1 Áádóó áko baa hoolzhiizh, Amalickiah kéyah bee bóhólnííh silį́į́ʼgo tʼáá áko Laman dineʼé Nephi bidineʼé deijoołá dadooleełgo yee yichʼįʼ yáłtʼįʼgo hahoolzhiizh; aooʼ, hastóí yikʼidiilniiʼ éí Laman dineʼé tséʼhadiitłʼindóó yichʼįʼ háádaadzih doo biniyé, Nephi dineʼé yikʼijįʼ—

2 Áádóó kótʼáó éí bijéí neiyiiłná Nephi dineʼé yikʼijįʼ, áko ándahwiiʼaahii dahwééʼaahgo náhástʼéí tsʼáádah kʼadę́ę́ áłtso náhááh, binahatʼá kónízahgo yikʼehoolaa, aooʼ, Laman dineʼé biʼaláahdi naatʼáanii ábiʼdiilyaa, áádóó kéyah tʼáá átʼé bee bóhólnííh doogo yikáʼátʼį́, aooʼ, dóó diné tʼáá ałtso kéyah yikááʼ kéédahatʼínígíí ałdóʼ, Nephi dineʼé dóó Laman dineʼé tʼáá ałtso.

3 Éí bąą binahatʼá yikʼeh hoolaa, háálá Laman dineʼé bijéí deistłʼis dóó bintsáhákees yidiiłkʼąąʼ, dóó yádahóółchįįd, áko tʼóó ahayóí Nephi dineʼé yikʼiidoojahgo ahíyíʼeezh.

4 Háálá tʼáá áyisíí biniʼ nilį́, bidineʼé tʼóó ahayóíʼígíí biniinaa, Nephi dineʼé yikʼeh dadidoodleeł dóó biʼdisnáh ádeidoolííł.

5 Áádóó kótʼáó Zoram dineʼé bindaabaahí binaatʼááh danilį́įgo áyiilaa, éí Nephi dineʼé biʼeʼadziil alááh bił béédahózin, áádóó ahínéikahígíí, dóó kintah doo hółdzilgi; éí bąą ndaabaahí binaatʼááh yikʼidiilniiʼ bándaabaahí yikʼídadéézį́į doo biniyé.

6 Áádóó baa hoolzhiizh binichǫʼí yił dahdiiná, áádóó doo kééhojitʼínígóó Zarahemla kéyahjigo dahdiiná.

7 Áádóó baa hoolzhiizh Amalickiah naʼadloʼ dóó oolchʼį́į́d yee adziil áʼdiilyaa, łahjígo éí, Moroni, Bóhólníihii biDiyin God dayoodláago biniʼ yee hashtʼeʼádaʼdiilyaa.

8 Aooʼ, Nephi dineʼé bindaabaahí bidziilgo áyiilaa, dóó ndaabaahii yiiʼ dabighan ádaałtsʼíísígíí nideiyiznil, doodaiiʼ ahínéíkahgi, dahdeiyíbááhgi łeezh yínídeeztsih, áádóó ałdóʼ tsé yee nídaʼaztłʼin, bikin dahnaazhjaaʼgóó dóó bikédaayah ndaneesʼą́ą́góó yindaʼaztłʼin; aooʼ, tʼáá átʼé kéyah binaagóó.

9 Áádóó doo hózhǫ́ bidziilgo yadaʼdiitłʼingóó akweʼí ląʼí ndaabaahí neiyizhʼeezh; áádóó kótʼáó Nephi dineʼé bikéyah hózhǫ́ dahółdzil dóó dabidziilgo áyiilaa.

10 Áádóó kótʼáó tʼáá bí ádeinízingo kéédahatʼį́, bikédaayah, bizáanii, dóó badaʼáłchíní, dóó haszééʼ, baaʼáhayą́ągo yichʼįʼ hashtʼeʼ ádaʼdilnééh, áádóó áko Bóhólníihii biDiyin God yinahjįʼ dahiináa doo, áádóó Christ bibee óʼoolʼįįł tʼáá náás yiitʼih doo éí beʼanaaʼí yee béédahósin.

11 Áádóó Moroni éí diné bitsxeʼ dóó hayóíʼígíí átʼį́: hastiin ayóó yáʼátʼéehgo ntsékees; aooʼ, éí doo naʼatseed bił nilį́į da; éí hastiin tʼáá bí ádeinízingo kéédahatʼínígíí dóó tʼáá bí ádántsédaakees éí ayóó biiʼ sizíinii yaa bił hozhǫ́, áádóó bikʼiské bidisnááhdééʼ dóó naaltʼeʼí danilíidę́ę́ʼ;

12 Aooʼ, hastiin biDiyin God yichʼįʼ ahééh nízingo ayóó bijéí biyiʼ hólǫ́, bidineʼé bee bá adahaztiʼígíí dóó bee bikʼihdahoojisdliʼígíí biniinaa; diné bidineʼé yéego yáʼáátʼįįd dóó yéego hasihgo yáhoołʼaʼ.

13 Aooʼ, áádóó diné Christ tʼáá íiyisíí yoodlą́ągo yikééʼ sizíinii nilį́, áádóó bidineʼé yichʼą́ą́h naabaah doogo yee ádeehadoodzííʼ, tʼáá bí íínízingo kééhatʼį́, dóó bikéyah, dóo beʼoodląʼ, azhą́ bidiʼyoolyééł ndi.

14 Áko Nephi dineʼé beʼanaaʼí bitsʼą́ą́jįʼ adíchʼą́ą́h ndaabaah doogo bee ndabidiʼneestʼą́ą́ʼ, azhą́ shį́į́ ndabidiʼdootsxił ndi; aooʼ, áádóó ałdóʼ doo yíníyidoołʼaałgóó bee ndabidiʼneestʼą́ą́ʼ, aooʼ, áádóó doo bééshʼhał yiłhadoodił da tʼáá hazhóʼó beʼanaaʼí yikʼijįʼ tʼéiyá, tʼáá hazhóʼó yee yisdádadookahgo tʼéiyá.

15 Áádóó díí bedaʼoodląʼ ńtʼę́ę́ʼ; díí yedaʼałʼį́įgo Diyin God bikʼihoozhdoodliił kéyah biyiʼ, éí doodago kótʼáo ááłdishní, daʼoodlą́ągo Diyin God bibee hazʼáanii yéego yikʼeh dahółʼį́įgo kéyahgi náásdookah, aooʼ, yisdádoohjah, doodago anaaʼ yichʼįʼ hashtʼeʼádadidoołnííł, bááhádzidii bikʼehgo;

16 Áádóó ałdóʼ, beʼiináʼí yitsʼą́ą́jįʼ adíchʼą́ą́h ndaabaahgo dahdidoonééłjígo Diyin God bił ííshją́ą́ʼ íídoolííł, ákodaʼiilaago, Diyin Bóhólníihii yisdábidooʼish; áádóó díí éí kótʼáó Moroni beʼoodląʼ, dóó díí éí bijéí bíł ayóó átʼé, naʼatseed éí doodah, ákondi yáʼátʼéehgo éʼelʼį́, ákótʼáo bidineʼé yisdeiyíʼeezh, aooʼ, Diyin God bibee hazʼáanii yikʼeh dahółʼį́įgo, aooʼ, dóó bąąhágiʼ átʼéii ádąąh deitʼį́įgo.

17 Aooʼ, tʼáá aaníí, tʼáá aaníigo Nihichʼįʼ haasdziih, tʼáá ałtso nihokááʼ dineʼé kódaatʼéé ńtʼę́ę́ʼgo; dóó ákodaatʼéego, Moroni átʼéhígiʼ átʼáo, áko shooh, chʼį́įdiitah bibeʼadziil tʼáá íídą́ą́ʼ hoolʼáágóó yóóʼályaa doo ńtʼę́ę́ʼ, aooʼ, nihokááʼ dineʼé baʼáłchíní bijéí éí biʼiiníziinii doo yikʼehdidlį́į da doo ńtʼę́ę́ʼ.

18 Áko shooh, Hastiin éí Ammongiʼ átʼée ńtʼééʼ, éí Mosiah biyeʼ, aooʼ, áádóó Mosiah biyeʼ łaʼígíí ałdóʼ, aooʼ, Alma ałdóʼ dóó dabiyeʼ, éí tʼáá átʼé Diyin God yikééʼ naazį́į ńtʼééʼ.

19 Áko shooh, Helaman dóó bikʼiské Moronigi átʼáo dineʼé yíká ándaajaah ńtʼę́ę́ʼ; éí Diyin God bizaad yeendaʼneeztʼą́ą́ʼ, áádóó tʼáá átʼé binaʼtin deidiiztsʼą́ą́ʼígíí ádaanídaʼooskango tó yeedeiyísį́į́ʼ.

20 Áádóó kótʼáó díígiʼ átʼáo ádaʼiilaa, áádóó bizaadígíí biniinaa diné hojoobaʼ daniizį́į́ʼ, éí biniinaa Diyin Bóhólníihii agháadi ádaatʼáo baa nitsékees, áko tʼáá bí doo ałkʼinéijah da dóó doo saad ałkʼídeitʼááh da, aooʼ, dį́į́ʼ nááhaijįʼ ákótʼáo ahoolzhiizh.

21 Ákondi, bee hanásdzih yéegiʼ átʼáo, náhástʼéítsʼáadah náhááhgo, aooʼ, kʼé daʼahóʼníí ndi, tʼáadoo ádeinízin da ndi bikʼéí yichʼįʼ dah dadiikʼąąʼ, éí Laman dineʼé.

22 Aooʼ, ákogo, Laman dineʼé yił daʼahóbááhgo doo niʼkódaanéégóó tʼóó ahayóí nááhai, ázhą́ tʼáá íyiisíí doo ádeinízin da ndi.

23 Áko, Laman dineʼé yichʼiʼ yeendaabáhí yił háádadiłígíí yikʼédí danilį́ háálá naʼatseed doo bił danilį́į da, aooʼ, díí doo tʼáá átʼé átʼée da—yikʼédí danilį́ bí biniinaa bikʼéi laʼí beʼiinaʼ dahndadiitʼiʼ hoolʼáágóó iiná bił hazʼą́ą́góó, háálá biDiyin God yaanáhidookahgo tʼáadoo yichʼiʼ hashtʼeʼ ádadiilyaa da.

24 Ákotʼée ndi, ndabiʼdidootsiłgo doo yaa ádadidootʼaah da, dabizáanii dóó baʼáłchíní tʼóó báhádzidgo bikʼéí doo daatsʼídę́ę́ ndabiʼdoołtsiłgo, aooʼ, sodizin yitsʼáhaaskai, yitsʼą́ dahaazná dóó Laman dineʼé yił ahiikai ndabidoołtsxił biniyé.

25 Aooʼ, Nephi dineʼé bidił dadeeznaʼgo bikʼiské yę́ę yaa bił dahózhóo da doo, łaʼ tʼáá Diyin God bibee nahazʼáaʼnii yikʼeh dahółʼį́įgo, Diyin Bóhólníihii yee nahoníʼánée, éí bibee nahazʼáanii yikʼeh dahółʼį́įgo kéyah yiyiʼ daʼatʼį́į doo.