1 Dóó kʼad, baa hoolzhiizh ańdahwiiʼaahii Nephi bidineʼé yikʼi dahwééʼaahgo naadiin hastą́ą́ yihahgo, áko shooh, Laman dineʼé chʼéédaasdzid nídeizid dóó hayííłką́ągo, áko shooh, Amalickiah tʼáá bíbiníbaal biyiʼ daaztsą́ągo deiyiiłtsą́, áádóó ałdóʼ tʼáá éí bijį́ Teancum bichʼįʼ dahdadiibááhgo biniyé hashtʼeʼádadiilyaago deiyiiłtsą́.

2 Dóó kʼad, Laman dineʼé díí deiyiłtsą́ągo ndaazdzííd; dóó ádeidoołíí yę́ę aadeisįįdgo kéyah náhookǫsjigo tʼáadoo yiih yínáa da, áádóó tʼáá átʼé yił ndaabaahí Mulek kin dashijaaʼjigo dadínéézhchą́ą́ʼ, dóó hasih yíká anaaʼ bá hashtʼe hootʼéejįʼ aheezná.

3 Áádóó baa hoolzhiizh Amalickiah bikʼis aláahdi bidineʼé binaatʼáanii nilį́įgo bikʼihodiiniiʼ; áádóó Ammoron wolyée ńtʼę́ę́ʼ; áko aláahdi naatʼáanii Ammoron, éí aláahdi naatʼáanii bikʼis Amalickiah, éí bitsáskʼeh góneʼ nááhooʼááł doogo bikʼihodiiniiʼ.

4 Áádóó baa hoolzhiizh bidineʼé kin hadaasʼá baaʼádahołyą́ yidíínííd, éí ndaabaahgo shóndayoostʼeʼ; kin hadaasʼá doo tʼóó shódaoztʼeʼ da tsʼídá tʼóó ahayóí yiniyé adił dadeezgoʼ ndahoʼdistseed.

5 Áádóó kʼad, Laman dineʼé kin hadaasʼá yee ádídahoosniiʼ yę́ę tʼáá íyisíí dayótą́ʼgo Teancum haidiilʼį́į́ʼ, dóó nááná łahgi kéyah yee ádídahoosníʼígíí ałdóʼ; áádóó tʼóó báhádzidígiʼ ánéelą́ągo deiyiłtsą́, éí biniinaa Teancum doo kʼad bikʼiidiijah da niizį́į́ʼ anaaʼí bichʼą́ą́h yadaʼdiitłingi.

6 Ákondi bá ndaabaahí binaagóó dahdeiyínééhgo áyiilaa, anaaʼ yichʼįʼ hashtʼeʼádadilnééh nahalingo; aooʼ, ádíchʼą́ą́h ndaabaahgo biniyé yá hashtʼeʼádadilnééh, bináago yadaʼdiitłʼingo áyiilaa áajįʼ yisdádookahgo.

7 Áádóó baa hoolzhiizh tʼahdii anaaʼ yichʼįʼ hashtʼeʼádadilnééhgo Moroni bindaabaahí ląʼí yichʼįʼ ayííłʼáʼ yee dabidziil dooleeł biniyé.

8 Áádóó Moroni kódíínííł yiłníigo saad yichʼįʼ áyiilaa áko anaaʼí daasnááhígíí tʼáá deiyínóhtʼą doo; háálá Laman dineʼé ląʼí deisnááhgoo, áko tʼáá ałtso Laman dineʼé deisnááhnéé tʼáá deiyootʼą́ doo éí bidiníná Laman dineʼé deesnááhyę́ę yił ałnáádeidooʼnił biniyé.

9 Áádóó haneʼ bichʼįʼ ánááyiidlaa kéyah Bountifuldi bidziilgo ádahoołééh yidííniid, dóó nahookǫsjigo áhoołtsóózígo chʼíhonítʼiʼ baa ádahoołyą́, Laman dineʼé áajįʼ da yee ádídahodoolnih dóó bidziil yee doo daatsííd da doo.

10 Áádóó Moroni haneʼ yichʼįʼ ánááyiidlaa, kweʼé kéyah siʼanígíí wołíbee baaʼáholyą́ą doo, áádóó tʼáá ałtsojįʼ áájí Laman dineʼé bichʼįʼ nahwiyíłná, neʼadziilígíí bííghahgo, naʼadloh yee ádínáhodoolnih doodago łahgiʼ átʼáo kin dah naazhjaa yitsʼą́ą́ʼ náyiizhchid yę́ęgiʼ átʼáo; áádóó ałdóʼ binaagóó kin dah naazhjaaʼígíí bińdaʼdíítłʼį́į́ł dóó dabidziilgo ídíílííł, éí Laman díné tʼah doo yee ádídahoolníih da.

11 Áádóó ałdóʼ ánááyidooniid, nichʼįʼ deeshááł ndi, ákondi shooh, Laman dineʼé nihichʼįʼ dahdeinééh kéyah nihiníʼáajįʼ eʼeʼaah tónteel bííghahgi; áádóó áko shooh, bikʼijįʼ dideeshbah, éí bąą doo naadeeshááł da.

12 Kʼad éí, aláahdi naatʼáanii (Ammoron) Zarahemla kéyahdééʼ níyá, dóó binaaí yę́ęʼ ádingo beʼasdzą́ą́ yee yił hoolneʼ, dóó ląʼí hastóí ahíyiiʼeezh, dóó Nephi dineʼé yikʼijįʼ dadeezbaaʼ eʼeʼaah tónteel bibąąhjįʼ.

13 Áádóó áko Nephi dineʼe yichʼįʼ hałchįʼ, dóó yíł ndaabaahí nááná łah kéyahjigo áyiʼéésh, éí kin haalʼá yee ádíhoosníí áko yaa ádahalyánígíí ííłní, Nephi dineʼé ałdóʼ bichʼįʼ ndahoyołná kéyah niníʼáajįʼ haʼaʼaah tónteeljįʼ, dóó bikéyah bighadadoohtʼááł tʼáá bideinóhahgo, bindaabaahí yee dabidziilígíí bikʼehgo.

14 Áko Nephi dineʼé kótʼáo báhádzidgo bił hazʼą́ andahwiiʼaahii Nephi bidineʼé yikʼi dahwééʼaah naadiin hastą́ą́ ałtso iihááh.

15 Ákondi shooh, baa hoolzhiizh andawiiʼaahii naadiin tsostsʼid yihah góneʼ dahwééʼaahgo, Moroni, Teancum kódadohnííł yiłní—éí ndaabaahii shádiʼááh dóó eʼeʼaah kéyah ndaneesʼáajįʼ yichʼą́ą́h ndaabaahgo áyiilaa, dóó kéyah Bountifulgóó dahdiiná, bándaabaahí yił Teancum yíkaʼadoojah áko kin dah naazhjaaʼ bighadahodeestʼánée tʼáá bí ndadoodleeł biniyé.

16 Áádóó baa hoolzhiizh Teancum Mulek bikin haalʼáadi bikʼiidoohjah biʼdooniid, dóó bííghahdą́ą́ʼ choindeidoołtʼeeł.

17 Áádóó baa hoolzhiizh Teancum hashtʼeʼíʼdiilyaa Mulek kin haalʼáadi yikʼiidoojahgo, dóó Laman dineʼé yichʼįʼ dahdiiná; ákondi tʼáá íiyisíí bichʼą́ą́h yadaʼdiitłʼinígíí biniinaa yikʼeh dadidoodleełígíí doo bóhoneidzą́ągo yiyiiłtsą́; éí bąą yee hodeezʼánée niʼkóyiilaa dóó Bountiful kin haalʼáajįʼ nátʼą́ą́ʼ náʼná, Moroni doonéłígíí bibaʼ, áko bándaabaahi yee dabidziil doo.

18 Áádóó baa hoolzhiizh Moroni bándaabaahí yił níná kéyah Bountifuldi, ándahwiiʼaahii Nephi bidineʼé yikʼi dahwééʼaahgo naadiin tsostsʼid nááhai.

19 Naadiin tseebíí náhááh góneʼ, Moroni dóó Teancum dóó ląʼída ndaabaahí binanitʼáʼí anaaʼ yaandadóotʼįįłgo ahííkai—Laman dineʼé lá haitʼáo bádahodiiłchįįł áko nihichʼįʼ chʼídookah dóó bikʼiidiijah; doodago bidziilgo dah deiyínééhdééʼ łídadilchíídgo chʼídeidínóoʼááł, áko yikʼeh dadidoodleeł dóó Mulek kin haalʼá shóndeidoołtʼéeł.

20 Áádóó baa hoolzhiizh Laman dineʼé ataʼ dahalneʼí bandaabaahí yichʼįʼ adeisʼaʼ, éí Mulek kin haalʼá bee baaʼáháyą́, binaatʼáanii bichʼįʼ, éí Jacob wolyé, bándaabaahí bił chʼínínééh deełʼníigo naaki kin haalʼá bitaʼgi yikʼiidoojahgo. Ákondi shooh, Jacob, éí Zoram dineʼé nilį́, bándaabaahí yił ałchʼįʼ ndadoobahgo doo haalgaigi yichʼįʼ chʼénééh da.

21 Áádóó baa hoolzhiizh Moroni, tʼáá áłah bá ahonéédzą́ąjįʼ doo chʼídoonééłgo nayólí, éí bąą, Laman dineʼé bidziilgo bił hazʼą́ą́dééʼ chʼíídínóóʼahgo yee hodeezʼą́.

22 Éí bąą Teancum ndaabaahí tʼáá díkwíhígo tónteel bibąąhjįʼ ayííłʼaʼ; dóó Moroni dóó bandaabaahí yił, tłʼéego, doo kééhojitʼį́į́góó dahdiiná, Mulek kin haalʼá eʼeʼaahjigo; áko, biiskání, Laman dineʼé bándaabaahí Teancum hadeideesʼį́į́ʼ, binaatʼáanii, Jacob yaaníjééʼ dóó yił dahoolneʼ.

23 Áádóó baa hoolzhiizh Laman dineʼé bindaabaahí Teancum yichʼįʼ yinééł, éí ayóó ánéélą́ʼígíí biniinaa Teancum yikʼeh dadidoodleełígíí bííghah danízin háálá tʼáá dikwíhí yiltʼé. Áádóó Teancum Laman dineʼé bándaabaahí bichʼįʼ deiyínééhgo deiyiłtsʼą́ągo tónteel bibąąhjįʼ dahdadínííchą́ą́ʼ, nahookǫs bichʼįʼjigo.

24 Áádóó baa hoolzhiizh Laman dineʼé bandaabaahí bitsʼą́ą́jįʼ dahdadiníichą́ą́ʼgo deiyiiłtsʼą́, bił dahóósih dóó yídaneedlį́įgo yikééʼ dahdadiibaaʼ. Áádóó Teancum Laman dineʼé bándaabaahí yinooʼahgo chʼééh yíká deiyibááh, áko shooh Moroni bándaabaahii tʼáá dikwíhígo kin haalʼáá góneʼ yahadohnééł yidííniid, dóó bighadadidoohtʼááłgo bee adídahódoołnih.

25 Áádóó ákódaadzaa, dóó kin haalʼá yaaʼádahalyanée tʼáá áłtso ndeestseed, aooʼ, yee ndaabaahí doo niʼndeeznilígíí tʼáá áłtso.

26 Áádóó Moroni Mulek kin haalʼá yighaiyítʼą́ągo yee ádíhoosnííʼ bándaabaahí łahdóó yił, łah éí Laman dineʼé yił ałkʼiijééʼ éí Teancum yitsʼą́ądééʼ danééchéhígíí.

27 Áádóó baa hoolzhiizh Laman dineʼé Teancum yíkéé deiyíbaah Bountiful kin haalʼá bííghahjįʼ, dóó Lehi dóó bándaabaahí tʼáá dikwíhígo yił ałkʼííjééʼ, éí Bountiful kin haalʼá yaa ádahalyą́ągo ádabiʼdiilyaa ńtʼę́ę́ʼ.

28 Áádóó áko shooh, Laman dineʼé ndaabaahí binaatʼááh Lehi bindaabaahí bichʼįʼ deiyínééhgo dayiłtsʼą́, tʼóó báhádzidgo bił dahóółąądgo dahdadínííchą́ą́ʼ, doo shį́į́ Mulek kin haalʼá yee ádídahodiilnih da háálá Lehi da nihikʼéh didoodleeł; háálá deiyíneéłgo chʼééhdeeskai, dóó Lehi bándaabaahí éí dabiinéí.

29 Áko kʼad Laman dineʼé doo bił béédahózin da Moroni dóó bándaabaahí bikʼéé yinééłgo; áádóó Lehi dóó bindaabaahí tʼéiyá yéédaaldzid.

30 Áko kʼad Lehi doo bikʼeh dadidiidlééł da nízin Moroni dóó bándaabaahí yił ahííkaigo índa.

31 Áádóó baa hoolzhiizh Laman dineʼé tʼah doo nízaa niinééhgóó Nephi dineʼé bináztʼiʼ, Moroni bándaabaahí nahdééʼ, dóó Lehi bindaabaahí éí kódééʼ, éí tʼáá átʼé dabiinéí dóó ayóó dabidziil, ákondi Laman dineʼé éí chʼééh deeskai nizaadééʼ nínánígíí biniinaa.

32 Áádóó Moroni bándaabaahí bikʼijįʼ dadidoohbah yidííniid yee ndaabaahígí niʼ ndeeznilgo índa.

33 Áádóó baa hoolzhiizh Jacob, naatʼáanii nilį́įgo, dóó Zoram dineʼé nilį́įgo, doo bikʼeh hodidlį́į́go, doo ndahinilyéésgóó Laman dineʼé yooʼishgo Moroni yichʼįʼ dahdadiibaaʼ.

34 Moroni áádééʼ yinééłgóó, Jacob éí yinéłígíí neidoołtsxiłgo biniʼ nilį́ dóó naʼashxaałgo chʼídeeshbah nízin Mulek kin haalʼádi. Ákondi shooh, Moroni dóó bándaabaahí alááh dabidziil; éí biniinaa Laman dineʼé ádadooníłígíí doo bee bá hooʼaʼ da.

35 Áádóó baa hoolzhiizh tʼáá áłchʼíshdééʼ tsʼídá yéego daʼahooghą́ą́ʼ; dóó ałtsʼą́ą́jí tʼóó ahayóí ndaaztseed, aooʼ, dóó Moroni atíbiʼdiilyaa dóó Jacob seesxį́.

36 Áádóó Lehi yił ndaabaahí dabidziilígíí ayóó bádahachįʼgo yikééʼ dahdadiibaaʼ, dóó Laman dineʼé akéédééʼ deibáhígíí yee daʼahighanígíí niʼndeeznil, dóó chʼéékaiʼígíí, háajigo ndaʼdoołhxałígíí, bił chʼaadaazlį́į́ʼ.

37 Áádóó kʼad Moroni bił dahooląądígíí yaa ákoniidzį́į́ʼ, kóyidííniid: Bee nidaabahí ndanohjááh dóó niʼndanohnííł, áko doo ndanihidiiltsxił da.

38 Áádóó baa hoolzhiizh Laman dineʼé díidí saad déidiiztsʼą́ągo, ndaabaahí binaatʼááh, doo ndaaztseedígíí tʼáá ałtso, yee ndaabaahí Moroni deesʼeezjįʼ adeeyistłʼííd, dóó bándaabaahígíí ałdóʼ kódaahnééh deidííniid.

39 Ákondi shooh, tʼóó ahayóí doo akʼeh dahóołįįd da; dóó bibééshał doo niʼkódeiléhígíí deisxił dóó yedaʼaztłʼǫ́, dóó yee ndaabaahígíí bighadahaasnil, bikʼiské yił kéyah Bountifulgóó abidiʼnoodzood.

40 Áádóó yah adabiʼdisnilígíí ndaaztseedígíí yiláah áneelą́ą́ʼ, aooʼ, tʼáá ałchʼijí ndaaztseedígíí yiláah áneelą́ą́ʼ.