1 Áko baa hoolzhiizh Nephi bidiné bitahgo ándahwiiʼaahii dahwéeʼaahgo hástʼą́ą́ nááhai, kéyah Zarahemladi doo saad ałchʼįʼ ahaʼnííł éí doodaiiʼ anaaʼ hólǫ́ǫ da;

2 Ákondi diné éí bichʼįʼ nidahwiisʼnááʼ, aooʼ, bikʼiské nidaaztseedígíí biniinaa tʼáá íiyisíí bichʼįʼ nidahwiisʼnááʼ, dóó bilį́į́ dóó ndeiniłkaad nidaaztseedígíí ałdóʼ biniinaa, dóó bitłʼoh náádą́ą́ʼ deiyilʼá dááchxǫʼą́ą́góó ałdóʼ, éí Laman dineʼé yikʼi naaldeehgo deiyííłchxǫʼ.

3 Áádóó yéego bichʼįʼ nidahwiiʼnánígíí biniinaa diné biiʼ sizíinii tʼáá átʼé yínííł daazlį́į́ʼ; dóó Diyin God yee nahwiiʼáahii bikʼijįʼ kólyaago deiyoosdląąd háálá bibąąhági ádaatʼéii dóó tsʼídá aláahdi woolchʼį́į́d yaa naakaiʼígíí biniinaa; éí bąą honaanish béédazhdoolnih biniyé chʼééhonísid.

4 Áádóó sodizin tʼáá átʼé hadeidilééhgo hahoolzhiizh; aooʼ, dóó ląʼigo tooh Sidondi tó bee dabiʼdoolzį́į́ʼ dóó Diyin God bisodizin yidahidiikai; aooʼ, Alma tʼáá bí tó yee yiyíísį́į́ʼ, éí sodizin daʼatahígíí bihigh priest dooleełgo biʼdiilzį́į́ʼ, bizhéʼé Alma bikʼi sodoolzingo bíísį́į́ʼ.

5 Áádóó baa hoolzhiizh ándahwiiʼaahii dahwéeʼaahgo tsostsʼid náhááh góneʼ táadi dimííl dóó baʼaan ashdladi neeznádiin diné yiltʼáó Diyin God bisodizin yihidiikai dóó tó bee dabiʼdoolzį́į́ʼ. Dóó bikʼiʼdahooshzhiizh Nephi bidineʼé ánihwiiʼaahii bikʼidahwéeʼaahgo tsostsʼid nídááhai; áko ahodéeszéeʼgo ahoolzhiizh.

6 Áádóó baa hoolzhiizh ándahwiiʼaahii dahwéeʼaahgo tseebíí náhááh góneʼ, sodizin daʼatahígíí ádaa dadzódlí daazlį́į́ʼ, tʼáá íiyisíí daʼatʼínígíí biniinaa, dóó naatʼą́hí daditsxǫsígíí, dóó naatʼą́hí nizhónígo-daastłʼónígíí, dóó bilį́į́ʼ dóó binaaldlooshii kʼeeʼaandínéestʼą́ biniinaa, dóó bibéésh óola, dóó bibéésh łigaii, dóó tʼáá ałtso daʼílíinii ałʼąą ádaatʼéii, éí yíká ádaatʼį́įgo shódeiyoostʼeʼ; dóó díí tʼáá ałtso yee ádaa dadzódlíigo ádadootʼį́, dóó ééʼ tʼáá íiyisíí daʼílíinii yee hadadítʼé daazlį́į́ʼ.

7 Áko díí Alma tʼáá íiyisíí bee bichʼįʼ nahwiiʼná, aooʼ, dóó ląʼí da diné sodizin yiiʼ ndaʼnitiní, dóó priest danilínígíí, dóó elder yikʼi sodadoolzingo yiyíísį́į́ʼ yę́ę ałdóʼ; aooʼ, dóó ląʼí yéego yínííł daniizį́į́ʼ háálá diné bitahgóó bąąhági átʼéii dahazlį́įʼgo deiyooʼínígíí biniinaa.

8 Háálá deiyiiłtsą́ tʼáá íiyisíí yínííł danilį́įgo diné bisodizin daʼatʼínígíí ádaa dadzódlí daazlį́į́ʼ, dóó bee daʼatʼíinii bijéí dóó nahasdzáán bikááʼgóó tʼáadoo bee chodaaʼínígíí ádiih nideiyiizlá, ałhidiníłnáó, ałhąąh nideiyiiłhaał daazlį́į́ʼ, áádóó tʼáá bí ádanizinígíí dóó bił yáʼádaatʼéhígíí tʼáá háí shį́į́ doo tʼáá bígi ádaatʼínígíí atídeiłʼį́ daazlį́į́ʼ.

9 Áádóó áko, díí ándahwiiʼaahii dahwéeʼaahgo tseebíí yihah góneʼ, diné sodizin daʼatahígíí ayóó átʼéego daʼahijoodląʼ daazlį́į́ʼ; aooʼ, oolchʼį́į́d, dóó áháchįʼ, dóó ajoodlá dahazʼlį́į́ʼ, dóó atíʼálʼį́, dóó ádaa dadzódlí, Diyin God bisodizin doo daʼatahígíí biláahgo ndi ádaa dazódlí daazlį́į́ʼ.

10 Áádóó áko ándahwiiʼaahii dahwéeʼaahgo tseebíí yíhai; dóó sodizin biyiʼdóó bąąhági ádaatʼínígíí éiyá doo sodizin daʼatahígíí tʼáá íiyisíí bidínóołtłʼahii tʼáadoo bidáahjįʼ adahohʼníłídeiníłtłʼah; dóó sodizin náás bee hoogááłę́ę tʼą́ą́ʼ kódzaa.

11 Áádóó baa hoolzhiizh nahastʼéí haahááh góneʼ dahwéeʼaahgo, Alma sodizin biyiʼ bąąhági ádaajitʼį́įgo haideesʼį́į́ʼ, dóó sodizin atah danilínígíí doo daʼoodlánígíí doo yáʼátʼéehii dóó nááná łah doo yáʼáshóonii yichʼįʼ adeiyiʼééshgo ałdóʼ yiyiiłtsą́, áko diné atídadoonííł.

12 Aooʼ, diné tʼáá íiyisíí ałʼąą átʼáo nitsídaakeesgo yiyiiłtsą́, łaʼ ádaa dadzódlí, daʼahijoodlá, baa dahojoobáʼígíí dóó biʼééʼ ádaadinígíí dóó dichin danilínígíí dóó dibááʼ danizinígíí dóó bitah dahoneezgaiʼígíí dóó atídaadzaaʼígíí yitsʼą́ąjįʼ nínádaayis.

13 Áko díí diné bitahgóó áhootʼéhígíí biniinaa cha hahóóʼá, łaʼ éí hojoobaʼ ádaatʼį́, bíká adoowołígíí yíká adahaalyeed, téʼéʼį́ danilínígíí dóó baa dahojoobáʼígíí yaa daʼiilé, dichin danilínígíí yaadaʼiiłtsóód, dóó tʼáá ałtsoní yikʼee tiʼdahoonííh, háálá éí Christ yá ádaatʼį́, éí náasdi doogáałgo diyingo áhodooníłígíí bikʼehgo.

14 Éí bichʼįʼ yoołkáałgo nideiyólí, áko bibąąhági ádaatʼéii baaʼńdidootʼaał; háálá daneeznánígíí náádahidooʼnaałgo tʼáá íiyisíí yaa bił dahózhǫ́ǫ́d, Jesus Christ bikʼehgo áhodoonííł dóó bibeʼadziilii dóó anoonééł bitłʼóól yitsʼą́ą́dę́ę́ʼ yisdéidooʼish.

15 Áádóó áko baa hoolzhiizh Alma, baa dahojoobáʼígo Diyin God yikééʼ deíkáhígíí tiʼdahooʼníihgo yiyiiłtsą́, dóó łaʼ diné chʼéékaiʼígíí atíʼalį́ bikʼi yáádeiyiitsííh, dóó doo aheełtʼéégo baa ntsáhákees yiiłtsą́, éí biniinaa tʼáá íiyisíí yínííł silį́į́ʼ; ákótʼée ndi Diyin Bóhólníihii biʼIiʼ Sizį́i Diyinii tʼáadoo bikʼideeyáa da.

16 Áádóó hastiin bił ééhózinii sodizin biyiʼdóó elder dah yikahdóó łaʼ yikʼidiilniiʼ, dóó diné ádaanínígíí bikʼehgo bóhólníihgo abiʼdiilyaa, áko bee hazʼánii ádaalyaa yę́ę bikʼeh hólʼį́į doogo yee bóhólníih dooleełgo bąąh niilyá, dóó diné bąąhági átʼéii yaa naakaiʼígíí dóó ádąąh nidahastʼánígíí yee bóhólníihgo yá nahwiiʼaah doo.

17 Áko díí hastiin Nephihah wolyé, dóó éí aláahdi ánahwiiʼaah doogo bikʼihodiiniiʼ; dóó ánáhwiiʼaahgo-dahsidá dóó diné yikʼidéezį́įʼgo yá nahaʼá.

18 Áko sodizin yikʼi high priest dooleełgo Alma tʼáadoo beidiníʼą́ą da, ndi tʼáá bí high priest tʼahdii nilį́; ákótʼée ndi Nephihah ánahwiiʼaah nilį́įgo yeidiníʼą́.

19 Áádóó tʼáá shí diné bitah naasháa doo nízingo áyiilaa, éí doodago Nephi bidineʼé bitahgo, áko Diyin God bizaad yee neidínóotįįł, Diyin bá naʼanish béédazhdoolnih biniyé, dóó háchʼįʼ kwíidoolííł, Diyin God bizaad bee, tʼáá ałtso ádaa hodzódlí dóó ndaʼadloʼ dóó tʼáá átʼé diné bitahgo saad ałchʼįʼ adajiiniłígíí, éí doo bee hashtʼeʼninázhdookah da tʼáá hozhǫ́ʼí tʼáá aaníí yéego yee yikʼijįʼ haadzíiʼgo tʼéiyá.

20 Áádóó baa hoolzhiizh nahastʼéí yihah góneʼ Nephi bidineʼé yikʼi dahwéeʼaahgo, Alma ánihwiiʼaahii-dah sidáagi Nephihah yeidiníʼą́, dóó diyingo ałkééʼ nahatʼá hódahgo Diyin God bibeʼadziilii bohoogááł tʼéiyá yinaalnishgo áʼdiilyaa, Diyin God bizaad tʼáá aaníí yaa halneʼgo, diyingo ił ííshją́ą́ ályaaígíí dóó diyingo áhodooníłígíí bikʼehgo.