1 Áko Ammon dóó bikʼiské Laman dineʼé bikéyah nineelʼą́ądi ałtsʼą́ą́ʼjigo dah diikai, áko Aaron éí Laman dineʼé kéyah Jerusalem, hoolyeejigo dah diiyá, éí kéyah dabizází ndabiʼdiizchínéedi óólyé; dóó éí éii tʼáá nízaadi Mormon nineelʼą́ądi bidiiʼá.

2 Áko Laman dineʼé dóó Amaleki dineʼé dóó Amulon bidineʼé kintah ayóó átʼéego ádeiyiilaa, éí Jerusalem woosyeʼ.

3 Áko Laman dineʼé tʼáá bí doo ndabíʼdídzil da, ákondi Amaleki dineʼé dóó Amulon dineʼé éí alááhgo doo ndabíʼdídzil da; éí bąą Laman dineʼé bijéí deidoołtłʼis danízin, áko tsʼídá yéego bąąhági ádaatʼį́ dóó íiyisíí daalchʼį́dígíí ádeiłʼį́ dadooleeł.

4 Áádóó baa hoolzhiizh Aaron Jerusalem kintahdi níyá, dóó Amaleki dineʼé áłtsé neidíníítą́ą́ʼ. Áádóó bidaʼoodlání áłah nídaadleehdi néídíníítą́ą́ʼ, háálá oodlání áłah nídaadleeh éí Nehor danilínígíí bihoogááłjí yéédaʼiidlaa; háálá ląʼí Amaleki dineʼé dóó Amulon dineʼé éí Nehor danilínígíí bihoogááł yikééʼ niikai.

5 Éí bąą, Aaron łaʼ daʼoodlání áłah nídaadleeh góneʼ yah ííyá dóó diné neidíníítą́ą́ʼ, dóó yichʼįʼ yáłtiʼgo, áko shooh Amaleki dineʼé łaʼ saad hóółǫ́ǫgo bichʼįʼ yiizįʼ, kóníigo: Haʼátʼíísh tʼáá aaníinii átʼé diníigo bee háíndzííʼ? Diyin yá naalʼaʼí łaʼísh yíníłtsʼą́ą́ʼ? Haʼátʼíísh biniinaa Diyin yá nidaalʼaʼí dóó nihichʼįʼ ííshją́ą́ aʼdilneeh da? Shooh, daʼ díí dinéʼísh doo nidineʼígíí átʼáo yáʼádaatʼéehgo yiikah da?

6 Áádóó ałdóʼ ádiní, ádaa ńdaʼsiikango tʼéiyá doo dínííʼnééł da. Haash yitʼáó nihintsékees dóó nihijéí biyiʼdi ádaatʼéhígíí nił bééhózin? Baa ádaa ńdaʼdiikąąłígíí haash yitʼáó tʼáá íídą́ą́ʼ nił bééhózin? Haash yitʼáó diné doo yáʼádaatʼéehii daniidlínígíí nił bééhózin? Áko shooh, kin biiʼ dahodílzingo ádeilyaa, dóó áłah nídeidleehgo Diyin God bichʼįʼ ndahwiidlá. Diyin God tʼáá átʼé nihokááʼ dineʼé yisdéidooniłgo deiniidlą́.

7 Áko Aaron ábíłní: Diyin God biYeʼ nihokááʼ dineʼé bibąąhági ádaatʼéii yá nináʼdoodléełgooísh yinídlą́?

8 Áádóó hastiin ábíłní: Ákotʼéhígíí doo níł bééhózin da daniidzin. Díí tʼáá ádzaagóó ádaʼołʼínígíí doo deiniidlą́ą da. Náásgóó ádahodooníłígíí doo níł bééhózin da daniidzin, nihizází dóó nihí nihizází yee hadahaasdzííʼ yę́ę doo deiniidlą́ą da, náásgóó bikʼi hodoolzhishígíí.

9 Áko Diyin bizaad bee akʼedaʼashchínígíí Christ doogáałgo yaahalneʼígíí Aaron yichʼįʼ ííshjání áyiilaa, dóó anoonééłdę́ę́ʼ náádahiidooʼnaałígíí ałdó, dóó nihokááʼ dineʼé doo bá nináʼdoolyééł da tʼáá hazhóʼó Christ nihánáádiilyá dóó tiʼhoozniiʼgo tʼéiyá, dóó bidił yee bąąhági átʼéii yikʼé nináʼdoodlééł.

10 Áádóó baa hoolzhiizh díí hazhóʼó yaa ahoʼniilneʼ ńtʼééʼ tʼóó bichʼįʼ ádadahoolchįįd, dóó tʼóó bándahałtiʼ; dóó saad yee hahaasdzííʼyę́ę doo deiyiistsʼą́ą́ʼ da.

11 Éí bąą, saad yee hahaasdzííʼyę́ę doo deiyiistsʼą́ą́ʼgóó bił bééhoozingo, áłah ńdaadleehgi yitsʼą́ąjįʼ dah diiyá, áádóó Ani-Anti kin dahshijaaʼgi níyá, dóó ákweʼé Muloki Diyin bizaad yee neinitingo yikʼíníyá; dóó Ammah dóó bikʼis ałdóʼ. Áádóó ląʼí saad yee haadzííʼ yę́ę doo bił yáʼádaatʼééh da.

12 Áádóó baa hoolzhiizh diné bijéí deistłʼisgo yaa ákodaniizį́į́ʼ, áko yitsʼą́ą́dóó dah diikai dóó Middoni kéyahdi yíkai. Áádóó tʼóó ahayóí Diyin bizaad yee ndeineeztą́ą́ʼ, dóó saad yeendaʼnitinígíí diné tʼáá díkwíhí daʼoosdląąd.

13 Ákotée ndi, Aaron dóó bikʼiské dikwííshį́į́ yiltʼéego dabiʼdisdził dóó awáalyah góneʼ abiʼdistłʼííd, dóó łaʼígíí éiyá Middonidi dóó bináágóó nahazʼą́ą́góó adahineezhchą́ą́ʼ.

14 Áádóó awáalyah góneʼ abiʼdiistłʼííd yę́ę ląʼí ałʼąą átʼéego tiʼdahoozniiʼ, áádóó Lamoni dóó Ammon chʼíbííʼeezh, dóó yadaʼastsood dóó ééʼ yee háádeidiidlaa.

15 Áádóó Diyin bizaad yaa dahalneʼgo dahnáádiikai, áádóó áko díí éí átséedi awáalyahdę́ę́ʼ chʼíbiʼdoonil; áádóó áko díigi átʼáo tiʼdahoozniiʼ.

16 Áádóó tʼáá nidaakaigo Diyin Bóhólníihii biʼIiʼ Sizį́ Diyinii bił hólǫ́, Amaleki dineʼé tʼáá ałtso áłah ńdaadleehgóó Diyin God bizaad yee ndaʼnitin, éí doodago Laman dineʼé tʼáá ałtso áłah ńdaadleeh bá lą́ ndaʼiilééhdi yah ahikááh.

17 Áádóó baa hoolzhiizh Bóhólníihii bikʼijidlí silį́į́ʼ, hónáásiiʼ ląʼí tʼáá aaníinii yaa ákodaaniizįįʼ, aooʼ, ląʼí bąąhági ádaatʼínígíí, dóó bizází beʼóʼoolʼįįł, doo ákodaatʼée da, yaa ákodanízingo yił ííshją́ą́ ádeiyiilaa.

18 Áádóó baa hoolzhiizh Ammon dóó Lamoni éí Middoni kéyahdę́ę́ʼ dóó Ishmael kéyahjįʼ nátʼáázh, éí kéyah baa deetʼáanii átʼé.

19 Áádóó aláahdi naatʼáanii éí Lamoni Ammon doo yá naalʼaʼí, éí doodago bá naalnishí nilį́į da dooleeł nízin.

20 Ákondi díí biiʼ áłah ńdaʼadleehí Ishmael kéyahdi ádoolniiłgo yinahazʼą́; dóó bidineʼé, éí doodago dine yikʼinahaʼahígíí, áłah dooleełgo yinahazʼą́.

21 Áádóó yaa bił hózhǫ́, dóó ląʼígóó neineeztą́ą́ʼ. Áádóó nihinaatʼáanii nishłį́ yidííniid, áko diné tʼáá bí ádeinízinígi átʼáo kéédahatʼínígíí danohłį́, bizhéʼé, aláahdi naatʼáanii, doo tʼáá naʼníleʼdii atínihiłʼį́į da, hááłá bizhéʼé Ishmaeldi diné kéédahatʼínígíí bikʼi díníʼį́į́ʼ yiłníigo yeidiníʼą́, dóó tʼáá ałtso kéyah binaago naaznilígíí bikáaʼgi.

22 Áádóó ałdóʼ yee yił hoolneʼ tʼáá bí ádeinízinígi átʼáo Bóhólníihii Diyin God deidísin doo, tʼáá bił nidahazʼą́ą́góó, éí kéyah aláahdi naatʼáanii Lamoni yikʼi hooʼááłdi.

23 Áádóó Ammon aláahdi natʼáanii Lamoni bidineʼé neineeztą́ą́ʼ; áádóó baa hoolzhiizh, tʼáá ałtso Diyinkʼehgo oodááł bídadéétʼiʼígíí yee neineeztą́ą́ʼ. Áádóó tʼáá ákwíí jį́ yaa neiyookąąh, tʼáá awołí bee, áádóó bizaad deidiiztsʼą́ą́ʼ dóó yikʼehdahóółʼįįd, dóó tʼáá íiyisíí yídaneedlį́įgo Diyin God bibee hazʼáanii yikʼeh dahółʼį́.