1 Áádóó baa hoolzhiizh tádiin dóó biʼaan hastą́ą́ hanáánááhaigo ándahwiiʼaahii Nephi bidineʼé yá dahwéeʼaah, áko dílzingo nááʼhéésdzoh Alma Helaman yeiníʼánée Shiblon bee bóhólnííh silį́į́ʼ.

2 Áádóó hastiin yáʼátʼéehii nilį́, Diyin God yinahjįʼ yáʼátʼéehgo yigááł, dóó áłahjįʼ yáʼátʼéehii yikʼeh hółʼį́, Bóhólníihii biDiyin God bibee hazʼáanii yikʼeh hołʼį́, áádóó bikʼis ałdóʼ.

3 Áádóó baa hoolzhiizh Moroni ałdóʼ náádiilyá. Áádóó kótʼáo tʼádiin dóó biʼaan hastą́ą́ ándahwiiʼaahii dahwéeʼaahgo ałtso ahoolzhiizh.

4 Áádóó baa hoolzhiizh tʼádiin dóó biʼaan tsʼostsʼid yihahgo ándahwiiʼaahii dahwéeʼaahgo, ląʼí diné ahiikah, ashdlaʼ dimííl yázhí dóó biʼaan dį́įdi neeznádiin diné, dabizáanii dóó baʼáłchíní, Zarahemla kéyahdóó náhookǫsjigo kéyah yiih yíná.

5 Áádóó baa hoolzhiizh Hagoth, hastiin tʼáá íiyisíí shił ééhózin doo nízingo nitsékees, éí bąą tsin naaʼeeł ayóó aniłtsooʼígíí áyiilaa, kéyah Bountiful niníʼáagi, kéyah Ádahasdįįd bíighahgi, dóó eʼeʼaahjigo tónteeldóó dah adiiłʼéél, áhoołtsʼózí hazʼą́ągi éí áádóó náhookǫsjigo kéyah.

6 Áádóó áko shooh, ląʼí Nephi dineʼé iih yíjééʼ dóó ląʼí chodeidoołʼįįłígíí yił dah daʼdiiłʼéél, áádóó kótʼáo ląʼí sáanii dóó áłchíní ałdóʼ; dóó náhookǫsjigo dah daʼdiiłʼéél. Áajįʼ tádiin dóó biʼaan tsostsʼid yihahígíí ałtso ahoolzhiizh.

7 Áádóó tádiin dóó biʼaan tseebíí yihah góneʼ, díí hastiin tsin naaʼeeł łaʼ ánáádeiyiidlaa. Áádóó áłtsé tsin naaʼeeł yę́ę náníʼéél dóó ląʼí diné yiih heezná; dóó ląʼí chodeidoołʼįįłii iih deiyiizhjaaʼ, dóó náhookǫsjigo kéyah bił dah daʼdiiʼéél.

8 Áádóó baa hoolzhiizh tʼáadoo baa nááhodiiztsʼą́ą da. Dóó tónteel biyiʼ tó nidabistseed daniizį́į́ʼ. Áádóó baa hoolzhiizh nááná łaʼ tsin naaʼeeł ałdóʼ dahdiiʼéél dóó háajigo ííʼélígíí doo nihił bééhózin da.

9 Áádóó baa hoolzhiizh díí yihah biyiʼ tʼóó ahayóí diné náhookǫsjigo adahaazná. Áádóó kótʼáo tádiin doo biʼaan tseebíí ałtso ahoolzhiizh.

10 Áádóó baa hoolzhiizh tádiin dóó biʼaan náhástʼéí yihah góneʼ ándahwiiʼaahii dahwéeʼaahgo, Shiblon ałdóʼ dah nídiidzá dóó Corianton náhookǫs kéyahjigo tsin naaʼeeł bił dahdiiʼéél, choidooʼįįłígíí dahyidiiyį́ diné ákǫ́ǫ́ aheeznánígíí yichʼįʼ.

11 Éí bąą Shiblon dílzingo ndahaasdzooʼígíí, tʼahdoo dahnidiidááhgóó, biyeʼ Helaman yeidiníʼą́, éí Helaman wolyé, bizhéʼé bízhiʼígíí bee biʼdóójįʼ.

12 Áko shooh, díí tʼáá átʼé nídaháasdzooígíí Helaman bee bóhólnííh éí nídaháasdzo dóó tʼáá ałtso kéyahgóó nihokááʼ dineʼé baʼáłchíní bichʼįʼ élyaa, tʼáá hazhóʼó Alma doo baa hodoonih nínee tʼéiyá tʼáadoo ályaa da.

13 Ákótʼée ndi, díí éí dílzingo hashtʼeʼniiʼnil, dóó ałkééʼ daʼáchííh baa haneʼ ndeiʼáa ńtʼę́ę́ʼ; éí bąą, díí yihah biyiʼ, Helaman baa deetʼą́, tʼah doo Shiblon dahndiidááhgóó.

14 Áádóó baa hoolzhiizh díí yihah biyiʼ ałdóʼ éí ákweʼé łaʼ atsáhaaskaiʼígíí Laman dineʼé yidiikai; dóó Nephi dineʼé yikʼijįʼ bá náádahóóchʼįįd.

15 Áádóó díí yihahígíí biyiʼ ląʼí ndaabaahí Moronihah bidineʼé yikʼijįʼ anaaʼ ádeiyiilaa, éí doodago Moronihah bindaabaahí yikʼijįʼ, áko tʼóó ahayóí nidabiʼdiztseed.

16 Áádóó kótʼáo ándahwiiʼaahii Nephi bidineʼé yikʼi dahwéeʼaahgo tʼádiin dóó biʼaan náhástʼéí nááhaigo ahoolzhiizh.

17 Áádóó kótʼáo Alma ałtso baahóóneʼ, áádóó Helaman ałdóʼ éí biyeʼ, dóó Shiblon, éí ałdóʼ biyeʼ ńtʼę́ę́ʼ.