1 Áádóó baa hoolzhiizh niʼkódaadzaa dóó yitsʼą́ąjįʼ hideeskai. Áádóó Moroni Zerahemnah ííłní: Áko shooh, Zerahemnah diné ndaʼáłtseedii doo daniidlį́į da. Níł bééhózingo nihílákʼeekai, ákondi doo ndanihidiiltsxił da.

2 Áko shooh, doo niheʼadziil biniyé nihichʼįʼ nídadiibahgo nidanihiiltseed da; dóó doo tʼáá háiida yisná ádadiilnííł daniidzin da. Ákondi nihí éiyá díí bíká ádaahtʼį́įgo nihikʼijįʼ ndaahbaah; aooʼ, dóó niheʼoodląʼ biniinaa nihichʼįʼ nihádahchįʼ.

3 Ákondi kad, nihił béédahózin Diyin Bóhólníihii nihił hólǫ́, dóó nihił bééhózin nihilákʼee nihííʼeezhígíí. Áádóó áko bikʼidoohtʼį́į́h díí niheʼoodląʼ dóó Christ deiyniidlánígíí binahjįʼ nihá kólyaa. Áádóó kʼad nihił béédahózin díí niheʼoodląʼ doo nihitsʼą́ą́ʼ dadoołchxǫǫł da.

4 Áko kʼad nihił béédahoozin díí Diyin God woodlánígíí tʼáá aaníí átʼé; aooʼ, nihił bééhózin Diyin God nihíká análwoʼ, dóó nihaa áhályą́, dóó nihichʼą́ą́h naaghá, dóó deiniidlą́ągo tʼéiyá, dóó niheʼoodląʼ, dóó nihisodizin; dóó Diyin Bóhólníihii ánihidiʼdooldįįłgo doo yee hasʼą́ą da tʼáá hazhóʼó niʼiilzííh biih niildeiʼgo dóó niheʼoodląʼ doo daniidzį́į́ʼgóó tʼéiyá.

5 Áádóó áko, Zerahemnah, ándishní; Diyin God-tʼáá ałtsojįʼ bidziilii bizhí binahjįʼ, nihigaan bidziil áyiilaago nihikʼeh dadiidlį́į́ʼ, niheʼoodląʼ bee, nihinahaghaʼ bee, dóó dahodíníílzinígíí bee, aooʼ, dóó nihisodizin bee, dóó nihizáanii dóó nihaʼáłchíní bahastiʼgo bee baa ádahwiilyánígíí, tʼáá nihí ádaníídzingo dahiniiʼnánígíí, éí kéédahwiitʼiigóó dóó nihikédaayahgóó, aooʼ, Diyin God bizaad bikʼehdahónilʼį́į́go, éí tʼáá átʼé binahjįʼ nihił dahózhǫ́, áádóó éí tʼáá átʼé álááhdi nihiłdanilį́—

6 Aooʼ, áádóó doo díí tʼéiyá da; Tʼáá átʼé iiná bee nił yáʼátʼéhígíí biniyé ándishní, éí bee nidaahbaahígíí nihaadanóhnííł, áko doo danihidiiltsxił da, ndi tʼáá dahinohnáago ádanihidiilnííł, yíwohjįʼ oohkááh dóó tʼáadoo nihikʼijįʼ nidaahbaahí.

7 Áádóó áko, díí doo ákódaohdzaagóó, áko shooh, nihílákʼeʼohkai; dóó bił ndaashbaahígíí nihichʼįʼ deeshʼaał, dóó nihitsʼíís atídeidoołíiłgo danihidoogą́ą́ł, áko ánihidiʼdooldįįł; dóó áko nihił béédahodoozįįł háí éí díí diné yikʼi bóhólníih dooleeł; aooʼ, dóó nihił béédahodoozįįł háí éí naalteʼí da dooleeł.

8 Áádóó áko baa hoolzhiizh Zerahemnah díí bee haʼoodzíʼígíí yidiiztsʼą́ąʼgo hachʼįʼ niníyá dóó bibéésh hał dóó bibéésh hał názhahí yiníjaaʼ dóó hainínil, dóó beʼałtį́į́ʼ Moroni yílákʼeyíítą́, dóó kóbidííniid: Shooh, kǫ́ǫ́ éí bee nideibaahígíí sinil, naadadiiʼnił, ákondi doo éí nihił ahadaʼdidiitááł da, éí doo bedaʼdiilníiłgo nihił béédahózin, nihaʼáłchíní ałdóʼ; ndi bee ndeibaahígíí nídadoohnííł, dóó doo kééhatʼíníjígo niheʼołnííh; éí doodago éí nihibéésh hał tʼáá ndeijaahgo, nihiʼdidoogą́ą́ł éí doodago akʼehdadidiidleeł.

9 Áko shooh, doo nisodizinjí atah daniidlį́į da, doo éí Diyin God nihilákʼee nihííʼeezhgo deiniidlą́ą da; ákondi kódeiniidzin ndaʼohgizígíí bee nihibéésh-hał bitsʼą́ą́dóó yisdáohkai. Áko shooh, nihibéésh ééʼ dóó nihichʼą́ą́h dah naaznilígíí yisdánihííʼeezh.

10 Áádóó áko Zerahemnah bizaad ałtso yee haadzíiʼgo, Moroni béésh-hał dóó yee nidaabaah yę́ę yaa néíʼnil, éí beiyíʼnilyę́ę, Zerahemnah yaa néíníjaaʼ, kóníigo: Áko shooh, daʼahiigánígíí nidootʼih.

11 Áko saad bee haasdziih yę́ę doo łahgo ádeeshłííł da, éí bąą Diyin Bóhólníihii hináago, doo dahdidóóhnééł da tʼáá hazhóʼó doo nihikʼijįʼ anaaʼ ánáádadoohdłííł dago bee ádáhadadoohdzihgo tʼéiyá. Áko kʼad danihííníítąʼ nihidił niʼ ndadiilzas, éí doodago bee nahoníʼánígíí bikʼehgóó ádaohnééh.

12 Áádóó áko Moroni díí saad yee haadzíiʼgo, Zerahemnah éí bibéésh hał tʼáá dahyootį́į́ł, dóó Moroni yichʼįʼ ádáhálchįʼ, áádóó Moroni yichʼįʼ dahyiiteʼ yidoyoołhéełgo; ákondi bibéésh hał dah yidiitą́ągo, áko shooh, Moroni bá naabaahí łaʼ bibéésh hał bitsʼą́ą́ʼ niʼjįʼ ayídzííłhaal, dóó bitseeʼgi kʼéʼéltǫʼ; áádóó Zerahemnah neidííłhaal dóó bitsiiziz niʼjįʼ eeltsʼid. Áádóó Zerahemnah yitsʼą́ą́jiʼ dah diiyá bá ndaabaahígíí yitahjįʼ.

13 Áádóó baa hoolzhiizh naabaahii ákweʼé sizinéé, éí Zerahemnah bitsiiziz nahjįʼ ayídzííłhaal yę́ę, éí bitsiiziz niʼdóó neidiiʼą́, dóó bibéésh hał hahaashchiiʼgi dah yizʼą́, dóó yichʼįʼ yiłkʼídoolniiʼ, ayóó íítsʼaʼgo yichʼįʼ kódííniid:

14 Díí atsiiziz niʼjįʼ naaltsʼidígi átʼáo, éí nihinaabaahí binaatʼáá bitsiiziz nahalingo, nihídóʼ niʼjįʼ ahidínóóhdah tʼáá hazhóʼó bee ndaahbaahígíí nihaadanohjaaʼ dóó kʼé bił naaztʼiʼgo bee ahadaʼdinoohtʼą́ągo tʼéiyá.

15 Áko tʼóó ahayóí, díí saad deidiiztsʼą́ą́ʼ dóó atsiiziz béésh-hał bąąh dasiʼą́ągo deiyiiłtsą́, áko yéego nídaasdzííd, dóó ląʼí da yee nidaʼałtseedígíí Moroni sizį́įjįʼ adeiyiistłʼííd, dóó kʼé bił naaztʼiʼgo yee ahadaʼdeestʼą́. Áádóó ląʼí da ahadaʼdeestʼánígíí doo kééhatʼíníjígo yedaʼiisniiʼ.

16 Áko baa hoolzhiizh Zerahemnah tʼáá awołíbee báhóóchįįd, dóó yił ndaabaahí chʼéédziʼígíí yéigó yáhóółchįįd, áko Nephi dineʼé tʼáá yéego yikʼiidoojahgo.

17 Áádóó áko Moroni báhóóchįįd, Laman dineʼé doo nidabiʼdídzilígíí biniinaa; éí bąą bidineʼé bikʼiidoohjah dóó ndadoołtsxił yidííniid. Áádóó baa hoolzhiizh ndeiʼniiłtseed; aooʼ, Laman dineʼé bibéésh hał dóó bibeʼadziil yee ádaatʼį́.

18 Ákondi shooh, bitsʼíís dóó bitsiitsʼiin achʼąąh naalyei bąąh adáádingo Nephi dineʼé bibéésh-hał dadeenínígíí yee atídaaneʼ; aooʼ, áko shooh baa adaʼasgeed dóó atídaalyaa, aooʼ, tʼáá hodíínaʼí nidabiʼdistseed Nephi dineʼé bibéésh-hał bee; dóó dabiʼdoogą́ą́ʼ, Moroni yił ndaabaahí łaʼ yee haadzííʼ yę́ę bikʼehgo áhoodzaa.

19 Áko Zerahemnah, kʼadę́ę ałtso ndabiʼdiltseedígíí yiyiiłtsą́ągo yéego Moroni yichʼįʼ hadoolghaazh, bí dóó bidineʼé yił ahadaʼdidoohtʼááłgo yee ádee hadaasdzííʼ, beʼiinaʼ tʼáadoo niʼ kódaalyaagóó, doo yichʼįʼ nináádadidoobah da dadííniid.

20 Áádóó baa hoolzhiizh Moroni naʼatseed niʼkónááyiidlaa diné bitahgóó. Laman dineʼé yee nidaabaahígíí yighá yiisnil; dóó kʼé bił naaztʼiʼgo yił ahadaʼdeestʼą́ągo doo kééhojitʼínígóó yeʼiisniiʼ.

21 Nidaaztseedígíí tʼáadoo wóóltaʼ da háálá tʼóó báhádzidígi ánéelą́ʼígíí biniinaa; aooʼ, nidaaztseedígíí tsʼídá tʼóó ahayóí, tʼáá ałchʼihjí Nephi dineʼé dóó Laman dineʼé.

22 Áádóó baa hoolzhiizh nidaaztseedígíí tó nílį́ Sidon yiih deiyiistłʼííd, áádóó dadeezʼéél dóó tónteel bitłʼáadi hakʼi dahodiilkǫʼ.

23 Áádóó Nephi dineʼé bindaabaahí, éí doodago Moroni báhígíí, éí dabighangóó dóó dabikéyahgóó ánáhaasná.

24 Áádóó áko ándahwiiʼaahii Nephi bidineʼé yikʼi dahwéeʼaahgo tseebíítsʼáadah nááhai. Áádóó áko díí Alma baa haneʼ kojįʼ náhaasdzoh, éí Nephi bibéésh tʼą́hí bikááʼ nídaháásdzoh.