Omni Binaaltsoos

1 Áko shooh, bikʼihoolzhiizh shí, Omni éí shizhéʼé, Jarom, díidí béésh tʼą́hí bikááʼ łaʼ nínáhidíizoh shidííniid, áko nihizází baa haneʼ tʼáá ndeilyée doo—

2 Ákohgo, shiyoołkáałgo, shidineʼé Nephi dineʼé, baa áháshyą́ągo béésh hał bee bichʼą́ą́h niʼséłhxaal shá baa ákonoohsįįh, áko Laman dineʼé, bibeʼanaaʼí doo yizáhidookah da. Ákondi shooh, shí éí diné doo yáʼáshóonii nishłį́, dóó bee ndahwiistʼánée dóó Diyin Bóhólníihii bibee hazʼáanii doo bikéh honishʼį́į da ńtʼę́ę́ʼ tʼáá íídą́ą́ʼ bikʼeh honishʼį́į doo ńtʼę́ę́ʼ.

3 Áádóó baa hoolzhiizh naakidi neeznádiin dóó tsostsʼidiin doo biʼaan hastą́ą́ nááhaigo, hodéezyéélgo ląʼí da nááhai, áádóó ląʼí báhádzid daʼanaaʼgo nidaʼahijistseed. Aooʼ, áko, naakidi neeznádiin dóó tseebídiin doo biʼaan naaki nááhai, dóó díidí béésh tʼą́hí shizází yee ndahazʼánéegi átʼáo tʼah naashjaah, dóó shiyeʼ Amaron bílákʼééjaaʼ. Kojįʼ ałtso íʼiishłaa.

4 Áádóó kʼad shí, Amaron, tʼáá haʼátʼíí shį́į́ náhídóozohígíé nídéesoh, éí tʼah díkwíhí yeeʼ, shizhéʼé bibéésh tʼą́hí biyiʼ.

5 Áko shooh, bikʼihoolzhiizh táadi neeznádiin dóó naadiin nááhaigo, Nephi dineʼé tʼáá íiyisíí doo yáʼádaatʼéhígíí ábiʼdisdįįd.

6 Háálá Diyin Bóhólníihii doo yee hásʼą́ą da, Jerusalem kéyahdę́ę́ʼ chʼííníʼeezh dóó yaa áhályą́ dóó yikʼideezʼį́į́go anaaʼí yitsʼą́ą́dóó yisdáyíʼeezh, aooʼ, dóó bizází bił ííshją́ą́ ádaalyaa yę́ę bee hazʼáanii bikʼehgo doo bił ííshjání ádadoolnííł da, éí nihizází yee yichʼįʼ hahaasdzííʼ, kóníigo: Shibee hazʼáanii doo bikʼeh dahonołʼį́į́góó kéyah bikááʼgóó doo náás doohkah da.

7 Ákohgo, Diyin Bóhólníihii anihootʼą́ ayóó átʼéiigo yikʼijįʼ kóyiilaa; ákótʼée ndi, diyinkʼehgo deíkáhígíí yaa joozbaʼ áko doo dínóonééł da, ndi anaaʼí bílákʼeedóó yisdáyíínil.

8 Áádóó baa hoolzhiizh shikʼis Chemish béésh tʼą́hí baa níjaaʼ.

9 Kʼad shí, Chemish, shínaaí bibéésh tʼą́hí biyiʼ, tʼáá díkwíhí bikááʼ náházoh; háálá áko shooh, akéedi áyiilaaígíí yiiłtsą́, éí tʼáá bí bílaʼ yee náyíízoh, néyíízoh dóó tʼáá éí bijį́ sheiníjaaʼ. Dóó díigi átʼáo nihaa haneʼ tʼah nideijaah, háálá nihizází yee ndahazʼánée bikʼehgo. Kojįʼ ałtso íʼiishłaa.

10 Áko shooh, shí, Abinadom, Chemish biyeʼ nishłį́. Áko shooh, baa hoolzhiizh tʼóó ahayóí anaaʼ yiiłtsą́ dóó shidineʼé Nephi dineʼé dóó Laman dineʼé ahidiníłnáago ałkʼinéijah, dóó shí, shí béésh hał bee, ląʼí da Laman dineʼé niséłtseed shikʼiske bichʼą́ą́h naashbaahgo.

11 Áádóó áko shooh, díí diné baa haneʼ béésh tʼą́hí dabikááʼ éí aláahdi naatʼáanii danilínígíí deiníjaaʼ, ląʼídi są́ náʼoogą́ą́ʼ bikʼehgo; éí łaʼ ił ííshją́ą́ ádaʼalyaaígíí doo shił bééhózin da, nídaháasdzooígíí tʼéiyá, éí doodago, Diyin bikʼehgo áhodooníłígíí; ákohgo, nídaháasdzooígíí éí tʼáá bíighah. Áádóó kojįʼ ałtso íʼiishłaa.

12 Áko shooh, Amaleki áshtʼį́, Abinadom biyeʼ nishłį́. Áko shooh, Mosiah bee nihił hodeeshnih, éí kéyah Zarahemladi aláahdi naatʼáanii ábiʼdiilyaa; háálá áko shooh, Diyin Bóhólníihii bił ííshją́ą́ʼ áyiilaa tʼah bítséedi díí Nephi bikéyahdóó tsxį́įłgo chʼídoohnééł biʼdooʼniid, dóó tʼáá háí shį́į́ Diyin Bóhólníihii biinééʼ deidiiztsʼą́ʼígíí éí dóʼ bił kéyahdóó chʼídoohnééł, diné doo kééhatʼínígóó—

13 Áádóó baa hoolzhiizh Diyin Bóhólníihii ábidííniidyę́ę yikʼeh áhoolaa. Áko diné doo kééhatʼínígóó dahdiiná, dóó tʼáá háí shį́į́ Diyin Bóhólníihii biinééʼ deidiiztsʼą́ʼígíí, dóó ląʼí da naʼnitin dóó Diyin bikʼeh áhodooníłígíí yinahjįʼ yíkai. Dóó Diyin God bizaad tʼáá áłahjįʼ bee bił haneʼgo, dóó Diyin bibee adziilii bee, doo kééhojitʼį́įdi yiiyiʼ chʼékai kéyah Zarahemla hoolyéejįʼ.

14 Áádóó diné łaʼ yikʼíkai, Zarahemla dineʼé daolyáo. Kʼad éí, Zarahemla dineʼé ayóó átʼéego bił dahóózhǫǫd, Zarahemla ałdóʼ yéego bił hóózhǫǫd, háálá Diyin Bóhólníihii Mosiah dineʼé beiníʼeezh béésh łitsoii tʼą́hí Jew dineʼé baa haneʼ bikááʼ nídaháasdzogo deiníjaaʼ.

15 Áko shooh, baa hoolzhiizh Mosiah bił bééhózin Zarahemla bidineʼé Jerusalemdę́ę́ʼ chʼékai, Zedekiah, Judah aláahdi yinaatʼáanii nilį́įgo, éí Babylongóó yisnáá jizlį́į́ʼ.

16 Áádóó doo kééhojitʼį́į góneʼ chʼíníná, dóó tónteel bikááʼgóó Diyin Bóhólníihii hóníʼeezh, Mosiah kéyah yikááʼ kééhatʼínéejįʼ jiníná, éí tʼáá ákweʼé bił kéédahojitʼį́įgo hodeeshzhiizh.

17 Áádóó Mosiah bikʼíníyáhą́ądą́ą́ʼ, tʼóó ahayóí silį́į́ʼ lá. Ákótʼée ndi, tʼóó ahayóí anaaʼ dahazlį́į́ʼ dóó ayóó ałkʼinéijah ńtʼę́ę́ʼ, dóó béésh hał yee nináʼdaʼahiltsxiʼgo hoolzhiizh, dóó bizaadyę́ę deiyíłchxʼǫ́; dóó baa haneʼ tʼáadoo łaʼ deiníjaaʼ da; dóó Tʼáá Ałtsoní Áyiilaii yóóʼadeideezʼą́; dóó Mosiah, éí doodago bidineʼé, doo yikʼidaʼdiitįįh da.

18 Ákondi baa hoolzhiizh Mosiah bizaad yee neidinótį́į́ł. Áádóó baa hoolzhiizh Mosiah bizaad yee neineeztʼą́ągo, Zarahemla dabizázíyę́ę yaa hoolneʼ dabizhéʼé dabizázíyę́ę ałkééʼ naháasdzooígíí, tʼáá yénálniihígíí bikʼehgo, éí nídaháasdzo, ndi díí béésh tʼą́hígíí doo biyiʼ da.

19 Áádóó baa hoolzhiizh Zarahemla bidineʼé, dóó Mosiah bidineʼé, ahíikai; dóó Mosiah aláahdi naatʼáanii nilį́įgo bikʼihodiiniiʼ.

20 Áádóó baa hoolzhiizh Mosiah bíyoołkáałdi, tsé ntsaa binídaʼokʼaashgo bił yah aatʼą́; áádóó bee yílyáhígíí dóó Diyin God bibee aʼiilyéii dóó bibee adziilii bee tsé binídaʼokʼaazh dabikááʼígíí yaa hoolneʼ.

21 Áádóó Coriantumr, dóó bidineʼé nidaaztseed yę́ę tsé dabikááʼ. Áádóó Zarahemla bidineʼé Coriantumr yikʼi dánééztʼą́ą́ʼ yę́ę yaa halneʼ; dóó yił kéédahatʼį́įgo ooljééʼ náhástʼéidi dah yiitą́.

22 Áádóó ałdóʼ bizhéʼé dabizází yę́ę tʼį́į́hdigo baa chʼíhootʼą́. Áádóó áłtsé dabimá dóó dabizhéʼéyę́ę kin yadiinéézdę́ę́ʼ chʼídahaaznáh, Diyin Bóhólníihii diné bizaad ałʼąą átʼéego áyiilaayę́ędą́ą́ʼ, dóó bikʼeʼéyééʼgo Diyin Bóhólníihii bánahwiizʼą́, éí tʼáá aaníí ádaatʼé; dóó náhookǫsjigo kéyah bikááʼgóó bitsin adíítąąd.

23 Áko shooh, shí, Amaleki, Mosiah bíyoołkááłyę́ędą́ą́ʼ shiʼdizhchʼį́, tʼahdii naasháago náábiʼdiilyá; dóó aláahdi naatʼáanii Benjamin, éí biyeʼ, biséskʼeh góneʼ anáánaadzáh.

24 Áádóó áko shooh, Benjamin naatʼáanii nilį́įgo, Nephi dineʼé dóó Laman dineʼé yéego ałchʼįʼ nidaazbaaʼ bitsʼą́ą́dóó yéego atídaʼahiilyaago yííłtsą́. Ákondi shooh, Nephi dineʼé éí akʼehdadeesdlį́į́ʼ, aooʼ, aláahdi naatʼáanii Benjamin tʼáá aaníí Zarahemla anaaʼí kéyahdóó chʼííníłkaad.

25 Áádóó baa hoolzhiizh dóó hasistih, dóó, shaʼáłchíní adin, dóó aláahdi naatʼáanii Benjamin éí Diyin Bóhólníihii yikʼehgo yigááł, ákohgo, díí béésh tʼą́hí baa deeshnił, tʼáá ałtso dineʼé Diyin baa hohkááh yiłní, Israel biDiyin Ayóó Átʼéii, dóó Diyin bikʼeh áhodooníłígíí, dóó ił ííshją́ą́ ádaalyaaígíí deinóhdlą́, Diyin yá nidaalʼaʼí diyinkʼehgo áká ańdaajáhígíí, dóó ałʼąą átʼéego saad daʼaniihgo baa dahaasyáhígíí, dóó ataʼ dahalneʼgo baa dahaasyáhígíí, dóó tʼáá ałtso yáʼátʼéhígíí, tʼáá ałtsoní yáʼátʼéehii éí Bóhólníihii bitsʼą́ą́dę́ę́ʼ: dóó doo yáʼáshóonii éí biʼiiníziinii bitsʼą́ą́dę́ę́ʼ.

26 Áádóó kʼad, shikʼiské ayóó ánihííníshníinii, Christ baa dadoohkah nisin. Éí Israel biDiyin Ayóó Átʼéii átʼį́, dóó biyisdánáʼiildééh ńdadóhłé, dóó nináʼílyá bibee adziil ałdóʼ. Aooʼ, baa hohkááh, dóó nihiyiʼ sizíinii tʼáá átʼé bee bichʼįʼ nááhółniih, dóó tʼáá chʼiyáán ádąąh dahtʼį́ dóó tʼáá bił sodadołzin, dóó nihá ndahwiistʼą́ bijį́įjįʼ yéego ádaahtʼį́; dóó Diyin Bóhólníihii hináago yisdádoohkah.

27 Áádóó kʼad diné łaʼ Nephi bikéyah doo kééhojitʼį́į́góó nákaiígíí baa hadeesdzih, ląʼí da kéyah baa dahastʼánée bikááʼ kénáádahoniitʼį́į doo danízin.

28 Ákohgo, doo kééhojitʼį́į́góó dah diikai. Áádóó binaatʼáanii éí diné bitsxeʼ dóó Ayóó Átʼéii nilį́, dóó diné bikʼos niłdzilígíí nilį́, áko diné ałchʼįʼ ńdaʼditsihgo ánáyiilʼįįh, dóó ałtso naaztseed, tʼáá hazhóʼí ashdladiingo tʼéi chʼéédzííʼ, doo kééhojitʼį́į́di, dóó kéyah Zarahemladi nákai.

29 Áádóó baa hoolzhiizh ląʼí da ałdóʼ dah náánéidiiʼeezh, dóó doo kééhojitʼį́į́góó dah náádiikai.

30 Áádóó shí, Amaleki, shikʼis łaʼ, ałdóʼ yił dah diikai; dóó tʼah doo baa náhodiistsʼį́į́h da. Áko kʼadę́ę nááshiʼdiilyéego bichʼįʼ hoolzhish; dóó díí béésh tʼą́hí ałtso bikááʼ ndaʼasdzoh. Dóó díí kʼad ałtso baa haasdzííʼ.