1 Áádóó baa hoolzhiizh Laman dineʼé daasnánígíí haʼasidí yá nideiznil, dóó daneeznánígíí yóóʼadeidoołʼį́įłgo yichʼįʼ deiyííłʼaad, aooʼ, dóó Nephi dineʼé nidaaztseedyę́ę ałdóʼ; áádóó Moroni bá hadaʼasidí éí nidaalnishígíí yikʼi dadéezʼį́įʼgo áyiilaa.

2 Áádóó Moroni Mulek kin haalʼáágóó Lehi yił níʼáázh, éí kin haalʼá yee ádíhoosni áádóó Lehi yeidiníʼą́. Kʼad shooh, díí hastiin Lehi éí Moroni ląʼí daʼanaaʼgóó yił tádííbaaʼ, dóó éí hastiin Moronigi átʼé, dóó doo atídzaaʼígíí ałháh yaa ahééh nízin; aooʼ, ayóó áhoʼní, tʼáá áłah Nephi bidineʼé ayóó ádabóʼní.

3 Áádóó baa hoolzhiizh Laman dineʼé daneeznánée ałtso yóóʼ ádeiyiilaa dóó Nephi dineʼé ádaadinígíí ałdóʼ, áádóó kéyah Bountifulgóó anábidiʼnoolkaad; dóó Teancum, Moroni ánínígíí bikʼehgo, kéyah yindaʼageedgo yidadeeshnish, éí doodago Bountiful, kin haalʼáagi.

4 Áádóó ndaʼazgeed biyiʼjígo tsin yílkaalgo áyiilaa; áádóó łeezh hadayizgeedígíí tsin yílkaal yinahʼjįʼ ndeiyizgeed; dóó kótʼáo Laman bidineʼé yídeiniłchééhgo ndaashnish Bountiful kin haalʼá tsin yílkaal dóó łeezh binázʼáago yee bidziilgo ádeiyiilaa, tʼáá íiyisíí bąąh nízaadgo.

5 Áádóó díí kin haalʼá tʼáá íiyisíí bidziilgo tʼáá nízaadgo bił ahodoolzhish, dóó díí kin haalʼá biyiʼ Laman dineʼé daasnááhígíí hadaalzíídgo ályaa; aooʼ, azhą́ díí kin binaʼazʼá éí tʼáá bí bílaʼ yee ádeiyiilaa yę́ę góneʼ. Moroni éí Laman dineʼé ndadoolnishgo yee hoołʼaʼ, háálá doo nanitłʼahgóó bikʼi ádéestʼį́į́ʼ nidaalnishgo, dóó tʼáá átʼé bá ndaabaahí Laman dineʼé tʼáá hoolzhishii yikʼiidoojahgo hashtʼeʼádadoolzin.

6 Áádóó baa hoolzhiizh Moroni łaʼLaman dineʼé bindaabaahí ayóó ádaatʼéii yikʼeh dadeesdlį́į́ʼ, áádóó Mulek kinhaalʼá yee ádídahoosʼni, éí Laman dineʼé łahgo ayóó bidziilgo bił hazʼą́ą́ ńtʼę́ę́ʼ Nephi bikéyahdi; dóó ayóó bidziilgo áyiilaa áko dabiʼdisnánígíí biiʼ baa áháayą́ą doo.

7 Áádóó baa hoolzhiizh éí yihahígíí biyiʼ Laman dineʼé tʼáadoo yichʼįʼ náádadeezbaaʼ da, ákondi bidineʼé anaaʼ yíká hashtʼeʼádadilnééh yindaalnishgo áyósin, aooʼ, Laman dineʼé bichʼą́ą́h bidziilgo naʼazʼáago hashtʼedeiyiilaa, dóó ałdóʼ bizáanii dóó badaʼáłchíní dichin dóó tihooʼnííh yitsʼą́ą́dóó yisdáyíʼeezh, dóó bá ndaabaahí chʼiyáán yaadeiyiijááh.

8 Áádóó áko baa hoolzhiizh Laman dineʼé bindaabaahí, tónteel eʼeʼaahjí, shádiʼááhjí, Moroni doo yiniihgóó łaʼ Nephi dineʼé ałkʼijįʼ dahodeezʼą́, éí biniinaa ałtsʼáhaaskai, áko łahgóó Nephi dineʼé yikʼeh dadeesdlį́į́ʼ, aooʼ, hónáásiiʼ bikin hadaasʼá łahdóó yee ádídahoosnííʼ éí kéyah hazʼą́ągi.

9 Áádóó baa hoolzhiizh bąąhági ádaatʼínígíí biniinaa, aooʼ, ałtsʼą́ą́jí daazlį́į́ʼ dóó naalchidʼí bitah dahazlį́ʼígíí biniinaa tʼáá íiyisíí báhádzidgo bił hooʼaʼ.

10 Áádóó kʼad áko shooh, Ammon bidineʼé łahgo baa hadeesdzih, éí, áłtséedą́ą́ʼ, Laman dineʼé danilį́į́ ńtʼę́ę́ʼ; ákondi Ammon dóó bikʼiské biniinaa, éí doodago Diyin God beʼadziil dóó bizaad binahjįʼ, Diyin Bóhólníihii yikééʼ niikai; áádóó Zarahemla bikéyahjįʼ biʼdeetʼeezh, áádóó Nephi dineʼé baa ádahalyą́ą ńtʼę́ę́ʼ.

11 Áádóó doo bee ndaʼdoobaahí bikʼiské yikʼijįʼ chodeiyoołʼíigo yee ádeehadaasdzíʼígíí biniinaa; háálá tsʼídá doo nináádaʼdoołtsxiłgóó yee ádee hadaasdzííʼ; dóó yee ádee hadaasdzíʼígíí doo yedaʼiilaagóó ndabididooltsxił; aooʼ, áko bikʼis bikʼeh dadeesdlííʼgo yizaakai doo ńtʼę́ę́ʼ, Ammon dóó bikʼéí doo baa ááh danízingo dóó doo ayóó ádabooʼníígo.

12 Áádóó díí biniinaa Zarahemla bikéyahgóyaa abiʼdootʼeezh; dóó Nephi dineʼé baa ádahalyą́ągo hodeeshzhiizh.

13 Ákondi baa hoolzhiizh tʼóó bááhadzidgo bił hazʼą́ągo yaa ákódaniizį́į́ʼ, Nephi dineʼé ląʼígóó achʼįʼ nahwiiʼná dóó tiʼhooʼnííh yá yiiʼ naaskai, aa ááh dabidiisnááʼgo bee ndaʼabaahí yił hadadoodiłgo tsídadeezkééz bikéyah yichʼą́ą́h ndadoobah biniyé.

14 Ákondi shooh, yee ndadoobahí ndeidiijááhgo, Helaman dóó bikʼiské ndabookąąhgo yighadahodeestʼą́, yee ádee hadaasdzííʼ ádayiilaayę́ę kʼasdą́ą́ʼ tʼáadoo yedaʼiilaa da.

15 Áádóó Helaman yá yikʼee bił hóóyééʼ doo yikʼeh dahóółʼįįdgo biiʼ sizíinii bitsʼą́ą́ʼ dadoochxǫǫł; éí bąą tʼáá átʼé díí diyin yił ahadaʼdeestʼánígíí éí tʼáá íiyisíí bikʼiské yikʼee baa ndahóókaadgo deiyiiłtsą́, díí kʼad tʼóó hóyéeʼgo bił hooʼaʼ.

16 Ákondi shooh, baa hoolzhiizh ląʼí biyeʼké, éí bee ndaʼabaahí doo ndeididoojihgo Diyin God yił ahadaʼdeestʼą́ą da áko éí anaaʼí doo bee ndaabaahí yikʼijįʼ yił hadadoodił da; áko kʼad ahíhiikai, yídeiyíighahígíí yee ndaabaahí choideidoołʼįįł, áádóó Nephi dineʼé deiniilyé dadííniid.

17 Áádóó ahadaʼdeestʼą́ yee hadahaasdzííʼ Nephi dineʼé tʼáá bí ádeinízingo iiná yá ndadoobahgo, aooʼ, kéyah tʼáá yichʼą́ą́h ndabaahgo beʼiinaʼ nidahodootʼih, aooʼ, yee ahadaʼdeestʼą́ tʼáá hójinízingo iiná doo yaa dáádidookah da, ákondi tʼáá ałtsojįʼ yichʼą́ą́h ndadoobah áko bí dóó Nephi dineʼé doo yisnááh dadooleeł da.

18 Kʼad shooh, naakidi dimííl yázhí tsíłkéí, díí yee ahadaʼdeestʼą́ dóó yee ndadoobahígíí dah deidiijaaʼ bikéyah yichʼą́ą́h ndadoobahgo.

19 Áádóó kʼad shooh, Nephi dineʼé doo tʼóó ndeiníłtłʼah da ńtʼę́ę́ʼ, kʼad hoolzhishdi ayóó bidziilgo áká ańdaajah daazlį́į́ʼ, háálá yee ndaʼdoobahí dah deidiijaaʼ, dóó Helaman nihinaatʼáanii dooleeł dadííniid.

20 Áádóó tʼáá átʼé diné ániid nidaakaiígíí danilį́, tʼáá íiyisíí doo ndahinilyées da, dóó ałdóʼ ayóó da bitsxeʼ dóó dabiinéí; ákondi shooh, doo díí tʼéiyá da—tʼáá áłahjįʼ doo dabiyoochʼíid da tʼáá ałtsoní bee badaʼahódlí.

21 Aooʼ, díí diné tʼáá aaníinii yee naazį́ dóó ayóó ntsídaakeesgo dahóyą́, háálá Diyin God bibee hazʼáanii yikʼeh dahółʼį́į doogo bee ndabidiʼneestą́ą́ʼ dóó yáʼátʼéehgo yikééʼ deíkááh.

22 Áádóó áko baa hoolzhiizh Helaman naaki dimííl yázhí tsíłkéí nidaabaahii yinaatʼáanii nilį́įgo yíníʼeezh, diné bíká ańdaajah kéyah bił nahazʼą́ą́dę́ę́ʼ shádiʼááh dóó eʼeʼaah tónteel nineelʼą́ą́dę́ę́ʼ.

23 Áádóó ándahwiiʼaahii Nephi bidineʼé yikʼi dahwéeʼaahgo naadiin tseebíí nááhaigo ahoolzhiizh.