1 Áádóó áko baa hoolzhiizh łaʼtsʼáadah yiził dóó náhastʼéítsʼáadah yihah góneʼ, neeznáá jį́ yoołkaał góneʼ, Laman dineʼé bindaabaahí Ammonihah kéyah yichʼiʼ yinéełgo deyiiłtsą́.

2 Áádóó áko shooh, éí kin dashijaaʼ hastʼenánil, dóó Moroni kin dashijaaʼ binaagi ndaabaahí łaʼ dah yinéełgo áyiilaa, dóó łeezh binázgeedgo ádeiiyilaaʼ Laman dineʼé beʼałtʼį́į́ biʼakʼaaʼ dóó bitsé bichʼą́ą́h doo biniyé; háálá áko shooh, tsé dóó akʼaaʼ yee daʼahíbááh.

3 Áko shooh, ádííniid Ammonihah kin dashijaaʼ hastʼenályaa. Ánihidishní, aooʼ, łahdóó hastʼenályaa; háálá Laman dineʼé łah deiyiiłchǫʼ éí diné bąąhági ádaatʼínígíí biniinaa, éí tʼáá hódíínaʼí náádoolchxǫǫł danízin.

4 Ákondi shooh, tʼóó báhádzidgo baandahóókaad; háálá áko shooh, Nephi dineʼé bináágóó ndaʼazgeed, éí tsʼídá hódahdi ádeiyiilaa áko Laman dineʼé bitsé dóó beʼakʼaaʼ tʼáadoo baa heezjééh da, áádóó ałdóʼ yikʼiidoojahgo doo yídeiyíighah da yaheʼetiingi tʼéiyá.

5 Áko ákweʼé hoolzhishgo Laman dineʼé bindaabaah binaatʼááh tʼóó bił daʼahóóyóí, Nephi dineʼé bił éédahózinígíí hasih bił nahazʼą́ hashtʼedeiyiilaaʼígíí biniinaa.

6 Áko Laman dineʼé binaatʼáánii kódaniizį́į́ʼ, alááhgo tʼóó ahoniyóíʼígíí biniinaa, aooʼ, bikʼinéíjah yę́ęgi átʼáo bee nihá áhóótʼiʼ danízin, aooʼ, áádóó ałdóʼ achʼąąh naatʼááhí, dóó béésh ééʼ yee hashtʼeʼádaʼdiilyaa, áádóó akał ééʼ ałdóʼ yee hashtʼeʼádaʼdiilyaa, aooʼ, ééʼ tʼáá íiyisíí ditʼą́ągo akʼídeestiʼ.

7 Áádóó áko hashtʼeʼádaʼdoolzingo doo nanitłʼahgo nihikʼéí yisná ádadiilnííł danízin, éí doodago tʼáá nihí ádaniidzinjįʼ atídadiilnííł dóó ndadiiltsxił.

8 Ákondi shooh, tʼáá íiyisíí bił adahóóyóíʼ, bíká hashtʼeʼ ádaʼdiilyaa łá, díigi átʼáo Lehi baʼáłchíní tsʼídá tʼah doo deiyiiłtsééh da ńtʼę́ę́ʼ. Kʼad éí Laman dineʼé yídaháásdá, Moroni yee naʼneeztą́ą́ʼ yę́ęgi átʼáo ndadoobah.

9 Áádóó baa hoolzhiizh Laman dineʼé, éí doodago Amalickiah bidineʼé, ndadoobah yichʼįʼ hashtʼeʼ ádaʼdiilyaaígíí tʼáá íiyisíí yikʼee dadeeshxiz.

10 Áko, aláahdi naatʼáanii Amalickiah Nephi bikéyahdę́ę́ʼ hadaayá, bá ndaabaahí yilą́ąjįʼ, Laman dineʼé éí Nephi dineʼé ałkʼiidoołjah ńtʼę́ę́ʼ Ammonihah bikin dashijaaʼdi; háálá áko shooh, bidineʼé ndabidiʼdooltsxiłgo doo yąąh bineʼ da.

11 Ákondi shooh, Amalickiah tʼáá bí tʼáadoo níyáá dah atah ndoobahgo. Áádóó áko shooh, binaabaah binaatʼááh Nephi dineʼé doo bikʼiidijah da danízin Ammonihah bikin dashijaaʼdi, hááłá Moroni Nephi dineʼé ádeiʼdoolíłígíí łahgo áyiilaa, éí biniinaa Laman dineʼé baa ndahookaadgo tʼą́ą́ʼ hideeskai áádóó yikʼiidoojah yę́ę doo bá bíighah da silį́į́ʼ.

12 Éí bąą doo kéédahojitʼíníjígo tʼóó dah dadíníichą́ą́ʼ, áádóó binábaal dahdeidiijaah dóó Noah bikéyahjigo dahdiiná, éí áádę́ę́ʼ Nephi dineʼé bikʼiizhdoojahgo tʼáá íyiisíí bohónéédzą́ dazhniiʼzį́į́ʼ.

13 Áko doo bił béédahózin da Moroni tʼáá íiyisíí anaaʼ yá hashtʼeʼ áʼdiilyaago, éí doodago nidaabaahii bá hasih nahazʼą́ą́góó ádeiyiilaa, tʼáá ałtso kéyah kin dah naazhjaaʼ binaagóó; áko, Noah bikéyahgóó tʼáá íiyisíí bíniʼ bídadéétʼiʼgo náás dahdiiná; aooʼ, bá nidaabaahii binaatʼááh éí kin dahshijaaʼgi diné nideidoołtsxiłgo yee ádáhadaasdzííʼ.

14 Ákondi shooh, yikʼee dadeesyiz; Noah bikin dashijaaʼdi, éí doo hózhǫ́ bidziilgóó hazʼą́ą́ ńtʼę́ę́ʼ, éí kʼad, Moroni bikʼehgo hózhǫ́ bidziilgo ályaa, aooʼ, Ammonihah bikin dashijaaʼ biláahdi bidziilgo.

15 Áádóó áko, shooh, díí éí Moroni bił ééhózingo átʼį́, háálá Ammonihah kin dashijaaʼdi ndadooldzííłgo bił bééhózin; háálá Noah bikin dashijaaʼdi doo bidziilgo hazʼą́ą́ ńtʼę́ę́ʼ, áádóó kótʼáo áadi bikʼiidiijah danízingo yinééł; éí íinízinée bikʼehgo.

16 Áádóó áko shooh, Moroni Lehi nidaabaahii binaatʼááh nílį́į dooleełgo yikʼidiilniiʼ éí kin dashijaaʼdi nidaabaahii yikʼi; dóó Lehi éí tʼáá éí Laman dineʼé tooh Sidon haʼaʼaahjigo hootsodi yił daʼahoogąʼą́ąʼ átʼį́.

17 Áádóó áko shooh baa hoolzhiizh, áko Laman dineʼé Lehi kin dahshijaaʼ yikʼi bóhólníihgo bił béénáádahoozingo baąh nináádahóókaad, háálá Lehi ayóó yinídaaldzid; ákótʼée ndi bindaabaahí binaatʼááh kin dashijaaʼ yikʼijįʼ ndadoobahgo yee ádee hadaasdzííʼ; éí bąą, bindaabaahí ndeiyizhʼeezh.

18 Áko shooh, sih nahazʼą́ągi Laman dineʼé doo nááná łahgi átʼáo yiih doonééł da, tʼáá hazhóʼó yahʼ éʼétiingi tʼéiyá, háálá hózhǫ́ hódahgo ahéédaʼastłʼin éí łeezh adahaaskʼaadgo bee, dóó hoyahgo bináágóó ahéédaʼiisgeed, yah éʼétiingi éí ndagaʼ.

19 Áádóó kótʼáo díigi átʼáo Nephi dineʼé hashtʼeʼádaʼdiilyaa nidaabaahii bá nahazʼą́ nááná łahdééʼ yah adadoonahígíí ndabiʼdiʼdoołtsxił, tsé yichʼįʼ adeiyiiłtłʼiid dóó kʼaaʼ yee deiyółtʼóóhgo.

20 Áádóó áko díigi átʼáo hashtʼeʼádaʼdiilyaa, aooʼ, ndaabaahí dabidziilígíí łaʼ, bibéésh hał dóó bibee adiltłʼį́į́h yee, háiida bisih nahazʼą́ yahʼeʼeʼtiingi yah adaakáahgo ndeidoołtsił; áádóó kótʼáo Laman dineʼé yichʼą́ą́h hashtʼeʼ ádaʼdiilyaa.

21 Áádóó baa hoolzhiizh Laman dineʼé binaatʼááh bá ndaabaahí yah eʼeʼtiingi ndahaazná, dóó Nephi dineʼé yichʼįʼ dadeezbaaʼ, sih nahazʼą́ągi yah adoonéełgo; ákondi shooh, díkwíidi da nátʼą́ą́ʼ anbiníʼdiʼnoolkaad, áko ląʼígo nidabiʼdistseed.

22 Áko Nephi dineʼé yikʼi bídahólníih doogo chʼééh ádeiyííłʼįįd yah éʼétiingi, áádóó łeezh deiyílkʼid yę́ę nahjįʼ adeiyizgeed áko bindaabaahí yichʼįʼ éʼétin ádeidoolíiłgo, áko tʼáá bídeiyííniighahgo bichʼįʼ ndadiibah danízin; ákondi shooh, díí daʼágeedgóó tsé bichʼįʼ ahiltłʼiidígíí dóó kʼaaʼ yee deiyółtʼóhígíí nidabistseed; deiyíldzis łeezh yee hadeididoołbį́į́ł ndi, daneeznánígíí dóó atídabiʼdilyaaígíí bee hadadéébįįd.

23 Áko Nephi dineʼé tʼáá ałtso anaaʼí yikʼi dabidziil; áádóó kótʼáo Laman dineʼé Nephi dineʼé ndeidoołtsiłgo yidanitaah ńtʼę́ę́ʼ bindaabaahí binaatʼááh ałtso nidabiʼdistseed; aooʼ, áádóó Laman dineʼé dimííl yázhí bilááhgóó nidabiʼdistseed; áko, łahjígo éí, Nephi dineʼé doo łaʼ seesyį́į da.

24 Ashdladiin éí atídaadzaah, éí yah eʼetiin góneʼ Laman dineʼéʼ beʼkʼaaʼ atídabiilaa, ákondi beʼachʼą́ą́h naatʼáhí, béésh ééʼ, béésh chʼah dabichʼą́ą́h ntʼééʼ, áko dabijáád atídaalyaa, ląʼí da yéego atídaadzaa.

25 Áádóó baa hoolzhiizh, éí Laman dineʼé ndaabaahí binaatʼááh ałtso nidabiʼdiztseedgo doo kééhojitʼínígóó adahineezhchą́ą́ʼ. Áádóó baa hoolzhiizh Nephi bikéyahgóó anááʼná, biʼaláahdi naatʼáanii, Amalickiah, éí Nephi dineʼé bitsʼą́ą́dóó biʼdizhchí, ląʼígo ábiʼdisdįįdígíí yee yił dahoolneʼ.

26 Áádóó baa hoolzhiizh tʼáá íiyisíí bidineʼé yichʼįʼ báhóóchįįd, Nephi dineʼé tʼáadoo yikʼeh deesdlííʼígíí biniinaa, éí tʼáadoo yisná ádeiyiilaa da.

27 Aooʼ, tʼáá awołíbee báhoochííd, dóó Diyin God yiyíídzííʼ, dóó Moroni ałdóʼ, tʼáá aaníí hadił deeshdlííł níigo áda haadzííʼ; dóó Moroni éí Diyin God bibee hazʼáanii yikʼeh hółʼínígíí biniinaa bidineʼé hasih hazʼą́ągo yá hashtʼehoolaa.

28 Áádóó baa hoolzhiizh, łahjígo éiyá Nephi bidineʼé biBóhólníihii Diyin God ahéheeʼ deidííniid, háálá bidziilgo doo yineelání da dabidisnáádę́ę́ʼ yisdábidooʼishgo.

29 Áádóó kótʼáo ándahwiiʼaahii Nephi bidineʼé yikʼi dahwéeʼaahgo náhástʼéítsʼáadah ałtso nááhai.

30 Aooʼ, tʼáá áłahjįʼ kʼé bił naaztʼiʼgo bił hooʼaʼ, áádóó yéego sodizin biyiʼ náás deeskai Diyin God bizaad deiyíístsʼą́ą́ʼ dóó yéego yindaalnishígíí biniinaa, éí Helaman, dóó Shiblon, dóó Corianton, dóó Ammon dóó bikʼiské yee ndabidineeztą́ą́ʼ, aooʼ, áádóó tʼáá áłtso Diyin God diyingo bihootʼááł bee bikʼidahodiinííʼígíí ałdóʼ, ádaa ńdaʼooskango tó bee dabiʼdoolzį́į́ʼ, dóó diné bitahgóó nidaʼnitingo adahaasʼaʼ.