1 Áádóó áko Alma díí saad ałtso yee yichʼįʼ haadzíiʼgo niʼ neezdá, áádóó Amulek yiizįʼ dóó neidíníítą́ą́ʼ, kóníigo:

2 Shikʼéí, Christ doogááł haʼníigo baa haʼoodzíʼígíí tʼáadoo baa dahosidiitsʼą́ą da dadidoohniiłígíí éí doo ákótʼée da nisin, éí Diyin God biYeʼ átʼį́įgo bee ndaʼniitin; aooʼ, shił bééhózin díí tʼóó ahayóidi bee nidanihidiʼneestą́ą́ʼ tʼahdoo nihitsʼánóhkáhą́ądą́ą́ʼ.

3 Áádóó shikʼis ayóó ííníshʼnínígíí adadohlííłígíí nihił ííshją́ą́ íidoolííł, nihichʼįʼ nidahwiiʼnánígíí biniinaa; dóó nihíniʼ hashtʼedaahłééh nihidííniid; aooʼ, tʼáá íiyisíí daʼiinohdlą́ dóó hadaʼíínółní nihidííniid—

4 Aooʼ, niheʼoodląʼ tʼáá íiyisíí nihee hólǫ́ǫgo saad nihijéí biyiʼdi kʼidohłé, áko bee hózhǫ́ dooleełígíí bídadinóohtah.

5 Dóó baa ádahooniidzį́į́ʼ nihinitsékees biyiʼdi tsʼídá yéego ndaʼídoołkidígíí éí saad tʼáá aaníinii daatsʼí Diyin God biYeʼ biiʼ hólǫ́, éí doodago daatsʼí Christ doo hólǫ́ǫ da.

6 Dóó shikʼis, ląʼí da ałʼąą átʼéego naʼnitin, nihił ííshją́ą́ áyiilaa, Christ bitsʼą́ą́dę́ę́ʼ saad bee yisdáʼdoodáłígíí biiʼ hólǫ́.

7 Shikʼis Zenos saad yee haadzíʼę́ę choyoosʼįįd, Diyin God biYeʼ nináʼnídláhígíí binahjįʼ, áádóó Zenock bizaad ałdóʼ yee haadzííʼ; Moses bizaad ałdóʼ choyoosʼįįd, díí bee tʼáá aaníí ádaatʼé.

8 Áádóó áko, shooh, tʼáá shí ánihidideeshniił díí tʼáá aaníí ádaatʼé. Áko shooh, ánihidishní, Christ diné yitah doogáłígíí, dóó bidineʼé ndaʼiisiʼyę́ę ákʼiididootʼáłígíí shił bééhózin, dóó nihokááʼ dineʼé baʼáłchíní bibąąhági ádaatʼéii yá tíʼhodoonih; háálá Bóhólníihii Diyin God yee haadzííʼ.

9 Háálá bąąhági átʼéii bikʼé nináʼdoolyéełgo bee nihootʼą́; háálá Hoolʼáágóó Diyin God binahatʼaʼ ayóó átʼéii bikʼehgo éí bąąhági átʼéii bikʼé nináʼdoolyéełgo ályaa; éí doodago éí nihokááʼ dineʼé tʼáá ałtso hoolʼáágóó tidahoonííh doo; aooʼ, tʼáá ałtso daastłʼis dóó tʼáá ałtso daʼasiihgo yóó aheeskai, dóó hoolʼáágóó tidahojoonííh dooleeł tʼáá hazhóʼó tsʼídá bąąhági átʼéii bikʼé nináʼílyáhígíí bohoolyaago tʼéiyá.

10 Háálá éí tsʼídá ayóó átʼéego dóó akéeʼdi nááʼiiniih ádoolnííł; aooʼ, doo éí diné nááhidoonih da, dóó ałdóʼ doo éí naaldlooshii daʼałchinígíí da, dóó ałdóʼ doo éí tsídii da; háálá doo éí nihokááʼ dineʼé nááhidoonih da; ndi doo nineelʼą́ą́góó dóó hoolʼáágóó nááʼiiniih átʼée dooleeł.

11 Kʼad éí doo tʼáá háí shį́į́ diné bidił yee nááná łaʼ diné bibąąhági ádaatʼéii yee yá yikʼé nináʼ doodlééł da. Áko shooh, diné iisxį́įgo, daʼ nihibee hazʼáaniiʼísh, tʼáá ákogi átʼáo bikʼéstʼiʼ, bikʼis yiyiisxį́įgo? Nihichʼįʼ haasdziihigo éí, Doodah.

12 Ákondi bee hazʼáanii éí iisxíinii tʼáá bí beʼiinaʼ yee yikʼé nináʼdoodlééł ní, áko tsʼídá nááná łaʼ éí doo bíighah da tʼáá hozhoʼó hoolʼáágóó bąąhági ádaatʼéii bikʼé nináʼílyáago tʼéiyá bee nihokáaʼgi bíighah dooleeł.

13 Éí bąą, tsʼídá ayóó átʼéego dóó akéeʼdi nááʼiiniih ádoolnííł; índa kótʼée dooleeł, éí doodago ákódoolnííł, dił bee nááʼiiniihyę́ę ndootʼih; áko índa Moses bibee hazʼáanii ałtso biʼdoolnííł; aooʼ, tʼáá ałtso biʼdoolnííł, tʼáá ałtso áłtsʼíísíjįʼ dóó dah łizhinjįʼ, dóó doo łaʼ bił áhodoolzhish da.

14 Áádóó áko shooh, díí tʼáá átʼé bee hazʼáanii ííłní, tʼáá ałtsoní honíshééhíjįʼ tsʼídá ayóó átʼéego dóó akéeʼdi nááʼiiniih áá haʼní, dóó Diyin God biYeʼ éí tsʼídá ayóó átʼéego dóó akéeʼdi nááʼhiidoonihii nilį́į doo; aooʼ, hoolʼáágóó doo ninítʼiʼii átʼée doo.

15 Áádóó ákótʼáo tʼáá ałtso bízhiʼ yoodlánígíí yisdéídooʼish; díí éí biniyé tsʼídá akéeʼdi nááʼhiidoonih, hayiʼdi bee ajoobaʼ ndoolyééł, éí tʼáá ákogi átʼáo nihwiitʼaah yiláahgo bidziil, dóó binahjįʼ diné daʼiidoodląąłgo ádaa ńdaʼdookąął.

16 Áádóó ákótʼáo ajoobaʼ tʼáá ákogi átʼáo nihwiitʼaah bee átʼée dooleełígíí yiʼdoolííł, dóó hasih bee bińdoochił, áko biʼoodląʼ ádaadingo doo ádaa ńdaʼookąąhgóó éí tʼáá átʼé bee nihwiitʼaah bee haa hwiidínóotʼįįł; éí bąą tʼáá háiida oodląʼ yee ádaa náʼooskango tʼéiyá ayóó átʼáo dóó hoolʼáágóó nináʼílyáago hootʼááł bikʼéstiʼ dooleeł.

17 Éí bąą shikʼéí, Diyin God nihá hwiidoołʼaał, áko niheʼoodląʼ bee ádaa ńdaʼoohkąąhgo hahodoolzhish, áko bizhí dilzinígíí bee bichʼįʼ sodadołzingo hahodoolzhish, áko nihaa joobaʼ dooleeł.

18 Aooʼ, ajoobaʼ bíká bichʼįʼ sodadołzin; háálá éí bidziilgo yisdánihidoonił.

19 Aooʼ, hojoobaʼ ádaʼdółnééh, áádóó tʼáá bichʼįʼ sodadołzin doo.

20 Nihidáʼákʼeh nahazʼą́ą́góó yéego bichʼįʼ ndaʼoohkąąh, aooʼ, nihilį́į́ʼ tʼáá ałtso bá.

21 Danihighangóó yéego bichʼįʼ ndaʼoohkąąh, aooʼ, bił nihighanígíí tʼáá ałtso bá, abínígo, ałnéʼéʼááhgo, dóó eʼeʼááhgo.

22 Aooʼ, yéego bichʼįʼ sodadołzin niheʼanaaʼí bibee adziilii bikʼijįʼ.

23 Aooʼ, yéego bichʼįʼ sodadołzin biʼiiníziinii bikʼijįʼ, éí tʼáá ákogi ádaatʼéii tʼáá ałtso yikʼijįʼ nilį́.

24 Yéego bichʼįʼ sodadołzin dáʼákʼehgóó kʼidaʼdoołáhą́ą bá, áko ląʼígo ńdaʼdínóołtʼįįł.

25 Yéego nihikéyahgóó nihilį́į́ʼ nidaakaiígíí bá sodadołzin, áko ląʼí da dooleeł.

26 Ákondi doo díí tʼéiyá da; doo naagháhí góneʼ yah anídaahkahgo tʼáá átʼé bee ádanohtʼéhígíí bee sodadołzin, dóó nahonitʼin nahazʼánídi, dóó doo kéédahojitʼínídi sodadołzin.

27 Aooʼ, áádóó Diyin Bóhólníihii bichʼįʼ sodadołzin doo bíighahgóó, bíniʼ nihijéí biiʼdóó, áłahjįʼ Diyin God bichʼįʼ ádá sodadołzin, dóó tʼáá ałtso diné nihinaagóó dahólónígíí ałdóʼ bá.

28 Áádóó áko shooh, shikʼéí ayóó ánihííníshʼníinii, ánihidishní, díí tʼáá ákódí tʼáadoo danohsiní, háálá díí ałtso ádaohłaago, bichʼįʼ ańdahaztʼiʼígíí, dóó biʼééʼ ádaadinígíí doo bíkáʼ oohjééʼgóó, dóó bitah dahoneezgaiígíí dóó bichʼįʼ nidahwiiʼnánígíí doo baa nídaohkahgóó, dóó tʼáadoo leʼé nihee dahólónígíí, tʼáá háiida bee ádaadinígíí doo bee bíká oołyeedgóó—ánihidishní, díí tsʼídá doo ádaahtʼį́į́góó, áko shooh, nihisodizin éí tʼáadoo biniyéhé da, dóó doo nihíká adoolwoł da, dóó diné tʼóó ádahoʼdilʼínígíí éí oodląʼ doo deinízinígíí ndahonohłin.

29 Éí bąą, diyingo ayóó óʼóʼní doo béédaołniihgóó, béésh bąąhdóó nahjįʼ dilyį́hígíí nohłį́, éí béésh yidiłhį́įhii chʼídayiiłtłʼiid, (eii éí doo bą́ą́h ílíní átʼée da) dóó diné tʼóó yikʼi nidaakai.

30 Áádóó áko, shikʼéí, nihá kwíínísin, ląʼí da nihił ííshją́ą́ ályaaígíí woołtsą́ągo índa, Diyin bizaad dílzingo bee akʼedaʼashchínígíí díí yaa halneʼgo binahjįʼ baa ákonohsin doo, bee ádaa ńdaʼsookanígíí bee wóshdę́ę́ʼ nihohkááh.

31 Aooʼ, wóshdę́ę́ʼ nihidoohkahą́ą nihá nisin dóó tʼáadoo nihijéí daołtłʼisí; háálá áko shooh, yisdádooháałjįʼ oʼoolkid dóó ayííłką́; háálá áko shooh, ádaa ńdaʼoohkąąh dóó nihijéí doo dasoołtłʼisgóó, tʼáá hooshchʼįʼ ayóó átʼéego nináʼílyáago bee hootʼááł nihaa doolyééł.

32 Háálá áko shooh, díí iiná biyiʼ éí diné Diyin God yaa doogáałgo yiniyé hashtʼeʼádiʼdoolnííłgo bá hooʼaʼ, aooʼ, áko shooh díí iiná yitʼihígíí bijį́ éí diné ndoolnish biniyé ooʼááł.

33 Áádóó áko, bee nihił hweeshneʼę́ę bikʼehgo, ląʼí da nihił ííshją́ą́ ályaaígíí daołtsą́ągo, éí bąą, baa nánihooshkąąh tʼahdoo iiná ałtso ádaałeʼ bijį́įdi índa ádaa ńdaʼookąąhí; háálá díí jį́ iiná yitʼihígíí ííłtsogo; hoolʼáágóó iiná bá hashtʼeʼádadidiilnííł biniyé nihaílyá, áko shooh, díí iiná biyiʼ doo hazhóʼó hashtʼeʼádadiilnéehgo, éí bikééʼdę́ę́ʼ tłʼéeʼgo chahałheeł biyiʼ naanish ádoolníłígíí ádin.

34 Diyin bikéyah hózhónídi baa nooyáago, doo éí kódidoohniił da, kʼad ádaanáʼiideeshkąął, áko shiDiyin God baa nídeeshdááł. Dooda, doo éí kódidoohniił da; háálá tʼáá éí iiʼ sizíinii tʼahdoo náándiilyéhę́ędą́ą́ʼ nihitsʼíís yiyiʼ hólónée, tʼáá éí iiʼ sizíinii adziilii bee hólǫ́ǫgo nihitsʼíís nayiiłnáa dooleeł hoolʼáágóó iiná bił hazʼą́ądi.

35 Háálá áko shooh, tʼah índa dadoohníígo tʼáadoo ádaa ńdaʼsookangóó náánihiʼdiilyáajįʼ ayííłką́ągo, áko shooh, chʼį́įdii biʼiiníziinii nanihiloʼ dooleeł, dóó bíjístłʼǫ́ǫ dooleeł; éí bąą, Diyin Bóhólníihii biʼIiʼ Sizį́ Diyinii nitsʼą́ą́jįʼ kódoonííł, dóó doo nihiyiʼ hólǫ́ǫ da dooleeł, dóó biʼiiníziinii tʼáá ałtsojįʼ nanihiloʼ dooleeł; dóó díigi átʼéego éí bąąhági ádaatʼínígíí akéeʼdi bił hazʼą́ą dooleeł.

36 Áádóó díí shił bééhózin, háálá Diyin Bóhólníihii éí ání atsʼíís doo biiʼ hodílzinígíí éí doo biiʼ honishłǫ́ǫ da, ndi diné yáʼátʼéehii bijéí biiʼ honishłǫ́; aooʼ, áádóó ałdóʼ ádííniid diyinkʼehgo deíkáhígíí éí shił hazʼą́ądi shił yah ahidookah, doo chʼéédoodááłgóó; ndi biʼééʼ éí Diyin biDibé Yázhí bidił bee daalgaigo ádoolníił.

37 Áádóó áko, shikʼéí ayóó ánihííníshʼníinii, díí béédaałniih dooleeł nisin, dóó Diyin God bá dahodínóhsingo yisdádadoohkahígíí bindaałnish dooleeł, dóó Christ éí doo doogááł da tʼáadoo dadohníní;

38 Áko tʼáadoo Iiʼ Sizį́ Diyinii bikʼijįʼ naałdzilí, bíniʼ nihiyiʼ hólǫ́ǫ dooleeł, dóó Christ bízhiʼ ákʼidadohtʼaah; áko tʼáá íiyisíí hojoobaʼ ídaʼdółnéehgo niʼjįʼ ntsidahidoohgeeh, dóó Diyin God bichʼįʼ sodadołzin, tʼáá naaháágóó, diyingo dóó tʼáá aaníinii nihił bééhózinígíí binahjįʼ, dóó tʼáá ákwíí jį́ bichʼįʼ ahééh danohsin, yee nihaa joobaʼígíí dóó yee nihikʼijidlíhígíí nihaa yiizlá.

39 Aooʼ, áádóó ałdóʼ tʼáá íiyisíí ánihidishní, shikʼéí danohłíinii, tʼáá áłahjįʼ sodizin bee ádaa áhółyą́, áko biʼiiníziinii yee yíʼoołkąąhígíí doo yee yóó anihidínóoʼah da, áko doo nihikʼehdidoodleeł da, áko ałtso iiyííłką́ągo doo nanihiloʼ da dooleeł; háálá áko shooh, yáʼátʼéehii éí doo nihaidoolééł da.

40 Áádóó áko shikʼéí ayóó ánihííníshʼníinii, haʼíínółníigo, achʼįʼ nahwiiʼná tʼáá ałtso bichʼįʼ nihidziil; áádóó téʼéʼį́ biniinaa chʼídanihineeskadígíí tʼáadoo deinóhdziihí, háálá ákódaahdzaago éí bígi átʼáo bąąhági ádaohtʼį́į doo.

41 Ákondi hadaʼíínółní, dóó achʼįʼ ndahwiiłnáanii bichʼįʼ danihidziil, dóó haaʼígíí shį́į́ hoolzhishgo tʼáá ałtso bee nihichʼįʼ nidahwiiʼnánée biiʼ hadoohkah dóó háádadoołyįh.