį́į́ł biniyé.

13 Áádóó baa hoolzhiizh tʼáá ałtso kéyah bikááʼgóó diné bitah, doo saad ahídeetʼááh da; ndi éí naakitsʼáadah Jesus yikééʼ naazínígíí álílee ayóó átʼéii bitah ádaalʼį́į́ ńtʼę́ę́ʼ.

14 Áádóó baa hoolzhiizh tsostsʼidiin dóó baʼaan tʼááłáʼí éí ałtso nááhai, dóó tsostsʼidiin dóó baʼaan naaki ałdóʼ ałtso nááhai; aooʼ, dóó índa, ńléí tsostsʼidiin dóó baʼaan náhástʼéijįʼ ałtso nááhai; aooʼ, neeznádiin ałtso nááhai ndi, dóó Jesus naakitsʼáadahii náyiizláʼą́ą, éí ałtso Diyin God bikéyah hózhónígóó aheeskai, tʼáá hazhóʼó táltʼéego nahasdzáán tʼáá yikááʼ naakai dooleeł hodooʼniidę́ę tʼéiyá; dóó akééʼ naazíinii łaʼ dabidiʼdoolzį́į́ʼ dóó bitsáskʼehgi náádabiʼdiilzį́į́ʼ; dóó ląʼí diné yił ahąąh ndaakai yę́ę ałdóʼ náádabiʼdiilyá.

15 Áádóó baa hoolzhiizh kéyah bikááʼgóó doo saad ahídeitʼaah da, háálá Diyin God beʼayóó óʼóʼníinii diné bijéí biiʼ dahólǫ́ǫgo biniinaa.

16 Áádóó doo éí daʼahoolchʼį́įd da, doodago doo ałkʼijįʼ ntsídaakees da, doodago doo saad ahídeitʼaah da, doodago ałjiłí, doodago yoochííd, doodago ndaʼałtseedii, doodago atseezį́ dóó naʼadloʼ diné dóó asdzání bee tsiʼnaʼadáh ádaatʼéii éí bitahgóó ádin ńtʼę́ę́ʼ; dóó tʼáá aaníí éí Diyin God nihokááʼ dineʼé tʼáá ałtso bílaʼ yee áyiilaaígíí éí tsʼídá doo łaʼ kótʼéego bił dahózhǫ́ǫ da ńtʼę́ę́ʼ díí dineʼé íiyisíí bił dahózhónígi átʼáo.

17 Daʼniʼįįhii, doodago ndaʼałtseedii, doodaiiʼ Laman dineʼé ndi, doodago ałʼąą átʼéego -ites dineʼé bee dabiʼdójíhígíí éí tsʼídá ádin ńtʼę́ę́ʼ; ndi tʼáá ałtso éí tʼááłáʼí, Christ baʼáłchíní danilį́į́ ńtʼę́ę́ʼ, dóó Diyin God bił hazʼánígíí dayoosbą́.

18 Áádóó dooládóʼ éí diné bikʼidahojisdliʼ da! Háálá éí tʼáá ałtsoní ádeiléhígíí Diyin Bóhólníihii yee yikʼidahojídlíí ńtʼę́ę́ʼ; aooʼ, bikʼidahojídlíigo ndi dóó náásnootʼį́įłgo éí neeznádiin dóó baʼaan neeznáá nááhai; dóó Christ níyáhą́ądą́ą́ʼ ndahoʼdizhchínée kojįʼ ałtso ájísdįįd, dóó tʼáá ałtso kéyah bikááʼgóó diné saad doo ahídeetʼáah da.

19 Áádóó baa hoolzhiizh Nephi, akéeʼdi béésh bikááʼ haneʼ áyiilaahą́ą, (díí haneʼ éí béésh tʼą́hí Nephi wolyéhę́ę bikáaʼgi haneʼ áyiilaa) éí bizééʼ hazlį́į́ʼ; dóó éí biyeʼ, Amos éí haneʼ yikááʼ ánáánéíłʼį́; dóó éí éiyá ałdóʼ Nephi wolyéhę́ę béésh tʼą́hí bikáaʼgi haneʼ ánááyoodlííł ńtʼę́ę́ʼ.

20 Áádóó éí éiyá tʼáá yikááʼ náʼiidzohgo tseebídiin dóó baʼaan dį́į́ʼ nááhai; áko tʼahdi éí kéyah bikááʼgóó kʼé hólǫ́ǫgo hoolzhish, tʼáá hazhóʼó áłchʼį́į́dígo, łaʼ diné sodizin yitsʼáhaaskaiígíí tʼéiyá dóó Laman dineʼé yee ádaʼdéejiʼ; éí bąą kéyah bikááʼgóó éí Laman dineʼé náhásdlį́į́ʼ.

21 Áádóó baa hoolzhiizh Amos éí ałdóʼ náádiilyá, (dóó neeznádiin dóó baʼaan náhástʼédiin dóó baʼaan dį́į́ʼ nááhai Christ níyáhą́ądą́ą́ʼ dóó wóshdę́ę́ʼ) dóó biyeʼ Amos bitsáskʼeh góneʼ béésh bikááʼ haneʼ yikááʼ nináʼádzoh ńtʼę́ę́ʼ; áádóó éí éiyá ałdóʼ, Nephi wolyéhę́ę béésh tʼą́hí bikáaʼgi haneʼ ííłʼį́į́ ńtʼę́ę́ʼ; dóó éí díidí naaltsoos, Nephi baa haneʼ wolyéego, Nephi béésh tʼą́hí ałdóʼ bikááʼ nááháasdzo.

22 Áádóó baa hoolzhiizh naakidi neeznádiin nááhai; dóó naakidi są́ náʼoogą́ą́ʼ tʼáá hazhóʼó áłchʼį́į́dígo tʼéiyá chʼéédzííʼ.

23 Áádóó áko, shí, Mormon, díí nihił béédahodoozįįł nisin diné éí ałʼąą dínéestʼą́, áko índa tʼáá ałtsogóó nihokááʼgóó dahazlį́į́ʼ, dóó Christ bikʼihojídlíigo biniinaa, diné ayóó átʼéego daʼatʼį́ daazlį́į́ʼ.

24 Áádóó áko, éí díí naakidi neeznádiin dóó baʼaan tʼááłáʼí yihahgo bitah hahoolzhiizh, ééʼ daʼílíinii dah yiih ńdaakááh, dóó yooʼ danizhónígíí, dóó tʼáadoo leʼé daʼílíinii nahasdzáán bikáaʼgi ádaalyaaígíí, éí yee ádaa dahaʼniihgo yaa ńdiikai.

25 Áádóó kodóó tʼáadoo leʼé yáʼádaatʼéehii dóó bee daʼiináaniiyę́ę doo yee ahaa dajoobaʼ da daazlį́į́ʼ.

26 Áádóó dah daʼíldéhígíí bikʼehgo ałtsʼádaʼiisdeeʼ; dóó tʼáá bí bisodizin bá dahooghan bee ńdaʼdidoolyééłgo ádeiyiilaa, dóó tʼáá aaníí Christ bisodizin bá hooghanée éí doo deiniidlą́ą da daazlį́į́ʼ.

27 Áádóó baa hoolzhiizh naakidi neeznádiin dóó baʼaan neeznáá ałtso nááhaigo kéyah bikááʼgóó tʼóó ahayóí ałʼąą átʼéego sodizin bee dah daʼíldééh silį́į́ʼ; aooʼ, ląʼída éí sodizin Christ beedahoniilzin daaní, ákondi ląʼída binahatʼá bee yisdáʼiildéehii doo dayoodlą́ą da, áko índa bąąhági ádaatʼéii yaa nínáádiikai, dóó tsʼídá íiyisíí diyingo baa ntsáhakeesyę́ę éí doo baa doolyéłę́ę yichʼįʼ kódeiyiilaa háálá bąąhági ádaatʼinígíí biniinaa.

28 Áádóó dineʼé bąąhági átʼéii yaa naakaiígíí dóó Chʼį́įdii biʼiiníziinii bijéí deíyiiłtsoodígíí biniinaa éí díí sodizin bąąhági átʼéii tsxį́įłgo bee náás dínéesą́.

29 Áádóó nááná, náánáłaʼ sodizin léiʼ Christ doo deiniidlą́ą da daaní; áádóó tʼáá aaníí Christ bisodizinée dayoołchʼį́į́d, háálá éí diné hojoobaʼ ádeinízingo dóó Christ dayoodlą́ągo biniinaa; dóó deijoosłááʼ háálá ląʼída éí bitahgóó álílee diyinkʼehgo naʼanish ádaalyaahą́ą biniinaa.

30 Éí bąą Jesus hastóí náyiizláʼą́ą naakitsʼáadah danilínée hootaakaiyę́ę, éí adziil dóó óhólníihii yee yikʼehdadidlį́įʼgo awáalyaa góneʼ yah adayiiznil; ndi Diyin God bizaad bibee adziilii, éí éí biiʼ dahólónígíí biniinaa, awáalyaahą́ą éí ałtso ahiih ndahaasdááz, dóó naanish diyinii ayóó ádaatʼéhígíí éí binaanish ádayósingo diné yitah daakai ńtʼę́ę́ʼ.

31 Ákótʼée ndi, azhą́ ákótʼéego álílee bitah dahólǫ́ǫ ndi, diné bijéí deistłʼis, dóó ndootsił danízingo hadeinitáá ńtʼę́ę́ʼ, Jew dineʼé Jerusalemdi Jesus bizaad biniinaa, hadeinitáhą́ągi átʼáo.

32 Áádóó kǫʼ biyiʼ góneʼ adayiistłʼííd, dóó tʼáadoo ádaatʼéhígóó áádę́ę́ʼ chʼíheeskai ńtʼę́ę́ʼ.

33 Áádóó naaldlooshii daʼałchinii bighan góneʼ adayiistłʼííd ndi, naaldlooshii daʼałchinii tʼóó yił ndaanéé ńtʼę́ę́ʼ, awééʼ dibé yázhí yił naanéhégi átʼáo; dóó doo ádaatʼéhígóó éí yitahdééʼ chʼíheeskai.

34 Ákótʼée ndi, diné bijéí deistłʼis, háálá ląʼída priest danilínígíí dóó diyin yá yádaałtiʼí tʼóó ádaʼdilínígíí ląʼída sodizin bá hooghan ałʼąą ádaatʼéego hadeiyiswod, dóó bikʼehgo tʼáá ałtsoní bąąhági átʼéii yaa naakai. Áádóó Jesus bidineʼé ałdóʼ atídeiłʼį́; ndi Jesus bidineʼé éí doo nátʼą́ą́ʼ atíńdaʼałʼį́į da ńtʼę́ę́ʼ. Áádóó ákótʼáo tʼáá nináháhááh bikʼehgo, tʼáá házhóʼí doo daʼoodlą́ą́góó dóó bąąhági átʼéii yaa ńdiikai, wónáásdóó naakidi neeznádiin dóó baʼaan tádiin ałtso nááhai ndi.

35 Áádóó áko baa hoolzhiizh tʼáá díí yíhaiígíí biyiʼ, aooʼ, naakidi neeznádiin dóó baʼaan tádiin dóó baʼaan tʼááłáʼí góneʼ yihahgo, diné tʼóó ahayóígo ałtsʼáhaazná.

36 Áádóó baa hoolzhiizh díí kóneʼ yihahgo diné łaʼ Nephi dineʼé daolyéego hazlį́į́ʼ, dóó éí éiyá Christ tʼáá aaníí dayoodlą́ą́ ńtʼę́ę́ʼ; dóó díí kótʼéego daʼíldéhígíí éí łaʼ diné Laman dineʼé—Jacob dineʼé, Joseph dineʼé, dóó Zoram dineʼé deiłníí ńtʼę́ę́ʼ;

37 Éí bąą Christ tʼáá aaníí dayoodlánígíí, dóó tʼáá aaníí Christ yichʼįʼ sońdadílzįįhígíí, (éí éí łaʼ táltʼéego Jesus náyiizláʼą́ą tʼáá kǫ́ǫ́ hólǫ́ǫ doo hodooʼniidę́ę éí daʼatah ńtʼę́ę́ʼ) éí Nephi dineʼé, dóó Jacob dineʼé, dóó Joseph dineʼé, dóó Zoram dineʼé daolyéé ńtʼę́ę́ʼ.

38 Áádóó baa hoolzhiizh nahatʼá bee yisdáʼiildéehii doo deiniizį́ʼę́ę éí Laman dineʼé, dóó Lemuel dineʼé, dóó Ishmael dineʼé daolyéé ńtʼę́ę́ʼ; dóó Christ binahatʼá bee yisdáʼiildéehii tʼáá aaníí átʼéhígíí ałdóʼ bił béédahózin, ndi doo deiniizį́į́ʼgóó yikʼijįʼ daazlį́į́ʼ; dóó ałkʼidą́ą́ʼ, bizhéʼé, doo daʼoodlánéegi átʼáo, baʼáłchíní tʼáadoo daʼiinohdlání deiłníigo éí ndeinitin ńtʼę́ę́ʼ.

39 Áádóó hodeeyáádą́ą́ʼ átʼéhę́ęgi átʼáo, bizhéʼé éí doo yáʼátʼéehii dóó bąąhági átʼéii éí yaa naakaigo biniinaa. Áko Diyin God baʼáłchíní dajiinohłá dabiʼdiʼníigo éí ndabiʼdinitin ńtʼę́ę́ʼ, éí Laman dineʼé hahoolzhiizhyę́ędą́ą́ʼ ndi Nephi baʼáłchíní dajiinohłá, dabiʼdiʼníigo ndabidiʼnitinéegi átʼéego.

40 Áádóó baa hoolzhiizh naakidi neeznádiin dóó baʼaan dízdiin dóó baʼaan dį́į́ʼ éí ałtso nááhai; dóó ákótʼéego éí diné kéédahatʼį́į́ ńtʼę́ę́ʼ. Áádóó diné doo yáʼátʼéehii dóó bąąhági átʼéii yaa naakaiyę́ę dabidziil daazlį́į́ʼ dóó éí Diyin God bidineʼé yilááhgóó dínéestʼą́.

41 Áádóó éí diné sodizin bá hooghan tʼáá bí ádeinízinígi átʼáo ádayoolííł dóó ndeinil ńtʼę́ę́ʼ, dóó tʼáadoo leʼé daʼílíinii yee hadeidileʼ. Áádóó ákótʼáo naakidi neeznádiin dóó baʼaan ashdladiin ałtso nááhai, dóó naakidi neeznádiin dóó baʼaan hastą́diin ałdóʼ ałtso nááhai.

42 Áádóó baa hoolzhiizh diné bąąhági átʼéii yaa naakaiyę́ę éí Gadianton nahonitʼingo beeʼaghaʼdiitʼaahiiyę́ę ląʼí nááhodleeł silį́į́ʼ.

43 Áádóó Nephi dineʼé dabiʼdiʼnínée éí ałdóʼ bijéí biyiʼdi ádaa dahaʼniihgo yaa ńdiikai, háálá daʼílíinii tʼáá íiyisíí bee dahazlį́įʼgo biniinaa, dóó bikʼiské Laman dineʼé dah yikahígi átʼáo nikiʼdiildeeʼ.

44 Áádóó kodóó naakitsʼáadahí éí diné nahasdzáán yikááʼ naaldeehii bąąhági ádáádzaayę́ę yaa naakaiígíí yaa yínííł daniizį́į́ʼ.

45 Áádóó baa hoolzhiizh táadi neeznádiin ałtso nááhaigo, tʼáá áła Nephi dineʼé dóó Laman dineʼé éí aheełtʼéego tʼáá íiyisíí bąąhági átʼéii yaa ńdiikai.

46 Áádóó baa hoolzhiizh Gadianton daʼniʼįįhii éí tʼáá ałtso kéyah bikááʼgóó hazlį́į́ʼ; dóó tʼáadoo yáʼátʼééh hiinání da tʼáá hazhóʼó Jesus yikééʼ naazíinii tʼéiyá. Áádóó diné bąąhági átʼéii yaa naakaiígíí éí béésh óola dóó béésh łigaii tʼóó ahayóí hashtʼendayiinííł ńtʼę́ę́ʼ, dóó tʼáadoo leʼé ałchʼįʼ ndayiiłniih ńtʼę́ę́ʼ.

47 Áádóó baa hoolzhiizh táadi neeznádiin dóó baʼaan ashdlaʼ ałtso nááhaigo, (dóó tʼahdii diné bąąhági átʼéii yaa naakai) Amos éí bizééʼ hazlį́į́; dóó bikʼis, Ammaron, Amos bitsáskʼeh góneʼ béésh bikááʼ haneʼ ánáánéíłʼį́į́ ńtʼę́ę́ʼ.

48 Áádóó baa hoolzhiizh táadi neeznádiin dóó baʼaan naadiin ałtso nááhaigo, Ammaron, Iiʼ Sizį́ Diyinii bił halneʼgo, béésh bikááʼ haneʼę́ę éí diyinée néideesʼį́į́ʼ—aooʼ, tsʼídá tʼáá ałtso béésh bikááʼ haneʼ diyingo hadadiilyaahą́ą ndi dóó daʼoochííł bikʼehdę́ę́ʼ yítʼánée—Christ níyáhą́ądą́ą́ʼ ndi dóó ńléí neeznádiin dóó baʼaan naadiin nááhaijįʼ éí haneʼ bikááʼ ádaalyaahą́ą éí tʼáá ałtso néideesʼį́į́ʼ.

49 Áádóó Diyin Bóhólníihii éí yichʼįʼ néideesʼį́į́ʼ, áko náás hodeeshzhiizhgo Jacob bighandóó dineʼé, Diyin Bóhólníihii bił ahaʼdeestʼánée éí binahjįʼ náásgóó yaa halneʼę́ę yichʼįʼ hanéídooʼnił. Áádóó ákótʼéego éí Ammaron bihaneʼ ałtso neiyíízoh.