1 Áádóó baa hoolzhiizh aláahdi naatʼáanii Lamoni bá ndaalaʼí daohsįįh dóó tʼáá átʼé áhóótʼįįdgo daołtsánígíí baa hadahoohdziih.

2 Áádóó tʼáá átʼé deiyiiłtsánígíí yee hadahasdzííʼgo, dóó bił bééhoozįįd Ammon dibé yéego yikʼídeezʼį́į́ʼgo yisdéinííłkaad, dóó ałdóʼ bichʼįʼ ńdadibaahígíí ayóó átʼéego bichʼįʼ bidziil, tʼáá íiyíísii yikʼee tsídoolyiz, dóó ádííniid: Tʼáá laʼ aaníí, díí nihokááʼ dineʼé yilááh átʼé. Áko shooh, daʼ díísh Iiʼ Sizį́ Ayóóʼátʼéii átʼį́ éí díí diné ayóó átʼáo yánahwiiʼaah, ndaʼałtseedígíí biniinaa?

3 Áádóó aláahdi naatʼáanii yił dahoolneʼ, dóó ádadííniid: Iiʼ Sizį́ Ayóóʼátʼéii éí diné daatsʼí nilį́, doo nihił béédahózin da; ákondi díí nihił béédahózin, áko aláahdi naatʼáanii beʼanaaʼ doo dabidoołhééł da, dóó aláahdi naatʼáanii bilį́į́ʼ doo daʼníłtsʼą́ąjigo ałtsʼádeidínóołkał da bíł ndaʼniilkaadgo, háálá tʼáadoo leʼé ayóó yiyichįįh dóó ayóó bidziil; éí bąą, aláahdi naatʼáanii yikʼis nilį́įgo nihił béédahózin. Dóó áko, O aláahdi naatʼáanii, łaʼ diné ákótʼáo ayóó áboodziilgo doo nihił béédahózin da, háálá nihił bééhózingo éí doo bidiʼdoolyééł da.

4 Áádóó áko, díí saad yídiiztsʼą́ą́go, díí átʼáo yichʼįʼ haadzííʼ: Kʼad shił bééhoozin éí Iiʼ Sizį́ Ayóóʼátʼéii átʼį́; dóó yisdánihidooishgo nihaa níyá, áko doo nanihideestxił da nihikʼiské ííshlaa yę́ęgiʼ átʼáo. Áko díí éí Iiʼ Sizį́ Ayóóʼátʼéii nihizází yaa hadahaasdzííʼ yę́ę átʼį́.

5 Áko díí éí Lamoni bibee óʼoolʼįįł átʼée ńtʼę́ę́ʼ, éí bizhéʼé bił hoolneʼ, éí Iiʼ Sizį́ Ayóóʼátʼéii hólǫ́. Ázhą́ Iiʼ Sizį́ Ayóóʼátʼéii deiyoodlą́ą ndi, tʼáá bí adeiłínígíí tʼáá aaníí átʼé danizin; ákótʼée ndi, Lamoni tʼáá íiyíísii náásdzííd, háálá doo ákoʼiilaagóó bá ndaalʼaʼí neistseed yę́ę yikʼee bił hóóyééʼ.

6 Háálá bikʼéí tʼóó ahayói neistseed bidibé toohdi daʼníłtsʼą́ąjigo ałtsʼádeineeskaadígíí biniinaa; dóó áko, háálá bidibé daʼníłtsʼą́ąjigo ałtsʼádeineeskaadígíí biniinaa neistseed.

7 Áko Laman dineʼé Sebus tábąąhdi naazį́įʼgo diné bidibé daʼníłtsʼą́ąjigo ałtsʼánídeiniłkaʼgo ádaʼałʼį́, áko daʼníłtsʼą́ąjigo ałtsʼádeineeskaadígíí bikéyahjigo adeineiłkaad, áko kódaatʼį́į́go aheedaʼnitʼįįh.

8 Áádóó baa hoolzhiizh aláahdi naatʼáanii Lamoni bá ndaalʼaʼí neidéíłkid, kóníigo: Díí hastiin ayóó bidziilígíí háádish naaghá?

9 Áádóó ádeiłní: Áko shooh, niłį́į́ʼ yáʼniʼíłjóół. Áko aláahdi naatʼáanii bá ndaalʼaʼí, dibé taah dinoołkał tah bitsʼéédi íídííniid, shilį́į́ʼ dóó tsinaabąąs bijáád ndaakiígíí hashtʼeʼdadoolííł yídííniid, dóó Nephi kéyahgo daʼdiilbąąs; háálá Nephi bikéyahdi ayóó átʼéego adazhniiyą́ą́ jiní, Lamoni bizhéʼé bá, éí ákweʼé kéyah tʼáá átʼé yilą́ąjiʼ sizį́.

10 Áko aláahdi naatʼáanii Lamoni Ammon bilį́į́ʼ dóó bitsinaabąąs hashtʼeilééhgo yidiistsʼą́ą́go tʼáá íiyísii bidiisnááʼ, Ammon tʼáá íiyísii akʼeh hółʼínígíi biniinaa, kóníigo: Tʼáá laʼ aaníí tʼáá ałtso shándaalʼaʼí bitahdóó doo łaʼ díí hastiingiʼ átʼáo tʼáá íiyisíí akʼeh hółʼį́į da ńtʼę́ę́ʼ; háálá tʼáá altso shibee hazʼáanii yénálniihgo yeʼałʼį́.

11 Áko tʼáá aaníí díí Iiʼ Sizį́ Ayóóʼátʼéii átʼį́į́ lá, dóó shaa doogááł nisin, ndi baa shistiʼ.

12 Áádóó baa hoolzhiizh Ammon aláahdi naatʼáanii dóó bá ndaalaʼí bilį́į́ʼ dóó bitsinaabąąs yá hashtʼeʼyiilaahgo, aláahdi naatʼáanii yił yáhiiyá, dóó aláahdi naatʼáanii binííʼ łah ádzaago yiyiiłtsʼą́; éí bąą kʼasdą́ą́ʼ tʼóó yitsʼą́ą́jįʼ chʼínálwod.

13 Áádóó aláahdi naatʼáanii bá ndaalaʼí łaʼ ábiłní, Rabbanah, éí éii, naatʼáanii ayóó átʼéii doodago ayóó átʼáo bidziilgo, áá haʼní, jó biʼaláahdi naatʼáanii ayóó dabidziilgo yaa ntsidaakees; áádóó ááh yiłní: Rabbanah, aláahdi naatʼáanii tʼáá kǫ́ǫ́ shił honílǫ́ nóʼníh.

14 Éí bąą Ammon aláahdi naatʼáanii yichʼįʼ naanásdzá, áádóó ííłní: Háʼátʼíí la bee níkáʼiishyeed, O aláahdi naatʼáanii? Áádóó aláahdi naatʼáanii ahééʼílkidgo índa bichʼįʼ haadzííʼ, bindaʼalkidígíí bikʼehgo, háálá haʼátʼíí yididooniiłígíí doo bił bééhózin da.

15 Áádóó baa hoolzhiizh Ammon ánáádooʼniid: Háʼátʼíísh shítsʼą́ą́dóó nínizin? Ákondi aláahdi naatʼáanii doo bichʼįʼ haadzííʼ da.

16 Áádóó baa hoolzhiizh Ammon, Diyin God biʼIiʼ Sizį́ Diyinii bił hólǫ́ǫgo, éí bąą aláahdi naatʼáanii yaa nitsekeesígíí bił bééhoozin. Áádóó kóyidííniid: Daʼ nándaalʼaʼí dóó nidibé bichʼą́ą́h nisíbaahígíí, dóó bikʼiské tsotsʼidgo bee adiltłʼį́į́h dóó béésh hał bee atʼííshłaago baa hosidínítsʼą́ʼígíí biniinaa, dóó łaʼ éí bigaan kʼéhíkal, áko nidibé dóó nánidaalaʼí bichʼą́ą́h nideeshbaał; éí bąą, daʼ dííʼísh biniinaa nidiisnááʼ?

17 Ándishní, haʼátʼíísh biniinaa, ayóó átʼáo niʼdiisnáá? Áko shóóh, diné nishłį́, dóó nánaalʼaʼí nishłį́; éí bąą, haʼátʼííshį́į́h tʼáá ákogiʼ átʼéego nínizinígíí, ná beʼdeeshłííł.

18 Áko aláahdi naatʼáanii díí saad yidiiztsʼą́ą́go, ayóó átʼáo náábiʼdiisnááʼ, háálá Ammon yaa ntsékeesígíí bił bééhózin; azhą́ díí ákótʼée ndi, aláahdi naatʼáanii Lamoni haadzííʼ, dóó ííłní: Háish ánítʼį́? Iiʼ Sizį́ Ayóóʼátʼéii éíísh ánítʼį́ʼ, tʼáá ałtsoní bił bééhózinii?

19 Ammon náátʼą́ą́ hánáádzííʼ dóó kóní: Éí doo shí áshtʼį́į da.

20 Áádóó aláahdi naatʼáanii ání: Haash yitʼáo shijéí biyiʼdi baa nitséskeesígíí nił bééhózin? Tʼáadoo nináhiníyésí handziih, dóó díí nił bééhózinígíí baah handziih, áádóó ałdóʼ haʼátʼíí adziilii bee shikʼéí shidibé daʼníłtsʼą́ąjigo ałtsʼádeineeskaadę́ę bigaan kʼídahííníkal éí bee shił hólneʼ—

21 Áádóó áko, díí nił bééhózingo bee shił hwíínilneʼgo, haʼátʼíshį́į́ nínízinígíí naadeeshłééł, dóó nínízingo, shá ndaabaahii naaʼádahalyą́ą doo; ákondi shił bééhózin ni éí biláahgo nidziil; ákótʼée ndi, tʼáá haʼátʼííshį́į́ nínízinígíí nichʼįʼ kódeeshłííł.

22 Áádóó Ammon hóyą́ągo, ákondi doo atidoolííłgóó, Lamoni ííłní: Shizaadísh bikʼedidíítį́į́ł, haʼátʼíí adziilii bee áshłaaʼígíí bee nił hwííshneʼgo? Áádóó díí éí nitsʼą́ą́dóó nisin.

23 Áádóó aláahdi naatʼáanii bił hoolneʼ, kóníigo: Aooʼ, nizaad tʼáá átʼé yideeshdląął. Áádóó ákótʼáo łídishcháázh íyiilaago habidiʼdoolʼį́į́ʼ.

24 Áádóó Ammon doo tʼą́ą́ʼ nináhiníyéésgóó yichʼįʼ haadzííʼ, dóó íídííniid: Diyin God hólǫ́ǫ́góósh yinidlą́?

25 Áádóó haadzííʼ, dóó ábiłní: éígaʼ doo bikʼeʼdiishtįįh da.

26 Áádóó Ammon ání: daʼ Iiʼ Sizį́ Ayóóʼátʼéii hólǫ́ǫgo yinídlą́?

27 Ńtʼę́ę́ʼ ání, Aooʼ.

28 Áádóó Ammon ání: Díí éí Diyin God átʼį. Dóó Ammon ánáánéíłní: Díísh Iiʼ Sizį́ Ayóóʼátʼéii átʼį́įgo yinídlą́, éí Diyin God átʼį́, yáʼąąsh dóó nahasdzáán tʼáá átʼé biyiʼ dóó bikáaʼgi hólónígíí áyiilaa?

29 Áádóó ání: Aooʼ, táá ałtso nahasdzáán biyiʼ dóó bikáaʼgi siláhígíí áyiilaa; ákondi yáʼąąsh éí dóó shił bééhózin da.

30 Áádóó Ammon ííłní: yáʼąąshdi éí Diyin God dóó tʼáá ałtso Diyin yá ndaalʼaʼí dadiyinii kéédahatʼį́.

31 Áádóó aláahdi naatʼáanii Lamoni ání: Daʼ éí nahasdzáán bilááhdi hazʼą́.

32 Áádóó Ammon ání: Aooʼ, dóó nihokááʼ dineʼé baʼáłchíní tʼáá ałtso yikʼidéézʼį́į́ʼ áádóó tʼáá ałtso nitsídahakees dóó ajéí yinízinígíí bił bééhózin; háálá bílaʼ yee hodeeyáadą́ą́ʼ tʼáá ałtsoní áyiilaa.

33 Áádóó aláahdi naatʼáanii Lamoni ání: Tʼáá ałtso baa hwíínílneʼígíí éí yinishdlą́. Daʼ Diyin Godish anííłʼaʼ?

34 Áádóó Ammon ííłní: Nihokááʼ dineʼé éí nishłį́; dóó nihokááʼ dineʼé éí Diyin God yeełtʼéego ábiʼdiilyaa, dóó biʼIiʼ Sizį́ Diyinii yee shikʼidiilniiʼiiʼ díí diné bee ńdiníítʼį́į́ł shidííniid, áko tʼáá ákogi átʼéii dóó tʼáá aaníinii bił béédahodoozįįłjįʼ ndahodootʼish.

35 Áádóó éí Iiʼ Sizį́ Diyinii łahdóó shiiʼ hólǫ́, éí ééhózinii shaayiilé, dóó adziilii ałdóʼ sheʼoodląʼ bikʼehgo dóó Diyin God yinízinígíí.

36 Áko Ammon díí saad yeehaadzíigo, nahasdzáán ályaadééʼ, dóó Adam alyaadééʼ ałdóʼ, dóó nihokááʼ diné asih yę́ę tʼáá átʼé bídeetʼiʼígíí yee yił hoolneʼ, haneʼ ndaháasdzohyę́ę dóó Diyin bizaad dílzingo bee akʼedaʼashchínígíí diné ndeijaahígíí yił chʼééníąąh dóó yidaah neiyiznil, éí Diyin yá yádaałtiʼii yaa hadahasdzį́į́ʼ, ázhą tʼáá niléédéé bizází, Lehi, Jerusalemdę́ę́ʼ dah diinánígíí ndi.

37 Áádóó (aláahdi naatʼáanii dóó bá ndaalaʼí bichʼįʼ) diné doo kééhatʼinídi tʼáá ałtsogóó tʼádadíínánééʼ bizází yił chʼííníʼą́, dichin dóó dibááʼ yikʼéé tihdahoozníiʼ yę́ę, dóó bichʼįʼ nahwiisnááʼ yę́ę, dóó ákótʼáo bił hoolzhishyę́ę.

38 Áádóó Laman dóó Lemuel, dóó Ishmael biyeʼké akʼíhjįʼ nilíinééʼ ałdóʼ yił chʼínííníʼą́, aooʼ, tʼáá ałtso akʼíhjįʼ danilíinééʼ yił chʼínííníʼą́; dóó haneʼ ndaháasdzohyę́ę dóó Diyin bizaad bee akʼedaʼashchínígíí tʼáá ńléí Lehi Jerusalemdę́ę́ʼ dah diinándóó kʼad hoolzhishjįʼ yił chʼíyizʼą́.

39 Ákondi doo díí tʼéiyá da; háálá nináʼílyáago hootʼááł yee yił nahaasneʼ, éí nahasdzáán hadilnéhéédą́ą́ʼ hashtʼeelyaa; áádóó Christ doogáłígíí ałdóʼ yił ííshją́ą́ áyiilaa, dóó Bóhólníihii binaanish tʼáá átʼé yił ííjshą́ą́ áyiilaa.

40 Áádóó baa hoolzhiizh díí ałtso yaahaadzííʼgo, dóó aláahdi naatʼáanii yił chʼíyizʼą́ągo, aláahdi naatʼáanii bizaad tʼáá átʼé yoosdląąd.

41 Áádóó Bóhólníihii yéego yichʼįʼ sodiʼniilzin kóníigo: O Bóhólníihii, shaajiiníbaah; Nephi bidineʼé ląʼígo baa jiisinibaʼígíí bikʼehgo, shí, dóó shidineʼé nihichʼįʼ kónílééh.

42 Áádóó áko, díí yee haadzííʼgo, niʼjįʼ naaʼíítłizh, bizééʼ hazlį́į́ʼ nahalingo.

43 Áádóó baa hoolzhiizh bá ndaalʼaʼí nídabidiiłtį́ dóó bichʼooní yił yahádeistį́, dóó tsáskʼeh yikááʼ ndeistį́; dóó bizééʼ hazlį́į́ʼ nahalingo naaki jį́ dóó naaki tłʼééʼ tʼóó sitį́, dóó bichʼooní, dóó biyeʼké, dóó bitsiʼké bikʼih daachah, Laman dineʼé ádáʼáłʼínígíí bikʼehgo, bąąh ádaʼasdįįdígíí biniinaa ayóó átʼéego yínííł daazlį́į́ʼ.