1 Áádóó baa hoolzhiizh ałtso diné yichʼįʼ haadzííʼgo ląʼí bizaad deiyoosdląąd, dóó ádaańdaʼookąąh, dóó Diyin bizaad bee akʼedaʼashchínígíí nideiłkaah daazlį́į́ʼ.

2 Ákondi ląʼída éí Alma dóó Amulek ndadiiltsxił danízin ńtʼę́ę́ʼ; háálá Alma deiyoołchʼį́į́d, Zeezrom saad tʼáá bééhózinígó yee yichʼįʼ haadzííʼ yę́ę biniinaa; áádóó Amulek nihínaʼazloʼ ałdóʼ dadííniid, dóó bibee hazʼáanii yikʼijįʼ haadzííʼ dóó biʼaghaʼdaʼdiitʼaahii dóó ándahwiiʼaahii ałdóʼ.

3 Áádóó Alma dóó Amulek ałdóʼ deijoołá; háálá bąąhágiʼ adaatʼínígíí tʼáá bééhózínígo yee yikʼijįʼ haadzííʼ, dóó nahónitingo ndabidiʼdooltsxił.

4 Ákondi baa hoolzhiizh tʼáadoo ádaadzaaʼí da; ákondi deitsxił dóó tłʼóół ditsʼidígíí yee yeʼdaʼaztłǫ́ʼ, dóó kéyah biʼaláahdi anáhwiiʼaahii yidááh ndeizlooz.

5 Áádóó diné ákǫ́ǫ́ níjééh dóó yikʼijįʼ hadahaasdzííʼ—bee hazʼáanii dóó biʼaghaʼdaʼdiitʼaahii dóó kéyahdóó biʼándahwiiʼaahii, yikʼijįʼ haadzííʼ dadííniid, dóó diné tʼáá ałtso ákǫ́ǫ́ kéédahatʼínígíí ałdóʼ, dóó tʼááłʼáʼí Diyin God ałdóʼ dadííniid, dóó biYe diné bitahgóó iidoołʼaał, ákondi doo yisdéidoonił da; dóó ląʼí da diné Alma dóó Amulek yee yikʼijįʼ hadahaasdzííʼ áko díí éí kéyahdoo aláahdi ánahwiiʼaahii bidaahdóó ádadííniid.

6 Áádóó baa hoolzhiizh Zeezrom saad bee hadaʼíísdzíʼígíí yikee tsídoolyiz; dóó ániʼ doo yee daʼooʼínígíí ałdóʼ yaa ákónízin, éí diné yitahgóó saad yee yinaʼazloʼ; áádóó biiʼ sizíinii asiihígíí yaa ákoniizį́įʼgo bee bichʼįʼ nahwiiʼná silį́į́ʼ; aooʼ, chʼį́įdiitah bikʼeʼayeeʼ bináztʼiʼ silį́į́ʼ.

7 Áádóó baa hoolzhiizh diné yichʼįʼ dilwoshgo yaa nídiidzáh, kóníigo, Áko shooh, tʼáá shí ádíhodiishtʼiʼ, dóó díí hastóí Diyin God bidaahdóó chin bąąh ádaadin. Áádóó yáʼnáʼookąąhgo hahoolzhiizh; ákondi yikʼijįʼ hadaasdzííʼ, kódaaníigo: Daʼ biʼiiníziiniiísh nanihiloʼ? Áádóó yikʼi dahidiizhééʼ, dóó bitahdóó chʼídeiyistłʼííd, dóó tʼáá ałtso Alma dóó Amulek yee hahaasdzííʼ yę́ę deiyoosdląʼígíí ałdóʼ; dóó chʼídeiyistłʼííd, dóó hastóí hachʼįʼ adeesʼaʼgo tsé yee ndahwiineesneʼ.

8 Áádóó beʼzáanii dóó baʼáłchíní ałhandeiyizhʼeezh, áádóó tʼáá háíshį́į́ daʼoosdląąd doodago Diyin God bizaad bee ndabiʼdineestʼą́ą́hgo daʼoosdląądígíí éí tsídziʼ ádéiyistłʼííd, áádóó bindaʼasdzoh éí Diyin bizaad dílzingo bee akʼedaʼashchínígíí dabiyiʼę́ę, áádóó éí ałdóʼ tsídziʼ ádéiyistłʼééd, áko adadidookʼą́ą́ł dóó kǫʼ bee ádadooldįįł.

9 Áádóó baa hoolzhiizh Alma dóó Amulek, dahdeidiiʼeezh bidiʼdoolyééłjįʼ biʼdítʼeezh, áko kǫʼ bee adaabididooldííłígíí yidoołtsééł biniyé.

10 Áádóó Amulek sáanii dóó áłchíní tihdahoonííhgo kǫʼ bee ndabiʼdiltseedgo yiyiiłtsą́, bídóʼ yikʼee tiʼhoozniiʼ; dóó Alma íídííniid: Haaléítʼáo díí tiʼhooniih tʼóó nihinááł áhoonííł? Éí bąą bichʼįʼ dahdidiilnih, dóó Diyin God bibeʼadziilii nihiyiʼ hólóonígíí choidiilʼįįł, dóó dahnidinood bitsʼą́ą́dóó yisdádiinił.

11 Ákondi Alma abidííniid: Iiʼ Sizį́ Diyinii shigaan bee dahdideeshnihgo tʼą́ą́ʼ kóshósin; háálá áko shooh Bóhólníihii tʼáá bí adiłyahayizhʼeezh, ayóóʼátʼéii bee; dóó díí adeidoolííłgo yee hoołʼaʼ, doodago díí diné kódabidoolíłígíí, bijéí deistłʼisígíí bikʼehgo, áko báhachʼįʼgo yee yánáhodooʼáłígíí tʼáá ákogiʼ átʼéii doo, dóó tʼáá ákogi ádaaníiłii bidił yá daʼooʼíinii nilíigo bikʼihjįʼ ndadootʼááł, aooʼ, dóó nihoníyáadi yéego bikʼihjįʼ hadahidoodzih.

12 Áko Amulek Alma iidííniid: Áko shoosh, nihí daatsʼí ałdóʼ adanihidoołką́ą́ł?

13 Áádóó Alma ání: bíneʼdii Bóhólníihii iinízinígíí bikʼehgo áhoodooʼnííł. Ákondi, shooh, nihinaanish éí tʼah doo ałtso íílnééh da; éí bąą dóó adanihiʼdiʼdoolką́ą́ł da.

14 Áko baa hoolzhiizh bitsʼíís kǫʼ biih daheestłʼííd adahideezkʼą́ąʼgo, dóó haneʼ ndaháasdzoh bił adahaastłʼid yę́ę ałdóʼ, kéyahdóó aláahdi anahwiiʼaahii Alma dóó Amulek yaa níyá dóó yidaahdóó sizį́ʼ dóó yeʼaztłʼǫ́ dóó bilaʼ biniitsįʼgiʼ neidiiłtsʼin, áádóó íídííniid: Díí bikéédóó woołtsą́ągo, díí dinéʼísh nináádínóohtįįł, áko łeetsoii dookʼą́ą́ł dahsikaad biihidoołtłʼił.

15 Áko shooh, baa ákonoozį́į́ʼ shį́į́ kǫʼ biihdabiʼdiistłʼídígíí adziilii bee yisdádoohniłgo doo bínoołʼą́ą da; doodago daʼ Diyin God yisdáyínil háálá niheʼoodląʼjí daʼatahígíí biniinaa. Dóó bánahwiitʼaahii biniitsįʼ ninaanéidííłtsʼin, dóó ání: Haítʼáó ádahadoohdzih?

16 Áko díí ánahwiiʼaahii Nehorjí ádaʼoolʼįįł dóó daʼoodlą́ą́jí atah nilį́, éí Gideon yiyiisxį́.

17 Áádóó baa hoolzhiizh Alma dóó Amulek tʼáadoo yee yił hoolneʼé da; dóó nínáánéídíítsʼin, dóó awáalyah yá naazíinii yeeníʼeezh awáalyah iidoonił biniyé.

18 Áádóó tááʼ yiską́ awáalyah sikéego ląʼída aghadaʼdiitʼaahii, dóó ándahwiiʼaahii, dóó priest danilínígíí, dóó ndaʼnitiní, éí Nehor deiyoodlą́ągo yikééʼ deiyíkááh ńtʼę́ę́ʼ, dóó deidínóółʼįįłgo awáalyahdi baaheeskai, dóó saad łąʼída yíndaʼídééłkid; ákondi tʼáadoo haadzííʼ da.

19 Áádóó baa hoolzhiizh ándahwiiʼaahii bidááh deizįʼ, dóó ádaaní: Haʼátʼíí biniyé díí diné bindaʼídíkid doo baah hołneʼ da? Dooʼísh nihił bééhózin da kǫʼ danaanood biih nihideeshniłgo bee shóhólnííh? Áádóó haodziih yidííniid; ákondi tʼáadoo haadzííʼ da.

20 Áádóó baa hoolzhiizh ałtsʼá haaskai dóó daʼníłtsʼą́ąjigo dadahidikai ákondi biiskání ninááheeskai; dóó ánahwiiʼaahii biniitsʼįʼ yéígo nídéídííkaad. Áádóó ląʼída ałdóʼ yichʼįʼ nahaaskai, dóó ńdeidííłtsin, kódaaníigo: Daʼ náánéidoosįįł dóó díí diné báninááhoohʼááł, dóó nihibeehasʼáanii bikʼijįʼ hanáádoohdzih? Tsʼídá ayóó átʼáo nihidziilgo haʼátʼíí biniyé doo bee yisdáóʼaash da?

21 Áádóó ląʼída yee yichʼįʼ hadahaasdzííʼ, biwooʼ yikʼijįʼ ahídeiłkʼashgo, dóó yikʼi dahidiizheehgo, dóó kódaaníigo: Haish éí da niitʼée doo biʼiiníziiniitʼah yiikaigo?

22 Áádóó tʼáá ahayóí, aooʼ, tʼóó ahayóí ałʼąą átʼáo yee yichʼįʼ hadahaasdzííʼ; dóó yándahałtiʼgo ląʼí yiską́. Áádóó doo yadaʼółtsóód da dichin dooleeł, dóó tó dóʼ dooda dibááʼ dooleeł biniyé, dóó bíʼééʼ yighadeeznil tʼáá łichíí doo biniyé; áádóó tłʼóół ditsʼídígíí yee yedaʼaztłʼǫ́ dóó awáalya adeeznil.

23 Áádóó baa hoolzhiizh tiʼhoonííhgo ląʼí yiską́, (áádóó naakitsʼáadah yoołkááł, dóó neeznáágóó yiziłgo, dóó Nephi bidineʼé ándahwiiʼaahii yikʼidahéeʼaah neeznáá yiháh góneʼ) aláahdi ánahíiʼaahii Ammonihah bikéyahdi dóó ląʼí bándaʼnitiní dóó biʼaghadaʼdiitʼaahii awáalyahdi yíkai áadi Alma dóó Amulek tłʼóół bee beʼestłʼǫ́.

24 Áádóó aláahdi ánahwiiʼaahii bidááh yiizįʼ, dóó ninááyidííłtsʼin, dóó ííłní: Diyin God bibeʼadziilii nihee hólǫ́ǫgo díí tłʼóół náóhʼáád, dóó ákohgo índa daʼiidiidląął éí Bóhíolníihii díí diné íídoołdįįł bizaad bikʼehgo.

25 Áádóó baa hoolzhiizh tʼáá átʼé yeeyíkai dóó ndeidííłtsʼin, dóó tʼáá éí saad ánáádooʼniid, azhą́ tʼáá átʼé; dóó ałtso hachʼįʼ hadahaasdzííʼgo Diyin God bibeʼadziil Alma dóó Amulek bił hoolneʼ, áádóó dekódzaa dóó bikeeʼ yiyiizįʼ.

26 Áádóó Alma yéígo sodoolzingo, kóníígo haadzííʼ: Haanídzáagooʼísh ayóó átʼáo tiʼhiinííh doo, O Bóhólníihii? O Bóhólníihii, nihidziilgo ánihílééh Christ yiniidlánígíí bikʼehgo, azhą́ yisdánihiʼdeeniłjįʼ ndi; áko díí diné deiyiiłtsʼą́ągo, dadíneezhchʼą́ą́ʼ, háálá ábiʼdidooldįįł bibikʼidahooleʼ.

27 Áádóó baa hoolzhiizh ayóó átʼáo ndaadzidígíí biniinaa naaʼahineezdeeʼ, awáalyah bichʼeʼátin tʼáá bichʼįʼgi; dóó nahasdzʼáan bidziilgo hidiisnááʼ, dóó kin bee ályaayę́ę ałtsá haastǫʼ, áko niʼjįʼ nááłdááz; dóó aláahdi ánahwiiʼaahii, dóó aghaʼdadiitʼaahii, dóó priest, dóó ndaʼnitiní danilínígíí, Alma dóó Amulek atídabiilaayę́ę, kin bikʼinááłdzááz.

28 Áádóó Alma dóó Amulek awáalyahdééʼ chʼíníʼáázh, dóó tʼáadoo atídzaa da; háálá Bóhólníihii adziilii beenílá Christ yoodlánígíí bikʼehgo. Áádóó awáalyahdééʼ tʼáá hoshchʼį chʼíníʼáázh; dóó tłʼóół bee beʼastłʼónée náostʼah; dóó awáalyah yę́ę niʼjįʼ nááłdzááz, dóó tʼáá ałtso diné kin biyiʼyę́ę daneezná, tʼáá hazhoʼó Alma dóó Amulek éí tʼáadoo da; dóó tʼáá hoshchʼįʼ kintahjįʼ níʼáázh.

29 Áko diné ayóó átʼáo hodiiztsʼą́ągo tʼáá átʼé dadeikáago ndahaazjééʼ háálá hóótʼįįd daniizį́į́ʼgo; áádóó Alma dóó Amulek awáalyahdééʼ hááʼáázhgo deiyiłtsą́ągo, dóó kin niʼjįʼ nááłdzáazgo, ayóó átʼáo yikʼee ndaasdzííd, dóó Alma dóó Amulek yitsʼáádóó dadineezhchą́ą́ʼ, tłʼízí dóó biyázhi naaki náshdóítsoh bitsiiʼjįʼ dadiʼilígíí yitsʼą́ąjįʼ da néechééh nahalingo; áko kótʼáó Alma dóó Amulek yitsʼą́ą́dóó dadadínííchą́ą́ʼ.