1 Áádóó nááná, shikʼéí, Bóhólníihii Diyin God baʼáłchíní bibee hazʼáanii yeiníláháádą́ą́ éí baa ntsídaahkees; dóó beedaałniih Bóhólníihii Diyin God ląʼída priest yiyiisį́į́ʼ, diyingo óʼoolʼįįł bikʼehgo, éí biYeʼ bikʼehgo, háálá éí díí diné yee ndeidinóotįįł.

2 Áádóó éí priest danilínígíí éí biYeʼ bibee óʼoolʼįįł bikʼehgo bee dabiʼdiilzį́į́ʼ, diné éí Diyin biYeʼ nináʼnídlá yee yichʼįʼ dadéezʼį́įʼgo bił béédahózin dooleeł biniyé.

3 Áádóó díí bikʼehgo éí dabiʼdoolzį́į́ʼ—Diyin God tʼáá íídą́ą́ʼ bił bééhózingo nahasdzáán hadilyaadą́ą́ʼ bikʼihdaʼhoodiiniiʼ dóó bee ndahodiistʼą́, bidaʼoodląʼ yee dabidziil dóó nizhónígo Diyin yá ndaalnish, aláahji éí yáʼátʼéehii doodago bąąhágiʼ átʼéii ńdeididoolééł; éí bąą yáʼátʼéehii ńdeidiilá, dóó bidaʼoodląʼ yee dabidziilgo yee ádaatʼįįd, dóó diyingo bikʼihdahodiiniiʼ, aooʼ, éí diyingo hashtʼedabiʼdiilyáago bikʼihdahodiinii, dóó éí bikʼehgo, éí bá nináʼdoolyeełgo tʼáá biláajįʼbá hashtʼeilyaa.

4 Áádóó áko bidaʼoodląʼígíí bikʼehgo diyingo bikʼihdahoodiiniiʼ, łaʼ éí Diyin God biʼIiʼ Sizį́ Diyinii doo deinizin da háálá bijéí deistłʼis dóó doo yikʼi daʼdiitʼįįh da, áko, díí doo kótʼéégóó éí bikʼiské nahalingo ayóó átʼáo bá bohonéédzą́ą doo ńtʼę́ę́ʼ.

5 Doodago áłtsogo, nigháídę́ę́ʼ bikʼéí tʼáá yił ahéłtʼéego bił hazʼą́ą ńtʼę́ę́ʼ; áko díí diyingo akʼih dahoodiiniiʼ tʼah doo nahasdzáán hadilnééhyę́ędą́ą́ʼ hashtʼedaalyaa háálá íídą́ą́ʼ doo bijéí deistłʼis da, aYeʼ Tʼáá Éí Tʼéiyá Yizhchíinii bąąhági átʼéii yikʼé nináʼídláhígíí bił danilį́į́ ńtʼę́ę́ʼ, éí bee hadilyaa—

6 Áádóó díí diyingo akʼidahodiiniih bee bikʼihodiiniiʼgo, dóó hódahgo Diyin God bibeʼadziilii diyingo bee bikʼihodiiniiʼ, bibee hazʼáanii nihokááʼ dineʼé baʼáłchíní yee neidínóótʼį́į́łgo, áko da Diyin bibee ił hózhǫ́ǫdi yił yahanídookah—

7 Díí hódahgo Diyin God bibeʼadziilii biYeʼ bikʼehgo óʼoolʼįįł, éí óʼoolʼįįł nahasdzáán hadilnééhyę́ędą́ą́ʼ hashtʼeilyaa; éí doodago kótʼáo ááłdishní, niyiiłkaah doodago nináʼáhaah adindą́ą́ʼ, ahoolʼáádę́ę́ʼ dóó ahoolʼáágóó hashtʼeelyaadééʼ, alą́ąjįʼ tʼáá ałtsojįʼ ééhózin bikʼehgo—

8 Áko kótʼéego bikʼihdahodiiniiʼ—diyingo akʼidahodiinííh bee bikʼihdahodiiniiʼ; dóó diyingo ádaʼoolʼįįł bee dabiʼdiilzį́į́ʼ, dóó hódahgo Diyin God bibeʼadziilii bee diyingo óʼoolʼįįł ńdeidiilá, éí bee bikʼihdahodiiniiʼígíí, dóó diyinkʼehgo óʼoolʼįįł, dóó hódahgo Diyin God bibeʼadziilii, éí doo bił hahoolzhiizh da doodago doo ninítʼiʼ da—

9 Áko ahoolʼáágóó high priest daazlį́į́ʼ, éí aYeʼ bikʼehgo óʼoolʼįįł, éí nihiTaaʼ Tʼáá Éí Tʼéiyá Bá Yizhchíinii nilį́, éí éí niyiiłkaah doodago nináʼáhaah bąąh ádindnii nilį́, éí tʼáá íiyisíí bibee ajoobaʼ, tʼáá ahiniiltʼéégóó niháhasʼą́, dóó tʼáá aníinii biiʼ hólǫ́. Áádóó díí éí ákótʼée doo. Amen.

10 Áko, diyingo óʼoolʼįįł baa haasdzíhígíí, doodago hódahgo Diyin God bibeʼadziilii, tʼóóʼahayóí beedaʼbiʼdiszį́į́ʼ dóó Diyin God bihigh priest daazlį́į́ʼ; dóó tʼáá íiyisíí bedaʼoodląʼ binahjįʼ dóó ádaańdaʼooskango, dóó Diyin God yichʼįʼ yáʼátʼéehii danilį́, ádaańaʼookąąh yíká ádaatʼį́ dóó yáʼátʼéehii yindaalnish áko doo tíʼdahwiidoonih da.

11 Ákogo diyingo bee óʼoolʼįįł ałkééʼ sinil bee bikʼidahodiiniiʼ, dóó hadaałtʼéego ádaalyaa, dóó dabiʼééʼ Bóhólníihii Dibé Yázhí bidił binikááʼ góneʼ daasgisgo bitsáʼdaʼdinílííd daazlį́į́ʼ.

12 Áko, Iiʼ Sizį́ Diyinii hadaałtʼéego ádabiilaago, biʼééʼ łigaigo ádaalyaa, Diyin God bidáádóó daniłtólí dóó doo bąąh dachin da, bąąhági átʼéii tsʼídá tʼóó bíł badaaʼihgo deiniłį́. dóó tʼóó áhayóí, tsʼídá ląʼída, niłtólí ádaalyaa dóó biBóhólníihii Diyin God bee íłhózhǫ́ yiihikai.

13 Áádóó áko, shikʼéii, Diyin God bidaahdóó hojoobaʼ danohsį́į́h, dóó ndaʼíiyoosihígíí tsin bineestʼą́ nahalingo ádaańdaʼoohkąąh, áko Diyin bee ił hózhóonii nihidóʼ biih hidoohkááh.

14 Aooʼ, hojoobaʼ danóhsį́į́h Melchizedek bidineʼé ádaatʼé yę́ęʼgiʼ átʼáo, éí ałdóʼ high priest Diyin bee óʼoolʼįįł ałkééʼ sinil bee bikʼidahodiiniiʼ éí baa haasdzííʼ, éí ałdóʼ hoolʼáágóó hódahgo Diyin God bibeʼadziilii bee daasdzį́į́h.

15 Áádóó Abraham éí Melchizedek tʼáá éii Diyin bibéeso yichʼįʼ neiyiiléí ńtʼę́ę́ʼ; aooʼ; nihizheʼé Abraham ndi tʼáá ałtso binaadeełii tʼááłáʼí dootłizh bighahgo neiyiilei ńtʼę́ę́ʼ.

16 Áko díí diyin bee ádaʼoolʼį́įł kótʼao baa dahaasyá, éí yee diné Diyin God biYeʼ nideiyoolį́į doo, tʼáá bí díígiʼ átʼáo ałkééʼyisnil, doodago ałkééʼ óʼoolʼįįł, dóó díí éí bibąąhági átʼéii baanéídidooʼááłgo nideiyoolí, áko Bóhólníihii bee ił hózhóonii biihdiikah danízin.

17 Áko díí Melchizedek éí Salem kéyahdi aláahdi naatʼáanii nilį́įgo; dóó bidineʼ éí tʼáá íiyisíí bąąhági ádaatʼéii dóó doo yaa ádaashoonii yiih yikai; aooʼ, tʼáá ałtso doo yáʼátʼééhjí dahdiikai; bááhígiʼ átʼéii tʼóó ahayóí ałʼąą átʼéego biiʼ dahólǫ́.

18 Ákondi Melchizedek oodląʼ yéego yee naashnish, dóó hódahgo Diyin God bibeʼadziilii beiyílyá Diyin God bihódiyingo ałkééʼ óʼoolʼįįł bikʼehgo, bidineʼé ádaanáʼoohkąąh yee neineeztʼą́ą́ʼ. Áádóó áko shooh, ádaańdaʼooskan; dóó Melchizedek bikéyahgi hodeezyéél áhósingo beiníłką́; éí bąą hózhǫ́ǫgo yinantʼaʼí wolyéé ńtʼę́ę́ʼ, háálá Salem biʼaláahdi naatʼáanii nilį́į́ ńtʼę́ę́ʼ; áádóó bizhéʼé yił nahaʼáá ńtʼę́ę́ʼ.

19 Áko, ląʼída bilą́ąjįʼ aheeskai, dóó ałdóʼ ląʼída bikéé adahaaskai, ákondi doo éí łaʼ biláah átʼée da ńtʼę́ę́ʼ; éí bąą, bí éí ayóó baa yáʼátʼiʼ ńtʼę́ę́ʼ.

20 Áko kʼad díí éí doo baa yá náádeeshtih da; bee haasdzííʼígíí tʼáá bíighah nisin. Áko shooh, Diyin bizaad bee akʼedaʼashchínígíí nihá sinil, tʼáá nihí ndaahgizgo éí bee ádíʼdahodidoołtih.

21 Áádóó áko baa hoolzhiizh Alma díí saad yee yichʼįʼ haadzííʼgo, yichʼįʼ dahdiilniiʼ dóó bizhiʼ ayóó íítsʼaʼgo hadoolgháázh, kóníigo: Ádaanáʼookąąh kʼad baa hoolzhiizh, háálá yisdáʼiildééh kʼadą́ą baa hoolzhíísh;

22 Aooʼ, Diyin Bóhólníihii bizhí bee, Diyin yá ndaalʼaʼí bizééʼdééʼ bee, tʼáá ałtso diné dah deiyíkááhgóó yił halneʼ; aooʼ, bił haneʼgo; tsʼídá aláahdi ił hózhónii haneʼ chódeidoołtʼeeł, aooʼ, díí ił hózhǫ́nii haneʼ diné tʼáá ałtso bitahgóó bił áhozdooltsʼį́į́ł, aooʼ, tʼáá ałtso nihokááʼgóó daʼníłtsʼą́ąjigo ałtsʼádabidiʼneeskaadígíí bichʼįʼ ndi; ákohgo nihídoʼ dasidiitsʼą́ą́ʼ.

23 Áádóó díí tʼáá beehózinígo nihił ííshjáá adaalyaa, bikʼih daʼdidiitʼį́į́ł biniyé, áko doo daʼdiilzih da; dóó díí biniinaa kéyah doo bééhózingiʼ naaldeehígíí dasiidlį́įgo; éí bąą, tʼáá íiyisíí nihikʼihdahojisdlį́į́ʼ, háálá díí ił hózhónii haneʼ bee nihił dahóoneʼ tʼáá ałtso nihidaʼakeh bikááʼgóó.

24 Háálá áko shooh, kʼad Diyin yá ndaalʼaʼí ląʼí yił dahoolneʼ nihikéydaayahgóó; dóó díí éí nihokááʼ dineʼé baʼáłchíní bijéí biyiʼdę́ę hashtʼéʼádadidoolnííłgo binaʼnitin ńdeididoolééł ayóó átʼáo nádaahdí.

25 Áádóó kʼad Diyin yá ndaalʼaʼí bizééʼdééʼ bee haneʼ baa hózhóonii yee nihił dahodoolnihgo tʼáá éí tʼéí bikádaʼíísiniiltsʼą́ą́ʼ, doogááłígíí, bichʼįʼ hoolzhish, hahgo shį́į́ éí doo nihił bééhózin da. Diyin God bichʼįʼdíí shí yoołkaał biyiʼ dooleeł nisin, ndi tʼáá tsxiłígo éí doodago tʼah náásdi, beiníłką́ągo shił hózhǫ́ǫ doo.

26 Áádóó hastóí yáʼátʼéehgo deikáhígíí dóó dahodísinígíí bił ííshjání ádadoolnííł, Diyin yá ndaalʼaʼí bizééʼdééʼ bee, niyá baa hoolzhiizhdi, áko nihizází bizaad bidahodoolnííł, yaa ndahazneʼę́ę bikʼehgo, éí diyingo áhodooníłígíí biiʼ dahólónée bikʼehgo.

27 Áádóó áko, shikéí, shijéí tsʼídá bitłʼáahdę́ę́ʼ laanaa nisin, aooʼ, tʼáá íiyisíí ádiłniisdzííłgo shitah hodíłniih, shizaad dadidoohtsʼį́į́ł nisin, dóó nihibąąhági ádaatʼéii yooʼadahidoohʼaah, dóó ádaanáʼiiníkąąhgo tʼáadoo tʼó náás bił hoolzhishí.

28 Ákondi Bóhólníihii bichʼįʼ hojoobaʼ adaʼdoołnééh, dóó bizhiʼ diyinígíí bee sodadołzin, tʼáá áłaahjįʼ hadaʼoohsííd dóó sodadołzin, áko nihikʼi naazláhígíí doo bilááhgóó nanihinitaah da dooleeł, dóó áko Iiʼ Sizį́ Diyinii bikéé deiyinóhkááh doo, hojoobaʼ adaʼdoołnééh, nihaʼátʼé adingo adaʼdoołnééh, akʼeh dahonołʼį́, haʼdaʼíínółní, ayóó óʼóʼní nihiiʼ dahołé dóó nízaadgóó hadaʼíínółní;

29 Bóhólníihii deinohdlą́; hoolʼáágóó dahiinóhnáa dooleełgo biká hadaʼíínółní; Diyin God bibee áyóóʼóʼóní nihijéí biyiʼ dahólǫ́ǫgo; áko nihoníyáadi yisdádoohkah dóó Diyin bibee ił hózhóonii biih dahídoohkah.

30 Áádóó Diyin Bóhólníihii ádaanáʼookąąh yee ná hwiidoołʼaał, áko doo biʼáháchʼįʼ nihikʼih siláa da doo, áko doo chʼį́įdiitah bibéésh daʼahólzhʼaʼí danihótʼąʼ da dooleeł, áko doo anoonééł naakiʼ góneʼígíí bee tidahwiidoohnih da.

31 Áádóó Alma ląʼígo saad diné yee yichʼįʼ hanáánáádzííʼ, éí doo díí béésh tʼąhí biyiʼ ndaháásdzoh da.