Enos Binaaltsoos

1 Áko shooh, baa hoolzhiizh shí, Enos, shił bééhózingo shizhéʼé éí diné yáʼátʼéehii átʼéii ńtʼę́ę́ʼ—Háálá bizaad yee nashineeztą́ą́ʼ, dóó Diyin Bóhólníihiikʼehgo yáʼátʼéehgo iiná yee nashineeztą́ą́ʼ—dóó éí bąą shiDiyin God bízhiʼ baa hashniih—

2 Áádóó nihił hodeeshnih shibąąhági ádaatʼéii Diyin God tʼahdoo shaandeeʼaahyę́ędą́ą́ʼ, éí bidááhdóó tʼáá íiyisíí shichʼįʼ nahwiisnááʼ.

3 Áko shooh, naaldlooshii daʼałchinígíí bíká naashzheeh biniyé tsiyiʼgóó dah diiyá; dóó shizhéʼé tʼáá ahą́ą́h hoolʼáágóó iiná yee shichʼįʼ hanázihyę́ę, dóó Diyin yá naazíinii bił dahózhǫ́, tʼáá íiyisíí yéego shijéí yidiisnááʼ.

4 Áádóó shiiʼ sizíinii diyinkʼehgo oodááł tʼáá íiyisíí yídin silį́į́ʼ; dóó Áshiilaaígíí bidááhdóó ntsidinígoʼ yéego bichʼįʼ sodeeszin, dóó shiiʼsizʼíinii bá ádaanáʼiisiskan; dóó bichʼįʼ yishchahgo sodiszingo shee iʼííʼą́; aooʼ, dóó azhą́ʼ tłʼééʼ hazlį́į́ʼ ndi tʼahdii yáʼąąsh gódei shiinééʼ diitsʼaʼ.

5 Áádóó łaʼ shichʼįʼ hajoodzííʼ, kóníigo: Enos, nibąąhági ádaatʼéii baa nisiníyáhą́ą naanídinishʼaah, dóó nikʼihojidoodliił.

6 Áádóó shí, Enos, Diyin God doo biyoochʼíídgóó shił bééhózin; ákohgo, baa yínííł nisinée nahjįʼ kólyaa.

7 Áádóó kódííniid: Diyin Bóhólníihii, dííshąʼ éí haitʼáo bóhónéedzą́?

8 Áádóó kóshidííniid: Christ yínídlánígíí biniinaa, éí tʼahdoo biinééʼ dinitsʼį́į́h da dóó tʼahdoo yiniłtsééh da. Dóó ląʼí nínáádoohahgo índa bitsʼíís yee ííshjání ídidoolnííł; ákohgo, náásgóó yínááł, neʼoodląʼ hadaałtʼéego ánáániidlaa.

9 Kʼad, bikʼihoolzhiizh éí saad sidétsʼą́ą́ʼgo, shikʼéí danilíinii Nephi dineʼé beʼiinaʼ baa tsídékéézgo bá hojoobaʼ niizį́į́ʼ; ákohgo, tʼáá átʼé bee aníshtʼéhígíí bee Diyin God bichʼįʼ bá náʼiisékan.

10 Áádóó iiʼ sizíiniikʼehjí shichʼįʼ nahwiiʼnáago, áko shooh, Diyin Bóhólníihii biinééʼ shíniʼ nááhásdlį́į́ʼ, kóníigo: Nikʼéí danilíinii shibee hazʼáanii yikʼeh dahółʼinígíí baa deeshááł. Díí kéyah baa diníʼą́, dóó éí hodiyingo hazʼą́; doo éí haitʼáo da hóyéeʼgo bikʼijįʼ hadeesdzih da tʼáá hazhóʼó bąąhági ádaatʼį́įgo tʼéiyá; ákohgo, bee haasdzíʼę́ę bikʼehgo nikʼéí baa deeshááł; dóó ndaʼiisíihgo yínííł hwiindzin bikʼijįʼ kódeeshłííł.

11 Áádóó shí, Enos, díí saad sídítsʼą́ąʼgo, Diyin Bóhólníihii yinishdlánígíí bee shidziil sélį́į́ʼ; dóó chʼééh sodiszingo nízaadgóó ahoolzhiizh, shikʼéí Laman dineʼé bá.

12 Áádóó baa hoolzhiizh sodeeszin dóó bikʼijįʼ yéego tʼáá ałtsojįʼ bíká áátʼįįd, Diyin Bóhólníihii kóshidííniid: Háálá iinídlánígíí biniinaa, laanaa nínízinígíí nichʼįʼ kódeeshłííł.

13 Áádóó kʼad áko shooh, laanaa bitsʼą́ą́dę́ę́ʼ nisinée—ákó shidineʼé, Nephi dineʼé, niʼiilzííh yiih yíkaidą́ą́ʼ, tʼáá haʼátʼííshį́į́ bee áhodiʼdooldįįł, dóó Laman dineʼé chʼéékaigo, áko Bóhólníihii Diyin God shidineʼé, Nephi dineʼé baa haneʼ nídaháasdzooígíí tʼáá náás yiitʼááł doo; bibee adziilii bee, áko náasdi beiniłką́ągo Laman dineʼé bił ííshją́ą́ ídoolniił, áko yee dah yisdánídookah—

14 Háálá hojoobaʼ adeitʼíigo naʼnitin tʼáá aaníinii nináádeididoodłééł ílǫ́ǫ chʼééh ádeilʼįįd. Dóó bádahachįʼgo adadííniid, bighaahdą́ą́ʼ, nihizaad ńdaháádzohyę́ę dóó tʼáá nihí adanihidiildįįł, dóó nihizází ádaʼoołʼįįł yę́ę éí dóʼ tʼáá ałtso.

15 Ákohgo, Bóhólníihii Diyin God nihizaad ńdaháádzohígíí doo dadoochxǫǫłgóó nihá yaa áhályą́ągo shił bééhózin, tʼáá áłahjįʼ bichʼįʼ náʼooshkąąh, háálá kóshidííniid: Tʼáá biniyé hojoobaʼ nínízinígíí neʼoodląʼ bee yínkeedgo, iinídlą́ągo Christ bízhiʼ binahjįʼ biniyé sodilzinígíí nichʼįʼ kódoolnííł.

16 Áádóó sheʼoodląʼ bee, Diyin God néísiskąąd nihaahaneʼ nídaháasdzooígíí baa áhólyą́ą doo bidííniid; áko Diyin God shił ahaʼdeetʼą́ tʼáá bí íiniizį́įʼgo béésh tʼą́hí bikááʼ haneʼę́ę Laman dineʼé yeidooʼááł.

17 Áádóó shí, Enos, ahaʼdeetʼánée bikʼehgo áhodooníłígíí shił bééhoozin; ákohgo shiiʼ sizíinii áhoʼdiilzeeʼ.

18 Áádóó Diyin Bóhólníihii áshidííniid: Nihizázíyę́ę ałdóʼ díí shídayííkeed; áko beʼoodląʼ bikʼeh ádáhodoonííł; háálá tʼáá nigi átʼáo bedaʼoodląʼ ńtʼę́ę́ʼ.

19 Áádóó kʼad baa hoolzhiizh shí, Enos éí, Nephi dineʼé bitaa séyá, Diyin bikʼeh áhodooníłígíí bee nanétą́ą́ʼ, dóó éí sidetsʼą́ʼígíí dóó yiiłtsánígíí tʼáá aaníigo bee hahaasdzííʼ.

20 Áádóó kʼad baa haasdziih Laman dineʼé tʼáá aaníí Diyin God deidoodląąłgo Nephi bidineʼé tʼáá awołí bee yíká ádáátʼįįd. Ákondi chʼééh ádeiitʼįįd; tʼáá íiyisíí daʼoołchʼį́į́d daazlį́į́ʼ, dóó doo yáʼáshóonii ndabilóozgo daʼałchin daazlį́į́ʼ, dóó tʼóó báádahadzid, dóó diné nidaʼałtseedii daazlį́į́ʼ, tʼóó bedaʼelyaii adeʼádaʼdiilyaa dóó tʼóó baaʼihii ałtso yiih yíkai lá; naaldlooshii daʼałchinígíí deildeeł; níbaal yiiʼ dabighan, dóó doo kééhojitʼį́įdi ndaaldeeh bitsiiʼ daashzhééʼ dóó naaldlooshii bikágí boozhnííʼ gónaa tʼéiyá bikʼidaastiʼgo; dóó ałtį́į́ʼ índa béésh hał názhahí dóó tsénił doo bił nidanitłʼahgo yee atídaʼałʼį́. Dóó lą́ʼí yiiltʼéego éí atsįʼ tʼáá daalchíiʼgo tʼáá bízhání deilghał; dóó ndanihidoołtsxiłgo tʼáá áłahjįʼ nihíkáʼádaatʼį́.

21 Áádóó baa hoolzhiizh Nephi bidineʼé kʼidiʼdoolyéełgo hashtʼeʼdahoolaa, dóó tłʼoh naadą́ą́ʼ ałʼąą átʼéego deineestʼą́, dóó tsin bineestʼąʼ, dóó ndanilkaadígíí, béégashii ałʼąą ádaatʼéii, dóó tłʼízí, dóó tłʼízí daʼałchinígíí, dóó łį́į́ʼ ląʼígo.

22 Áádóó tʼóó ahayóí Diyin yá yádaałtiʼii nihitah dahólǫ́ǫ́ ńtʼę́ę́ʼ. Áádóó Diné éí bikʼos dááłdził, áko doo bikʼizhdootą́ą́ʼ ádaatʼée da.

23 Áádóó tsʼídá yéego bikʼeʼeschʼíiʼgo, naʼnitin dóó Diyin bikʼeh áhodooníiłgo anaaʼ dahodooleełígíí bee bił dahóoneʼ, dóó ałkʼijįʼ ídlį́, dóó dahodoochxǫǫł, dóó anoonééł áłahjįʼ bee béédabijííłnííh, dóó ahoolʼáágóó áhoonííł, dóó Diyin God bibee ánihwiitʼaah dóó bibee adziilii, díí tʼáá ałtso—áłahjįʼ Diyin Bóhólníihii bá dahodínósin bidiní. Díí tʼáadoo biʼohó bee yáshtiʼ, dóó tsʼídá bééhózínígo bee haadzííʼ, áko doo tsxįįgo áhoʼdidooldįįł da. Dóó kótʼáo haah hashneʼgo nááházoh.

24 Áádóó Nephi dineʼé dóó Laman dineʼé daʼahigą́ągo yishʼíigo shiiníłką́.

25 Áádóó baa hoolzhiizh są́ biih yíyá, áádóó neeznádiin dóó tsostsʼidiin dóó baʼaan náhástʼéí nááhaiyę́ędą́ą́ʼ nihizhéʼé Lehi Jerusalemdę́ę́ʼ dah diiná.

26 Áádóó nááshidiʼdoolyééł bichʼįʼ hoolzhishgo baa ákoniizį́į́ʼ, Diyin God bibeeʼadziil shidiisnáʼígíí bee díí dineʼé ndínéeshtįįł dóó Diyin bikʼeh áhodooníłígíí bee bichʼįʼ hadeesdzih, dóó Christ bizaad tʼáá aaníi átʼéego bee bichʼįʼ hadeesdzih. Áádóó díí baa hashneʼgo tʼáá ńléídę́ę́ʼ shiiníłką́, dóó nahasdzáán biláahdi átʼéego baa hóózhǫǫd.

27 Áádóó tʼáá hodíínaʼí hanáshyį́įhdi deeshááł, sháNináʼnídláii bił hazʼą́ądi; háálá éí bí binahjįʼ háádeeshyįhgo shił bééhózin. Áádóó shitsʼíís hoolʼáágóó hiná násdlį́įʼgo éí tʼáá íiyisíí baa shił hózhǫ́, dóó bidááhdę́ę́ʼ yideesįįł; áko shił hózhǫ́ǫgo biniiʼ yideestsééł, áádóó kóshididooniił: Wóshdę́ę́ʼ shaa nínááh, nikʼihojisdlííʼii, shiTaaʼ nilíinii bighandi ná hashtʼehoolyaa. Amen.