1 Áádóó áko naadiin ashdlaʼ yihah góneʼ bee hahoolzhiizh ándahwiiʼaahii Nephi bidineʼé yikʼi dahwéeʼaahgo, Lehi bidineʼé dóó Morianton bidineʼé bikéyah binahjįʼ kʼé hólǫ́ǫgo ádeiyiilaa, áádóó naadiin ashdlaʼ yihah góneʼ kʼé yee náás deeskai;

2 Ákótʼée ndi, tʼáadoo nizáádgo kʼé hólǫ́ǫgo hooʼaʼ da, diné bitahgo łaʼ saad ahídeitʼááh ándahwiiʼaahii alą́ą́jįʼ dahsidáhígíí Pahoran biniinaa; hááłá áko shooh, diné bee hazʼáanii łahdóó łahgo adoolnííł danízin.

3 Ákondi shooh, Pahoran éí bee hazʼáanii łahgo ádoolníiłgo doo yee hasʼáa da; éí bąą, diné łaʼ bee hazʼáanii doo łahgo ádoolníił da daaníigo yee ndaʼastsooz yę́ę doo yá yeʼiilaa da.

4 Éí bąą, bee hazʼáanii łahgo ádoolnííł daninígíí bichʼįʼ bádahóóchįįd, dóó kéyah yikʼi aláahdi ánahwiiʼaahii doo nilį́į da doo daniizį́į́ʼ; éí bąą ahinízhdiijééʼ, ákondi tʼáadoo ndaʼahestseed da.

5 Áádóó baa hoolzhiizh Pahoran ánihwiiʼaahii-dah sidáádóó nahjįʼ kódoolníił danízinígíí éí aláahdi naatʼáani-bihastóí daosyeʼ, háálá bee hazʼáanii łahgo ádoolnííł danízin áko tʼáá bí ádeinízingo binahatʼaʼ deiyiłyeed yę́ę nahjįʼ kódoolnííł dóó aláahdi naatʼáanii kéyah yikʼi bóhólníh doogo yikʼidadidoolnih.

6 Áádóó aláahdi ánahwiiʼaahii Pahoran tʼáá dahsidaa doo danízin yę́ę éí diné tʼáá bí ádá nidahatʼá bízhiʼgo ákʼideidiitʼą́; áádóó kótʼáo ałʼąą dahyildah, háálá tʼáá bí ádá nidahatʼá yee ádeihadahaasdzííʼ éí doodago ahadaʼdeestʼą́ áko beʼoodląʼ yikʼehgo dahiná dóó yee báʼahootʼįʼígíí tʼáá bí ádeinízingo binahatʼaʼ tʼáá náás yiitʼih doo danízin.

7 Áádóó baa hoolzhiizh díí yaa adaʼahigánígíí diné bizhí yee saad yee hadahaasdzíʼígíí bee kʼéházdǫǫd. Áádóó baa hoolzhiizh diné tʼáá bí ádá nidahatʼá diné ádaanínígíí bikʼeh áhoodzaa, dóó Pahoran ándahwiiʼaahii dah sidáádóó tʼáá dahsidáa doogo ályaa, éí binahjįʼ Pahoran bidineʼé tʼáá íiyisíí bił dahóózhǫǫd áádóó diné tʼóó ahayóí tʼáá bí ádeinízingo kéédahatʼínígíí ałdóʼ, éí aláahdi naatʼáanii-bihastóí dabidiiłheel, ákondi tʼáá hójinízingo iiná tʼáadoo łaʼ yitsʼą́ą́jí náánásdlį́į́ʼ da áko tʼóó yikééʼ niikai.

8 Aláahdi naatʼáanii deinízinígíí éí aláahdi béédahoʼdílzinii badaʼáłchíní danilį́, dóó aláahdi naatʼáanii dadooleełgo yíká ádaatʼį́; áádóó shóhólnííh doo danízinígíí dóó diné yikʼi bídahólnííhígíí éí bikáʼándaajah.

9 Ákondi shooh, díí adeʼáhootʼéego hoolzhishgo Nephi bidineʼé tʼáá bí saad ałkʼídeitʼááh; háálá áko shooh, Amalickiah éí Laman bidineʼé Nephi dineʼé yikʼijįʼ yá nááhóółchįįd, dóó tʼáá ałtso bikédaayahdę́ę́ʼ ndadoobahígíí ahíʼyiiʼéésh, dóó yee ndadoobahígíí yee hashtʼeʼ ádadilnééh, dóó wołíbee anaaʼ yikʼá hashtʼeʼádadilnééh; háálá Moroni bidił deeshdlįįł níigo yee hadoodzííʼ.

10 Ákondi shooh, díí ádee hadoodzíʼę́ę tʼáá naʼnileʼdii haʼoodzííʼ átʼéego nihił béédahodoozįįł; ákótʼée ndi, bí dóó bándaaabaahí Nephi dineʼé yikʼiidoojahgo hashtʼeʼ ádaʼdiilyaa.

11 Áko kʼad bá ndaabaahí doo áłtséédą́ą́ʼ yę́ęgi ánéelą́ą da, háálá Nephi dineʼé damiil bilááh áneelą́ą́ʼgo nideistseed, tʼóó ahayóí nidaaztseed ndi, Amalickiah ndaabaahí ayóó dabidziilgo ahíyiiʼeezh, azhą́ ákótʼée ndi doo náldzidgóó Zarahemla góyaa dahdiiná.

12 Aooʼ, Amalickiah tʼáá bí ndi níyá, Laman dineʼé yilą́ąjįʼ sizį́įgo. Áádóó ándahwiiʼaahii naadiin ashdlaʼ yihahígíí biyiʼ dahwééʼaah; áádóó aláahdi ánahwiiʼaahii, Pahoran baa saad hólónée kʼédaházdoodgo.

13 Áádóó baa hoolzhiizh aláahdi naatʼáani-bihastóí Laman dineʼé yił daʼahiʼniigą́ąʼgo yaa dahodiiztsʼą́ą́ʼ; bijéí bił dahóózhǫǫd; dóó bee ndaʼabaahí doo chodeidiilįįł da daniizį́į́ʼ, háálá aláahdi ánahwiiʼaahii tʼáá áyisíí yichʼįʼ bádahóóchįįd, áádóó diné tʼáá bí ádeinízingo kéédahotʼinígíí ałdóʼ, bee ndaʼabaahí yee bikéyah yichʼą́ą́h ndadoobahgo doo ádeinízin da.

14 Áádóó baa hoolzhiizh Moroni díí yiyiiłtsą́ągo, áádóó Laman dineʼé kéyah binaagóó deínéehgo ałdóʼ yiyiiłtsą́, tʼáá íiyisíí báhóóchįįd háálá diné yéego yá naashnishgo yisdayíʼeezh yę́ę doo ndabíʼdídzil da; aooʼ, tʼáá íiyisíí báhóóchįįd; biiʼ sizíinii áháchįʼ biiʼ hadéébįįdgo yikʼijįʼ kóyiilaa.

15 Áádóó baa hoolzhiizh saad yichʼįʼ áyiilaa, diné ádaaníigo, kéyah yee bíhólníihii, yídóółtah nízingo, dóó bí (Moroni) adziil yeidoolééł atsʼą́ą́jí daazliįʼígíí yíiniłkadgo bikéyah yichʼą́ą́h ndadoobahgo éí doodago tʼóó ndabiʼdidootsxił.

16 Áko áłtsé hashtʼeidoolíłígíí éí saad dahółónígíí dóó diné atsʼą́ą́jíʼ daazlį́ʼígíí nidootʼih; háálá áko shooh, díí ákóhootʼéhígíí biniinaa tʼáá ałtsojįʼ yikʼee tiʼdahoozniiʼgo ábísdįįd. Áádóó baa hoolzhiizh diné ádadííniid yę́ę bohoolyaa.

17 Áádóó baa hoolzhiizh Moroni bá ndaabaahí aláahdi naatʼáani-bidahastóí deinízinígíí yikʼijįʼ ndadoobahígíí ayííłʼaʼ ádaa dadzódlí dóó bídaholnííh niʼ bił didoolkǫǫł, éí doodago bee ndaʼabaah yił hadadoodił dóó tʼáá bí ádeinízingo dah hináa doo.

18 Áádóó baa hoolzhiizh ndaabaahí bichʼįʼ dadeezbaaʼ; dóó bibee ádaahodzódlí dóó ádídahólníyę́ę yąąh nideiyiisxaal, áko yee ndaabaahí yił hadahaazdéél dóó Moroni bá ndaabaahí yił ałkʼiijééʼ dóó nidabiʼdistseedgo niʼ bił dadiilkǫʼ.

19 Áádóó baa hoolzhiizh dį́į́ʼ dimííl atsʼá dahazʼnánée béésh hał bee nidabiʼdistseed; áádóó binaatʼáanii chʼéédziʼígíí éí dabiʼdisná dóó awáalyah adahaasnil, áko kʼad baa nídahódóotʼįįłgo doo bá bóhóneedzą́ą da.

20 Áádóó atsʼá dahaaznáanii chʼéédziʼígíí, béésh hał bee ndabiʼdidooltsxił doo ńtʼééʼ ndi, tʼáá hójinízinjí iiná deinízingo deilyiłtsood, áádóó tʼáá hójinízinjí iiná bidah naatʼaʼí yadaʼdiiʼá bílátahdóó dahnidaatʼaʼgo ádayiilaa, dóó bikin hadaasʼáágóó, áádóó yee ndaabaahí bikéyah yichʼą́ą́h chodeidoołʼįįł.

21 Áko Moroni aláahdi naatʼáanii-bidahastóí íísdįįd, áko doo ła aláahdi naatʼáanii-bidahastóí dajoolyée da doo, áko diné doo ndabíʼdídzilígíí dóó bídaholnííh yee ádaa dadzódlí yę́ę íísdįįd; ákondi bikʼiské nahalingo aʼohgo ádaatʼéego ályaa, áádóó tʼáá bí ádeinízingo kéédahatʼį́į doogo yéego yíká ndaazbaaʼ.

22 Áko shooh, baa hoolzhiizh Moroni daʼanaaʼ niʼ kwíílééh dóó tʼáá bí bidineʼé ahináádiijahígíí ałdóʼ, dóó kʼé dóó hódzą́ yikʼeh yikahgo íílééh, dóó Laman dineʼé yił daʼahidooghą́ąłgo bee hazʼáanii haidilééh, áko shooh, Laman dineʼé Moroni bikéyah yiih yíná, éí tónteel biihiníʼą́.

23 Áádóó baa hoolzhiizh Moroni bikin sinildi Nephi dineʼé doo tʼáá íiyisíí bidziilgo bił hazʼą́ą da; éí bąą, Amalickiah dahyidínííłkaad, ląʼí neiłtseedgo. Áádóó baa hoolzhiizh Amalickiah éí kin sinil yee ádeihoosnííʼ, aooʼ, tʼáá átʼé biʼanaaʼí bikʼijįʼ hashtʼeʼdaalyaa yę́ę yee ádihoosnííʼ.

24 Áádóó Moroni kintahdóó chʼídahineezchaʼígíí Nephihah kin dashijaaʼjįʼ nahaazjééʼ; áádóó ałdóʼ Lehi bikintahdę́ę́ʼ dineʼé ahíikai, áádóó Laman bidineʼé yił daʼahidoogą́ąłgo yichʼįʼ hashtʼeʼ ádaʼdiilyaa.

25 Ákondi baa hoolzhiizh Amalickiah éí Laman dineʼé doo Nephihah kin dashijaaʼdi yił daʼahidoogą́ąłgo dooda yidííniid, ákondi tónteel bąąhdi dah yinéełgo áyiilaa, diné ndaabaahí tʼáá ałtso kin dah naazhjaaʼ yaa ádahalyą́ dóó yichʼą́ą́h ndadoobahgo.

26 Áádóó tʼáá náás níbaaʼ, tʼóó ahayóí kin dah naazhjaaʼ yę́ę adeihoosnííʼ, Nephihah bikéyah, dóó Lehi bikéyah, dóó Morianton bikéyah, dóó Omner bikéyah, dóó Gid bikéyah, dóó Mulek bikéyah, díí tʼáá átʼé haʼaʼahjigo tónteel bibąąhgi naaznil.

27 Ákó kótʼáo Laman dineʼé shódaʼoostʼeʼ, Amalickiah binaʼadloʼ bee, tʼóó ahayóí kin hadaasʼá, doo yóóltaʼ ánéelą́ą́ʼ nidaabaahii bee, tʼáá átʼé bidziilgo hashtʼeʼdaalyaa Moroni hashtʼeilyaaígi átʼáo, díí tʼáá átʼé Laman dineʼé bee dahółdzilgo bił dahooʼaʼ.

28 Áádóó baa hoolzhiizh kéyah Bountiful niniʼą́ąjįʼ niníná, Nephi dineʼé deinííłchééhgo dóó ląʼí ndeiłtseedgo.

29 Ákondi baa hoolzhiizh Teancum yidááh níná, Morianton yiyisxínée átʼį́ dóó éí bidineʼé danéechééhgo yichʼą́ą́h niníbaaʼ.

30 Áádóó baa hoolzhiizh Amalickiah ałdóʼ yichʼą́ą́h níníbaaʼ, tʼóó ahayóí yił ndaabaahí yił yinéełgo áko kéyah Bountiful yee adídahodoolnihgo, áádóó náhookǫsjigo kéyahígíí ałdóʼ.

31 Ákondi shooh Teancum dóó yił ndaabaahí nátʼááʼ abinííłkadígíí doo yíłdin da, háálá naabaahí ayóó átʼéii danilį́; áko Teancum yił ndaabaahígíí tʼááłáʼí nízínígo Laman dineʼé tsʼídá yiláahdi dabidziil dóó naʼabaah ayóó deiyichįįh, ákótʼáo Laman dineʼé yikʼeh dadeesdlį́į́ʼ.

32 Áádóó baa hoolzhiizh atídeiłʼį́į́go, ákótʼáo tʼáá ndeełtseedgo chahóółhéél. Áádóó baa hoolzhiizh Teancum dóó yił ndaabaahí kéyah Bountiful bibąąhgi biníbaal nideiznil; dóó Amalickiah tónteel bighahgi biníbaal nideiznil, kótʼáo ndabidiʼneeskaad.

33 Áádóó baa hoolzhiizh tłʼééʼ azlį́įʼgo, Teancum dóó bá nidaalʼaʼí yił dahdíníítʼį́į́ʼ chahałheeł biiʼ, dóó Amalickiah biníbaal siʼą́ąjįʼ; dóó áko shooh, tʼóó báhadzoo daʼiiłhaazh chʼéédeeskaiʼígíí biniinaa, éí hadoh yiyiʼ ndaazbaaʼígíí bitsʼą́ą́dóóʼ.

34 Áádóó baa hoolzhiizh Teancum nantʼíngo aláahdi naatʼáanii biníbaal yiih nootʼį́į́ʼ, dóó bijéí béésh yaa ayííłgeed; áádóó aláahdi naatʼáanii tʼáá hooschįʼ yiyiisxį́ bá nidaalʼaʼí tʼáadoo chʼéinísid da.

35 Áádóó tʼáá bí biníbaalgóó ánánootʼį́į́ʼ, dóó áko shooh, yił ndaabaahí daʼałwosh ńtʼę́ę́ʼ, chʼéínísid dóó tʼáá ałtso yaa naayáhą́ą́ yee yił hoolneʼ.

36 Áádóó bá ndaabaahí hashtʼeʼádaʼdółnééh yidííniid, Laman dineʼé chʼéédaasdzidgo bikʼiidoojahígíí bíká.

37 Áádóó díigi átʼáo ándahwiiʼaahii Nephi bidineʼé yikʼi dahwéeʼaahgo naadiin ashdlaʼ yihah bił ahoolzhiizh, áádóó áajįʼ Amalickiah yę́ę bee niiníłką́.